No Kasanokayo a Makaadani iti Dios

“Umadanikayo iti Dios, ket isu umadaninto kadakayo,” kuna ti Santiago 4:8. Kas pammaneknek a kayatna a nasinged dagiti tattao kenkuana, impaay ni Jehova a Dios ti Anakna para kadatayo.

KAS subad dayta naayat a tignay, insurat ni apostol Juan: “Agayattayo [iti Dios], agsipud ta immuna nga inayatnatayo.” (1 Juan 4:19) Ngem tapno sumingedtayo iti Dios kas indibidual, adda dagiti addang a masapul nga aramidentayo. Umarngi dagitoy iti uppat a pamay-an a sumingedtayo kadagiti pada a tao, kas naibinsabinsa iti immuna nga artikulo. Usigentayo dagitoy.

Ammuenyo Dagiti Nakaskasdaaw a Galad ti Dios

Adu ti nakaskasdaaw a galad ti Dios, kangrunaan kadagitoy ti ayat, sirib, kinahustisia, ken pannakabalinna. Adu ti pakakitaan iti sirib ken pannakabalinna agpadpada iti adayo a law-ang ken iti lubong a pagnanaedantayo, manipud iti nagdadakkel a galaksi agingga iti babassit-usit nga atomo. Insurat ti salmista: “Dagiti langlangit ipalawagda ti dayag ti Dios; ket ti law-ang ipakitana ti aramid ti imana.”​—Salmo 19:1; Roma 1:20.

Ti sangaparsuaan iyanninawna met ti ayat ti Dios. Kas pagarigan, ti pannakasukogtayo ipasimudaagna a pagayatan ti Dios a tagiragsakentayo ti biag. Inaramidnatayo a makailasin kadagiti kolor, makaraman ken makaangot, maayatan iti musika, agkatawa, maay-ayo iti kinapintas, ken pinaraburannatayo iti nakaad-adu pay nga abilidad ken galad a saan unay a nasken iti biag. Wen, ti Dios ket talaga a naparabur, naasi, ken naayat​—dagiti galad nga awan duadua a mamagbalin kenkuana a kas “ti naragsak a Dios.”​—1 Timoteo 1:11; Aramid 20:35.

Agrag-o ni Jehova iti kinapudno a ti panangipakatna iti kinasoberanona ken ti panangsuporta iti dayta dagiti nasaririt a parsuana ket naibatay kangrunaanna iti ayat. (1 Juan 4:8) Nupay ni Jehova ti Sapasap a Soberano, tratuenna dagiti tattao, nangruna dagiti nasungdo nga adipenna, kas iti panangtrato ti naayat nga ama iti annakna. (Mateo 5:45) Awan ipaidamna a pagimbaganda. (Roma 8:38, 39) Kas nadakamaten, uray la nga impaayna ti biag ti bugbugtong nga Anakna para kadatayo. Wen, ti ayat ti Dios ti gapu a sibibiagtayo ken addaan namnama nga agbiag iti agnanayon.​—Juan 3:16.

Inikkannatayo ni Jesus iti nauneg a pannakaawat iti personalidad ti Dios gapu ta naan-anay ti panangtuladna ken Amana. (Juan 14:9-11) Isu ket naparabur unay, naanus, ken mannakaawat. Naminsan, inyegda ken Jesus ti maysa a lalaki a tuleng ken adda depekto ti panagsaona. Mabalin nga alusiisen ti lalaki iti nagtetengngaan ti adu a tao. Makapainteres ta inyadayo ni Jesus daytoy a lalaki iti napakni a lugar sana pinaimbag. (Marcos 7:32-35) Apresiarenyo kadi dagiti tattao a mannakipagrikna ken mangraem iti dignidadyo? No kasta, sigurado nga ad-adda a sumingedkayo ken ni Jehova ken ni Jesus bayat nga umad-adu ti maammuanyo maipapan kadakuada.

Utobenyo Dagiti Galad ti Dios

Mabalin nga adu ti naisalsalumina a galad ti maysa a tao, ngem masapul a panunotentayo dayta a tao tapno maallukoytayo kenkuana. Kasta met ken Jehova. Ti panangmennamenna kadagiti galadna ti maikadua a napateg a pamay-an iti iyaadani kenkuana. Ni Ari David ket maysa a lalaki a napudno ti panagayatna ken Jehova ken ‘mayannugot iti puso [ni Jehova].’ Kinunana: “Malagipko dagiti aldaw idi ugma; pampanunotek amin dagiti ar-aramidmo; is-isipek ti aramid dagiti im-imam.”​—Aramid 13:22; Salmo 143:5.

No matmatanyo dagiti nakaskasdaaw a parsua wenno basaenyo ti Biblia a Sao ti Dios, pampanunotenyo kadi dagita, a kas ken David? Usigenyo ti maysa nga anak a kaaw-awatna ti surat ti dungdunguenna unay nga ama. Ania ngata ti aramidenna iti dayta a surat? Sigurado a saanna a basta palabsan ti linaon dayta sana idulinen a dagus iti uuyosan. Imbes ketdi, adalenna sana amirisen ti amin a detalye ken kababagas dayta. Kasta met koma ti panangipategtayo iti Sao ti Dios, a kas iti salmista a nangikanta: “O anian a panangayatko iti lintegmo! Isu ti imutektekak nga agmalmalem.”​—Salmo 119:97.

Taginayonen ti Nasayaat a Komunikasion

Ti nasayaat a komunikasion taginayonenna ti aniaman a relasion. Ramanen dayta ti panagsao ken panagimdeng​—saan laeng a babaen ti isip no di pay ket ti puso. Makisaotayo iti Namarsua babaen ti kararag, ti nadayaw ken direkta a pannakikomunikar iti Dios. Maay-ayo ni Jehova iti kararag dagiti agayat ken agserbi kenkuana ken mangbigbig ken Jesu-Kristo kas kangrunaan a pannakabagina.​—Salmo 65:2; Juan 14:6, 14.

Idi unana, nagsao ti Dios kadagiti tattao iti nadumaduma a wagas, kas kadagiti sirmata, tagtagainep, ken babaen dagiti anghel. Ngem agsasao itatta babaen ti naisurat a Saona, ti Nasantuan a Biblia. (2 Timoteo 3:16) Adu ti bentaha ti naisurat a Sao. Mabalin a pagkonsultaan iti aniaman a kanito. Mabalin dayta nga ulit-uliten a kas iti maysa a surat. Ken saan a nalaka a maballikug, a kadawyan iti berbal a panagestoria. Gapuna, ibilangyo ti Biblia a kas maysa a dakkel a koleksion dagiti surat a naggapu iti naayat a nailangitan nga Amayo, ken palubosanyo nga agsao kadakayo iti inaldaw babaen kadagitoy a surat.​—Mateo 4:4.

Kas pagarigan, ipakita ti Biblia ti pagalagadan ni Jehova maipapan iti umiso ken di umiso. Ilawlawagna ti panggepna para iti sangatauan ken iti daga. Ken ipakitana ti pannakilangenna iti nadumaduma a tattao ken nasnasion, nasungdo man a managdaydayaw wenno napeklan a kabusor. Kadagitoy nga impailanadna a pannakilangenna iti tattao, impaayannatayo ni Jehova iti naisalsalumina ken detalyado a panangiladawan iti personalidadna. Ipanayagna ti ayat, rag-o, panagladingit, pannakadismaya, panagpungtot, asi, pannakaseknanna​—wen, ti nadumaduma a kapanunotan ken rikriknana, agraman dagiti makagapu kadagitoy​—iti wagas a nalaka a matarusan ti tattao.​—Salmo 78:3-7.

Kasanokayo a mabenepisiaran kalpasan a mabasayo ti maysa a paset ti Sao ti Dios? Ken kasanokayo a nangnangruna a suminged iti Dios? Umuna, utoben dagiti nabasa ken naammuanyo maipapan iti personalidad ti Dios, ket ipapusoyo dagita. Kalpasanna, ikararag ken Jehova ti pampanunoten ken rikriknayo maipapan iti naadalyo ken no ania ti aramiden tapno magunggonaankayo iti dayta. Pannakikomunikar dayta. Siempre, mabalinyo met nga ikararag ti dadduma pay a pampanunotenyo.

Iramanyo ti Dios iti Aramidenyo

Saritaen ti Biblia ti maipapan iti sumagmamano a matalek a lallaki idi unana a nakipagna iti pudno a Dios. (Genesis 6:9; 1 Ar-ari 8: 25) Ania ti kaipapanan dayta? Kaawatan a nagbiagda nga inaldaw a kasla adda a mismo ti Dios iti sibayda. Pudno a managbasolda, ngem impategda dagiti linteg ken prinsipio ti Dios, ken nagbiagda a maitunos iti panggep ti Dios. Naay-ayoda ni Jehova ket inaywananna ida, kas ipakita ti Salmo 32:8: “Iwardaskanto ket isurokanto iti dalan a pagnaemto: balakadankanto a sisisiput toy matak kenka.”

Magayyemyo met ni Jehova​—a nasinged a makipagna, mangtarabay, ken mangbalakad kadakayo a kas iti maysa nga ama. Dineskribir ni propeta Isaias ni Jehova a kas “Daydiay mangisursuro kenka tapno magunggonaam ti bagim, Daydiay mangpappapagna kenka iti dalan a rebbeng a pagnaam.” (Isaias 48:17, NW) Bayat a masagraptayo dagitoy a bendision, mariknatayo ti kaadda ni Jehova “iti makanawan[tayo],” no iyar-arig, a kas idi ken David.​—Salmo 16:8.

Nagan ti Dios​—Ti Nakagupgopan Dagiti Galadna

Adu dagiti relihion ken umad-adu dagiti patarus ti Biblia a saan a mangus-usar ken mangipakpakaammo iti personal a nagan ti Dios. (Salmo 83:18) Kaskasdi, ti nagan a Jehova ket agarup 7,000 a daras nga agparang iti orihinal a Hebreo a manuskrito! (Iti kasupadina, inikkat ti kaaduan a managipatarus iti Biblia ti nagan ti Dios, ngem tinaginayonda dagiti nagan ti adu a didiosen a nadakamat iti orihinal a manuskrito, kas ken Baal, Bel, Merodac, ken uray ni Satanas!)

Ipapan ti dadduma a tattao nga awan balena ti di panangusar iti nagan ti Dios. Ngem panunotenyo: Narigrigat kadi wenno nalaklaka ti maaddaan iti nadekket, nasin-aw a pannakirelasion iti maysa nga awan naganna? Dagiti titulo a kas iti Dios ken Apo (a mayawag met iti didiosen) nalabit ipabigbigda ti pannakabalin, autoridad, wenno saad ni Jehova, ngem ti laeng personal a naganna ti naan-anay a pakabigbiganna. (Exodo 3:15; 1 Corinto 8:5, 6) Ti personal a nagan ti pudno a Dios itakderanna dagiti kalidad ken galadna. Pudno ti kinuna ti teologo a ni Walter Lowrie: “Ti tao a saan a makaammo iti nagan ti Dios saanna a talaga nga am-ammo ti Dios.”

Alaenyo a pagarigan ni Maria, maysa a napasnek a Katoliko a taga Australia. Idi damo a makasaritana dagiti Saksi ni Jehova, pinalubosan ni Maria nga ipakitada kenkuana ti nagan ti Dios iti Biblia. Ania ti reaksionna? “Nakasangitak idi damo a makitak ti nagan ti Dios iti Biblia. Natukay unay ti riknak iti pannakaammok a mabalinko nga ammuen ken usaren ti personal a nagan ti Dios.” Intultuloy ni Maria nga inadal ti Biblia, ket iti umuna a gundaway iti biagna, naammuanna no siasino a talaga ni Jehova ken naaddaan iti manayon a relasion kenkuana.

Wen, ‘makaadanitayo iti Dios,’ nupay ditay makita kadagiti literal a matatayo. “Makitatayo” ti nakadadaeg a personalidadna babaen ti panunot ken pusotayo ket iti kasta, rumayray ti panagayattayo kenkuana. Ti kasta nga ayat “ti naan-anay a singgalut ti panagkaykaysa.”​—Colosas 3:14.

[Kahon/Ladawan iti panid 6]

Subadan ni Jehova ti Ayatyo Kenkuana

ADDA agsumbangir a dasig ti maysa a relasion. No umadanitayo iti Dios, tutopanna dayta babaen ti iyaadanina kadatayo. Usigenyo ti panangtratona iti lakay a ni Simeon ken iti baket a ni Anna, nga agpada a naisangsangayan a nadakamat iti Biblia. Ni Lucas a nagsurat iti Ebanghelio saritaenna kadatayo a ni Simeon a mangpadpadaan iti Mesias ket “nalinteg ken managdayaw.” Nakita ni Jehova dagitoy a nasayaat a galad ni Simeon ket imparangarangna ti ayatna iti daytoy maipatpateg a lakay babaen ti panangipalgakna kenkuana a “dinanto [ni Simeon] makita ni patay sakbay a makitana ti Kristo.” Tinungpal ni Jehova ti karina ket inturongna ni Simeon ken maladaga a Jesus, nga inkuyog dagiti nagannak kenkuana idiay templo sadi Jerusalem. Siraragsak ken napnuan panagyaman a sinakruy ni Simeon ti maladaga sa nagkararag: “Ita, Soberano nga Apo, palpalubosamon ti adipenmo a mapan a siwayawaya a sitatalna sigun iti deklarasionmo; agsipud ta dagiti matak nakitadan ti wagas a panangisalakanmo.”​—Lucas 2:25-35.

“Iti dayta met laeng nga oras,” impakita met ni Jehova ti ayatna iti 84 ti tawenna a ni Anna babaen ti panangiturongna kenkuana ken Jesus. Saritaen kadatayo ti Biblia nga adda a kanayon idiay templo daytoy napateg a balo “a mangipapaay iti sagrado a panagserbi” ken Jehova. Kas ken Simeon, napnuan panangapresiar a nagyaman iti naisalsalumina a kinaimbag ni Jehova, sa nagsao maipanggep iti ubing “kadagidiay amin nga agur-uray iti pannakaispal ti Jerusalem.”​—Lucas 2:36-38.

Wen, nakita ni Jehova ti napalaus a panagayat ken panagbuteng da Simeon ken Anna kenkuana ken ti kasta unay a pannakaseknanda iti pannakaibanag ti panggepna. Dinakay kadi iyadani ken Jehova dagita a salaysay ti Biblia?

Kas ken Amana, ammo met ni Jesus ti agpaypayso a makin-uneg a kinatao. Idi mangisursuro idiay templo, napaliiwna ti maysa a “marigrigat a balo” a nangidonar laeng iti “dua a babassit a sinsilio a bassit unay ti pategna.” Saan a kas ken Jesus, imbilang ti dadduma a nakapaliiw a nanumo daydi a sagut ti balo. Pinadayawan ni Jesus daydi a baket gapu ta intedna ti amin nga adda kenkuana. (Lucas 21:1-4) Manamnamatayo ngarud nga ipategnatay ni Jehova ken ni Jesus no ipaaytayo kadakuada ti kasayaatan, dakkel man wenno bassit ti saguttayo.

Maragsakan ti Dios kadagidiay agayat kenkuana ngem maladingitan no sumina dagiti tattao kenkuana sada agaramid iti dakes. Saritaen kadatayo ti Genesis 6:6 a ‘napasennaay ti puso’ ni Jehova gapu iti kinadakes ti sangatauan sakbay ti Layus idi kaaldawan ni Noe. Kalpasanna, dagiti nasukir nga Israelita maulit-ulit a ‘sinuotda ti Dios, ken pinaungetda ti Santo ti Israel,’ kuna ti Salmo 78:41. Wen, ti Dios ket saan a managbukbukod, awanan rikna a “Namarsua.” Isu ket pudpudno a persona nga addaan nasimbeng wenno perpekto a rikrikna, a maisupadi kadatayo.

[Dagiti Ladawan iti panid 7]

Ti panangutob kadagiti pinarsua ni Jehova ket maysa a pamay-an a sumingedtayo kenkuana