Itultuloyyo ti Agserbi ken Jehova Buyogen ti Natibker a Puso
“Ti pusok natibker, O Dios, ti pusok natibker.”—SALMO 57:7.
1. Apay a makapagtalektayo a kas ken David?
MATULONGANNATAYO ni Jehova a tumibker iti Nakristianuan a pammati tapno makapagtalinaedtayo iti pudno a Kinakristiano kas dedikado nga adipenna. (Roma 14:4) Gapuna, makapagtalektayo kas ken salmista David, a natignay a mangikanta: “Ti pusok natibker, O Dios.” (Salmo 108:1) No natibker ti pusotayo, matignaytayo a mangtungpal iti dedikasiontayo iti Dios. No isu ti pagpannurayantayo iti panangiwanwan ken bileg, saantayto a maisin, tumibker ti determinasion ken pammatitayo kas manangsalimetmet iti kinatarnaw, ‘a kankanayon nga aduan iti aramiden iti trabaho ti Apo.’—1 Corinto 15:58.
2, 3. Apay a napateg ti pammagbaga ni Pablo a nairekord iti 1 Corinto 16:13?
2 Iti pammagbaga a naiturong kadagiti pasurot ni Jesus sadi Corinto ngem sigurado nga agaplikar kadagiti agdama a Kristiano, kinuna ni apostol Pablo: “Agtalinaedkayo a siririing, agtakderkayo a sititibker iti pammati, agtalinaedkayo a malalaki, bumilegkayo.” (1 Corinto 16:13) Iti Griego, tunggal maysa kadagitoy a bilin ket adda iti present tense. No kasta, idagdagadagna ti agtultuloy a tignay. Apay a napateg daytoy a patigmaan?
3 ‘Makapagtalinaedtayo a siririing’ iti naespirituan no sarangtentayo ti Diablo ken agtalinaed a nadekket iti Dios. (Santiago 4:7, 8) Ti panagpannuray ken Jehova pagtalinaedennatayo a nagkaykaysa ken ‘makapagtakder a sititibker iti Nakristianuan a pammati.’ Datayo—agraman ti adu a kakaduatayo a babbai—‘agtalinaedtayo a malalaki’ babaen ti situtured a panagserbi iti Dios kas manangiwaragawag iti Pagarian. (Salmo 68:11) ‘Bumilegtayo’ no agtultuloy a dawatentayo iti nailangitan nga Amatayo ti bileg a mangaramid iti pagayatanna.—Filipos 4:13.
4. Ania ti nangiturong iti panagpabautisartayo kas Kristiano?
4 Dimmasigtayo iti pudno a pammati idi naan-anay a nagdedikartayo ken ni Jehova ken insimbolotayo dayta babaen ti pannakaitaneb. Ngem ania ti nangiturong iti bautismotayo? Umuna, nagadaltayo iti umiso a pannakaammo iti Sao ti Dios. (Juan 17:3) Daytoy ti nangpatanor iti pammati ket natignaytayo nga agbabawi, nga imparangarangtayo ti pudno a ladingit gapu kadagiti naglabas a basoltayo. (Aramid 3:19; Hebreo 11:6) Kalpasanna nagbalbaliwtayo, nga inwaksitayo dagiti dakes nga aramid tapno makapagbiagtayo a maitunos iti pagayatan ti Dios. (Roma 12:2; Efeso 4:23, 24) Sinaruno daytoy ti naimpusuan a panagdedikartayo ken ni Jehova babaen ti kararag. (Mateo 16:24; 1 Pedro 2:21) Kiniddawtayo iti Dios ti nadalus a konsiensia ket nabautisarantayo kas simbolo ti dedikasiontayo kenkuana. (1 Pedro 3:21) Ti panangutob kadagitoy nga addang tulongannatayo a sipapanunot iti kinapateg ti agtultuloy a panagregget a mangtungpal iti dedikasiontayo ken agtultuloy nga agserbi ken ni Jehova buyogen ti natibker a puso.
Itultuloyyo ti Gumun-od iti Umiso a Pannakaammo
5. Apay a nasken nga itultuloytayo ti gumun-od iti pannakaammo iti Kasuratan?
5 Tapno matungpaltayo ti dedikasiontayo iti Dios, nasken nga itultuloytayo a gumun-od iti pannakaammo iti Kasuratan a mangpabileg iti pammatitayo. Anian a nagragsak ti gumun-od iti naespirituan a taraon idi damo a naammuantayo ti kinapudno a naggapu iti Dios! (Mateo 24:45-47) Nananam dagita a “taraon”—ken makapasalun-atda iti naespirituan. Ita, napateg nga itultuloytayo ti gumun-od iti nasustansia a naespirituan a taraon tapno mataginayontayo ti natibker a puso kas dedikado nga adipen ni Jehova.
6. Kasano a natulongankayo a mangpatanor iti naimpusuan a panagyaman maigapu iti kinapudno a linaon ti Biblia?
6 Masapul a pagreggetan ti gumun-od iti kanayonan a pannakaammo iti Kasuratan. Kasla panagbirok dayta iti nailemmeng a gameng—agkalikagum iti panagporsegi. Ngem anian a makagunggona no masarakan “ti mismo a pannakaammo iti Dios”! (Proverbio 2:1-6) Idi damo nga inyadalannakayo iti Biblia ti maysa nga agibumbunannag iti Pagarian, nalabit inusarna ti libro a Pannakaammo a Mangiturong iti Biag nga Agnanayon. Mabalin a sumagmamano a tiempo ti binusbosyo tapno mausig ti maysa a kapitulo, nalabit nasursurok ngem iti maminsan a panagadal. Nakasursurokayo idi mabasa ken mausig dagiti naisitar a kasuratan. Nailawlawag no narigat a maawatan ti maysa a punto. Nagsagana a naimbag ti nangyadal kadakayo iti Biblia, inkararagna ti espiritu ti Dios ken tinulongannakayo a mangpatanor iti naimpusuan a panagyaman maigapu iti kinapudno.
7. Kasano a makualipikar ti maysa a tao a mangisuro iti sabsabali iti kinapudno manipud iti Dios?
7 Maiparbeng dayta a panagregget, ta insurat ni Pablo: “Asinoman a berbal a nasursuruan iti sao mangiranud koma iti amin a naimbag a bambanag iti daydiay mangipaay iti kasta a berbal a panangisuro.” (Galacia 6:6) Ti Griego a teksto a nausar ditoy ipasimudaagna a dagiti sursuro ti Sao ti Dios ket naitukit iti isip ken puso daydiay “berbal a nasursuruan iti sao.” Ti kasta a pannakaisuroyo ti mangkualipikar kadakayo a mangisuro kadagiti sabsabali. (Aramid 18:25) Tapno matungpalyo ti dedikasionyo, nasken a taginayonenyo ti naespirituan a salun-at ken kinatibkeryo babaen ti agtultuloy a panangadal iti Sao ti Dios.—1 Timoteo 4:13; Tito 1:13; 2:2.
Laglagipenyo ti Panagbabawi ken Panagbalbaliwyo
8. Kasano a posible a mataginayon ti nadiosan a kondukta?
8 Malagipyo pay kadi ti bang-ar a nariknayo idi naammuanyo ti kinapudno, nagbabawikayo, ket nariknayo ti pammakawan ti Dios maibatay iti pammati iti pangsubbot a daton ni Jesus? (Salmo 32:1-5; Roma 5:8; 1 Pedro 3:18) Diyo la ketdi kayat ti agsubli iti dakes a panagbiag. (2 Pedro 2:20-22) Ti maysa a makatulong isu ti regular a panagkararag ken ni Jehova tapno mataginayon ti nadiosan a kondukta, matungpal ti dedikasionyo, ken maitultuloyyo ti matalek a panagserbi ken Jehova.—2 Pedro 3:11, 12.
9. Gapu ta inwaksitayon dagiti dakes nga aramid, ania ti itultuloytayo nga aramiden?
9 Gapu ta nagbalbaliwkayon babaen ti panangiwaksiyo kadagiti dakes nga aramid, itultuloyyo a kiddawen iti Dios a patibkerenna ti pusoyo. No ar-arigen, kasla naitawtawkayo iti sabali a dalan ngem nagkonsultakayo iti mapagtalkan a mapa isu a nabaelanyo ti nagna iti umiso a dalan. Dikay paiwawa ita. Kanayon nga agpannuraykayo iti panangiwanwan ti Dios, ken determinado nga agtalinaed iti dalan ti biag.—Isaias 30:20, 21; Mateo 7:13, 14.
Diyo Pulos Liplipatan ti Dedikasion ken Bautismoyo
10. Ania a bambanag ti laglagipentayo mainaig iti dedikasiontayo iti Dios?
10 Laglagipenyo a nagdedikarkayo ken Jehova babaen ti kararag, a tarigagayanyo ti agserbi a simamatalek iti agnanayon. (Judas 20, 21) Ti dedikasion ipamatmatna ti pannakailasin,wenno pannakaisina, agpaay iti sagrado a panggep. (Levitico 15:31; 22:2) Ti dedikasionyo ket saan a temporario a pannakitulag ken saan a pannakikumit iti tao. Maysa dayta a permanente a panagdedikar iti Sapasap a Soberano, ket kalikagumanna ti tungpal-biag a kinasungdo iti Dios. Wen, ‘agbiag wenno mataytayo, kukuanatayo ni Jehova.’ (Roma 14:7, 8) Naragsaktayo no agpasakuptayo iti pagayatanna ken no agtultuloytayo nga agserbi kenkuana buyogen ti natibker a puso.
11. Apay a nasken a laglagipenyo ti bautismoyo ken ti kaipapananna?
11 Kanayon a laglagipenyo ti bautismoyo kas simbolo ti naimpusuan a panagdedikaryo iti Dios. Awan ti nangpilit kadakayo nga agpabautisar gapu ta dakayo a mismo ti nagdesision. Determinadokayo kadi ita a sipapakinakem a tumunos iti pagayatan ti Dios agingga a sibibiagkayo? Kiniddawyo iti Dios ti nadalus a konsiensia ket nabautisarankayo kas simbolo ti dedikasionyo kenkuana. Taginayonenyo dayta nasayaat a konsiensia babaen ti panangtungpal iti dedikasionyo, iti kasta masagrapyo ti nabaknang a bendision ni Jehova.—Proverbio 10:22.
Adda Paset ti Pakinakemyo
12, 13. Kasano a nainaig ti nakemtayo iti dedikasion ken bautismo?
12 Pudno a ti dedikasion ken bautismoyo nangyegda iti dakkel a bendision iti minilion a tattao iti intero a daga. Idi insimbolotayo ti dedikasiontayo iti Dios babaen ti panagpabautisar, nataytayo mainaig iti dati a kabibiagtayo ngem saan no mainaig iti nakemtayo. Kas manamati a pudno a nasursuruan, sipapakinakem a nagdedikartayo iti Dios babaen ti kararag ket nagpabautisartayo. Ti panagdedikar ken panagbautisar kalikagumanna nga ammuentayo no ania ti pagayatan ti Dios sa boluntario nga aramiden dayta. (Efeso 5:17) Iti kasta, tultuladentayo ni Jesus, a sipapakinakem a nangibati iti trabahona a panagallawagi, nagpabautisar, ket naan-anay nga impamaysana ti panagaramid iti pagayatan ti nailangitan nga Amana.—Salmo 40:7, 8; Juan 6:38-40.
13 Panggep ni Jehova a Dios nga agbalin a ‘perpekto [ti Anakna] babaen dagiti panagsagaba.’ Nasken ngarud nga usaren ni Jesus ti nakemna tapno simamatalek a maibturanna dagita a panagsagaba. Tapno maaramidanna dayta, nangidaton ni Jesus “kadagiti araraw ken kasta met kadagiti dawat . . . buyogen dagiti napigsa nga ikkis ken lulua, ket isu naipanayag buyogen ti pannakaanamong gapu iti nadiosan a butengna.” (Hebreo 2:10, 18; 5:7, 8) No iparangarangtayo ti umasping a nadayaw a panagbuteng iti Dios, masiguradotayo a ‘maipangagtayo buyogen ti anamong,’ ket makapagtalektayo a patibkerennatayo ni Jehova kas dedikado a Saksina.—Isaias 43:10.
Mataginayonyo ti Natibker a Puso
14. Apay a nasken nga inaldaw a basaentayo ti Biblia?
14 Ania ti tumulong kadakayo a mangtaginayon iti natibker a puso ket iti kasta maitungpalyo ti dedikasionyo iti Dios? Tapno ad-adu pay ti magun-odyo a pannakaammo iti Sao ti Dios, inaldaw a basaenyo ti Biblia. Daytoy ti kanayon nga idagadag “ti matalek ken masirib nga adipen” nga aramidentayo. Kasapulan ti kasta a pammagbaga gapu ta ti panangitungpal iti dedikasiontayo kalikagumanna ti agtultuloy a pannagnatayo iti kinapudno maipapan iti Dios. No ammo ti organisasion ni Jehova nga ulbod dagiti isursurona, dina koma iparegta kadagiti Saksi ni Jehova ken kadagidiay kaskasabaanda ti panagbasa iti Biblia.
15. (a) Ania dagiti nasken a panunoten no mangaramid iti desision? (b) Apay a maikuna a maikadua laeng kadagiti Kristiano ti sekular a trabaho?
15 No mangaramid iti desision, kanayon a panunotenyo no kasano nga apektaranda ti panangitungpalyo iti dedikasionyo ken ni Jehova. Mabalin a mainaig daytoy iti sekular a trabahoyo. Ikagumaanyo kadi a makatulong dayta kadakayo a mangitandudo iti pudno a panagdayaw? Nupay napaneknekan ti kaaduan nga amo a mapagpiaran ken episiente dagiti dedikado a Kristiano, nadlawda met a saan nga ambisioso dagiti Saksi ni Jehova a rumang-ay iti lubong ket dida met makikompetensia iti dadduma kadagiti nangato a saad. Saan ngamin a ti kinabaknang, dayaw, kinalatak, wenno pannakabalin ti kalat dagiti Saksi. Para kadagidiay mangitungtungpal iti dedikasionda iti Dios, ti kapatgan isu ti panangaramid iti pagayatan ti Dios. Maikadua laeng iti biagda ti sekular a trabaho a makaipaay kadakuada kadagiti kasapulan iti biag. Kas ken apostol Pablo, ti kangrunaan a trabahoda isu ti Nakristianuan a ministerio. (Aramid 18:3, 4; 2 Tesalonica 3:7, 8; 1 Timoteo 5:8) Iyun-unayo kadi iti biagyo dagiti interes ti Pagarian?—Mateo 6:25-33.
16. Ania ti maaramidantayo no ti nalabes a pannakaringgor aramidenna a narigat ti panangitungpal iti dedikasiontayo iti Dios?
16 Dadduma ti nalabit gistay linapunos ti nadumaduma a pakaringgoran sakbay a naadalda ti kinapudno. Ngem anian a nagburayok ti pusoda iti rag-o, panagyaman, ken panagayat iti Dios idi inawatda ti namnama iti Pagarian! Ti panangusig kadagiti bendision a tinagiragsakda sipud idin ti nalabit makatulong iti panangitungpalda iti dedikasionda ken ni Jehova. Iti sabali a bangir, kasano no malpes ti “sao ti Dios” gapu iti nalabes a pannakaringgor kadagiti parikut a gagangay iti biag iti daytoy agdama a sistema, no kasano a dagiti siit lapdanda a dumakkel ken agbunga dagiti bin-i? (Lucas 8:7, 11, 14; Mateo 13:22; Marcos 4:18, 19) No madlawyo a mangrugi a mapasamak daytoy kadakayo wenno iti pamiliayo, iyallatiwyo ti pakaringgoranyo ken ni Jehova ket ikararagyo a tulongannakayo a mangparayray iti ayat ken apresasionyo. No iyallatiwyo kenkuana dagiti pakadagsenanyo, saranayen ken pakirdennakayo nga agtultuloy nga agserbi kenkuana a siraragsak buyogen ti natibker a puso.—Salmo 55:22; Filipos 4:6, 7; Apocalipsis 2:4.
17. Kasano a posible a madaeran dagiti nakaro a pakasuotan?
17 Itultuloyyo ti agkararag a regular ken Jehova a Dios, no kasano a nagkararagkayo idi nagdedikarkayo kenkuana. (Salmo 65:2) No masulisog nga agaramid iti dakes wenno maipasango iti nakaro a pakasuotan, dawaten ti panangiwanwan ti Dios ket agpatulong kenkuana a mangannurot iti dayta. Laglagipenyo ti kinapateg ti pammati, ta insurat ni adalan a Santiago: “No ti asinoman kadakayo agkurang iti sirib [a mangdaer iti maysa a pakasuotan], agtultuloy koma nga agdawat iti Dios, ta isu mangted a sipaparabur kadagiti isuamin ken awanan panangumsi; ket maitedto dayta kenkuana. Ngem isu agtultuloy koma nga agdawat buyogen ti pammati, a saan a pulos agduadua, ta ti agduadua umasping iti dalluyon ti baybay nga iduron ti angin ket maipalpallayog. Iti kinapudnona, saan koma a pagarupen dayta a tao nga umawatto iti aniaman manipud ken Jehova; isu ket di makapangngeddeng a tao, di agtaltalinaed kadagiti amin a dalanna.” (Santiago 1:5-8) No kasla mangdaeg ti pakasuotan, makasiguradotayo iti daytoy: “Awan ti sulisog a nangkemmeg kadakayo malaksid iti kadawyan kadagiti tattao. Ngem ti Dios matalek, ket saannanto nga ipalubos a masulisogkayo iti labes ti kabaelanyo nga itured, no di ket maigiddan iti pannakasulisog aramidennanto met ti dalan a pagruaran tapno mabalinanyo nga ibturan dayta.”—1 Corinto 10:13.
18. Ania ti aramidentayo no adda ilimlimedtayo a serioso a basol a mangpakpakapuy iti determinasiontayo a mangtungpal iti dedikasiontayo ken ni Jehova?
18 Kasano no adda ilimlimedyo a serioso a basol a mangburburibor iti konsiensiayo ken mangpakpakapuy iti determinasionyo a mangtungpal iti dedikasionyo iti Dios? No agbabawikayo, maliwliwakayo iti pannakaammo a ni Jehova ‘dina umsien ti puso a nadunor ken naidagel.’ (Salmo 51:17) Agpatulongkayo kadagiti naayat a Kristiano a panglakayen, nga ammoyo—a tuladenda ni Jehova—ket dida tagilag-anen ti tarigagayyo a mangisubli iti nasayaat a relasionyo iti nailangitan nga Ama. (Salmo 103:10-14; Santiago 5:13-15) Apaman a napabaro ti naespirituan a bileg ken natibker a puso, nalintegto ti pannagnayo ket maitungpalyo ti dedikasionyo iti Dios.—Hebreo 12:12, 13.
Itultuloyyo ti Agserbi Buyogen ti Natibker a Puso
19, 20. Apay a napateg nga itultuloytayo a tungpalen ti dedikasiontayo?
19 Kadagitoy napeggad a tiempo, nasken a naaneptayo a mangitungpal iti dedikasiontayo ken itultuloy nga agserbi iti Dios buyogen ti natibker a puso. Kinuna ni Jesus: “Ti nakapagibtur agingga iti panungpalan isunto ti maisalakan.” (Mateo 24:13) Yantangay agbibiagtayo “kadagiti maudi nga aldaw,” mabalin a dumteng ti panungpalan iti aniaman a kanito. (2 Timoteo 3:1) Maysa pay, awan kadatayo ti makasigurado no sibibiagtayo pay iti sumaruno nga aldaw. (Santiago 4:13, 14) Gapuna, napateg nga itultuloytayo a tungpalen ti dedikasiontayo itan!
20 Impaganetget daytoy ni apostol Pedro iti maikadua a suratna. Impatuldona a nadadael dagiti nadangkes idi panawen ti Layus ket madadaelto met ti simboliko a daga, wenno ti dakes a kagimongan dagiti tattao, inton “aldaw ni Jehova.” Gapuna, kinuna ni Pedro: “Anian a kita ti tattao ti rebbeng a pagbalinanyo kadagiti nasantuan a panagbibiag ken ar-aramid ti nadiosan a debosion”! Indagadagna met kadakuada: “Dungdungnguen, nga addaan iti daytoy naipakpakauna a pannakaammo, agaluadkayo tapno saankayo a mayadayo [babaen dagiti ulbod a mannursuro ken nadangkes a tattao] ket matnagkayo manipud bukodyo a kinatibker.” (2 Pedro 3:5-17) Anian a nakalkaldaang no maiwawa ti maysa a bautisado ket matay a dina nataginayon ti natibker a puso!
21, 22. Kasano a dagiti sasao iti Salmo 57:7 napaneknekan a pudno iti kaso ni David ken kadagiti pudno a Kristiano?
21 Ad-adda a mapabileg ti determinasionyo a mangtungpal iti dedikasionyo iti Dios no laglagipenyo ti naragsak nga aldaw ti bautismoyo ken agpatulong iti Dios tapno makaay-ayo iti pusona ti sasao ken aramidyo. (Proverbio 27:11) Nikaanoman saan a paayen ni Jehova dagiti adipenna, isu a nasken nga agmatalektayo kenkuana. (Salmo 94:14) Impakitana ti pannakipagrikna ken asina idi kineltayna ti plano dagiti kabusor ket inispalna ni David. Gapu ta agyaman iti dayta, inyebkas ni David ti natibker, di maisin, nga ayatna iti Nangispal kenkuana. Naimpusuan nga inkantana: “Ti pusok natibker, O Dios, ti pusok natibker. Agkantaakto ken mangipaayak iti samiweng.”—Salmo 57:7.
22 Kas ken David, saan a nagpangadua dagiti pudno a Kristiano iti debosionda iti Dios. Buyogen ti natibker a puso, ipagapuda ken ni Jehova ti pannakaispal ken pannakaisalakanda, a sirarag-o a kantaanda iti pammadayaw. No natibker ti pusoyo, agtalek dayta iti Dios, ket iti tulongna matungpalyo ti dedikasionyo. Wen, mabalinyo ti mayasping iti “daydiay nalinteg,” a maipapan kenkuana inkanta ti salmista: “Saanto a mabuteng uray iti dakes a damag. Ti pusona natibker, napagkammatalek ken Jehova.” (Salmo 112:6, 7) Babaen ti pammati ken naan-anay a panagtalek iti Dios, matungpalyo ti dedikasionyo ken makapagtultuloykayo nga agserbi ken ni Jehova buyogen ti natibker a puso.
Malagipyo Pay Kadi?
• Apay a nasken nga itultuloytayo ti gumun-od iti umiso a pannakaammo iti Biblia?
• Apay a sipapanunottayo koma iti inaramidtayo a panagbabawi ken panagbalbaliw?
• Kasano a makagunggona kadatayo ti pananglagip iti dedikasion ken bautismotayo?
• Ania ti tumulong kadatayo a makapagtultuloy nga agserbi ken ni Jehova buyogen ti natibker a puso?
[Dagiti Ladawan iti panid 18]
Makapagtultuloytayo nga agserbi ken ni Jehova buyogen ti natibker a puso no ti Nakristianuan a ministerio ti ipangpangrunatayo
[Ladawan iti panid 18]
Tagtaginayonenyo kadi ti naespirituan a salun-atyo babaen ti inaldaw a panangbasayo iti Sao ti Dios?