Agtalinaedkayo a Natibker, ket Agballigikayo iti Lumba ti Biag
NO AGLAYAGKAYO iti nadawel a baybay, ania ti kayatyo a pagluganan? Kayatyo kadi ti bassit a bangka wenno ti natibker, nalagda ti pannakaaramidna a barko? Awan duadua a kaykayatyo ti barko gapu ta ad-adda a kabaelanna a subaen dagiti napigsa a dalluyon.
Bayat a lumasattayo iti daytoy nadawel ken napeggad a sistema ti bambanag, maipasangotayo kadagiti makapasikor a karit. Kas pagarigan, mabalin a mariribukan ken madanagan no dadduma dagiti agtutubo iti tengnga dagiti makariro a kapanunotan ken uso iti daytoy a lubong. Mabalin nga agpangpangadua dagiti indibidual a karrugi pay la a magna iti Nakristianuan a dana. Uray ti dadduma a natibker ken matalek nga agserserbi iti Dios iti adu a tawen mabalin a masubsubokda gapu ta saan pay a naan-anay a naibanag dagiti namnamaenda.
Saan a karkarna dagita a rikna. Adda gundaway a maringgoran idi dagiti matalek nga adipen ni Jehova, kas kada Moises, Job, ken David. (Numeros 11:14, 15; Job 3:1-4; Salmo 55:4) Kaskasdi, nagbiagda a buyogen ti natibker a debosion ken ni Jehova. Mapabilegtayo nga agbalin a natibker gapu iti nasayaat nga ulidanda, ngem kayatnatayo nga iyadayo ni Satanas a Diablo manipud iti lumba ti biag nga agnanayon. (Lucas 22:31) Gapuna kasano a makapagtalinaedtayo a “natibker iti pammati”? (1 Pedro 5:9) Ken kasano a mapabilegtayo dagiti kapammatiantayo?
Kayat ni Jehova nga Agbalintayo a Natibker
No matalektayo ken ni Jehova, kanayon a sidadaan a tumulong tapno mataginayontayo ti kinasungdotayo. Adu a narigat a kasasaad ti sinango ni salmista a David, ngem nangnamnama iti Dios ket iti kasta, inkantana: “Inaonnak met [ni Jehova] iti maysa a naungor nga abut, iti pitak ti arinsaed. Kalpasanna pinatakderna dagiti sakak iti rabaw ti maysa a napasdok a bato; impasdekna a sititibker dagiti addangko.”—Salmo 40:2.
Pabilgennatayo ni Jehova a makirupak “iti nasayaat a dangadang iti pammati” tapno ‘mapetpetantayo a sititibker ti agnanayon a biag.’ (1 Timoteo 6:12) Ipaayna met kadatayo ti pamay-an tapno makapagtalinaedtayo a natalged ken agballigi iti naespirituan a pannakidangadangtayo. Indagadag ni apostol Pablo kadagiti pada a Kristiano nga ‘itultuloyda a gun-oden ti pannakabalin iti Apo ken iti kinabileg ti pigsana,’ ken ‘ikapetda ti naan-anay a kabal manipud iti Dios tapno mabalinanda ti agtakder a sititibker maibusor kadagiti pangallilaw a pamuspusan ti Diablo.’ (Efeso 6:10-17) Ngem ania ti mabalin a mangpakapuy kadatayo? Ken kasanotayo a maiwaksi dagita a napeggad nga impluensia?
Agannad Kadagiti Mangpakapuy a Bambanag
Nainsiriban a lagipen daytoy a napateg a banag: Dagiti desision nga aramidentayo ket makaapektar iti kinatalgedtayo kas Kristiano, iti positibo man wenno negatibo a wagas. Maipaspasango dagiti agtutubo kadagiti desision maipapan kadagiti bambanag a kas iti karera, kanayonan nga edukasion, ken panagasawa. Mabalin a kasapulan nga agdesision dagiti adulto no umakarda iti sabali a lugar wenno awatenda ti kanayonan a trabaho. Agdesisiontayo nga inaldaw mainaig iti panangusartayo iti panawentayo ken adu pay a sabali a bambanag. Ania ti tumulong kadatayo nga agaramid kadagiti nainsiriban a desision a tumulong iti kinatalgedtayo kas ad-adipen ti Dios? Kinuna ti maysa a nabayagen a Kristiano: “Agpatulongak ken ni Jehova no agaramidak kadagiti desision. Patiek a napateg ti panangakseptar ken panangyaplikar iti balakad nga ipaay ti Biblia, dagiti Nakristianuan a gimong, dagiti panglakayen, ken dagiti naibatay-Biblia a publikasion.”
No agaramid kadagiti desision, masapul nga imtuodentayo iti bagitayo: ‘Lima wenno sangapulo a tawen manipud ita, naragsakakto kadi kadagiti desision nga ar-aramidek ita, wenno pagbabawyakto? Ikagkagumaak kadi a siguraduen a didak pakapuyen iti naespirituan dagiti desisionko no di ket tumulong iti panagrang-ayko iti naespirituan?’—Filipos 3:16.
Ti itutulok kadagiti sulisog wenno ti dandani pananglabsing kadagiti linteg ti Dios ti nangyeg iti di natalged a panagbiag iti dadduma a bautisado nga indibidual. Nupay kasta unay a nagregget a makasubli ti sumagmamano a nailaksid iti kongregasion gapu ta awan panagbabawi nga intultuloyda ti dakes nga aramid, nailaksidda manen gapu iti umasping a basol—no dadduma kalpasan ti sumagmamano laeng a tiempo. Mabalin kadi a gapu ta dida inkararag ti tulong ti Dios tapno ‘karurodda koma ti dakes ken kumpetda iti naimbag’? (Roma 12:9; Salmo 97:10) Kasapulantayo amin ti ‘agtultuloy a mangaramid kadagiti nalinteg a dana maipaay kadagiti saka[tayo].” (Hebreo 12:13) Usigentayo ngarud ti sumagmamano a punto a makatulong kadatayo a mangtaginayon iti naespirituan a kinatalged.
Agtalinaed a Natibker Babaen Dagiti Nakristianuan nga Aktibidad
Ti maysa a pamay-an tapno mataginayon ti di agbaliwbaliw a kapartak iti lumba ti biag isu ti panagbalin nga okupado a mangikasaba iti Pagarian. Wen, ti Nakristianuan a ministeriotayo ket napateg a tulong tapno agtalinaed dagiti puso ken isiptayo a naipamaysa iti panagaramid ti pagayatan ti Dios ken sipapanunot iti gunggona a biag nga agnanayon. Iti daytoy a banag, indagadag ni Pablo kadagiti taga Corinto: “Dungdungnguek a kakabsat, agbalinkayo a natibker, di magaraw, a kankanayon nga aduankayo ti aramiden iti trabaho ti Apo, nga ammoyo a ti panagbannogyo saan nga ubbaw mainaig iti Apo.” (1 Corinto 15:58) Ti “natibker” kaipapananna ‘natalged iti lugarna.’ Ti “di magaraw” mabalin nga ipasimudaagna ti ‘di panangipalubos iti bagi a maisina manipud iti nakaipuestuanna.’ Gapuna, tumibker ti Nakristianuan a danatayo no agbalintayo nga okupado iti ministeriotayo. Ti panangtulong iti dadduma a tattao a mangam-ammo ken ni Jehova ket mangyeg iti kaipapanan ken ragsak iti biagtayo.—Aramid 20:35.
Kuna ni Pauline, maysa a Kristiano a nangbusbos iti nasurok a 30 a tawen kas misionero ken iti dadduma nga aktibidad ti amin-tiempo a panangasaba: “Maysa a proteksion ti ministerio gapu ta ti panangasaba kadagiti dadduma patalgedanna nga adda kaniak ti kinapudno.” Tumanor ti umasping a rikna no adda regular a pannakiraman kadagiti dadduma pay a Nakristianuan nga aktibidad, kas iti pannakigimong agpaay iti panagdayaw ken ti naanep a personal a panagadal iti Biblia.
Nagbalin a Natalged Gapu iti Naayat a Panagkakabsat
Mangyeg iti nabileg a pammatalged kadatayo ti panagbalin a paset ti sangalubongan nga organisasion dagiti pudno nga agdaydayaw. Anian a bendision ti maitimpuyog iti kasta a naayat, sangalubongan a panagkakabsat! (1 Pedro 2:17) Ken mabalintayo ti makaipaay iti pammatalged kadagiti kapammatiantayo.
Usigenyo ti tulong nga inaramid ni nalinteg a Job. Napilitan a binigbig uray ti sinsinan a manangliwliwa a ni Elifaz: “Ti asinoman a maitibkol, patakderen ti sasaom; ket ti tumtumeng nga agkapuy patibkerem.” (Job 4:4) Komustatayo iti daytoy a banag? Kas indibidual, adda responsabilidadtayo a tumulong kadagiti kakabsattayo iti pammati tapno makapagibturda iti panagserbi iti Dios. Iti pannakilangentayo kadakuada, mabalintayo ti agtignay a maitunos iti anag ti sasao a: “Papigsaenyo ti nakapuy nga im-ima ket patibkerenyo dagiti tumeng nga agkalogkalog.” (Isaias 35:3) Gapuna, apay a diyo aramiden a kalat a pabilgen ken paregtaen ti maysa wenno dua a pada a Kristiano kada makalangenyo ida? (Hebreo 10:24, 25) Dagiti makaparegta a sasao ti komendasion ken panagyaman gapu iti agtultuloy a panagreggetda a mangay-ayo ken ni Jehova ket pudno a makatulong kadakuada nga agtalinaed a natibker tapno agballigida iti lumba ti biag.
Dakkel ti maaramidan dagiti Kristiano a panglakayen no paregtaenda dagiti kabbaro. Posible daytoy babaen ti panangitukonda kadagiti makatulong a singasing ken nainsiriban a balakad ti Kasuratan ken babaen ti pannakipagtrabaho kadakuada iti tay-ak ti ministerio. Kanayon nga inaprobetsar ni apostol Pablo dagiti gundaway a mangpabileg kadagiti dadduma. Magagaran a makakita kadagiti Kristiano idiay Roma tapno mapabilegna ida iti naespirituan. (Roma 1:11) Imbilangna dagiti dungdungnguenna a kakabsat a lallaki ken babbai idiay Filipos kas ti ‘rag-o ken balangatna’ ken binalakadanna ida nga ‘agtakder a sititibker iti kastoy a pamay-an iti Apo.’ (Filipos 4:1) Apaman a nangngegna ti maipapan iti rigat dagiti kakabsatna idiay Tesalonica, imbaon ni Pablo ni Timoteo tapno ‘patibkeren ken liwliwaenna ida, tapno awan koma ti maisiasi babaen kadagiti rigat.’—1 Tesalonica 3:1-3.
Binigbig ken inapresiar da apostol Pablo ken Pedro ti matalek a panagregget dagiti padada nga agdaydayaw. (Colosas 2:5; 1 Tesalonica 3:7, 8; 2 Pedro 1:12) Kitaentayo met koma, saan a dagiti pagkapuyan dagiti kakabsattayo, no di ket dagiti nasayaat a galadda ken ti naballigi a pannakidangadangda tapno laeng makapagtalinaedda a natibker ken maidaydayawda ni Jehova.
No negatibo wenno manangdillawtayo, mabalin a ditay mapupuotan a mapagbalintayo nga ad-adda a narigat ti panangtaginayon iti kinatibker ti pammati para iti dadduma. Anian a maitutop a laglagipentayo a dagiti kakabsattayo ket “nalalatan ken naiwarawarada” iti daytoy a sistema ti bambanag! (Mateo 9:36) Iti kongregasion Kristiano, maiparbeng laeng a namnamaenda a makasarakda iti liwliwa ken bang-ar. Sapay koma ngarud ta aramidentayo amin ti kabaelantayo a mangpabileg kadagiti kapammatiantayo ken tulongantayo ida nga agtalinaed a natibker.
Mabalin nga adda dagiti gundaway a tratuendatayo dagiti dadduma iti wagas a mangpakapuy kadatayo. Ipalubostayo kadi a kumapuy ti panagserbitayo ken ni Jehova gapu iti maysa a makapasakit a komento wenno tignay? Ditay koma pulos ipalubos ti asinoman a mangdadael iti kinatibkertayo!—2 Pedro 3:17.
Dagiti Kari ti Dios—Mangpatalged nga Impluensia
Ti inkari ni Jehova a naraniag a masakbayan iti sidong ti turay ti Pagarian ket mangipaay kadatayo iti namnama a makatulong iti panangtaginayon iti kinatibkertayo. (Hebreo 6:19) Ken ti kombiksion a kanayon a tungpalen ti Dios dagiti karina tignayennatayo nga ‘agtalinaed a siririing ken agtakder a sititibker iti pammati.’ (1 Corinto 16:13; Hebreo 3:6) Mabalin a masubok ti pammatitayo gapu ta kasla agtaktak ti pannakatungpal ti dadduma kadagiti kari ti Dios. Nagpateg ngarud nga agannadtayo a di agpaallilaw kadagiti ulbod a sursuro ken mayadayo iti namnamatayo.—Colosas 1:23; Hebreo 13:9.
Agserbi koma a pakdaar kadatayo ti dakes nga ulidan dagiti Israelita a napapatay gapu ta dida namati kadagiti kari ni Jehova. (Salmo 78:37) Imbes a tuladentayo ida, agbalintayo koma a natibker, nga agserbi iti Dios buyogen ti kinaganat kadagitoy maudi nga al-aldaw. “Agbibiagak iti inaldaw a kasla no bigat ti iyaay ti dakkel nga aldaw ni Jehova,” kinuna ti maysa nga aduan iti kapadasan a panglakayen.—Joel 1:15.
Wen, asidegen ti dakkel nga aldaw ni Jehova. Ngem awan ti rumbeng a pagbutngantayo la ketdi no agtalinaedtayo a nasinged iti Dios. No siiinget a tungpalentayo dagiti nalinteg a pagalagadanna ken agtalinaed a natibker, makapagballigitayo iti lumba agpaay iti biag nga agnanayon!—Proverbio 11:19; 1 Timoteo 6:12, 17-19.
[Ladawan iti panid 23]
Ar-aramidenyo kadi ti amin a kabaelanyo a tumulong kadagiti pada a Kristiano nga agtalinaed a natibker?
[Picture Credit Line iti panid 21]
The Complete Encyclopedia of Illustration/J. G. Heck