Paliwliwa iti Bileg ni Jehova
“Iti kaadu dagiti pampanunotko itoy unegko dagiti pangliwliwam patalgedenda toy kararuak.”—SALMO 94:19.
KADAGITI amin nga agtarigagay iti liwliwa, adda pammaregta ti Biblia. Di ngarud pakasdaawan no apay a kuna ti The World Book Encyclopedia a “ti Biblia ti nagbaw-ingan ti adu a tattao maipaay iti liwliwa, namnama, ken pannarabay kadagiti tiempo ti riribuk ken panagduadua.” Apay?
Gapu ta ti Biblia ket impaltiing ti naayat a Namarsua kadatayo, “ti Dios ti amin a liwliwa,” Daydiay ‘mangliwliwa kadatayo iti amin a rigattayo.’ (2 Corinto 1:3, 4) Isu ‘ti Dios a mangipaay iti liwliwa.’ (Roma 15:5) Mapagulidanan ti panangipaay ni Jehova iti pamay-an a pakabang-arantayo amin. Imbaonna ditoy daga ti bugbugtong nga Anakna, ni Kristo-Jesus, tapno adda pangnamnamaan ken liwliwatayo. Insuro ni Jesus: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangalagad iti pammati kenkuana saan koma a madadael no di ket maaddaan iti agnanayon a biag.” (Juan 3:16) Deskribiren ti Biblia ni Jehova kas daydiay “inaldaw-aldaw a mangawit iti awittayo, wen, ti Dios isu ti salakantayo.” (Salmo 68:19) Addaan panagtalek a maikuna dagiti managbuteng-Dios a tattao: “Insaadko ni Jehova a kankanayon iti sanguanak: gapu ta adda iti makanawanko, saanakto a maan-ano.”—Salmo 16:8.
Ipakita dagita a teksto ti Biblia ti nauneg a panagayat ni Jehova a Dios kadatayo. Nalawag a sipapasnek a tarigagayan ken kabaelanna ti mangipaay kadatayo iti aglaplapusanan a liwliwa ken bang-ar kadagiti panawen ti pakadukotan. “Isu ti mangpapigsa iti nakapuy: ken iti daydiay awan ti kabaelanna isu pawadwadenna iti pigsa.” (Isaias 40:29) Kasanotay ngarud a maliwliwa iti bileg ni Jehova?
Ti Makapabang-ar a Pannakaseknan ni Jehova
Insurat ti salmista: “Iyallatiwmo ta awitmo ken Jehova, ket saranayennakanto: dinanto ipalubos a magaraw ti nalinteg.” (Salmo 55:22) Wen, maseknan ni Jehova a Dios kadagiti tattao. Impatalged ni apostol Pedro kadagiti Kristiano idi umuna a siglo: “Isu [ti Dios] maseknan kadakayo.” (1 Pedro 5:7) Impaganetget ni Jesu-Kristo ti panangipateg ti Dios kadagiti tattao idi kunana: “Saan kadi a ti lima a billit-tuleng mailako iti dua a sinsilio a bassit ti pategna? Kaskasdi awan uray maysa kadakuada ti malipatan iti sanguanan ti Dios. Ngem uray dagiti buok ti ul-uloyo nabilangda aminen. Dikay agbuteng; napatpategkayo ngem kadagiti adu a billit-tuleng.” (Lucas 12:6, 7) Napategtayo unay iti Dios ta maseknan uray kadagiti kababassitan a banag maipapan kadatayo. Ammona dagiti banag a ditay ammo a mismo gapu ta maseknan unay iti tunggal maysa kadatayo.
Naliwliwa unay ni Svetlana, ti agtutubo a balangkantis a nadakamat iti umuna nga artikulo, idi mariknana ti personal nga interes ni Jehova. Agpakamatay koman idi sakbay a naam-ammona dagiti Saksi ni Jehova. Nagpayadal iti Biblia ket naam-ammona ni Jehova kas pudpudno a persona a maseknan iti pagimbaganna. Natukay ti pusona isu a binalbaliwanna ti kabibiagna ket nagdedikar iti Dios. Narikna met ni Svetlana nga adda pay serbina. Kasapulanna dayta tapno makaandur iti laksid dagiti problemana ken maaddaan iti positibo a panangmatmat iti biag. Maikunana ita: “Masiguradok a dinakto pulos baybay-an ni Jehova. Napaneknekak a pudno ti naisurat iti 1 Pedro 5:7: ‘Iyallatiwyo [ken Jehova] amin a pakaringgoranyo, agsipud ta isu maseknan kadakayo.’”
Makaliwliwa ti Namnama a Naibatay iti Biblia
Maysa a pamay-an ti Dios a mangliwliwa ket babaen ti naisurat a Saona, a naglaon iti nakaskasdaaw a namnama iti masanguanan. Insurat ni apostol Pablo: “Amin dagiti bambanag a naisurat a nasaksakbay naisuratda a pakasursuruantayo, tapno babaen ti panagibturtayo ken babaen ti liwliwa manipud iti Kasuratan maaddaantay koma iti namnama.” (Roma 15:4) Imbatad ni Pablo ti panagnaig ti pudno a namnama ken liwliwa idi insuratna: “Ti Dios nga Amatayo, a nagayat kadatayo ken nangted iti agnanayon a liwliwa ken naimbag a namnama babaen ti di kaikarian a kinamanangaasi, mangliwliwa koma iti puspusoyo ken mangpatibker kadakayo iti tunggal naimbag nga aramid ken sao.” (2 Tesalonica 2:16, 17) Nairaman iti daytoy “naimbag a namnama” ti gundaway nga agbiag a perpekto, naragsak, ken agnanayon iti paraiso a daga.—2 Pedro 3:13.
Ti kasta a natalged ken naragsak a namnama ti nangpabileg ken Laimonis, ti alkoholiko a paralitiko a nadakamat iti immun-una nga artikulo. Iti panagbasbasana kadagiti naibatay-Biblia a literatura dagiti Saksi ni Jehova, naragsakan a nakaammo iti maipapan iti baro a lubong iti sidong ti Pagarian ti Dios, nga iti dayta maimbaganto a naan-anay ti sakitna. Nabasana iti Biblia daytoy naragsak a namnama maipapan iti namilagruan a panangpaimbag: “Iti kasta maluktanton dagiti mata ti bulsek, ken dagiti lapayag ti tuleng maluktandanto. Iti kasta aglagtonto ti pilay a kas maysa nga ugsa, ken ti dila ti umel agkantanto.” (Isaias 35:5, 6) Tapno maikari nga agbiag iti dayta a Paraiso, dakkel ti binalbaliwan ni Laimonis. Insardengna ti panaginumna iti arak. Nadlaw dagiti kaarruba ken gagayyemna ti panagbalbaliwna. Mangikonkondukta itan iti sumagmamano a panagadal iti Biblia, nga iranranudna iti sabsabali ti liwliwa nga itden ti naibatay-Biblia a namnama.
No Ania ti Maaramidan ti Kararag
No naladingit ti pusotayo, makaliwliwa ti panagkararag ken Jehova. Palag-anenna ti riknatayo. Bayat nga umar-ararawtayo, mabalin a maliwliwatayo no lagipentayo dagiti bambanag a nailanad iti Sao ti Dios. Kasla maysa a napintas a kararag ti kaatiddogan a salmo iti Biblia. Inkanta ti nangputar: “Linagipko dagiti pangngeddengmo idi ugma, O Jehova, ket naliwliwaak.” (Salmo 119:52) Masansan nga awan ti maymaysa a solusion a mangrisut kadagiti narikut unay a kasasaad, nangnangruna no mainaig iti panagsagaba ti salun-at. Nalabit a ditay ammo ti umno a pagpatulongantayo no agpannuraytayo iti bukodtay a pigsa. Kalpasan nga inaramidda ti amin a kabaelanda, napaneknekan ti adu a ti panagpatulong iti Dios babaen ti kararag ket mangyeg iti dakkel a liwliwa ken no dadduma, kadagiti di ninamnama a solusion.—1 Corinto 10:13.
Napasaran ni Pat ti kastoy a makaliwliwa nga epekto ti kararag idi isut’ naitaray iti emergency room ti maysa nga ospital. Idi naimbaganen, kinunana: “Nagkararagak ken Jehova ken nakitak a talaga a nasken nga italekko kenkuana ti biagko, nga aramidenna ti aniaman a pagayatanna. Kalmadoak kabayatan amin dagitoy; nariknak ti talna a naggapu iti Dios, a nadakamat iti Filipos 4:6, 7.” Anian a makaliwliwa dagitoy a sasao kadatayo amin! Balakadannatayo ni Pablo: “Dikay maringgoran iti aniaman, no di ket iti amin a banag babaen ti kararag ken araraw agraman panagyaman maipakaammo koma dagiti dawdawatyo iti Dios; ket ti talna ti Dios a mangringbaw iti amin a panunot aywanannanto dagiti pusoyo ken dagiti pannakabalin ti isipyo babaen ken Kristo Jesus.”
Ti Nasantuan nga Espiritu kas Manangliwliwa
Iti rabii sakbay ti ipapatayna, imbatad ni Jesus kadagiti apostolna a panawannanto idan. Nariribukan ken naladingitanda iti daytoy. (Juan 13:33, 36; 14:27-31) Gapu ta ammo ni Jesus a kasapulanda ti agtultuloy a liwliwa, inkarina: “Agkiddawakto iti Ama ket ikkannakayto iti sabali a katulongan [wenno, manangliwliwa] a maadda kadakayo iti agnanayon.” (Juan 14:16; footnote) Tuktukoyen ditoy ni Jesus ti nasantuan nga espiritu ti Dios. Malaksid iti dadduma a banag, liniwliwa ti espiritu ti Dios dagiti apostol kabayatan dagiti pannakasuotda ken pinabilegna ida nga agtultuloy a mangaramid iti pagayatan ti Dios.—Aramid 4:31.
Napagballigian ni Angie ti amin a dukot ken saem a napasaranna. Nagistay idi a natay ni lakayna kalpasan ti grabe nga aksidente. Ania ti nakatulong kenkuana? Kunana: “No awan ti saranay ti nasantuan nga espiritu ni Jehova, saanmi koma a nadaeran ti kasasaadmi ken dikam koma nakapagtalinaed a natibker. Nariknami ti pammabileg ni Jehova kabayatan ti panagkapsutmi, ken isut’ nagbalin a sarikedkedmi idi a madukotankami.”
Makaliwliwa a Panagkakabsat
Aniaman ti kasasaad iti biag ti maysa a tao ken adda man tumaud a narikut a kasasaad, makaliwliwa koma kenkuana ti panagkakabsat iti uneg ti kongregasion ni Jehova. Mangipaay daytoy a panagkakabsat iti naespirituan a suporta ken tulong kadagiti naitimpuyog iti dayta. Adda dita ti bunggoy dagiti naayat, manangipateg, ken makaliwliwa a gagayyem, a sidadaan ken situtulok a tumulong ken mangandingay iti sabsabali kadagiti panawen ti rigat.—2 Corinto 7:5-7.
Nasursuruan dagiti kameng ti kongregasion Kristiano a ‘mangaramid iti naimbag kadagiti isuamin, ngem nangnangruna kadagidiay nainaig [kadakuada] iti pammati.’ (Galacia 6:10) Tignayen ida ti pannursuro ti Biblia a mangiparangarang iti nainkabsatan nga ayat ken nadungngo a panangipateg iti maysa ken maysa. (Roma 12:10; 1 Pedro 3:8) Maidagadag kadagiti kabsat a lallaki ken babbai iti kongregasion nga agbalinda a naasi, makaliwliwa, ken nadungngo a mannakipagrikna.—Efeso 4:32.
Narikna da Joe ken Rebecca ti makaliwliwa a pannaranay dagiti kameng ti kongregasion Kristiano idi natay ti anakda. Kunada: “Tinulongannakami ni Jehova ken ti naayat a kongregasionna kabayatan ti naladingit a pagteng ti biagmi. Nakaawatkami iti ginasut a kard, surat, ken awag iti telepono. Naapresiarmi no kasano kapateg ti panagkakabsattayo. Bayat nga agpaspasanaangkami gapu iti ipapatay ti anakmi, immay simmaranay ti adu a lokal a kongregasion, a nangipaayda kadagiti taraon ken dinalusanda ti balaymi.”
Maliwliwakayo!
No mangrugi a sumuba ti napigsa nga angin ti didigra, ken bumayakabak ti di agsarday a pakarigatan, sisasagana ti Dios a mangipaay iti makaliwliwa a salaknib. Kastoy ti panangdeskribir kenkuana ti maysa kadagiti salmo kas manangipaay iti makaliwliwa a salinong: “Salukobannakanto kadagiti pawisna, ket iti salinong dagiti payakna agkamangkanto.” (Salmo 91:4) Mabalin a mailadawantayo ditoy ti maysa nga agila, tumatayab a mangsalukob kadagiti sibongna no makarikna iti peggad. Iti dakdakkel a kaipapananna, ni Jehova ti pudno a Mannalaknib iti amin nga agkamang kenkuana.—Salmo 7:1.
No kayatyo pay ti makaadal iti ad-adu maipapan iti Dios, iti personalidadna, iti pangpanggepna, ken iti pannakabalinna a mangipaay iti liwliwa, awisendakayo nga agadal iti Saona. Maragsakan dagiti Saksi ni Jehova a tumulong kadakayo a mangaramid iti dayta. Wen, mabalinyo met ti maliwliwa iti bileg ni Jehova!
[Dagiti Ladawan iti panid 7]
Makaliwliwa ti naibatay-Biblia a namnama iti masanguanan