Apay a Patanorenyo ti Kinatakneng?

NABIIT pay nga immakar idiay Estados Unidos ti agkabannuag a Hapones nga agnagan iti Kunihito.a Sumagmamano a lawas kalpasan ti idadatengna iti dayta a pagilian, naipasango iti maysa a situasion a namagpeggad iti propesionna. Kuna ni Kunihito: “Idi intukon ti amok ti maysa a trabaho, natalged unay ti riknak a mangawat iti dayta. Ngem gapu ta naimula kaniak sipud pay kinaubingko a natakneng ti agbalin a naemma, kastoy ti insungbatko: ‘Diak ammo no kabaelak, ngem padasek.’ Iti panangmatmat ti amok nga Americano, kasla ibagbagak a diak kabaelan ken awan kompiansak iti bagik. Idi naammuak a kasta, naamirisko nga adda dagiti nasken a baliwak.”

Ni Maria, nga agnanaed idiay New York City, ket nautek nga estudiante, ken kanayon a sidadaan a tumulong kadagiti kaeskuelaanna. Pasaray agpatulong kenkuana ti kaeskuelaanna a ni Juan. Ngem agrayo met ti baro ken Maria isu a nagpakpakalaing iti balasang. Nupay kayatna ti agtalinaed a nadalus iti moral, timmulok ni Maria iti pananggargari ni Juan ket natnag iti seksual nga imoralidad.

Pudno a karit ti agbalin a natakneng iti agdama a lubong nga addaan iti nadumaduma a kultura ken nalulok a moral. Apay ngarud a patanorenyo ti kinatakneng? Agsipud ta makaay-ayo iti Dios dagiti naimbag nga aramid, ket kaaduan kadatayo ti sigurado nga agtarigagay iti anamongna.

Ti Biblia a Sao ti Dios idagadagna kadagiti agbasbasa iti dayta a patanorenda ti kinatakneng. Kas pagarigan, insurat ni apostol Pablo: “Aniaman ti adda a naimbag a kababalin ken aniaman ti adda a banag a nadayaw, itultuloyyo nga imutektekan dagitoy a bambanag.” (Filipos 4:8) Ken paregtaennatayo ni apostol Pedro a ‘sipapasnek a reggetantayo nga inayon iti pammatitayo ti naimbag a kababalin.’ (2 Pedro 1: 5) Ngem ania ti kinatakneng? Maisuro kadi dayta idiay eskuelaan? Kasanotay a mapatanor dayta?

[Footnote]