Adda Kadi Pudpudno a Makapagkaykaysa Kadagiti Tattao?
ANIAMAN ti patpatienyo, nalabit umanamongkayo nga adda la ketdi dagiti mangipatpateg iti kinapudno iti nganngani amin a relihion. Mabalin nga adda dagiti Hindu, Katoliko, Judio, ken dadduma pay a tattao a mangapresiar unay iti pudno ken situtulok a mangsapul iti dayta. Ngem agparang a ti relihion ti mamagsisina iti sangatauan. Ti dadduma usarenda pay ketdi ti relihion para iti dakes a panggep. Makapagkaykaysanto ngata dagiti amin a napasnek a tattao manipud nadumaduma a relihion a mangipatpateg iti naimbag ken pudno? Makapagkaykaysada ngata a mangitungpal iti maymaysa a panggep?
Anian a makapaupay a makita a ti relihion ti makagapu iti kumarkaro a pannakabingaybingay! Utobenyo ti dadduma kadagitoy a panagdadangadang. Dagiti Hindu kinalabanda dagiti Budista idiay Sri Lanka. Iti nadumaduma a panagrarangetda, nangibukbok iti dara dagiti Protestante, Katoliko, ken Judio. “Dagiti Kristiano” nakigubatda kadagiti Muslim idiay Bosnia, Chechnya, Indonesia, ken Kosovo. Kasta met, idi Marso 2000, 300 a taga Nigeria ti natay gapu iti dua nga aldaw a dangadang a mainaig iti relihion. Wen, ti panaggiginnura gapu iti relihion rinubrobanna dagitoy nadawel a panagdadangadang.
Dagiti napasnek a tattao masansan a maupayda kadagiti kinadakes a maar-aramid iti nagan ti relihion. Kas pagarigan, adu a miembro ti simbaan ti marimon iti panangpanuynoy ti dadduma a simbaan kadagiti klero a nangabuso kadagiti ubbing. Nakaro ti pannakaupay dagiti dadduma a manamati gapu iti di panagtutunos kadagiti adu nga agkunkuna a Kristiano a sekta maipapan kadagiti isyu a kas iti homoseksualidad ken aborsion. Nalawag, ti relihion saanna a napagkaykaysa ti sangatauan. Ngem, kas ipakita dagiti sumaganad a kapadasan, adda dagiti talaga a mangipatpateg iti kinapudno a nadumaduma ti relihionda.
Mailiwda iti Kinapudno
Ni Fidelia ket napasnek ken debotado a managdaydayaw iti Catholic Church of San Francisco idiay La Paz, Bolivia. Agrukbab iti imahen ni Maria ken ikabilna dagiti kasayaatan a magatangna a kandela iti sango ti krusipiho. Linawas nga agdonar iti padi iti adu a taraon a maibunong kadagiti nakurapay. Nupay kasta, pimmusay ti lima kadagiti maladaga ni Fidelia sakbay a mabuniaganda. Idi kinuna ti padi kenkuana nga agsagsagaba amin dagiti annakna iti kasipngetan ti Limbo, nagsiddaaw ni Fidelia, ‘No naimbag ti Dios, apay nga agsagsagabada?’
Ti doktor a ni Tara ket napadakkel a kas maysa a Hindu idiay Kathmandu, Nepal. Kas panangsurotna kadagiti sinigsiglo kapautnan nga ugali dagiti kapuonanna, nagdaydayaw kadagiti dios kadagiti templo dagiti Hindu ken addada idolo iti pagtaenganna. Ngem pakaringgoran ni Tara dagiti saludsod a kas kadagitoy: Apay a kasta unay ti panagsagaba? Apay a matay dagiti tattao? Awan ti nasapulanna a makapnek a sungbat iti relihionna.
Iti sabali a bangir, dimmakkel ni Panya kas maysa a Budista iti maysa a pagtaengan iti abay ti maysa a kanal idiay Bangkok, Thailand. Naisuro kenkuana a ti panagsagaba ket maigapu kadagiti ar-aramid iti napalabas a biag ket maliklikan ti maysa a tao ti agsagaba no iwaksina dagiti amin a tarigagayna. Kas kadagiti dadduma a napasnek a Budista, naisuro kenkuana ti nauneg a panagraem iti kinasirib dagiti monghe a nakasuot iti duyaw a nagayad a kawes, a mapmapan iti balay tunggal agbannawag tapno dumawat iti limos. Kanayon ti narelihiosuan a panagmennamennana ken nagurnong kadagiti ladawan ni Buddha gapu iti pammatina a mangsalaknib dagitoy. Kalpasan ti nakaro a pannakaaksidentena a nangparalisado kenkuana manipud siket agingga iti sakana, binisita ni Panya dagiti monasterio dagiti Budista, a sipapasnek a nangnamnama iti namilagruan a pannakaagasna. Saan a naagasan wenno nalawlawagan iti naespirituan. Imbes ketdi, isu ket naigamer iti espiritismo ken nangrugi a nagan-anito.
Nayanak ni Virgil idiay Estados Unidos ket nakitipon kadagiti Black Muslim iti maysa a kolehio. Sireregta nga inwarasna dagiti literaturada, a mangibagbaga a ti puraw a tao ti Diablo. Kinunada a dayta ti makagapu no apay a nakaro ti kinadangkok dagiti puraw kadagiti nangisit. Nupay napasnek iti patpatienna, pakaringgoran ni Virgil dagitoy a saludsod: Kasano a dakes amin a puraw? Ken apay a nainaig ti kuarta iti adu a sermon?
Nupay dimmakkel ni Charo idiay South America a Katoliko ti kaaduan a tattao, isu ket maysa a napasnek a Protestante. Magustuanna ti di panagusar kadagiti imahen. Pakaragsakanna ti mapan iti kapilia iti kada Domingo tapno dumngeg iti emosional a seremonia, a ditoy ipukkawna ti “Aleluya!” ken makiraman iti sumaruno a narelihiosuan a panagkanta ken panagsala. Sipapasnek a patien ni Charo nga isu ket naisalakanen ken nayanak manen. Itedna iti simbaan ti apagkapullo ti sapulna, ket mangipatulod iti kuarta no agkiddaw ti paboritona nga ebanghelisador iti telebision iti kontribusion para kadagiti ubbing idiay Africa. Ngem idi dinamagna no apay a tutuoken ti naayat a Dios dagiti kararua idiay impierno, awan ti makapnek a sungbat ti pastor. Idi agangay, naduktalanna met a saan a nausar dagiti kontribusionna a pangtulong kadagiti ubbing idiay Africa.
Nupay nagduduma ti patpatien dagitoy lima nga indibidual, adda pagpapadaanda. Napateg kadakuada ti kinapudno ken sipapasnek a sinapsapulda dagiti napudno a sungbat kadagiti saludsodda. Ngem talaga kadi a makapagkaykaysada iti pudno a panagdayaw? Sungbatan ti sumaganad nga artikulo dayta a saludsod.
Ladawan iti panid 4]
Makapagkaykaysa kadi a talaga dagiti tattao a nagduduma ti nalikudanda?
[Picture Credit Line iti panid 3]
G.P.O, Jerusalem