Maysaka Kadi a “Nataengan” a Kristiano?
“IDI ubingak, nagsasaoak a kas ubing, nagpanunotak a kas ubing, nagrasonak a kas ubing,” insurat ni apostol Pablo. Wen, nagubingtayo amin idi. Ngem ditay nagtalinaed a kasta lattan. Kinuna ni Pablo: “Ita ta nataenganakon, inidiakon dagiti kababalin ti maysa nga ubing.”—1 Corinto 13:11.
Umasping iti dayta, mangrugi nga ubbing iti naespirituan ti amin a Kristiano. Ngem inton agangay, ‘makagteng amin iti panagmaymaysa iti pammati ken iti umiso a pannakaammo iti Anak ti Dios, iti maysa a nataenganen a tao, iti rukod ti kinatayag ti kinanaan-anay ti Kristo.’ (Efeso 4:13) Kastoy ti pammagbaga kadatayo ti 1 Corinto 14:20: “Kakabsat, dikay agub-ubingan no kadagiti pannakabalin iti pannakaawat . . . Agbalinkayo a nataenganen iti pannakabalin ti pannakaawat.”
Bendision iti agdama nga ili ti Dios dagiti nataengan a Kristiano, nangnangruna ta nakaad-adu dagiti kabbaro. Nataltalged ti kongregasion no adda dagiti nataengan a Kristiano. Nasayaat ti impluensiada iti espiritu, wenno kababalin, ti aniaman a kongregasion a nakaikamenganda.
Nupay mabalin nga automatiko ti pisikal nga idadakkel, nasken ti panawen ken panagregget tapno agmataengan iti naespirituan. Saan a nakaskasdaaw nga adda dagiti Kristiano idi kaaldawan ni Pablo a di ‘nagregget a rumang-ay iti kina-nataengan,’ nupay nabayagen a nagserserbida iti Dios. (Hebreo 5:12; 6:1) Komustakayo met ngay? Nabayagkayo man nga agserserbi iti Dios wenno nabiit pay, rumbeng a sipupudno a sukimatenyo ti bagiyo. (2 Corinto 13:5) Maibilangkayo kadi kadagidiay maikari a maawagan a nataengan a Kristiano? No saan, kasanokayo nga agbalin a kas kadakuada?
“Nataenganen iti Pannakabalin ti Pannakaawat”
Ti ubing iti naespirituan ket nakalaklaka nga “iyallo-allon dagiti dalluyon ket iyalla-alla ditoy ken idiay ti tunggal angin ti sursuro babaen ti panangallilaw dagiti tattao, babaen ti kinasikap iti panangparnuay iti biddut.” Gapuna, indagadag ni Pablo: “Babaen ti ayat dumakkeltayo koma iti isuamin a bambanag kenkuana nga isu ti ulo, ni Kristo.” (Efeso 4:14, 15) Kasanotay a maaramid dayta? Kuna ti Hebreo 5:14: “Ti nakired a taraon agpaay kadagiti nataengan a tattao, kadagidiay a babaen iti panangusar nasanay dagiti pannakabalin ti pannakaawatda a mangilasin agpadpada iti umiso ken di umiso.”
Paliiwem ta dagiti nataengan a tattao nasanay dagiti pannakabalin ti pannakaawatda babaen ti panangusar, wenno panangyaplikar kadagiti prinsipio ti Biblia. Nalawag ngarud a saan nga apagdarikmat ti panagmataengan. Masapul ti naunday a tiempo tapno agmataengan iti naespirituan. Nupay kasta, ad-adda nga agmataengankayo iti naespirituan babaen ti personal a panagadal—nangnangruna iti naun-uneg a bambanag iti Sao ti Dios. Kadagiti kallabes a tiempo, sinalaysay ti Pagwanawanan ti adu a naririkut a suheto. Saan a liklikan dagiti nataengan a tattao ti kakasta nga artikulo gapu ta naglaon dagita iti “sumagmamano a bambanag a narigat a maawatan.” (2 Pedro 3:16) Sigagagarda ketdi nga ipauneg ti kasta a nakired a taraon!
Dagiti Naregta a Manangaskasaba ken Mannursuro
Binilin ni Jesus dagiti adalanna: “Inkayo ngarud ket mangaramidkayo kadagiti adalan a tattao iti isuamin a nasnasion, a bautisaranyo ida iti nagan ti Ama ken ti Anak ken ti nasantuan nga espiritu, nga isursuroyo kadakuada a tungpalenda dagiti isuamin a bambanag nga imbilinko kadakayo.” (Mateo 28:19, 20) Agmataengankayo met iti naespirituan no sireregta a mangasabakayo. Apay a dikay reggetan ti makiraman a naan-anay iti dayta kas ipalubos ti kasasaadyo?—Mateo 13:23.
No dadduma, narigat nga iwayaan ti panangasaba gapu kadagiti pakakumikoman iti biag. Ngem no “umagawakayo a sipipinget” kas manangaskasaba, ipakpakitayo ti panangipategyo iti “naimbag a damag.” (Lucas 13:24; Roma 1:16) Iti kasta, mabalin a matmatandakayo a ‘pagulidanan dagiti matalek.’—1 Timoteo 4:12.
Dagiti Manangsalimetmet iti Kinatarnaw
Karaman pay iti panagmataengan ti panangikagumaanyo nga agtalinaed a natarnaw. Kinuna ni David iti Salmo 26:1: “Ukomennak, O Jehova, ta nagnaak iti kinasingpetko.” Ti kinatarnaw ket kinadalus, kinanaan-anay iti moral. Nupay kasta, dina kaipapanan ti kinaperpekto. Saan la a naminsan a nagbasol iti nadagsen ni David. Ngem gapu ta inawatna ti pannubngar ket binalbaliwanna ti panagbiagna, impamatmatna nga adda pay la iti pusona ti pudpudno a panagayat ken Jehova a Dios. (Salmo 26:2, 3, 6, 8, 11) Ti kinatarnaw ramanenna ti naipamaysa, wenno naan-anay, a naimpusuan a debosion. Imbilin ni David ken anakna a Solomon: “Ammuem ti Dios ni amam, ken agserbika kenkuana a buyogen ti maysa a puso a sipapalungdo.”—1 Cronicas 28:9.
Paset ti panangsalimetmet iti kinatarnaw ti panagbalin a “saan a paset ti lubong,” a di makiraman iti politika ken panaggugubat dagiti nasion. (Juan 17:16) Masapul met nga idianyo dagiti dakes nga aramid, kas iti pannakiabig, pannakikamalala, ken panagdroga. (Galacia 5:19-21) Ngem saan laeng a ti panangliklik kadagita ti kayat a sawen ti panagtalinaed a natarnaw. Imballaag ni Solomon: “Dagiti natay a ngilngilaw pataudenna iti dakes nga angot iti lana ti agaramid iti bangbanglo; kasta ti bassit a kinamaag nadagdagsen ngem ti sirib ken dayaw.” (Eclesiastes 10:1) Wen, uray “ti bassit a kinamaag,” a kas iti naalas a panagang-angaw wenno panagalembong iti kasungani a sekso, perdienna ti reputasion ti tao nga addaan iti “sirib.” (Job 31:1) Iparangarangyo ngarud a nataengankayo babaen ti panangikagumaanyo nga agbalin a mapagwadan iti amin a kababalinyo, nga idian uray ti “kita ti dakes.”—1 Tesalonica 5:22, King James Version.
Dagiti Nasungdo
Nasungdo met ti maysa nataengan a Kristiano. Bagbagaan ni apostol Pablo dagiti Kristiano kas mabasatayo iti Efeso 4:24: “Ikawesyo koma ti baro a personalidad a naparsua maitunos iti pagayatan ti Dios iti pudno a kinalinteg ken kinasungdo.” Iti Griego a Kasuratan, ti sao iti orihinal a lenguahe para iti “kinasungdo” ket kaipapananna ti kinadalus, kinalinteg, kinadayaw. Ti tao a nasungdo ket debosionado, napasnek; siaannad a tungtungpalenna amin nga annongenna iti Dios.
Ania ti nadumaduma a pamay-an a mapatanoryo ti kasta a kinasungdo? Ti maysa isu ti pannakitunos kadagiti panglakayen iti kongregasionyo. (Hebreo 13:17) Bigbigen dagiti nataengan a Kristiano a ni Kristo ti nadutokan nga Ulo ti kongregasion Kristiano. Gapuna, nasungdoda kadagidiay nadutokan ‘tapno mangipastor iti kongregasion ti Dios.’ (Aramid 20:28) Anian a di umiso a pagduaduaan wenno umsien ti autoridad dagiti nadutokan a panglakayen! Nasungdokayo met koma iti “matalek ken masirib nga adipen” ken kadagiti ahensia a nairanta a mangipaay iti naespirituan a ‘taraon iti umiso a tiempo.’ (Mateo 24:45) Alistokayo koma a mangbasa ken mangyaplikar iti impormasion a linaon ti Pagwanawanan ken dagiti kaduana a publikasion.
Panagayat Babaen Dagiti Aramidyo
Kastoy ti insurat ni Pablo kadagiti Kristiano idiay Tesalonica: “Ti ayat ti tunggal maysa ken dakayo amin rumangrang-ay iti maysa ken maysa.” (2 Tesalonica 1:3) Ti panangparayray ti ayat ket nasken unay nga aspeto iti naespirituan a panagmataengan. Kas nairekord iti Juan 13:35, kinuna ni Jesus: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.” Saan a basta emosion wenno rikna ti pakakitaan ti kasta a nainkabsatan nga ayat. Kuna ti Vine’s Expository Dictionary of Old and New Testament Words: “Marikna laeng ti ayat babaen kadagiti aramid a pataudenna.” Wen, agtultuloykayo nga agmataengan iti daytoy a banag no mabuyogan iti aramid ti ayatyo!
Kas pagarigan, mabasatayo iti Roma 15:7: “Abrasaenyo ti maysa ken maysa.” Maysa a pamay-an ti panangipakita iti ayat isu ti nabara ken naragsak a panangkablaawyo kadagiti kapammatianyo ken kabbaro kadagiti gimong ti kongregasion! Makiam-ammokayo a personal kadakuada. Ipakitayo ti “personal a panaginteres” kadagiti dadduma. (Filipos 2:4) Nalabit mabalinyo pay nga ipakita ti kinamanagpadagus ket awisenyo ti dadduma iti pagtaenganyo. (Aramid 16:14, 15) No maminsan, masuot ti kadakkel ti ayatyo babaen kadagiti pagkapuyan ti sabsabali. Ngem maiparangarang nga agmatmataengankayo no sursuruenyo nga ‘anusan ida iti ayat.’—Efeso 4:2.
Panangusar Kadagiti Sanikuatayo a Mangitandudo iti Nadalus a Panagdayaw
Idi un-unana, saan a tinungpal ti amin a tattao ti Dios ti responsabilidadda a mangsuporta iti templo ni Jehova. Isu nga imbaon ti Dios dagiti mammadto, a kas kada Haggeo ken Malakias, tapno paregtaenda dagiti tattaona iti daytoy a banag. (Haggeo 1:2-6; Malakias 3:10) Siraragsak dagiti nataengan a Kristiano ita a mangusar kadagiti sanikuada a pangsuporta iti panagdayaw ken Jehova. Tuladenyo ida babaen ti panangsurot iti prinsipio ti 1 Corinto 16:1, 2, a kanayon a ‘mangilasin koma iti aniaman’ a kontribusion agpaay iti kongregasion ken iti sangalubongan a trabaho dagiti Saksi ni Jehova. Ipanamnama ti Sao ti Dios: “Ti agmula a siwawadwad aganinto met a siwawadwad.”—2 Corinto 9:6.
Diyo liplipatan ti dadduma nga ik-ikutanyo, a kas iti tiempo ken pigsayo. ‘Pagreggetanyo a gatangen ti tiempo’ kadagiti di unay napateg nga ar-aramid. (Efeso 5:15, 16; Filipos 1:10) Adalenyo ti mas epektibo a panangusar iti tiempoyo. Iti kasta, masaparanyo ti makiraman kadagiti proyekto a panangmantener iti Kingdom Hall ken dadduma pay nga umarngi nga aktibidad a mangitandudo iti panagdayaw ken Jehova. Ad-adda a mapatalgedan nga agmatmataengankayon kas Kristiano no usarenyo dagiti sanikuayo iti kastoy a wagas.
Itultuloyyo ti Agmataengan!
Pudno a dakkel a bendision dagiti lallaki ken babbai a nagaget nga agadal ken aduan ti pannakaammo, naregta a manangaskasaba, awan pakapilawan ti kinatarnawda, nasungdo ken naayat, ken situtulok a mangted iti pisikal ken material a tulong iti trabaho ti Pagarian. Saan ngarud a nakaskasdaaw nga imbalakad ni apostol Pablo: “Ita ta binaybay-antayon ti pagdamdamuan a doktrina maipapan ken Kristo, agreggettayo koma a rumang-ay iti kina-nataengan”!—Hebreo 6:1.
Maysakayo kadi a nataengan a Kristiano? Wenno agubing-ubingkayo pay la iti naespirituan, no dadduma? (Hebreo 5:13) Aniaman kadagita, determinadokayo koma a mangigaed iti personal a panagadal, panangasaba, ken panangipakita iti ayat kadagiti kakabsatyo. Awatenyo ti aniaman a balakad wenno pannubngar dagiti nataengan a kakabsat. (Proverbio 8: 33) Ibaklayyo ti amin a responsabilidadyo kas Kristiano. Inton agangay ken buyogen iti panagregget, ‘makagtengkayo [met] iti panagmaymaysa iti pammati ken iti umiso a pannakaammo iti Anak ti Dios, iti maysa a nataenganen a tao, iti rukod ti kinatayag ti kinanaan-anay ti Kristo.’—Efeso 4:13.
[Blurb iti panid 27]
Nataltalged ti kongregasion no adda dagiti nataengan a Kristiano. Nasayaat ti impluensiada iti espiritu, wenno kababalin, ti kongregasion
[Dagiti Ladawan iti panid 29]
Makatulong dagiti nataengan iti espiritu ti kongregasion babaen ti panaginteres iti dadduma