Sirarag-okayo Koma a Makipagani!
“Dakkel ti anien, ngem bassit dagiti trabahador. Ngarud, ipakaasiyo iti Apo ti panagani a mangibaon kadagiti trabahador iti panaganina.”—MATEO 9:37, 38.
1. Ania ti makatulong kadatayo tapno agtultuloy a maaramidtayo ti pagayatan ti Dios?
KASLA idi kalman laeng no lagipentay ti aldaw a pannakabautisartayo kas maysa kadagiti adipen ni Jehova, sumagmamano man a tawen ti napalabasen wenno nabaybayag pay. Ti panangidayaw ken Jehova ti nagbalin a sentro ti biag nga indedikartay kenkuana. Kasta unay ti tarigagaytayo nga agserbi a siraragsak ken Jehova bayat nga ikagkagumaantayo nga idanon kadagiti sabsabali ti mensahe ti Pagarian ket iti kasta ipangagda koma dayta. (Efeso 5:15, 16) Uray ita, kasla nakaparpartak ti panaglabas ti aldaw no okupadotayo, ‘nga aduan ti aramiden iti trabaho ti Apo.’ (1 Corinto 15:58) Nupay maipasangotayo kadagiti parikut, makapagtultuloytayo no sirarag-o nga aramidentayo ti pagayatan ni Jehova.—Nehemias 8:10.
2. Ania ti mamagrag-o kadatayo kabayatan ti piguratibo a panagani?
2 Kas Kristiano, makiramramantayo iti maysa a piguratibo a panagani. Inyarig ni Jesu-Kristo iti maysa a panagani ti panangurnong kadagiti tattao a mangtagiragsakto iti biag nga agnanayon. (Juan 4:35-38) Yantangay makipaspasettayo iti dayta a panagani, makatulong no usigentayo ti rag-o dagiti nagkauna a Kristiano a nakipagani. Repasuentayo ti tallo a banag a mangted kadatayo iti rag-o bayat ti panagani iti kaaldawantayo. Isu dagitoy: (1) ti mensahetayo maipapan iti namnama, (2) ti naballigi a panagbiroktayo, ken (3) ti mannakikappia a kababalintayo kas agan-ani.
Naibaon a Makipagani
3. Ania ti nagrag-oan dagiti nagkauna a pasurot ni Jesus?
3 Nagbalbaliw la ketdi ti biag dagiti nakipagani idi un-unana—nangnangruna ti 11 a matalek nga apostol ni Jesus—iti aldaw a sinabetda ni napagungar a Kristo iti bantay idiay Galilea idi 33 K.P.! (Mateo 28:16) Nalabit adda iti dayta a pasamak ti “nasurok a lima gasut a kakabsat.” (1 Corinto 15:6) Silalagipda iti imbilin ni Jesus kadakuada: “Inkayo . . . ket mangaramidkayo iti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isuroyo kadakuada a tungpalenda ti amin a bambanag nga imbilinko kadakayo.” (Mateo 28:19, 20) Iti laksid ti nakaro a pannakaidadanes, kasta unay ti rag-oda a nakipagani bayat a nakitada ti pannakaipasdek ti kongregasion dagiti Kristiano iti nadumaduma a lugar. Idi agangay, ‘ti naimbag a damag naikaskasaba iti isuamin a parsua nga adda iti baba ti langit.’—Colosas 1:23; Aramid 1:8; 16:5.
4. Naibaon dagiti adalan ni Kristo iti sidong dagiti ania a kasasaad?
4 Iti nasapsapa a paset ti ministeriona idiay Galilea, inummong ni Jesus ti 12 nga apostolna sana imbaon ida nangnangruna tapno ipakaammoda a: “Ti pagarian ti langlangit asidegen.” (Mateo 10:1-7) Uray isu a mismo “napan nagsursor kadagiti amin a siudad ken purpurok [iti Galilea], a nangisursuro kadagiti sinagogada ken nangikaskasaba iti naimbag a damag ti pagarian ken nangag-agas iti tunggal kita ti sagubanit ken tunggal kita ti an-annayen.” Naasian ni Jesus kadagiti tattao “agsipud ta nalalatan ken naiwarawarada a kasla karkarnero nga awanan pastor.” (Mateo 9:35, 36) Gapu iti kasta unay a pannakatukay ti riknana, kinunana kadagiti adalanna: “Wen, dakkel ti anien, ngem bassit dagiti trabahador. Ngarud, ipakaasiyo iti Apo ti panagani [ni Jehova a Dios] a mangibaon kadagiti trabahador iti panaganina.” (Mateo 9:37, 38) Idi innem laengen a bulan ti nabati iti ministeriona ditoy daga, nakita ni Jesus ti kasta met la a panagkasapulan kadagiti agani idiay Judea. (Lucas 10:2) Iti dayta a dua a pasamak, imbaonna dagiti pasurotna a makipagani.—Mateo 10:5; Lucas 10:3.
Ti Mensahetayo Maipapan iti Namnama
5. Ania ti idekdeklaratayo a mensahe?
5 Kas ad-adipen ni Jehova ita, maragsakantayo a mangipangag iti awis a makipagani. Mangyeg kadatayo iti dakkel a rag-o no idanontayo ti mensahe ti namnama kadagiti maup-upay ken malmaldaangan. Kas kadagiti adalan ni Jesus idi umuna a siglo, anian a pribilehiotayo nga ipakaammo ti naimbag a damag—maysa a pudno a mensahe ti namnama—kadagidiay ‘nalalatan ken naiwarawara a kasla karkarnero nga awanan pastor’!
6. Ania a trabaho ti nakiramanan dagiti apostol idi umuna a siglo?
6 Idi katengngaan ti umuna a siglo, sireregta nga inkasaba ni apostol Pablo ti naimbag a damag. Ket sigurado a nabunga ti panaganina, agsipud ta kinunana idi nagsurat kadagiti Kristiano idiay Corinto idi agarup 55 K.P.: “Ipakaammok kadakayo, kakabsat, ti naimbag a damag nga indeklarak kadakayo, nga inawatyo met, a pagtaktakderanyo met.” (1 Corinto 15:1) Sigagaget idi a nakipagani dagiti apostol ken ti dadduma a nagkauna a Kristiano. Nupay saan nga ibaga kadatayo ti Biblia no mano nga apostol ti nakalasat bayat ti narikut a panawen a nagpatingga iti pannakadadael ti Jerusalem idi 70 K.P., ammotayo a nagtultuloy a nangasaba ni apostol Juan agarup 25 a tawen kalpasan dayta a pasamak.—Apocalipsis 1:9.
7, 8. Ania a mensahe ti namnama ti ipakpakaammo dagiti adipen ni Jehova buyogen ti awan kaaspingna a kinaganat?
7 Simmaruno ti sinigsiglo a panangdominar ti klero ti Kakristianuan, ti apostata a “tao ti kinakillo.” (2 Tesalonica 2:3) Ngem idi arinunos ti maika-19 a siglo, dagidiay nangikagumaan a mangitunos iti biagda kadagiti pannursuro ti orihinal a Kristianidad inawatda ti mensahe ti namnama ken inwaragawagda ti Pagarian. Kinapudnona, manipud iti damo a ruar daytoy a magasin (Hulio 1879), karaman iti paulona dagiti sasao a “Herald of Christ Presence (Mangiwarwaragawag iti Kaadda ni Kristo),” “Herald of Christ’s Kingdom (Mangiwarwaragawag iti Pagarian ni Kristo),” wenno “Mangibumbunannag iti Pagarian ni Jehova.”
8 Naipasdek idi 1914 ti nailangitan a Pagarian ti Dios iti sidong ti panangituray ni Jesu-Kristo, ket ipakpakaammotayo itan ti mensahe maipapan iti namnama buyogen ti awan kaaspingna a kinaganat. Apay? Agsipud ta maysa kadagiti bendision nga itden ti Pagarian isu ti umad-adanin a panungpalan ti agdama a dakes a sistema. (Daniel 2:44) Adda pay kadi nasaysayaat a mensahe ngem iti dayta? Ken adda pay kadi naragragsak ngem ti pannakiraman iti panangiwaragawag iti Pagarian sakbay a dumteng ti “dakkel a rigat”?—Mateo 24:21; Marcos 13:10.
Naballigi a Panagbirok
9. Ania ti imbilin ni Jesus kadagiti adalanna, ket ania ti reaksion dagiti tattao iti mensahe ti Pagarian?
9 Maysa pay a mangnaynayon iti rag-otayo nga agani isu ti naballigi a panangbiroktayo kadagiti agbalin nga adalan ken tumulong kadatayo nga agani. Idi 31-32 K.P., binilin ni Jesus dagiti adalanna: “Iti aniaman a siudad wenno purok a serkanyo, birokenyo no siasino iti dayta ti maikari.” (Mateo 10:11) Maibatay iti reaksionda iti mensahe ti Pagarian, saan nga amin idi ket maikari. Kaskasdi, sireregta dagiti adalan ni Jesus a nangikasaba iti naimbag a damag sadinoman a pakasarakanda kadagiti tattao.
10. Kasano nga intultuloy a binirok ni Pablo dagiti maikari a tattao?
10 Kalpasan ti ipapatay ken panagungar ni Jesus, nagtultuloy ti naregta a panangbirok kadagiti maikari a tattao. Nakirinnason ni Pablo kadagiti Judio nga adda iti sinagoga ken kadagiti tattao nga adda kadagiti tiendaan idiay Atenas. Idi nangasaba iti Griego a siudad ti Areopago, “nakitipon kenkuana ti sumagmamano a tattao ket nagbalinda a manamati, nga adda met kadakuada ni Dionisio, maysa nga ukom iti pangukoman ti Areopago, ken ti maysa a babai a managan Damaris, ken sabsabali pay malaksid kadakuada.” Iti sadinoman a napanan ni Pablo, mapagwadan ti panangasabana iti “publiko ken iti binalaybalay.”—Aramid 17:17, 34; 20:20.
11. Aniada a metodo iti panagministerio ti nausar idi?
11 Kadagiti naudi a dekada ti maika-19 a siglo, situtured dagiti napulotan a Kristiano a nangbirok kadagiti maikari a tattao. Iti artikulo a napauluan “Napulotan a Mangasaba,” kinuna ti Hulio/Agosto 1881 a ruar ti Zion’s Watch Tower: “Ti panangikasaba iti naimbag a damag . . . ket pannakisarita ‘kadagiti naemma’—dagidiay sidadaan ken mayat a dumngeg, iti kasta agbalinda a paset ti bagi ni Kristo, dagiti makipagtawid.” Dagiti imbaon ti Dios nga agani masansan a masabetda dagiti tattao a nakimisa ket ikkanda dagitoy iti tract a naglaon kadagiti Nainkasuratan a mensahe a nairanta a manggutugot kadagiti maikari a tattao. Kalpasan a nausig a naimbag ti kinaepektibo daytoy a metodo ti panangasaba, indagadag ti Pagwanawanan a Mayo 15, 1903, kadagiti agan-ani nga iwarasda dagiti tract “iti binalaybalay, kada bigat ti Domingo.”
12. Kasanotay a naparang-ay ti kinaepektibo ti panangasabatayo? Iyilustraryo.
12 Kadagiti kallabes a tawen, rimmang-ay ti ministeriotayo gapu iti pannakisarita kadagiti tattao iti sabali a lugar malaksid kadagiti pagtaenganda. Epektibo unay daytoy kadagiti lugar a ditay madanon dagiti bumalay kadagiti pagtaenganda bayat ti gagangay nga oras ti panangasabatayo gapu ta napanda nangged wenno nagaliwaksay. Idi a ti maysa a Saksi idiay Inglatera ken ti kaduana nadlawda ti regular a panagawid dagiti naka-bus a bisita kalpasan nga agmalmalem dagitoy iti aplaya, inturturedda ti limmugan kadagiti bus ket intukonda dagiti kopia Ti Pagwanawanan ken Agriingkayo! kadagiti pasahero. Iti uneg ti makabulan, nakaipaimada iti 229 a kopia. Kastoy ti reportda: “Dikam agamak a mangasaba kadagiti aplaya, lugar ti negosio, wenno aniaman a karit a mabalin a pakaipasanguanmi agsipud ta ammomi a saranayennakami a kanayon ni Jehova.” Nakaipasdekda iti ruta ti magasin, nakairugida iti panagadal iti Biblia, ken nakapagserbida kas auxiliary pioneer.
13. Ania a panagbalbaliw iti ministeriotayo ti kasapulan iti dadduma a lugar?
13 Bayat nga agtultuloy ti panangbirok kadagiti maikari, mabalin nga adda dagiti lugar nga agkalikagum iti naannad a panangusig iti ministerio. Nupay adu a Saksi ti nairuamen a mangasaba iti binalaybalay kada agsapa ti Domingo, napaliiw ti dadduma nga adda dagiti lugar a saan unay nga epektibo ti nasapa a panangasaba kadagiti tattao iti pagtaenganda gapu ta mabalin a matmaturog pay laeng dagiti bumalay. Babaen ti panangbaliwda kadagiti eskediulda, adu itan a Saksi ti mangasaba iti malem, nalabit kalpasan ti gimong. Ket talaga a nabunga ti panagbirokda. Idi napan a tawen, 2.3 porsiento ti ngimmatuan ti bilang dagiti agibumbunannag iti Pagarian. Pakaidayawan daytoy ti Apo ti panagani ken mangyeg rag-o iti pusotayo.
Taginayonen ti Kappia Bayat ti Panagani
14. Ania koma ti kababalintayo no idanontayo ti mensahetayo, ken apay?
14 Ti maysa pay a makagapu no apay a naragsaktayo isu ti mannakikappia a kababalin nga iparparangarangtayo bayat ti panagani. Kinuna ni Jesus: “No sumrekkayo iti balay, kablaawanyo ti sangakabbalayan; ket no ti balay maikari, ti talna a tarigagayanyo iti dayta dumteng koma iti dayta.” (Mateo 10:12, 13) Ti Hebreo a kablaaw ken ti katupagna a termino iti Biblikal a Griego ket agpada nga addaan iti anag a ‘Talna koma kadakayo.’ Kastoy koma ti kababalintayo no ikasabatayo ti naimbag a damag kadagiti tattao. Kayattay nga ipangagda koma ti mensahe ti Pagarian. Kadagidiay mangipangag, adda namnama a maikappiada iti Dios no agbabawida kadagiti basolda, agbalbaliwda, ken aramidenda ti pagayatanna. Iti kasta, ti pannakikappiada iti Dios ti mangiturong kadakuada iti biag nga agnanayon.—Juan 17:3; Aramid 3:19; 13:38, 48; 2 Corinto 5:18-20.
15. Kasanotay a mataginayon ti mannakikappia a kababalintayo no adda dagiti saan a mangipangag iti ikaskasabatayo?
15 Kasanotay a mataginayon ti talna no adda dagiti saan a mangipangag? Imbilin ni Jesus: “No di maikari [ti balay], ti talna manipud kadakayo agsubli koma kadakayo.” (Mateo 10:13) Iti salaysay ni Lucas maipapan kadagiti naibaon a 70 nga adalan, nairaman dagitoy a sasao ni Jesus: “No adda sadiay ti maysa a gayyem ti talna, agtalinaedto kenkuana ti talnayo. Ngem no awan, agsublinto dayta kadakayo.” (Lucas 10:6) No ikasabatayo ti naimbag a damag kadagiti tattao, aramidentayo koma dayta a nainggayyeman ken kalmado. No di mangipangag ti bumalay, agreklamo man wenno manglais, mangted dayta iti rason tapno ‘agsubli kadatayo’ ti mensahe ti pannakikappia nga awittayo. Ngem awan kadagitoy ti mangikkat iti talnatayo, maysa kadagiti bunga ti nasantuan nga espiritu ni Jehova.—Galacia 5:22, 23.
Nagsayaat a Kalat Para Kadagiti Agani
16, 17. (a) Ania koma ti kalattayo nga agsarungkar? (b) Kasanotay a matulongan dagidiay agsaludsod maipapan iti Biblia?
16 Kas trabahador iti panagani, maragsakantayo ta adda pasettayo iti pannakaurnong dagiti tattao nga agbiagto nga agnanayon. Ken anian a rag-otayo no adda mangipangag iti ikaskasabatayo, kayatna ti makaadal iti ad-adu pay, ken mapaneknekan a “gayyem ti talna”! Nalabit adu ti saludsodna maipapan iti Biblia ken kasla imposible a masungbatantayo amin dagita iti maminsan laeng a panagsarita. Ania ngarud ti aramidentayo no kasla di nainkalintegan ti agbayag iti damo a pannakisarita? Mabalin nga aramidentay a kalat ti maysa a naisingasing agarup 60 a tawenen ti napalabas.
17 “Sidadaan koma amin a Saksi ni Jehova a mangikondukta kadagiti mapagulidanan a panagadal iti Biblia.” Nagparang dagita a sasao iti maikatlo kadagiti serye ti makaisuro a bokleta a Model Study a naipablaak nanipud 1937 agingga iti 1941. Kastoy ti kunana: “Agingga a kabaelanda, siaanep koma ti amin nga agibumbunannag [iti Pagarian] a tumulong kadagiti tattao nga addaan iti naimbag a nakem, a mangipakpakita iti interes iti mensahe ti Pagarian. Masapul a masarungkaran dagitoy a tattao, masungbatan ti nadumaduma a saludsodda . . . , sa mairugi ti maysa a mapagulidanan a panagadal . . . iti kabiitan a panawen.” Wen, agsarungkartayo ta kalattay ti makairugi ken regular a makaikondukta iti panagadal iti Biblia iti pagtaengan.a Agsaganatayo a naimbag ken aramiden a makaisuro ti panangyadal yantangay kayattayo nga agbalin a makapabileg ken maipakita ti naayat a pannakaseknan iti interesado a tao.
18. Kasanotay a matulongan dagiti kabbaro nga agbalin nga adalan ni Jesu-Kristo?
18 Iti tulong ti libro a Pannakaammo a Mangiturong iti Biag nga Agnanayon ken dagiti broshur a kas iti Ania ti Kalikaguman ti Dios Kadatayo?, makaikonduktatayo kadagiti epektibo a panagadal iti Biblia ket iti kasta matulongantayo dagiti interesado a tattao nga agbalin nga ad-adalan. Bayat nga ikagumaantayo a tuladen ti Naindaklan a Mannursuro, ni Jesu-Kristo, mabalin met a makasursuro dagiti iyad-adalantayo iti Biblia iti mannakikappia ken naragsak a kababalintayo, iti kinapasnektayo, ken iti panagraemtayo kadagiti pagalagadan ken pagannurotan ni Jehova. Nupay sungbatantayo dagiti saludsod dagiti kabbaro tapno matulongantay ida, ikagumaantay met koma nga isuro no kasanoda a sungbatan dagiti tattao nga agsaludsod kadakuada. (2 Timoteo 2:1, 2; 1 Pedro 2:21) Kas piguratibo nga agan-ani, sigurado a maragsakantayo gapu ta agpromedio iti 4,766,631 ti panagadal iti Biblia a naikondukta iti intero a lubong iti napalabas a tawen serbisio. Ad-adda a naragsaktayo no maysatayo kadagiti agan-ani nga addaan iti iyad-adalan iti Biblia.
Itultuloyyo ti Agrag-o iti Panagani
19. Apay a naragsak ti panagani kabayatan ti ministerio ni Jesus ken di nagbayag kalpasanna?
19 Adda dagiti nasayaat a rason no apay a naragsak ti panagani kabayatan ti ministerio ni Jesus ken di nagbayag kalpasanna. Adu idi ti nangipangag iti naimbag a damag. Nakaragragsak nangnangruna idi Pentecostes ti 33 K.P., agsipud ta agarup 3,000 a tattao ti nagtulnog iti instruksion ni Pedro, inawatda ti nasantuan nga espiritu ni Jehova, ket nagbalinda a paset ti naespirituan nga Israel kas ili ti Dios. Kinapudnona, nagtultuloy nga immadu ti bilangda ken naglaplapusanan ti rag-oda bayat nga “intultuloy ni Jehova nga itipon kadakuada iti inaldaw dagidiay maisalsalakan.”—Aramid 2:37-41, 46, 47; Galacia 6:16; 1 Pedro 2:9.
20. Ania ti mangyeg kadatayo iti aglaplapusanan a rag-o bayat ti intay panagani?
20 Iti daydi a tiempo, pimmudno ti padto ni Isaias: “Ti nasion pinagbalinmo [Jehova] nga aduan umili; maipaay iti dayta pinadakkelmo ti panagrag-o. Nagrag-oda iti sanguanam kas iti panagrag-o iti tiempo ti panagani, kas kadagidiay agrag-o no bingbingayenda ti samsam.” (Isaias 9:3) Nupay agparang a nakompleton ti ‘nasion [dagiti napulotan] a napnuan iti umili,’ dakkel ti rag-otayo bayat a makitatayo nga umad-adu kada tawen ti bilang ti dadduma pay a makipagani.—Salmo 4:7; Zacarias 8:23; Juan 10:16.
21. Ania ti usigentayo iti sumaruno nga artikulo?
21 Addaantayo ngarud iti nabileg a rason nga agtultuloy nga agrag-o iti panagani. Ti mensahetayo maipapan iti namnama, ti panangbiroktayo kadagiti maikari a tattao, ken ti mannakikappia a kababalintayo—mangyeg amin dagitoy iti rag-o kas managani. Kaskasdi, adu ti gumura gapu kadagitoy. Napasaran daytoy ni apostol Juan. Naidestiero iti isla ti Patmos “gapu iti panagsao maipapan iti Dios ken panangsaksi ken Jesus.” (Apocalipsis 1:9) Kasano ngarud a mataginayon ti rag-otayo no maipasangotay iti pannakaidadanes ken ibubusor? Ania ti makatulong kadatayo a mangandur kadagiti bimmato a puso ti adu a kaskasabaantayo? Ti sumaruno nga artikulo ket mangipaay kadagiti Nainkasuratan a sungbat kadagitoy a saludsod.
[Footnote]
a Idi damo, maar-aramid dagiti panagadal kadagiti lugar a mabalin a pangummongan kadagiti grupo ti interesado a tattao. Ngem di nagbayag, naikondukta met ti panagadal kadagiti indibidual ken pamilia.—Kitaenyo ti Dagiti Saksi ni Jehova—Mangiwarwaragawag iti Pagarian ti Dios, panid 574, impablaak dagiti Saksi ni Jehova.
Ania ti Sungbatyo?
• Ania ti piguratibo a panagani?
• Ania a mensahe ti ipakpakaammotayo?
• Apay a naballigi ti panangbiroktayo kadagiti agbalin nga adalan?
• Kasanotay a mataginayon ti talna bayat ti panagani?
• Apay nga agtultuloytayo a naragsak bayat ti panagani?
[Dagiti Ladawan iti panid 12]
Panangasaba idi umuna ken maika-20 a siglo
[Dagiti Ladawan iti panid 13]
Kas ken Pablo, ikagumaan dagiti agdama nga agan-ani a kasarita dagiti tattao iti sadinoman
[Ladawan iti panid 13]
Nainggayyeman nga ipakaammo ti naimbag a damag