Nasungdo ken ni Kristo ken iti Matalek nga Adipenna

‘Dutokanto ni apona nga agaywan kadagiti amin a sanikuana.’​—MATEO 24:45-47.

1, 2. (a) Asino ti Panguluentayo sigun iti Biblia? (b) Ania ti mangipakita nga aktibo nga idadauluan ni Kristo ti kongregasion Kristiano?

“SAANKAYO met a maawagan iti ‘papanguluen,’ ta ti Panguluenyo ket maymaysa, ni Kristo.” (Mateo 23:10) Babaen kadagitoy a sasao, nalawag nga impakita ni Jesus nga awan ti asinoman a tao a rumbeng nga awagan dagiti pasurotna kas panguluenda. Adda idiay langit ti maymaysa a Panguluenda―ni Jesu-Kristo. Ti Dios ti nangdutok ken ni Jesus iti dayta a saad. Ni Jehova ‘imbangonna ni Kristo manipud kadagiti natay ket pinagbalinna nga ulo iti amin a bambanag iti kongregasion, a dayta ti bagina.’​—Efeso 1:20-23.

² Yantangay ni Kristo ti “ulo iti amin a bambanag” mainaig iti kongregasion Kristiano, adda autoridadna kadagiti amin nga urnos iti kongregasion. Ammona ti amin a mapaspasamak iti uneg ti kongregasion. Suksukimatenna a naimbag ti naespirituan a kasasaad ti tunggal kongregasion. Nagminar daytoy iti naipalgak ken ni apostol Juan idi arinunos ti umuna a siglo K.P. Kadagiti pito a kongregasion, naminlima a kinuna ni Jesus nga ammona ti aramidda, dagiti paglaingan ken pagkapuyanda, ken nangted iti maitutop a balakad ken pammaregta. (Apocalipsis 2:2, 9, 13, 19; 3:1, 8 , 15) Masiguradotayo a kasta met laeng ti pannakaseknan ni Kristo iti naespirituan a kasasaad dagiti kongregasion idiay Asia Menor, Palestina, Siria, Babilonia, Grecia, Italia, ken iti sadinoman. (Aramid 1:8) Komusta met ita?

Matalek nga Adipen

3. Apay a maitutop a mayarig ni Kristo iti maysa nga ulo ket ti kongregasionna iti maysa a bagi?

³ Kalpasan a nagungar ken di nagbayag sakbay a nagsubli ken ni Amana idiay langit, kinuna ni Jesus kadagiti adalanna: “Isuamin nga autoridad naiteden kaniak idiay langit ken ditoy daga.” Kinunana pay: “Adtoy! addaak kadakayo iti amin nga al-aldaw agingga iti panungpalan ti sistema ti bambanag.” (Mateo 28:18-20) Kas aktibo nga Uloda, agtultuloy a tartarabayenna ida. Iti suratna kadagiti Kristiano idiay Efeso ken Colosas, ni apostol Pablo inyarigna ti kongregasion Kristiano iti maysa a ‘bagi,’ a ni Kristo ti Ulo. (Efeso 1:22, 23; Colosas 1:18) Sigun iti The Cambridge Bible for Schools and Colleges, daytoy a panangidilig ket “saan laeng a mangipasimudaag iti kinapateg ti pannakaikaykaysa iti Ulo no di ket ipamatmatna no kasano nga us-usaren ti Ulo dagiti kamengna. Isuda ti instrumentona.” Ania a grupo ti us-usaren ni Kristo kas instrumentona sipud idi naisaad kas ari iti Pagarian idi 1914?―Daniel 7:13, 14.

4. Kas impadto ni Malakias, ania ti nakita ni Jehova ken ni Kristo Jesus idi sinukimatda ti naespirituan a templo?

⁴ Sigun iti padto ni Malakias, “ti pudno nga Apo” a ni Jehova ken ti “mensahero ti tulag” ken kabbaro a naitrono nga Anakna a ni Kristo Jesus, umayda ukomen ken sukimaten ti “templona,” wenno naespirituan a balay a pagdayawan. “Ti naituding a tiempo” a ‘pannakaukom ti balay ti Dios’ ket nalawag a nangrugi idi 1918.a (Malakias 3:1; 1 Pedro 4:17) Nasukimat a naimbag ti amin nga agkunkuna a pannakabagi ti Dios ken ti pudno a panagdayaw. Kas resultana, nailaksid dagiti iglesia ti Kakristianuan, a sinigsiglon a nangisursuro kadagiti doktrina a nangibabain iti Dios ken nakipaset iti panangpapatay iti adu a biag idi Gubat Sangalubongan I. Iti sabali a bangir, adda maysa a grupo dagiti matalek a natda a napulotan iti espiritu a Kristiano a nasubok, arigna a nagugoran iti apuy, ken naanamongan. Imbilang ida ni Jehova kas “ili a mangidiaya iti daton a sagut iti kinalinteg.”​—Malakias 3:3.

5. Maitunos iti padto ni Jesus maipapan iti ‘kaaddana,’ siasino ti napaneknekan a matalek nga “adipen”?

⁵ Maitunos iti padto ni Malakias, ti pakabigbigan daytoy a grupo ti “adipen” ket karaman iti ragup a pagilasinan nga impaay ni Jesus kadagiti adalanna tapno mabigbigda ti tiempo ti ‘kaaddana ken ti panungpalan ti sistema ti bambanag.’ Kinuna ni Jesus: “Siasino a pudpudno ti matalek ken masirib nga adipen a dinutokan ni apona a mangaywan kadagiti katulongna, tapno ipaayna kadakuada ti taraonda iti umiso a tiempo? Naragsak dayta nga adipen no iti idadateng ni apona masarakanna nga ar-aramidenna ti kasta! Pudno kunak kadakayo, Dutokannanto nga agaywan kadagiti amin a sanikuana.” (Mateo 24:3, 45-47) Idi ‘dimteng’ tapno sukimatenna ti “adipen” idi 1918, nasarakan ni Kristo ti maysa a grupo dagiti napulotan iti espiritu a natda a matalek nga ad-adalan. Sipud idi 1879, us-usarenda daytoy a pagbasaan ken dadduma pay a naibatay iti Biblia a publikasion tapno ipaayda ti naespirituan a ‘taraon iti umiso a tiempo.’ Binigbig ida ni Kristo kas ti grupo nga instrumento, wenno ‘adipenna.’ Idi 1919, intalekna kadakuada ti pannakaaywan ti amin a sanikuana ditoy daga.

Panangaywan Kadagiti Sanikua ni Kristo Ditoy Daga

6, 7. (a) Ania a sabali a termino ti inusar ni Jesus a mangtukoy iti matalek nga ‘adipenna’? (b) Ania ti ipamatmat ti panangusar ni Jesus iti sao a “mayordomo”?

⁶ Sumagmamano a bulan sakbay nga impaay ni Jesus ti pagilasinan ti kaaddana, agraman ti panangdakamatna iti kaadda ti maysa nga “adipen” a mangibagi kenkuana ditoy daga, tinukoyna daytoy nga “adipen” babaen ti sabali a termino a nangilawlawag no ania dagiti annongen daytoy nga adipen. Kinuna ni Jesus: “Asino a pudpudno ti matalek a mayordomo, daydiay masirib, a dutokanto ni apona iti bagi dagiti agserserbi kenkuana tapno agtultuloy nga ipaayanna ida ti bingayda nga abasto a taraon iti umiso a tiempo? Ibagak kadakayo a sipupudno, Dutokannanto kadagiti amin a sanikuana.”​—Lucas 12:42, 44.

⁷ Iti daytoy a teksto, ti adipen ket naawagan a mayordomo, maysa a termino a naipatarus manipud iti Griego a sao a mangipamatmat iti maysa a “mangay-aywan iti sangakabbalayan wenno sansanikua.” Dayta a grupo dagiti mayordomo ket saan laeng a basta maysa a grupo dagiti nalalaing a tattao a makabael a mangilawlawag kadagiti makapainteres a punto manipud iti Biblia. Malaksid iti panangipaayda iti makapasalun-at a naespirituan a taraon “iti umiso a tiempo,” nadutokan “ti matalek a mayordomo” a mangaywan iti intero a bagi dagiti agserserbi ken ni Kristo ken iti amin a pakaseknan ni Kristo ditoy daga, ti “amin a sanikuana.” Ania ti iramanna dayta?

8, 9. Aniada a ‘sanikua’ ti naitalek iti adipen?

⁸ Karaman kadagiti annongen ti adipen ti panangimaton kadagiti pasilidad nga us-usaren dagiti pasurot ni Kristo a mangibanag kadagiti Nakristianuan nga aktibidadda, kas iti sangalubongan a hedkuarter ken kadagiti sanga nga opisina dagiti Saksi ni Jehova, agraman dagiti lugar a pagdayawanda―dagiti Kingdom Hall ken Assembly Hall―iti intero a lubong. Napatpateg pay, imatmatonan met ti adipen ti pannakaisagana dagiti makapabileg a programa ti panagadal iti Biblia a maangay kadagiti linawas a gimong ken regular nga asamblea ken kombension. Kadagitoy a panagtataripnong, maidatag dagiti impormasion maipapan iti pannakatungpal dagiti padto ti Biblia, ken maiwardas dagiti naintiempuan nga instruksion no kasano a mayaplikar dagiti prinsipio ti Biblia iti inaldaw a panagbiag.

⁹ Annongen met ti mayordomo ti panangimaton iti kapatgan a trabaho a panangikasaba “iti daytoy naimbag a damag ti pagarian” ken panangaramid “iti ad-adalan kadagiti tattao iti amin a nasion.” Agkalikagum daytoy iti panangisuro kadagiti tattao no kasanoda a tungpalen ti amin a bilin ni Kristo, ti Ulo ti kongregasion, bayat daytoy tiempo ti panungpalan. (Mateo 24:14; 28:19, 20; Apocalipsis 12:17) Kas resulta ti trabaho a panangasaba ken panangisuro, naurnong ti “maysa a dakkel a bunggoy” a nasungdo a kakadua ti napulotan a natda. Dagitoy a “matarigagayan a banag dagiti amin a nasion” ket awan duadua a karaman kadagiti napapateg a ‘sanikua’ ni Kristo nga ay-aywanan ti matalek nga adipen.―Apocalipsis 7:9; Haggeo 2:7.

Mangirepresentar a Bagi a Manarawidwid

10. Ania a grupo ti nadutokan a mangaramid kadagiti desision idi umuna a siglo, ken ania ti epektona kadagiti kongregasion?

¹⁰ Gapu ta nadagsen dagiti annongen ti matalek nga adipen, sigurado nga agkalikagum dayta iti panagaramid iti adu a desision. Iti nagkauna a kongregasion Kristiano, dagiti apostol ken papanglakayen idiay Jerusalem ti nangibagi iti dayta nga adipen, a nangaramidda kadagiti desision agpaay iti intero a kongregasion Kristiano. (Aramid 15:1, 2) Dayta a bagi a manarawidwid idi umuna a siglo inyallatiwna dagiti desisionna kadagiti kongregasion babaen kadagiti surat ken agdaldaliasat a pannakabagi. Dagiti nagkauna a Kristiano siraragsak nga inawatda dagita a nalawag nga instruksion, ket gapu ta sitatallugodda a nakidanggay iti bagi a manarawidwid, naitandudo ti talna ken panagkaykaysada.―Aramid 15:22-31; 16:4, 5; Filipos 2:2.

11. Siasino ti us-usaren ita ni Kristo a mangiturong iti kongregasionna, ken ania koma ti panangmatmattayo iti daytoy a grupo dagiti napulotan a Kristiano?

¹¹ Kas idi tiempo dagiti nagkauna a Kristiano, maysa a bassit a grupo dagiti manangaywan a napulotan iti espiritu ti mangbukel ita iti Bagi a Manarawidwid kadagiti pasurot ni Kristo ditoy daga. Babaen ti pannakabalin ti “makannawan nga imana,” ni Kristo nga Ulo ti kongregasion iturturongna dagitoy a matalek a lallaki bayat nga imatmatonanda ti trabaho mainaig iti Pagarian. (Apocalipsis 1:16, 20) Iti pakasaritaan ti biag ni Albert Schroeder, maysa a nabayagen a kameng ti Bagi a Manarawidwid a nabiit pay a pimmusay, insuratna: “Kada Mierkoles, agmiting ti Bagi a Manarawidwid, a maluktan babaen ti kararag tapno agpaiwanwan iti espiritu ni Jehova. Siguraduenmi a ti tunggal banag a mataming ken tunggal desision a maaramid ket maitunos iti Sao ti Dios, ti Biblia.”b Mapagpiarantayo dagita a matalek a napulotan a Kristiano. No maipapan iti Bagi a Manarawidwid, ipangagtayo koma ti balakad ni apostol Pablo: “Agtulnogkayo kadagidiay mangidadaulo kadakayo ket agpasakupkayo, ta agtultuloy a bambantayanda dagiti kararuayo.”​—Hebreo 13:17.

Panangraem iti Matalek nga Adipen

12, 13. Ania dagiti Nainkasuratan a makagapu a raementayo ti klase adipen?

¹² No raraementayo ti matalek a klase adipen, raraementayo ti Apo, ni Jesu-Kristo. Insurat ni Pablo maipapan kadagiti napulotan: “Ti naayaban bayat a maysa a siwayawaya a tao ket adipen ni Kristo. Nagatangkayo iti maysa a gatad.” (1 Corinto 7:22, 23; Efeso 6:6) Gapuna, no sisusungdo nga agtulnogtayo iti panangiturong ti matalek nga adipen babaen ti Bagi a Manarawidwid, agpaspasakuptayo ken ni Kristo, ti Apo ti adipen. Ti panangraemtayo iti instrumento nga us-usaren ni Kristo a mangaywan kadagiti sanikuana ditoy daga ket maysa a pamay-an a ‘sipapanayag a bigbigbigentayo a ni Jesu-Kristo ti Apo nga agpaay iti dayag ti Dios nga Ama.’​—Filipos 2:11.

¹³ Raementayo met ti matalek nga adipen gapu ta dagiti napulotan a Kristiano ditoy daga ket piguratibo a naawagan kas “templo” a pagnanaedan ni Jehova “babaen ti espiritu.” Iti kasta, ‘nasantuanda.’ (1 Corinto 3:16, 17; Efeso 2:19-22) Daytoy a klase nasantuan a templo ti nangitalkan ni Jesus kadagiti sanikuana ditoy daga, a mangipamatmat nga adda dagiti kalintegan ken annongen iti uneg ti kongregasion Kristiano a naitalek laeng kadagiti napulotan. Gapuna, matmatan ti amin a kameng ti kongregasion a sagrado nga obligasionda ti sumurot ken mangitandudo iti panangiturong ti matalek nga adipen babaen ti Bagi a Manarawidwid. Wen, ibilang ti “sabsabali a karnero” a dakkel a pribilehio ti makitinnulong iti klase adipen iti panangaywan kadagiti sanikua ti Apo.―Juan 10:16.

Sisusungdo a Panangsuporta

14. Kas impadto ni Isaias, kasano a ti sabsabali a karnero magmagnada iti likudan ti napulotan a klase adipen ken agserserbida kas ‘di natangdanan a trabahador’?

¹⁴ Impadto ni Isaias ti sipapakumbaba a panagpasakup ti sabsabali a karnero kadagiti napulotan a kameng ti naespirituan nga Israel: “Daytoy ti kinuna ni Jehova: ‘Dagiti di tinangdanan a trabahador ti Egipto ken dagiti komersiante ti Etiopia ken dagiti Sabeo, natatayag a lallaki, umaydanto kenka a mismo, ket agbalindanto a kukuam. Iti likudam magnadanto; umaydanto a sigigrilios, ket agruknoydanto kenka. Agkararagdanto kenka, a kunkunada, “Pudno a ti Dios naikaykaysa kenka, ket awanen ti sabali; awan ti sabali a Dios.”’” (Isaias 45:14) Iti simboliko a pamay-an, ti sabsabali a karnero magmagnada iti likudan ti napulotan a klase adipen ken ti Bagi a Manarawidwidna, a sumursurotda iti panangiturong dagitoy. Kas ‘di natangdanan a trabahador,’ ti sabsabali a karnero sitatallugod nga usarenda ti pigsa ken sanikuada tapno masuportaranda ti sangalubongan a trabaho a panangasaba nga intalek ni Kristo kadagiti napulotan a pasurotna ditoy daga.―Aramid 1:8; Apocalipsis 12:17.

15. Kasano nga impakpakauna ti Isaias 61:5, 6 ti maipapan iti relasion ti sabsabali a karnero ken ti naespirituan nga Israel?

¹⁵ Naragsak ken agyaman ti sabsabali a karnero gapu ta agserserbida ken ni Jehova iti sidong ti panangiwanwan ti klase adipen ken ti Bagi a Manarawidwidna. Bigbigenda dagiti napulotan a kas kameng ti “Israel ti Dios.” (Galacia 6:16) Kas piguratibo a “sangsangaili” ken “ganggannaet” a makidangdanggay iti naespirituan nga Israel, sirarag-o nga agserserbida kas ‘mannalon’ ken ‘agay-aywan kadagiti kaubasan’ iti sidong ti panangiwanwan dagiti napulotan, ti “papadi ni Jehova” ken ‘ministro ti Dios.’ (Isaias 61:5, 6) Sireregta a makipaspasetda iti pannakaikasaba ti naimbag a damag ti Pagarian ken iti panangaramid kadagiti adalan iti amin a nasion. Naimpusuan a tulonganda ti klase adipen no maipapan iti panangipastor ken panangtaripato kadagiti kabbaro a nasarakan nga arig karnero a tattao.

16. Apay a ti sabsabali a karnero sisusungdo a supsuportaranda ti matalek ken masirib nga adipen?

¹⁶ Bigbigen ti sabsabali a karnero a dakkel ti nagunggonada gapu iti kinasaet ti matalek nga adipen a mangipaay iti naintiempuan a naespirituan a taraonda. Sipapakumbaba a bigbigenda a no saan a gapu iti matalek ken masirib nga adipen, bassit laeng wenno awan ti ammoda maipapan kadagiti agkakapateg a kinapudno iti Biblia, kas iti kinasoberano ni Jehova, ti pannakasantipikar ti naganna, ti Pagarian, ti baro a langlangit ken ti baro a daga, ti kararua, ti kasasaad dagiti natay, ken ti kinasiasino ni Jehova ken ti Anakna, ken no ania a talaga ti nasantuan nga espiritu. Gapu iti naan-anay a panagraem ken kinasungdoda, ti sabsabali a karnero siaayat a supsuportaranda dagiti napulotan a ‘kakabsat’ ni Kristo ditoy daga bayat daytoy tiempo ti panungpalan.―Mateo 25:40.

17. Ania ti nakita ti Bagi a Manarawidwid a masapul nga aramidenda, ket ania ti mausig iti sumaganad nga artikulo?

¹⁷ Gapu ta bumasbassit ti bilangda, saan a posible nga iti amin a kongregasion ket adda napulotan a mangaywan kadagiti sanikua ni Kristo. Nupay kasta, dutokan ti Bagi a Manarawidwid ti sumagmamano a lallaki a kameng ti sabsabali a karnero tapno agserbida kas manangaywan kadagiti sanga nga opisina, distrito, sirkito, ken kongregasion dagiti Saksi ni Jehova. Ti kadi panangmatmattayo kadagitoy a katulongan a papastor apektaranna ti kinasungdotayo ken ni Kristo ken iti matalek nga adipenna? Usigentayo dayta iti sumaganad nga artikulo.

[Footnotes]

Pangrepaso

• Asino ti Panguluentayo, ken ania ti mangipakita nga ammona dagiti mapaspasamak iti uneg ti kongregasion?

• Iti pannakasukimat ti “templo,” siasino dagiti nasarakan nga agtigtignay kas matalek nga adipen, ken ania dagiti sanikua a naitalek kadakuada?

• Ania dagiti Nainkasuratan a makagapu no apay a sisusungdo a suportarantayo ti matalek nga adipen?

[Dagiti Ladawan iti panid 23]

Dagiti ‘sanikua’ nga ay-aywanan ti “mayordomo” ramanenna dagiti material nga ik-ikutan, naespirituan a programa, ken trabaho a panangasaba

[Ladawan iti panid 25]

Dagiti kameng ti sabsabali a karnero supsuportaranda ti matalek a klase adipen babaen ti sireregta a panangasabada