Report Dagiti Manangiwaragawag Iti Pagarian
Napennek Dagiti Naespirituan a Kasapulanna
TI Chipre ket isla nga adda iti amianan a daya a nagsulian ti Baybay Mediteraneo. Idi tiempo ti Biblia, nalatak ti Chipre gapu iti gambang ken de kalidad a trosona. Inwaragawag da Pablo ken Bernabe ti naimbag a damag ti Pagarian sadiay bayat ti umuna a panagdaliasatda kas misionero. (Aramid 13:4-12) Itatta, positibo pay laeng ti epekto ti naimbag a damag iti biag ti adu a taga Chipre. Pudno unay daytoy iti kasasaad ni Lucas, maysa a lalaki nga agedad iti 40. Insalaysayna:
“Pitokami nga agkakabsat iti pamiliami nga agnanaed iti pagtaraknan ti baka. Uray idi ubingak pay, magusgustuakon ti agbasbasa. Paboritok a libro ti maibulsa nga edision ti Kristiano a Griego a Kasuratan. Idi sangapulo ti tawenko, siak ken ti sumagmamano a gayyemko nangbuangaykami iti bassit a grupo ti panagadal iti Biblia. Ngem di nagpaut dayta ta dagiti lallakay iti purokmi inawagandakami iti erehe.
“Idi agangay, bayat ti panageskuelak idiay Estados Unidos, naam-ammok ti adu a tattao a nadumaduma ti relihionda. Natukay manen ti interesko iti naespirituan a bambanag. Iti libraria ti unibersidadmi, adu nga aldaw ti binusbosko a nagad-adal iti nadumaduma a relihion. Adu met a relihion ti nagobserbarak, ngem iti laksid dagiti panangikagumaak, saanak pay a napnek iti naespirituan.
“Idi nagturposak, nagsubliak idiay Chipre ket inawatko ti trabaho kas direktor iti maysa a medikal a laboratorio. Kanayonnak a sarungkaran idiay pagtrabahuak ti maysa a nataenganen a lalaki nga agnagan Antonis, maysa kadagiti Saksi ni Jehova. Ngem napaliiw ti Greek Orthodox Church dagita a panagsarungkarna.
“Di nagbayag, binisitanak ti maysa a teologo ket inupaynak a makisarita kadagiti Saksi ni Jehova. Gapu ta naisuro kaniak manipud kinaubingko a ti Greek Orthodox Church ti pudno, nagtungpalak ket simmardengak a makisarsarita ken Antonis sa inrugik ti makisarsarita iti teologo maipapan iti Biblia. Bimmisitaak met iti adu a monasterio iti Chipre. Napanak pay idiay makin-amianan a Grecia ket pinasiarko ti Bantay Athos, a maibilbilang a kasasantuan a bantay kadagiti Orthodox a Kristiano. Kaskasdi a saan a nasungbatan dagiti saludsodko iti Biblia.
“Idin inkararagko iti Dios a tulongannak a mangsarak iti kinapudno. Di nagbayag kalpasanna, sinarungkarannak manen ni Antonis idiay pagtrabahuak, ket nariknak nga isu daytoy ti sungbat iti kararagko. Gapuna, insardengko ti nakisarsarita iti teologo ket nangrugiak a makipagadal iti Biblia ken Antonis. Nagtultuloyak a rimmang-ay, ket idi Oktubre 1997, insimbolok ti dedikasionko ken Jehova babaen ti bautismo iti danum.
“Idi damo, binusordak ti asawak ken ti dua nga inauna a balasitangko, nga agtawen idi iti 14 ken 10. Ngem gapu iti nasayaat a kababalinko, inkeddeng ti asawak nga umatender iti maysa a gimong idiay Kingdom Hall. Kasta unay ti pannakatukay ti riknana gapu iti kinaanus dagiti Saksi ken gapu iti impakitada a personal nga interes. Ad-adda a natukay ti riknana gapu iti panangusarda iti Biblia. Nagbanaganna, inawat ti asawak ken ti dua nga inauna a balasangko ti pannakipagadal iti Biblia kadagiti Saksi ni Jehova. Agasenyo ti ragsakko idi nabautisaranda a tallo iti “Naimpadtuan a Sao ti Dios” a Kombension Distrito idi 1999!
“Wen, napennek ti panangbirokko iti kinapudno. Itan, nagkaykaysan ti intero a pamiliami, a pakairamanan ti asawak ken ti uppat nga annakko, iti nadalus a panagdayaw ken Jehova.”