Dakayo a Kristiano a Papastor, ‘Palawaenyo ti Pusoyo’!

“NI Jehova isu ti pastorko; awanto ti pagkurangak.” Kasta ti panangyebkas ni David iti naan-anay a panagtalekna iti Diosna. Iti naespirituan nga anag, isut’ inturong ni Jehova “kadagiti nalasbang a pagaraban” ken “iti sibay dagiti dandanum a natalna,” nga indalanna “kadagiti dandana ti kinalinteg.” Tinulongan ken pinaregta ni Jehova idi pinalawlawan dagiti bumusbusor. Gapuna, naikuna ni David ken Jehova: “Diakto agbuteng iti dakes; ta sikukuyogka kaniak.” Gapu ta adda kenkuana ti Katan-okan a Pastor, determinado ni David nga ‘agtaeng iti agnanayon iti balay ni Jehova.’​—Salmo 23:1-6.

Napasaran met ti bugbugtong nga Anak ti Dios ti naayat a panangaywan ni Jehova. Naan-anay a tinulad ni Jesus ti kastoy a panangaywan iti pannakilangenna kadagiti adalanna ditoy daga. Isut’ gapuna nga iti Kasuratan, naawagan kas “ti nasayaat a pastor,” ti “naindaklan a pastor,” ken “ti panguluen a pastor.”​—Juan 10:11; Hebreo 13:20; 1 Pedro 5:2-4.

Ipaspastoran ni Jehova ken ni Jesu-Kristo dagidiay agayat kadakuada. Maysa nga ebkas ti panangipastorda ti naayat a kaadda iti kongregasion dagiti papastor nga adda iti babaenda. Kinuna ni Pablo kadagiti kasta a papastor: “Asikasuenyo ti bagbagiyo ken ti isuamin nga arban, a kadakuada dinutokannakayo ti nasantuan nga espiritu kas manangaywan, tapno ipastoranyo ti kongregasion ti Dios, a ginatangna babaen ti dara ti bukodna nga Anak.”​—Aramid 20:28.

Saan a kaskarina ti panangipastor iti arban a maitunos iti padron nga impakita ni Jehova ken ni Kristo Jesus, ngem napatpateg dayta ita ngem idi. Panunotenyo dagiti nasurok a sangamilion a Saksi a nabautisaran iti las-ud ti napalabas a tallo a tawen! Awanan dagitoy a kabbaro iti naespirituan a kapadasan nga agtaud iti naunday a panagtrabaho. Ditay met liplipatan dagidiay ubbing wenno tin-edyer a Saksi. Masapulda ti panangasikaso dagiti papastor ti kongregasion malaksid kadagiti dadakkelda.

Kinapudnona, tunggal Kristiano masuot kadagiti panangparigat ti dadduma, kas iti panangpilit dagiti kapatadan. Masapultayo amin ti makidangadang tapno madaeran ti napigsa a panangallukoy ti napalamlam a pagannayasan ti lubong. Iti dadduma a pagilian, nalabit maupay dagiti agibumbunannag iti Pagarian gapu iti di panangipangag ti kaaduan iti mensaheda. Addaan nakaro a parikut iti salun-at ti adu nga agibumbunannag. Mabalin a mapukaw ti regget dagiti dadduma a mangyun-una iti Pagarian gapu kadagiti parikutda iti kuarta. Kinapudnona, amintayo​—agraman dagidiay nabayagen iti kinapudno​—ti makasapul ken maikari iti tulong ti naayat a papastor.

Umno a Pakatignayan

Nabagbagaan dagiti Kristiano idi umuna a siglo: ‘Palawaenyo ti pusoyo’! (2 Corinto 6:11-13) Nasayaat no suroten dagiti Kristiano a panglakayen daytoy a balakad iti panangasikasoda kadagiti annongenda kas papastor. Kasano? Ket dagiti met ngay ministerial nga adipen, nga adu kadakuada ti manamnama nga agbalinto a papastor?

Tapno pakabendisionan ti arban, masapul a matignay dagiti Kristiano a panglakayen saan laeng a gapu iti pannakariknada iti annongen. Mabalakadanda: “Ipastoranyo ti arban ti Dios nga adda iti aywanyo, di mapilpilit, no di ket situtulok; saan met nga iti panagayat iti nakusit a gunggona, no di ket sigagagar.” (1 Pedro 5:2) Ramanen ngarud ti epektibo a panangipastor ti situtulok ken sigagagar a panagserbi iti sabsabali. (Juan 21:15-17) Kaipapananna ti panangammo ken alisto a panangipaay iti kasapulan dagiti karnero. Kaipapananna ti panangiparangarang kadagiti nasayaat a Nakristianuan a galad a pagaammo kas bunga ti espiritu ti Dios iti pannakilangenda kadagiti dadduma.​—Galacia 5:22, 23.

No dadduma ramanen ti panangipastor ti panangsarungkar kadagiti kakabsat iti pagtaenganda.a Ngem dagiti pastor a ‘mangpalpalawa iti pusoda’ pagserbida ti bagida. Kayatna a sawen, saanda a basta sumarungkar sagpaminsan tapno mangipastor. Usarenda ti amin a gundaway a mangipastor kadagiti dadduma iti arban.

Panangsanay iti Dadduma nga Agbalin a Papastor

Aniaman ti edad ti asinoman a kabsat a lalaki, no “ragragpatenna ti akem a manangaywan . . . tartarigagayanna ti nasayaat nga aramid.” (1 Timoteo 3:1) Adu a ministerial nga ad-adipen ti nangiparangarang iti kinatulok a mangragpat kadagiti kanayonan a pribilehio. No kasta, maragsakan dagiti panglakayen a tumulong kadagitoy natudio a kakabsat a mangaramid iti daytoy napateg nga addang a ‘panangragpat iti akem a manangaywan.’ Kayat a sawen daytoy a masanayda tapno agbalindanto nga epektibo a papastor.

Gapu ta siiinget nga agtungtungpal kadagiti nangato a pagalagadan ti Dios, saan a napakapsut dagiti sinan-papastor ti Kristiano a kongregasion ni Jehova. Nadeskribir dagitoy a papastor idiay Ezequiel 34:2-6, a makaparurod ket maikarida a kasta iti imatang ni Jehova. Agbussogda imbes a taraonanda ti arban. Dida pinapigsa ti nakapsut, inagasan ti masakit, pinatapatan ti nablo, wenno binirok ti naiwawa wenno napukaw. Inrurumenda dagiti karnero. Ad-adda a kasda la lobo imbes a kas papastor. Nawarawara dagiti nabaybay-an a karnero. Agallaallada ta awan ti mangaywan kadakuada.​—Jeremias 23:1, 2; Nahum 3:18; Mateo 9:36.

Saan a kas kadagidi di matalek a papastor, sursuroten dagiti Kristiano a papastor ti ulidan ni Jehova. Tumulongda a mangiturong kadagiti karnero “kadagiti nalasbang a pagaraban” ken “iti sibay dagiti dandanum a natalna.” Ikagkagumaanda nga idalan dagiti karnero “kadagiti dandana ti kinalinteg” babaen ti panangtulongda kadakuada a maaddaan iti umiso a pannakaawat iti Sao ni Jehova ken mangyaplikar iti dayta. Siiepektibo a maaramidan daytoy dagiti panglakayen gapu ta “kualipikado[da] a mangisuro.”​—1 Timoteo 3:2.

Ad-adu ti gundaway dagiti panglakayen a mangisuro no addada iti plataporma bayat dagiti gimong ti kongregasion. Ngem mangisuroda met iti personal a pamay-an. Pudno a nasigsigo ti dadduma iti panangisuro iti indibidual, ngem ad-adda a nasagudayan ti dadduma iti panagpalawag. Kaskasdi, saan a madiskualipikar ti maysa a mannursuro gapu ta nakapkapuy iti maysa a benneg ti panangisuro. Mangisuro dagiti panglakayen, nga usarenda ti amin a gundaway a silulukat kadakuada, agraman ti panangipastor. Dadduma a panangipastor ti maaramid a pormal, kas pagarigan, iti organisado a panagsarungkar. Ngem adu a panangipastor ti maaramidan iti gagangay a wagas a makagunggona met unay.

Kanayon a Papastor ken Mannursuro

Masapul ti maysa a doktor ti pannakaammo ken kapadasan tapno maaramidna ti trabahona. Ngem apresiaren dagiti pasientena no isut’ naasi, mannakipagrikna, maseknan, ken pudno nga interesado kadakuada. Masapul nga agbalin a paset ti personalidadna dagitoy a galad. Masapul met a kasta ti inaldaw a personalidad ti maysa a naimbag a mannursuro ken pastor. Ti pudno a mannursuro nakasagana a mangisuro kadagiti dadduma no kasapulan. Kuna ti Proverbio 15:23: “Ti maysa a sao iti maitutop a tiempo, anian a nagsayaat!” Mabalin a “maitutop a tiempo” no isut’ agpalpalawag iti plataporma, no mangaskasaba iti binalaybalay, wenno no makipatpatang idiay Kingdom Hall wenno iti telepono. Kasta met, ikagkagumaan ti naimbag a pastor nga iparangarang dagiti nasayaat, naayat a kualidad iti amin a tiempo, saan laeng a no agsarsarungkar tapno mangipastor. Gapu ta ‘pinalawana ti pusona,’ usarenna ti amin a gundaway a mangipastor iti arban, nga itedna ti panangaywan a masapulda iti maitutop a tiempo. Daytoy ti mamagbalin kenkuana a napateg iti panangmatmat dagiti karnero.​—Marcos 10:43.

Malaglagip ni Wolfgang a maysan a panglakayen, ti panangsarungkar ti maysa a ministerial nga adipen ken ti baketna iti pamiliana. Kunana: “Naayatan unay dagiti annakmi gapu iti pannakaasikasoda ken ti makaay-ayo a panaglalangenmi. Sangkaestoriada pay la dayta.” Wen, impakita daytoy a ministerial nga adipen a maseknan, a ‘palpalawaenna ti pusona.’

Maysa pay a gundaway a ‘panangpalawa iti puso’ ti panagsarungkar, panagipatulod iti ababa a makaparegta a surat, wenno panagtelepono kadagiti masakit, wen, aniaman a mangiparikna kadakuada a maseknankayo! Itukonyo ti tulong no kasapulan. No kayatda ti makipatang, agimdengkayo a naimbag. Sawenyo dagiti positibo, nakaay-ayat a teokratiko nga aktibidad ti lokal a kongregasion ken iti sadinoman. Tulonganyo ida a mangpampanunot iti nadayag a masakbayan nga agur-uray kadagiti agayat ken Jehova.​—2 Corinto 4:16-18.

Kanayonan ti Panangipastor nga Isasarungkar

No panunoten ti panggep ti panangipastor, nalawag a napateg ti pormal a panagsarungkar kadagiti kakabsat iti pagtaenganda. Nupay kasta, saan la a dayta ti nairaman. ‘Palpalawaen [ti maysa a nadungngo a pastor] ti pusona’ no nalaka a maasitgan iti amin a kasasaad ken kanito. Ti nabara a relasionna kadagiti kakabsat ipatalgedna kadakuada nga awan rumbeng a pagbutnganda iti tiempo ti peggad, ta pagaammoda a maseknan kadakuada ti nadungngo a kabsatda a Kristiano a pastor.​—Salmo 23:4.

Wen, dakayo amin a Kristiano a papastor, ‘palawaenyo ti pusoyo.’ Ipakitayo ti napudno nga ayat kadagiti kakabsatyo. Paregtaen, bang-aran, ken pabilgenyo ida iti naespirituan iti amin a kabaelanyo. Tulonganyo ida a tumibker iti pammati. (Colosas 1:23) Saanto nga agkurang iti aniaman dagiti karnero gapu ta naparaburanda iti Kristiano a papastor a ‘mangpalpalawa iti pusoda.’ Determinadoda a kas ken David, nga agnaed iti balay ni Jehova iti amin nga al-aldaw. (Salmo 23:1, 6) Ania pay ti sapulen ti maysa a naayat a pastor?

[Footnote]

[Kahon iti panid 30]

Dagiti Kristiano a Papastor

• Agserbida a sigagagar ken situtulok

• Taraonan ken aywananda ti arban

• Tulonganda ti dadduma a mangragpat iti akem a kas papastor

• Sarungkaran ken aywananda dagiti masakit

• Kanayon nga alistoda a tumulong kadagiti kakabsatda

[Dagiti Ladawan iti panid 31]

Iti man tay-ak ti serbisio, kadagiti gimong, wenno iti sosial a taripnong, kanayon a papastor dagiti panglakayen