Ti Pudno a Panagdayaw Pagkaykaysaenna Dagiti Tattao
NUPAY mabingaybingay ti sangatauan gapu iti relihion, adda bileg ti panagdayaw iti maymaysa a pudno a Dios a mamagkaykaysa kadagiti tattao. Idi a ti Israel ti napili a nasion ti Dios, adu a napasnek a Gentil ti naguyugoy iti pudno a panagdayaw. Kas pagarigan, pinanawan ni Ruth dagiti didiosen iti ilina a Moab ket kinunana ken ni Noemi: “Dagiti kailiam isudanto dagiti kailiak, ket ti Diosmo Diosko.” (Ruth 1:16) Idi umuna a siglo K.P., adu a Gentil ti nagbalin a managdaydayaw iti pudno a Dios. (Aramid 13:48; 17:4) Idi rinugian dagiti apostol ni Jesus ti agdaliasat iti adayo a luglugar tapno ikasabada ti naimbag a damag, adda dagiti dadduma pay a napasnek a tattao a nagkaykaysa iti panagdayaw iti pudno a Dios. “Bimmaw-ingkayo iti Dios manipud kadagiti idoloyo tapno agpaadipenkayo iti sibibiag ken pudno a Dios,” insurat ni apostol Pablo. (1 Tesalonica 1:9) Adda kadi ti kasta a mamagkaykaysa a bileg ti panagdayaw iti pudno a Dios ita?
Ipetteng dagiti managduadua a saan nga umiso ti agsao maipapan kadagiti “pudno a managdaydayaw” wenno “ti pudno a Dios.” Mabalin a kasta ti mariknada agsipud ta awan ti ammoda maipapan iti aniaman a gubuayan a pakaammuan iti kinapudno. Ngem dagiti agsapsapul iti kinapudno a naggapu iti nadumaduma a kasasaad mabigbigda a ti panagdayaw ket saan a personal a panagpili. Ti laeng Namarsua iti amin a banag, ni Jehova a Dios, ti kakaisuna a maikari a pagdayawantayo. (Apocalipsis 4:11) Isu ti pudno a Dios, ket adda kalinteganna a mangikeddeng no kasano ti rumbeng a panagdayaw kenkuana.
Tapno matulongantayo a mangtarus kadagiti ipaannurotna, impaayannatayo ni Jehova iti impormasion babaen ti Saona, ti Biblia. Nganngani amin a tao ditoy daga mabasada ti intero a Biblia wenno ti dadduma a pasetna. Maysa pay, kinuna ti Anak ti Dios: “No agtalinaedkayo iti Saok, . . . maammuanyonto ti kinapudno.” (Juan 8:31, 32) Mabalin ngarud a maammuan ti kinapudno. Minilion a nasingpet panagpuspusoda a tattao a nadumaduma ti narelihiosuan a nalikudanda ti situtured a nangawat iti kinapudno ken nagkaykaysadan iti pudno a panagdayaw.—Mateo 28:19, 20; Apocalipsis 7:9, 10.
Sangalubongan a Panagkaykaysa iti Panawentayo!
Ti naisangsangayan a padto iti libro ti Biblia a Sofonias dakamatenna ti panagtitipon dagiti tattao a nagduduma ti nalikudanda. Kastoy ti kunana: ‘[Ni Jehova] itednanton kadagiti ili ti panagbalbaliw nga agturong iti nasin-aw a pagsasao, tapno isuda amin umawagda iti nagan ni Jehova, tapno agserbida kenkuana iti abagan-abaga.’ (Sofonias 3:9) Anian a nagpintas a panangiladawan kadagiti nagbalbaliw a tattao a nagkaykaysa nga agserserbi iti Dios!
Kaano a mapasamak daytoy? Kunaen ti Sofonias 3:8: “‘Agtultuloykayo a manginanama kaniak,’ kuna ni Jehova, ‘agingga iti aldaw nga itatakderko a mangkamkam, ta ti hudisial a pangngeddengko isu ti panangummong kadagiti nasion, tapno mangummongak a sangsangkamaysa kadagiti pagarian, tapno ibukbokko kadakuada ti panangkondenarko, isuamin a sumsumged nga ungetko; ta babaen iti apuy ti regtak maalun-onto ti intero a daga.’” Wen, bayat ti panawen a panangurnong ni Jehova kadagiti nasion ngem sakbay nga ibukbokna kadakuada ti sumsumged nga ungetna, itdenna kadagiti naemma iti daga ti panagbalbaliw nga agturong iti nasin-aw a pagsasao. Itan dayta a tiempo, ta maur-urnongen dagiti amin a nasion iti gubat ti naindaklan nga aldaw ti Dios a Mannakabalin-amin iti Armagedon.—Apocalipsis 16:14, 16.
Itden ni Jehova ti nasin-aw a pagsasao iti ilina tapno agkaykaysada. Daytoy baro a pagsasao iramanna ti umiso a pannakatarus iti kinapudno iti Biblia maipapan iti Dios ken iti pangpanggepna. Ti panagsao iti nasin-aw a pagsasao ramanenna ti panamati iti kinapudno, panangisuro iti dayta kadagiti sabsabali, ken panagbiag a mayannurot kadagiti linteg ken prinsipio ti Dios. Sapulenna ti panangliklik iti mamagsisina a politika ken panangikkat kadagiti managimbubukodan a kababalin manipud puso, kas iti panangidumduma iti puli ken ti mamagsisina a nasionalismo a pakabigbigan daytoy a lubong. (Juan 17:14; Aramid 10:34, 35) Daytoy a pagsasao ket masursuro dagiti amin a nasingpet panagpuspusoda nga adda ayatda iti kinapudno. Dagiti lima a tattao a nadakamat iti napalabas nga artikulo ket dati a saan nga agkakarelihionan. Usigenyo no kasano a nagkaykaysada itan iti panagdayaw iti maymaysa ken kakaisuna a pudno a Dios, ni Jehova.
Nagkaykaysada iti Pudno a Panagdayaw
Idi a ni Fidelia, ti debotado a Romano Katoliko, ket gimmatang iti Biblia nga usaren ti anakna a babai iti leksionna idiay eskuelaan, kiniddawna iti padida nga ilawlawagna babaen ti Biblia no ania ti napasamak kadagiti lima a pimmusay nga annakna. “Anian a pannakaupayko!” kinunana. Isut’ gapuna nga idi simmarungkar kenkuana dagiti Saksi ni Jehova, dinamagna kadakuada ti isu met laeng a saludsod. Idi mabasana iti mismo a Bibliana ti kinapudno maipapan iti kasasaad dagiti natay, naamirisna no kasano nga isu ket inallilaw ti simbaan. Naammuanna nga awan ti puot dagiti natay ket saanda ngarud nga agsagsagaba idiay Limbo wenno iti uray sadinoman. (Salmo 146:4; Eclesiastes 9:5) Imbelleng ni Fidelia dagiti amin a narelihiosuan nga imahenna, pinanawanna ti simbaan, ket inrugina ti nagadal iti Biblia. (1 Juan 5:21) Sangapulo a tawenen a siraragsak nga isursurona ti Nainkasuratan a kinapudno kadagiti sabsabali.
Ni Tara a taga Kathmandu ket immakar iti maysa a pagilian a bassit laeng ti templo dagiti Hindu. Bimmisita ngarud iti maysa a simbaan dagiti Metodista iti namnamana a mapennek ti naespirituan a kasapulanna. Ngem awan ti nasarakanna a sungbat iti saludsodna maipapan iti panagsagaba ti tao. Kalpasanna, nasarakan dagiti Saksi ni Jehova ni Tara ket intukonda ti panangyadalda iti Biblia kenkuana. Kinuna ni Tara: “Naammuak a ti Dios ti ayat ket saan nga isut’ makinggapuanan iti amin a panagsagaba ditoy lubong . . . Naragsakanak iti namnama a baro a lubong nga adda talna ken panagtutunos.” (Apocalipsis 21:3, 4) Imbelleng ni Tara dagiti imahen ti Hinduismo nga adda kenkuana, insardengna ti panangannurotna kadagiti narelihiosuan nga ugali iti ilina, ken nasapulanna ti pudno a kinaragsak iti panangtulongna a mangpennek iti naespirituan a kasapulan dagiti sabsabali kas maysa a Saksi ni Jehova.
Ti Budista a ni Panya ket maysa a mammadles idi damo a maam-ammo dagiti Saksi ni Jehova idiay Bangkok, isu a naguyugoy kadagiti padto ti Biblia. Insalaysay ni Panya: “Idi naammuak no apay a naiduma dagiti agdama a kasasaad iti damo a panggep ti Namarsua ken no kasano nga impamuspusanna a pukawen dagiti parikut a pinataud dagiti nangilaksid kenkuana ken iti kinasoberanona, kas man la adda naikkat nga abungot kadagiti matak. Agtutunos unay ti amin a maipapan iti mensahe ti Biblia. Nasursurok nga ayaten ni Jehova kas maysa a persona; daytoy ti nanggutugot kaniak a mangaramid iti ammok nga umiso. Sigagagarak a tumulong iti dadduma a mangilasin iti nagdumaan ti natauan a sirib ken nadiosan a sirib. Ti pudno a sirib ket pudno a binalbaliwanna ti biagko.”
Idi agangay, pinagduaduaan unay ni Virgil ti narelihiosuan a patpatienna. Imbes nga agkararag iti Dios tapno matulongan dagiti nangisit a tattao ken ti ibilbilangna nga organisasion ti maysa a puli a kasla mangpatpataud iti gura kadagiti puraw, inkararagna a maammuanna koma ti kinapudno, aniaman dayta, sadinoman ti pakasarakan iti dayta. Insalaysay ni Virgil: “Idi mariingak iti simmaganad nga aldaw kalpasan ti naimpusuan a panagkararagko, nakakitaak iti maysa a magasin a Pagwanawanan idiay balay. . . . Mabalin a naipasirok daytoy iti ruangan.” Saan a nagbayag, sipapasnek a nakipagadal iti Biblia kadagiti Saksi ni Jehova. Intuloyna: “Napnekak iti kaunaan a gundaway iti biagko. . . . Nangrugi a makitak ti sinamar ti namnama.” Di nagbayag, naikaykaysa ni Virgil kadagidiay mangipapaay kadagiti tattao iti kakaisuna a pudno a namnama kas nailanad iti Sao ti Dios, ti Biblia.
Ni Charo a taga Latin America ket naay-ayo idi makita ti maysa a Saksi nga agnagan iti Gladys a marigrigatan daytoy kadagiti babassit nga annakna ket timmulong babaen ti panangitulodna kenkuana iti tiendaan. Idi agangay, inawat ni Charo ti indiaya ni Gladys a libre a panagadal iti Biblia iti pagtaengan. Nasdaaw ni Charo idi naammuanna iti bukodna a Biblia a saan nga amin a naimbag ket mapan idiay langit no di ket paraburan met ni Jehova dagiti tattao ditoy daga iti agnanayon a biag. (Salmo 37:11, 29) Sangapulo ket lima a tawenen nga iranranud ni Charo a mismo daytoy a namnama kadagiti sabsabali.
Iladawanyo iti panunotyo ti intero a lubong a pagnanaedan dagiti napudno a tattao nga agkaykaysa nga agdaydayaw ken Jehova, ti kakaisuna a pudno a Dios! Saan laeng nga imahinasion daytoy. Kasta ti inkari ni Jehova. Babaen ken ni mammadtona a Sofonias, kinuna ti Dios: “Sigurado a mangiteddaakto iti tengngam iti maysa nga ili a napakumbaba ken nanumo, ket pudno nga agkamangdanto iti nagan ni Jehova, . . . Saandanto nga agaramid iti kinakillo, wenno uray agsao iti kinaulbod, saanto met a masarakan kadagiti ngiwatda ti dila a manangallilaw; . . . ket awanto ti asinoman a mamagpigerger kadakuada.” (Sofonias 3:12, 13) No paginteresanyo daytoy a kari ti Dios, ipapusoyo daytoy a balakad ti Biblia: “Sapulenyo ni Jehova, dakayo amin a naemma iti daga, a nangannurot iti bukodna a hudisial a pangngeddeng. Sapulenyo ti kinalinteg, sapulenyo ti kinaemma. Nalabit maitalimengkayo iti aldaw ti unget ni Jehova.”—Sofonias 2:3.