Kinaemma​—Galad a Mangyeg iti Talna

Anian a makaay-ayo koma ti lubong no naemma amin a tao. Saanda koma nga agpipinnapilit, saan nga agririri dagiti miembro ti pamilia, saan nga agkikinnompetensia dagiti korporasion, ken saan nga agbibinnusor dagiti nasion. Kayatyo kadi ti agbiag iti kasta a lubong?

AGSAGSAGANA dagiti pudno nga adipen ni Jehova a Dios para iti baro a lubong nga inkarina, a ti kinaemma ket ibilangto ti amin a pagsayaatan ken paglaingan, saan a pagkapuyan. (2 Pedro 3:13) Kinapudnona, ikagkagumaanda ti agbalin a naemma uray ita. Apay? Daytoy ngamin ti kalikaguman ni Jehova kadakuada. Insurat ni Mikias a propetana: “Imbagana kenka, O naindagaan a tao, no ania ti naimbag. Ket ania ti kidkiddawen kenka ni Jehova no di ti panangwatwat iti kinahustisia ken panangayat iti kinamanangngaasi ken panagbalin a naemma iti pannakipagna iti Diosmo?”​—Mikias 6:8, NW.

Adu ti kayat a sawen ti kinaemma, kas iti di panagpasindayag, wenno di panagpalangguad, ken di panangipannakkel kadagiti abilidad, gapuanan, ken sanikua. Sigun iti maysa a reperensia, ti kinaemma kaipapananna met ti “panagtalinaed iti pagbeddengan.” Agtalinaed ti naemma a tao iti pagbeddengan ti nasayaat a kababalin. Bigbigenna met nga adda limitasion ti rumbeng ken kabaelanna nga aramiden. Ammona nga adda dagiti banag a dina pakaikarian. Awan duadua a magustuantayo dagiti naemma a tao. “Awanen ti ad-adda a makaay-ayo ngem ti napaypayso a kinaemma,” insurat ti Ingles a mannaniw a ni Joseph Addison.

Saan a nainkasigudan ti kinaemma kadagiti imperpekto a tattao. Masapul a pagreggetantayo a patanoren daytoy a galad. Naglaon ti Sao ti Dios iti sumagmamano a makaparegta a pasamak a mangyilustrar iti agduduma a pannakaiparangarang ti kinaemma.

Dua a Naemma nga Ari

Maysa ni David kadagiti kasusungduan nga adipen ni Jehova. Agtutubo pay laeng idi napulotan kas masanguanan nga ari ti Israel. Manipud idin, riniribuk ni Ari Saul ni David babaen ti pananggandatna a mangpapatay kenkuana, isut’ gapuna a nagbalin a pugante ni David.​—1 Samuel 16:1, 11-13; 19:9, 10; 26:2, 3.

Uray iti sidong dagita a kasasaad, ammo ni David a dina maaramid ti amin a kayatna tapno masalakniban ti biagna. Naminsan iti let-ang, saan a pinalubosan ni David ni Abisai a mangdangran ken Ari Saul a madama idi a matmaturog. Kinunana: “Narigat a pagarupen, iti biangko, manipud panangmatmat ni Jehova, nga iyunnatko ti imak maibusor iti pinulotan ni Jehova!” (1 Samuel 26:8-11, NW) Ammo ni David nga awan karbenganna a mangikkat ken Saul iti saadna kas ari. Impakita ngarud ni David ti kinaemma iti daytoy a gundaway babaen ti panagtalinaedna iti pagbeddengan ti umiso a kababalin. Umasping iti dayta, ammo dagiti adipen ti Dios iti moderno a panawen nga “iti panangmatmat ni Jehova,” adda dagiti banag a saanda a maaramid, uray no agpeggad ti biagda.​—Aramid 15:28, 29; 21:25.

Kas maysa nga agtutubo, imparangarang met ni Solomon nga anak ni Ari David ti kinaemma, nupay iti naiduma bassit a pamay-an. Idi naisaad nga ari ni Solomon, nariknana a dina kabaelan nga ibaklay ti nadagsen a rebbengen ti ari. Inkararagna: “O Jehova a Diosko, sika inaramidmo ti adipenmo iti saad ni David nga amana; ket maysaak nga ubing laeng; diak ammo no kasano ti iruruar wenno iseserrek.” Nalawag a binigbig ni Solomon a dina pay kabaelan ti agturay ken awan pay kapadasanna iti dayta. Naemma ngarud, saan a natangsit, wenno napalangguad. Dimmawat ni Solomon ken Jehova iti pannakaawat, ket napatgan ti kiddawna.​—1 Ar-ari 3:4-12.

Ti Mesias ken ti Nangisagana iti Dalanna

Nasurok a 1,000 a tawen kalpasan ti kaaldawan ni Solomon, insagana ni Juan a Mammautisar ti dalan ti Mesias. Kas nangisagana iti dalan ti Napulotan, tinungpal ni Juan ti padto ti Biblia. Mabalinna koma a pagpasindayag ti pribilehiona. Mabalin met koma ni Juan ti agpannakkel gapu ta kabagianna ti Mesias. Ngem kinuna ni Juan nga isu ket di maikari a mangwarwar la koma iti galut ti palloka ni Jesus. Ket idi agpabautisar ni Jesus idiay Karayan Jordan, kinuna ni Juan: “Siak ti agkasapulan ti panangbautisarmo, ket sika umayka kaniak?” Dayta ti mangipakita a naemma ni Juan, saan a napasindayag.​—Mateo 3:14; Malakias 4:5, 6; Lucas 1:13-17; Juan 1:26, 27.

Kalpasan ti pannakabautisar ni Jesus, inusarna ti amin a panawenna a nangikasaba iti naimbag a damag ti Pagarian ti Dios. Nupay maysa idi ni Jesus a perpekto a tao, kinunana: “Diak kabalinan nga aramiden ti maysa a banag iti bukodko a nakem . . . Sapulek, saan a ti bukodko a pagayatan, no di ket ti pagayatan daydiay nangibaon kaniak.” Maysa pay, saan a sinapul ni Jesus ti pammadayaw dagiti tattao, no di ket ni Jehova ti indaydayawna iti amin a gapuananna. (Juan 5:30, 41-44) Anian a kinaemma!

Nalawag ngarud a naemma dagiti nasungdo nga adipen ni Jehova​—kas kada David, Solomon, Juan a Mammautisar, ken uray ti perpekto a tao a ni Jesu-Kristo. Saanda a nagpannakkel, natangsit, wenno napalangguad, ken nagtalinaedda iti pagbeddengan ti umiso a kababalin. Ti ulidanda ket umdas a rason tapno patanoren ken iparangarang dagiti adipen ni Jehova iti moderno a panawen ti kinaemma. Ngem adda dadduma pay a rason iti panagbalin a naemma.

Iti daytoy nariribuk a panawen iti pakasaritaan ti tao, napateg unay kadagiti pudno a Kristiano ti kinaemma. Tulongannatay dayta a makikappia ken Jehova a Dios, kadagiti padatayo a tattao, ken maaddaan iti talna ti panunot.

Pannakikappia ken Jehova a Dios

Posible laeng ti makikappia ken Jehova no agtalinaedtayo iti pagbeddengan nga impasdekna maipaay iti pudno a panagdayaw. Limmabes dagiti immuna a nagannak kadatayo, da Adan ken Eva, iti pagbeddengan nga insaad ti Dios, ket isuda ti kaunaan a tattao a nagbalin a nakuspag. Napukawda ti nasayaat a takderda ken Jehova, agraman ti pagtaengan, ti masakbayan, ken ti biagda. (Genesis 3:1-5, 16-19) Anian a nagkas-ang ti nagbanaganda!

Agserbi koma a leksion kadatayo ti biddut a naaramid da Adan ken Eva, ta ti pudno a panagdayaw kednganna ti panagtignaytayo. Kas pagarigan, kuna ti Biblia a “dagiti mannakiabig, wenno dagiti managrukbab iti didiosen, wenno dagiti mannakikamalala, wenno dagiti lallaki a maipaay kadagiti di nainkasigudan a panggep, wenno dagiti lallaki a makikaidda kadagiti lallaki, wenno dagiti mannanakaw, wenno dagiti naagum a tattao, wenno dagiti managbarbartek, wenno dagiti manangrabngis, wenno dagiti manangkikil didanto tawiden ti pagarian ti Dios.” (1 Corinto 6:9, 10) Nainsiriban nga insaad ni Jehova dagitoy a pagbeddengan nga agpaay a pagimbagantayo, ket nainsiriban no ditay lumbes kadagitoy. (Isaias 48:17, 18) Kunaen kadatayo ti Proverbio 11:2: “Kadagiti napakumbaba [“naemma,” NW] adda ni sirib.”

Kasanon no ibaga kadatayo ti maysa a narelihiosuan nga organisasion a mabalintay ti lumbes kadagitoy a pagbeddengan ket kaskasdi nga anamongannatayo ti Dios? Al-allilawennatayo dayta nga organisasion. Iti sabali a bangir, ti kinaemma tulongannatayo a maaddaan iti nasinged a relasion ken Jehova a Dios.

Pannakikappia Kadagiti Dadduma

Ti kinaemma tulongannatayo met a makikappia kadagiti dadduma. Kas pagarigan, no kontento dagiti nagannak kadagiti kasapulanda ket ipangrunada dagiti naespirituan a banag, mabalin a kasta met ti panangmatmat dagiti annakda. Masursuro dagiti agtutubo ti agkontento, uray no saan a kanayon a mapatgan ti kayatda. Makatulong daytoy kadakuada nga agbiag a simple, ket agbalin a nataltalna ti biag ti pamiliada.

Ikagumaan koma dagiti manangaywan ti agbalin a naemma ket saanda nga abusuen ti autoridadda. Kas pagarigan, nabilin dagiti Kristiano: “Dikay lumbes kadagiti bambanag a naisurat.” (1 Corinto 4:6) Ammo dagiti panglakayen ti kongregasion a dida mabalin nga ipilit kadagiti dadduma ti kayatda. Aramatenda ketdi ti Sao ti Dios a pangibatayan iti panangisuroda no ania ti umiso maipapan iti kababalin, panagkawkawes, panaglanglanga, wenno panaglinglingay. (2 Timoteo 3:14-17) No makita dagiti kameng ti kongregasion a saan a lumlumbes dagiti panglakayen kadagiti Nainkasuratan a pagbeddengan, raemenda dagitoy a lallaki ket mataginayon ti nabara, naayat, ken natalna a kasasaad iti kongregasion.

Talna ti Panunot

Natalna ti panunot dagiti naemma. Saan nga ambisioso ti naemma a tao. Di kayat a sawen daytoy nga awan dagiti kalatna. Kas pagarigan, mabalin a tarigagayanna ti maaddaan kadagiti kanayonan a pribilehio iti serbisio, ngem agpannuray iti Dios, ket ni Jehova ti idaydayawna no maikkan kadagiti Nakristianuan a pribilehio. Saan a maibilang a personal a gapuanan dagita. Daytoy ti mamagsinged iti naemma a tao ken Jehova, “ti Dios ti talna.”​—Filipos 4:9.

Mabalin a mariknatayo sagpaminsan a maliwliwayandatayo dagiti dadduma. Saan kadi a nasaysayaat a maliwayandatayo gapu ta naemmatayo imbes a sikukuspag nga iturongtayo ti atension iti bagitayo? Saan nga agari ti ambision kadagiti naemma a tattao. Gapuna, natalna ti panunotda nga agpaay iti emosional ken pisikal a pagimbaganda.

Panangpatanor ken Panangtaginayon iti Kinaemma

Nagbalin a nakuspag da Adan ken Eva ket naipatawidda dayta a kababalin kadagiti annakda. Ania ti makatulong kadatayo tapno ditay maulit ti nagkamalian dagiti immuna a nagannak kadatayo? Kasanotay a mapatanor ti kinaemma, a maysa a nagsayaat a galad?

Umuna, makatulong kadatayo ti umiso a pannakaawat iti posisiontayo no idilig ken Jehova, ti Namarsua iti uniberso. Ania ti kaimudingan dagiti gapuanantayo no maikompara kadagiti gapuanan ti Dios? Insaludsod ni Jehova iti matalek nga adipenna a ni Job: “Sadino aya ti yanmo idi inkabilko dagiti pamuon ti daga? Ipalawagmo no adda pannakaawatmo.” (Job 38:4) Awan ti naisungbat ni Job. Saan kadi a limitado met ti pannakaammo, abilidad, ken kapadasantayo? Saan kadi a nasayaat a bigbigentayo ti limitasiontayo?

Kuna pay ti Biblia kadatayo: “Ti daga kukua ni Jehova, ken amin nga adda kenkuana; ti lubong, ken dagiti agnaed kenkuana.” Karaman ditoy ti ‘tunggal animal ti kabakiran, ken dagiti arban iti tapaw dagiti rinibu a turturod.’ Maikuna ni Jehova: “Ti pirak kukuak, ti balitok kukuak.” (Salmo 24:1; 50:10; Haggeo 2:8) Ania ti maiparangtayo a sanikua a mabalintay nga idilig iti sanikua ni Jehova? Kinapudnona, awan pamkuatan uray ti kabaknangan a tao a mangipannakkel iti sanikuana! Gapuna, nainsiriban a surotentayo ti naipaltiing a balakad ni apostol Pablo kadagiti Kristiano idiay Roma: “Babaen ti di kaikarian a kinamanangaasi a naited kaniak ibagak iti tunggal maysa kadakayo dita a dina panunoten nga ad-adda ti bagina ngem iti rebbengna a panangpanunot.”​—Roma 12:3.

Kas ad-adipen ti Dios nga agtarigagay nga agbalin a naemma, ikararagtayo dagiti bunga ti espiritu​—ayat, rag-o, talna, mabayag a panagitured, kinamanangaasi, kinaimbag, pammati, kinaalumamay, ken panagteppel. (Lucas 11:13; Galacia 5:22, 23) Apay? Agsipud ta nalaklaka para kadatayo ti agbalin a naemma no adda kadatayo ti tunggal maysa kadagitoy a galad. Kas pagarigan, ti ayat kadagiti padatayo a tattao tulongannatayo a mangparmek iti pagannayasan nga agpasindayag wenno agpalangguad. Ket ti panagteppel tulongannatayo a mangigawid iti bagitayo ken agpanunot sakbay nga agtignay a sikukuspag.

Agannadtayo! Nasken nga agaluadtayo a kanayon kadagiti palab-og ti kinakuspag. Adda dagiti tiempo a kimmuspag ti dua kadagiti ari a nadakamat itay. Sidadarasudos a pinabilang ni Ari David dagiti umili ti Israel a maikaniwas iti pagayatan ni Jehova. Kimmuspag ni Ari Solomon nga uray la nakiraman iti ulbod a panagdayaw.​—2 Samuel 24:1-10; 1 Ar-ari 11:1-13.

Agingga nga adda daytoy dakes a sistema ti bambanag, ti panagbalin a naemma kalikagumanna ti naynay a panagsalukag. Nupay kasta, makagunggona ti panangaramid iti dayta. Iti baro a lubong ti Dios, dagiti laeng naemma ti mangbukel iti kagimongan ti tao. Ibilangdanto a pagsayaatan, saan a pagkapuyan, ti kinaemma. Anian a nagsayaat inton maparaburan dagiti amin a tattao ken pamilia iti talna nga itden ti kinaemma!

[Ladawan iti panid 23]

Sieemma nga indaydayaw ni Jesus ni Jehova iti amin a gapuananna