Agtakderkayo a Naan-anay ken Addaan iti Natibker a Panamati
Panangtulong Kadagiti Agtutubo Babaen ti Naintiempuan nga Instruksion
NI Epafras ket maysa a Kristiano idi umuna a siglo a napan idiay Roma. Ngem adda naimbag a rason a mapampanunotna ti Colosas, maysa a siudad idiay Asia Minor. Inkasabana ti naimbag a damag sadiay ket awan duadua a natulonganna ti sumagmamano a taga Colosas nga agbalin nga adalan ni Jesu-Kristo. (Colosas 1:7) Maseknan unay ni Epafras kadagiti kapammatianna idiay Colosas, ta idiay Roma, insurat kadakuada ni apostol Pablo: “Ni Epafras . . . ipaw-itna kadakayo dagiti kablaawna, a kankanayon nga umag-agawa iti karkararagna maigapu kadakayo, tapno iti kamaudiananna makapagtakderkayo a naan-anay ken addaan natibker a panamati iti isuamin a pagayatan ti Dios.”—Colosas 4:12.
Kasta met itatta, nasged nga ikarkararag dagiti Kristiano nga amma ken inna ti naespirituan a pagimbagan dagiti annakda. Ikagkagumaan dagitoy a nagannak nga itukit ti panagayat iti Dios iti puspuso dagiti ubbingda tapno tumibkerda iti pammati.
Adu a Kristiano nga agtutubo ti nagpatulong no kasanoda a tamingen dagiti karit a maipasango kadakuada iti eskuelaan ken dadduma pay a lugar. Kinuna ti maysa a babai nga agtawen iti 15: “Dumegdegdeg dagiti parikutmi. Nakaam-amak unay ti biag. Masapulmi ti tulong!” Nasungbatan kadi dagiti dawat dagita nga agtutubo ken ti karkararag dagiti nadiosan a nagannak? Wen! Ti naibatay iti Biblia nga instruksion ket naipaay babaen “ti matalek ken masirib nga adipen.” (Mateo 24:45) Naipakita ditoy ti sumagmamano a literatura a nakatulong iti ginasut a ribu nga agtutubo tapno ‘makapagtakderda a naan-anay ken addaan natibker a panamati.’ Imutektekantayo ti dadduma kadagitoy.
“Kitaenyo . . . 15,000 a Kabbaro a Saksi!”
Idi Agosto 1941, adda 115,000 a nagtataripnong idiay St. Louis, Missouri, E.U.A., para iti kadakkelan a kombension dagiti Saksi ni Jehova a naangay iti daydi a tiempo. Iti maudi nga aldawna—ti “Aldaw Dagiti Ubbing”—agarup 15,000 nga ubbing ti nakatugaw iti asideg ti entablado a sipapasnek nga umim-imdeng bayat a nagpalawag ni Joseph F. Rutherford maipapan iti topiko a “Dagiti Annak ti Ari.” Idi dandanin malpas ti palawagna, kinuna ti 71 ti tawenna idin a Rutherford iti naamaan a timek:
“Dakayo amin . . . nga ubbing nga immanamongen . . . nga agtulnog iti Dios ken iti Arina, pangngaasiyo ta tumakderkayo.” Naggigiddan a timmakder dagiti ubbing. “Kitaenyo,” impukkaw ni Kabsat Rutherford, “nasurok a 15,000 a kabbaro a saksi ti Pagarian!” Adda kasta unay a panagpalakpak. Innayon ti nagpalawag: “Dakayo amin a mangaramid iti kabaelanna a mangisao kadagiti sabali ti maipapan iti pagarian ti Dios . . . , pangngaasiyo ta ibagayo ti Wen.” Simmungbat dagiti ubbing iti napigsa a “Wen!” Kalpasanna, imparangna ti baro a libro a Children, a naawat buyogen ti napaut a panagpalakpak.
Kalpasan daytoy makatukay a palawag, nagturong iti entablado ti atiddog a linia dagiti agtutubo, a sadiay inyawat kadakuada ni Kabsat Rutherford ti sagut a kopia ti baro a libro. Nakalua ti tallaong gapu iti naimatanganda. Kinuna ti maysa a nakaimatang iti pasamak: “Ti laeng bimmato a puso ti di matukay iti pannakakita kadagiti agtutubo a mangipakpakita iti naan-anay a panagtalek ken pammati iti Diosda a ni Jehova.”
Iti daydi nakallalagip nga asamblea, 1,300 nga agtutubo ti nabautisaran kas simbolo ti dedikasionda ken Jehova. Adu kadakuada ti nagtalinaed a natibker iti pammati agingga ita. Tumultulongda kadagiti lokal a kongregasion, agbolboluntarioda iti Bethel, wenno agserserbida kas misionero kadagiti sabali a pagilian. Pudno unay, ti “Aldaw Dagiti Ubbing” ken ti libro a Children ket nangipaay iti manayon nga epekto kadagiti adu a naganus a puso!
“Kasda la Dumteng iti Apagisu a Tiempo”
Bayat ti dekada 1970, tallo pay a libro ti impablaak dagiti Saksi ni Jehova a nangdanon kadagiti puso ti ginasut a ribu nga agtutubo. Dagitoy ket ti Panagimdeng iti Naindaklan a Mannursuro, Ti Kinaagtutuboyo—Pananggun-od ti Kasayaatan iti Dayta, ken Ti Librok Dagiti Estoria ti Biblia. Idi 1982, ti serye nga “Agimtuod Dagiti Agtutubo . . .” ti nangrugi nga agparang iti magasin nga Agriingkayo! Dagitoy nga artikulo ti nangtukay iti puspuso dagiti agtutubo ken nataengan. “Kada rabii, agyamyamanak iti Dios gapu iti pannakaipablaak dagita,” kinuna ti maysa nga agtawen iti 14. “Magustuak dagiti artikulo,” kinuna ti maysa nga agtawen iti 13, “kasda la dumteng iti apagisu a tiempo.” Umanamong dagiti nagannak ken dagiti nadutokan a Kristiano a panglakayen a dagitoy nga artikulo ket naintiempuan ken makagunggona.
Idi 1989, agarup 200 nga artikulo nga “Agimtuod Dagiti Agtutubo . . .” ti nagparang iti Agriingkayo! Iti “Nadiosan a Debosion” a Kombension Distrito iti daydi a tawen, nairuar ti libro a Dagiti Saludsod nga Iyimtuod ti Agtutubo—Dagiti Sungbat nga Epektibo. Nakatulong kadi dayta kadagiti agtutubo nga agtalinaed a natibker iti pammati? Tallo nga agtutubo ti nangisurat: “Daytoy a libro ket nakaskasdaaw a sagut kadakami tapno maawatanmi dagiti parikutmi ken tapno matamingmi ida. Agyamankami iti pannakaseknanyo iti pagimbaganmi.” Umanamong iti dayta ti nakaad-adu nga agbasbasa nga agtutubo iti intero a lubong.
“Pinennekna ti Bisinmi”
Idi 1999, nangpataud dagiti Saksi ni Jehova iti sabali pay a naintiempuan a kita ti instruksion para kadagiti agtutubo—ti video a Young People Ask—How Can I Make Real Friends? Sibabara a naabrasa dayta. Kinuna ti maysa nga agtawen iti 14: “Daytoy a video ti nangapektar iti rikriknak.” Maysa nga agsolsolo nga ina ti nagkuna: “Agbalinto dayta a paset ti regular a naespirituan a panagtaraonmi.” Kinuna ti maysa nga agtutubo a babai: “Makaparegta a maammuan a ti kasayaatan a Gayyemtayo, ni Jehova, pudno nga ay-ayaten ken maseknan kadagiti agtutubo iti sangalubongan nga organisasionna.”
Ania ti nagapuanan daytoy a video? Kuna dagiti agtutubo: “Natulongannak nga agaluad iti pannakikadkaduak, nga agsapul iti gagayyem iti kongregasion, ken manggayyem ken Jehova.” “Natulongannak a mangsango a situtured kadagiti kapatadak.” “Napatibkerna ti determinasionko nga agserbi ken Jehova iti inggat’ kabaelak.” Ken insurat ti maysa a pagassawaan: “Naimpusuan nga agyamankami kadakayo iti panangipaayyo kadakami iti daytoy a ‘taraon.’ Pinennekna ti bisinmi.”
Iti panangtungpalna iti inted-Dios nga annongenna, ti napulotan a “matalek ken masirib nga adipen” ket nangipaay iti naintiempuan a naespirituan a taraon kadagiti amin nga umawat iti dayta. Ket anian a rag-o a makita no kasano a ti kasta a Nainkasuratan nga instruksion tultulonganna dagiti agtutubo itatta a ‘makapagtakder a naan-anay ken addaan iti natibker a panamati iti isuamin a pagayatan ti Dios’!