Salsaludsod Dagiti Agbasbasa

Kaano ti pannakapulot ti “Santo dagiti Sasanto,” kas naipadto iti Daniel 9:24?

Ti Daniel 9:24-27 ket padto maipapan iti panagparang ti “Mesias a Panguluen”​—ti Kristo. No kasta, ti naipadto a panangpulot iti “Santo dagiti Sasanto,” dina tuktukoyen ti panangpulot iti Kasasantuan a siled ti templo idiay Jerusalem. Ti sasao a “Santo dagiti Sasanto” tuktukoyenna ketdi ti nailangitan a santuario ti Dios​—ti nailangitan a Kasasantuan​—iti naindaklan a naespirituan a templo ni Jehova.a​—Hebreo 8:1-5; 9:2-10, 23.

Kaano a nangrugi nga agandar ti naespirituan a templo ti Dios? Bueno, usigenyo ti napasamak idi nagpabautisar ni Jesus idi 29 K.P. Nanipuden iti daydi a momento ti biagna, tinungpal ni Jesus ti sasao iti Salmo 40:6-8. Idi agangay, impatuldo ni apostol Pablo nga inkararag ni Jesus iti Dios: “Sakripisio ken daton saanmo a kinayat, ngem nangisaganaka iti bagi a maipaay kaniak.” (Hebreo 10:5) Pagaammo ni Jesus a ‘saan a kinayat’ ti Dios nga agtultuloy a maidaton dagiti animal a sakripisio idiay templo ti Jerusalem. Nangisagana ketdi ni Jehova iti perpekto a natauan a bagi nga idaton ni Jesus kas sakripisio. Intuloy a kinuna ni Jesus kas panangyebkas iti naimpusuan a tarigagayna: “Adtoy! Umayak (iti lukot ti libro naisurat ti maipapan kaniak) tapno aramidek ti pagayatam, O Dios.” (Hebreo 10:7) Ket aniat’ sungbat ni Jehova? Kuna ti Ebanghelio ni Mateo: “Kalpasan a nabautisaran dagus a simmang-at ni Jesus manipud iti danum; ket, adtoy! naluktan ti langlangit, ket nakitana ti espiritu ti Dios a bumabbaba a kasla kalapati nga um-umay kenkuana. Adtoy! Kasta met, adda timek manipud iti langlangit a nagkuna: ‘Daytoy ti Anakko, ti dungdungnguen, nga inanamongak.’”​—Mateo 3:16, 17.

Ti panangawat ni Jehova a Dios iti pannakaidatag ti bagi ni Jesus kas sakripisio kaipapananna a timpuaren ti maysa nga altar a dakdakkel ngem iti literal nga altar idiay templo ti Jerusalem. Altar daytoy ti “pagayatan” ti Dios, wenno urnos maipaay iti panangawat iti natauan a biag ni Jesus kas sakripisio. (Hebreo 10:10) Ti pannakapulot ni Jesus iti nasantuan nga espiritu kaipapananna nga impasdeken ti Dios ti naan-anay nga urnosna iti naespirituan a templo.b Ngarud, idi nabautisaran ni Jesus, napulotan, wenno nailasin, ti nailangitan a taeng ti Dios kas “Santo dagiti Sasanto” iti urnos ti naindaklan a naespirituan a templo.

[Footnotes]

[Ladawan iti panid 27]

Napulotan ti “Santo dagiti Sasanto” idi nabautisaran ni Jesus