Naisangsangayan a Pakaammo

IDI agngudo ti tinawen a miting ti Watch Tower Bible and Tract Society of Pennsylvania idi Oktubre 7, 2000, adda naisangsangayan nga impakaammo ti tserman a ni John E. Barr, kameng ti Bagi a Manarawidwid. Nainaig daytoy a pakaammo kadagiti immun-una a palawag iti daydi nga agsapa nga inted da Theodore Jaracz ken Daniel Sydlik.​—Kitaenyo ti panid 12-16 ken 28-31 daytoy a magasin.

Tapno ipaganetgetna ti maysa a napateg a punto, kinuna ni Kabsat Barr: “Naited ‘iti matalek ken masirib nga adipen’ ken iti Bagi a Manarawidwidna dagiti bambanag a napatpateg ken nalawlawa ti saklawenna no idilig kadagidiay naitalek kadagiti legal a korporasion. Limitado ti sagudayen dagiti karta ti kakasta a korporasion. Nupay kasta, ni Apotayo a Jesu-Kristo intalekna iti klase matalek nga adipen ti amin a ‘sanikuana,’ wenno dagiti interes ti Pagarian ditoy daga.”​—Mateo 24:45-47.

No maipapan iti Pennsylvania a korporasion, innayon ni Kabsat Barr: “Sipud idi nagbalin daytoy a korporasion idi 1884, nagpateg ti naaramidan ti Watch Tower Bible and Tract Society of Pennsylvania iti moderno-aldaw a pakasaritaantayo. Kaskasdi, maysa la daytoy a legal nga instrumento nga usaren ‘ti matalek ken masirib nga adipen’ no kasapulan.”

Sigun iti palawag da Kabsat Sydlik ken Jaracz, ti pannakaitalek ti amin a naindagaan a sanikua ti Apo ‘iti matalek ken masirib nga adipen’ ket saan a lapped tapno palubosanda dagiti kualipikado a lallaki manipud iti “sabsabali a karnero” a mangibaklay iti sumagmamano nga administratibo nga annongen. (Juan 10:16) Awan met ti Nainkasuratan a rason tapno ipetteng a masapul a napulotan a Kristiano ti amin wenno maysa kadagiti agbalin a direktor kadagiti legal a korporasion nga us-usaren dagiti Saksi ni Jehova.

Imbaga ni Kabsat Barr kadagiti agdengdengngeg nga iti nabiit pay, dadduma a kameng ti Bagi a Manarawidwid dagiti Saksi ni Jehova nga agserserbi kas direktor ken opisial ti boluntario a naglusulos manipud kadagiti board of directors iti amin a korporasion nga us-usaren “ti matalek ken masirib nga adipen” idiay Estados Unidos. Naisaad a kasukatda dagiti responsable a kakabsat a lallaki manipud iti sabsabali a karnero.

Pudno a makagunggona daytoy a pangngeddeng. Mangted daytoy iti gundaway kadagiti kameng ti Bagi a Manarawidwid a mangbusbos iti ad-adu a tiempo a mangisagana kadagiti naespirituan a taraon ken mangaywan kadagiti naespirituan a kasapulan ti sangalubongan a panagkakabsat.

Kas panangingudo, kastoy ti kinuna ti tserman kadagiti maragragsakan nga agdengdengngeg: “Nupay naited kadagiti natenneb a manangaywan ti nadumaduma a legal ken administratibo a rebbengen, . . . agserbida amin iti sidong ti naespirituan a panangiwanwan ti Bagi a Manarawidwid. . . . Ikararagtay amin a bendisionan ni Jehova ti agkaykaysa a panagreggettayo a mangitungpal iti pagayatanna, nga agpaay a pakaidayawan ken pakaitan-okan ti naindaklan a naganna.”