Ti Dayag ni Jehova Agsilnag iti Ilina
“Ni met laeng Jehova agbalinto kenka a di nakedngan ti kapautna a silaw.”—ISAIAS 60:20.
1. Kasano a bembendisionan ni Jehova ti matalek nga ilina?
“PAGRAGRAGSAKAN ni Jehova ti ilina. Palibnosenna dagidiay naemma iti pannakaisalakan.” (Salmo 149:4) Kasta ti kinuna ti nagkauna a salmista, ket paneknekan ti historia a pudno ti sasaona. No matalek ti ili ni Jehova, aywananna, aramidenna a nabunga, ken salaknibanna ida. Iti nagkauna a panawen, pinagballigina ida kadagiti kabusorda. Iti kaaldawantayo, pinagtalinaedna ida a napigsa iti naespirituan ken impanamnamana kadakuada ti pannakaisalakan maibatay iti daton ni Jesus. (Roma 5:9) Ar-aramidenna daytoy gapu ta makaay-ayoda iti imatangna.
2. Nupay maipasangoda iti ibubusor, iti ania a makapagtalek ti ili ti Dios?
2 Siempre, iti lubong a naabbungotan iti kinasipnget, makapasar iti ibubusor dagidiay “agtartarigagay nga agbiag buyogen ti nadiosan a debosion.” (2 Timoteo 3:12) Kaskasdi, kitkitaen ni Jehova dagidiay bumusbusor, ket ballaaganna ida: “Aniaman a nasion ken aniaman a pagarian a saanto nga agserbi kenka madadaelto; ket dagiti met laeng nasion di bumurong a mapagwalangwalangto.” (Isaias 60:12) Ita, adda nadumaduma a kita ti ibubusor. Iti dadduma a pagilian, dagiti bumusbusor padpadasenda a kedngan wenno pawilan ti panagdayaw dagiti napasnek a Kristiano ken ni Jehova. Iti dadduma a lugar, dagiti panatiko ti nangranggas kadagiti agdaydayaw ken ni Jehova ken pinuoranda ti sanikua dagiti adipenna. Ngem laglagipenyo nga inkeddengen ni Jehova no ania ti pagbanagan dagidiay manglapped iti pannakaibanag ti panggepna. Mapaay dagiti bumusbusor. Saan nga agballigi dagidiay makibakal iti Sion, nga irepresentar dagiti annakna ditoy daga. Saan kadi a makaliwliwa a pammasiguro dayta manipud iti naindaklan a Diostayo, ni Jehova?
Nabendisionan a Nalablabes Ngem iti Ninamnama
3. Kasano a nayilustrar ti kinaimnas ken kinabunga dagiti agdaydayaw ken ni Jehova?
3 Kinapudnona, bayat ti maudi nga al-aldaw daytoy sistema ti bambanag, binendisionan ni Jehova ti ilina a nalablabes ngem iti ninamnamada. Nangnangruna ti agtultuloy a panangpapintasna iti lugar a pagdayawan kenkuana ken kadagidiay adda iti dayta a mangaw-awit iti naganna. Sigun iti padto ni Isaias, kinunana iti Sion: “Ti mismo a dayag ti Libano umayto kenka, ti kayo a parwa, ti kayo a presno ken ti sipres nga aggigiddan, tapno mapapintas ti lugar ti santuariok; ket padayagekto ti mismo a disso ti saksakak.” (Isaias 60:13) Nangayed a buyaen ti bambantay a nasaknapan kadagiti narukbos a kabakiran. Dagiti nabaludbod a kaykayo ket maikanatad ngarud a mangisimbolo iti kinaimnas ken kinabunga dagiti agdaydayaw ken ni Jehova.—Isaias 41:19; 55:13.
4. Ania dagiti ‘santuario’ ken ti ‘disso ti saksaka ni Jehova,’ ket kasano a napapintas dagitoy?
4 Ania dagiti ‘santuario’ ken ti ‘disso ti saksaka ni Jehova’ a nadakamat iti Isaias 60:13? Tukoyen dagitoy a termino dagiti paraangan ti naindaklan a naespirituan a templo ni Jehova, ti urnos mainaig ti iyaadani kenkuana iti panagdayaw babaen ken Jesu-Kristo. (Hebreo 8:1-5; 9:2-10, 23) Impakaammo ni Jehova ti panggepna a mangpapintas iti dayta a naespirituan a templo babaen ti panangummongna kadagiti tattao manipud iti amin a nasion tapno sumrek ken agdayawda sadiay. (Haggeo 2:7) Sakbayna, nakita a mismo ni Isaias dagiti tattao manipud iti amin a nasion nga agturturong iti naitan-ok a bantay a pagdayawan ken ni Jehova. (Isaias 2:1-4) Ginasut a tawen kalpasanna, nasirmata ni apostol Juan ti “maysa a dakkel a bunggoy, nga awan ti tao a nakabael a mangbilang, manipud kadagiti amin a nasion ken kadagiti tribu ken kadagiti ili ken kadagiti pagsasao.” Sitatakderda iti “sanguanan ti trono ti Dios; ket mangipapaayda kenkuana iti sagrado a panagserbi iti aldaw ken rabii idiay templona.” (Apocalipsis 7:9, 15) Iti pannakatungpal dagitoy a padto iti kaaldawantayo, nakitatayo a mismo ti pannakapapintas ti balay ni Jehova.
5. Ania a naindaklan a panagrang-ay ti napasaran dagiti annak ti Sion?
5 Anian a naindaklan a panagrang-ay amin dagitoy para iti Sion! Kuna ni Jehova: “Imbes nga agbalinka a maysa a naan-anay a nabaybay-an ken magurgura, nga awan asinoman a lumasat, aramidenkanto pay a kas maysa a banag a pagpannakkel agingga iti tiempo a di nakedngan, maysa a pagrag-oan iti kinapkaputotan.” (Isaias 60:15) Idi arinunos ti umuna a gubat sangalubongan, pudno a napasaran ‘ti Israel ti Dios’ ti panawen ti pannakalangalang. (Galacia 6:16) Nariknana a “naan-anay a nabaybay-an” gapu ta saan a nalawag kadagiti annakna ditoy daga no ania ti pagayatan ti Dios para kadakuada. Sa idi 1919, pinagungar ni Jehova dagiti napulotan nga adipenna, ket nanipud idin, binendisionanna ida kadagiti nakaskasdaaw a naespirituan nga irarang-ay. Maysa pay, saan kadi a makapagagar ti kari a nadakamat iti daytoy a bersikulo? Matmatan ni Jehova ti Sion kas “maysa a banag a pagpannakkel.” Wen, dagiti annak ti Sion, ken ni Jehova a mismo, pagpannakkeldanto ti Sion. Agbalinto a “maysa a pagrag-oan,” maysa a gubuayan ti aglaplapusanan a ragsak. Ken saan la nga apagbiit dayta. Ti naanamongan a kasasaad ti Sion, kas irepresentar dagiti naindagaan nga annakna, ket agpaut iti “kinapkaputotan.” Dinto pulos agsarday.
6. Kasano nga us-usaren dagiti pudno a Kristiano dagiti sanikua ti nasnasion?
6 Imdenganyo ita ti sabali pay a kari ti Dios. Kinuna ni Jehova iti Sion: “Ket pudno a susopemto ti gatas dagiti nasion, ket ti barukong ti ar-ari susopemto; ket siguradonto a maammuam a siak, ni Jehova, ti Manangisalakanmo, ket Daydiay Mannakabalin ni Jacob isu ti Manangsakam.” (Isaias 60:16) Kasano a ti Sion pagtaraonna “ti gatas dagiti nasion” ken susopenna “ti barukong ti ar-ari”? Dagiti napulotan a Kristiano ken dagiti kakaduada a “sabsabali a karnero” usarenda dagiti napapateg a sanikua dagiti nasion tapno itandudoda ti nasin-aw a panagdayaw. (Juan 10:16) Nagbalin a posible ti naindaklan a sangalubongan a panangasaba ken panangisuro a trabaho gapu kadagiti boluntario a pinansial a kontribusion. Gapu iti nainsiriban a panangusar kadagiti moderno a teknolohia, naipablaak dagiti Biblia ken literatura a naikugnal iti Biblia iti ginasgasut a pagsasao. Iti intero a historia, ita pay la a magun-od ti ad-adu a tattao ti kinapudno a linaon ti Biblia. Dagiti umili kadagiti nakaad-adu a nasion maad-adalda a ni Jehova ti Manangisalakan, ti nangsubbot kadagiti napulotan nga adipenna manipud iti naespirituan a pannakaadipen.
Panagrang-ay ti Organisasion
7. Ania a naisangsangayan a panagrang-ay ti napasaran dagiti annak ti Sion?
7 Pinapintas ni Jehova ti ilina iti sabali pay a wagas. Pinaraburanna ida iti panagrang-ay ti organisasion. Mabasatayo iti Isaias 60:17: “Imbes a ti gambang mangyegakto iti balitok, ket imbes a ti landok mangyegakto iti pirak, ket imbes a ti kayo, gambang, ket imbes a ti batbato, landok; ket dutokakto ti talna kas dagiti manangaywanmo ken ti kinalinteg kas dagiti manangitudingmo iti akem.” Maysa a panagrang-ay no masukatan ti gambang iti balitok, kasta met kadagiti dadduma pay a material a nadakamat. Maitunos iti daytoy, napasaran ti Israel ti Dios ti agtultuloy a panagrang-ay ti organisasion iti daytoy maudi nga al-aldaw. Usigenyo ti sumagmamano a pagarigan.
8-10. Dakamatenyo ti sumagmamano a panagrang-ay iti organisasion nangrugi idi 1919.
8 Sakbay ti 1919, dagiti kongregasion ti ili ti Dios ket idadauluan dagiti panglakayen ken diakono, a demokratiko nga imbutos dagiti kameng ti kongregasion. Nangrugi iti dayta a tawen, “ti matalek ken masirib nga adipen” ket nangdutok iti direktor ti serbisio iti tunggal kongregasion tapno mangimaton kadagiti aktibidad iti tay-ak ti serbisio. (Mateo 24:45-47) Ngem iti adu a kongregasion, saan unay nga epektibo dayta nga urnos gapu ta dadduma a naibutos a panglakayen ti saan a naan-anay a nangsuporta iti trabaho a panagebanghelio. Isu nga idi 1932, nabilin dagiti kongregasion nga isardengdan ti mangibutos kadagiti panglakayen ken diakono. Imbes ketdi, mangibutosda kadagiti lallaki nga agbalin a kameng ti komite ti serbisio a kadua ti direktor ti serbisio. Maysa dayta a “gambang” imbes a “kayo”—maysa a dakkel a panagrang-ay!
9 Idi 1938, dagiti kongregasion iti intero a lubong ti sangsangkamaysa a nangbigbig iti maysa a napasayaat nga urnos, nga ad-adda a maitunos iti Nainkasuratan a pagwadan. Ti pannakaaywan ti kongregasion ket naitalek iti company servant ken iti dadduma pay a manangaywan, a nadutokanda amin babaen ti panangiwanwan ti matalek ken masirib nga adipen. Saanen a babaen ti butos! Iti kasta, nateokratikuanen dagiti madutokan iti kongregasion. Maysa dayta a “landok” imbes a “batbato” wenno “balitok” imbes a “gambang.”
10 Nanipud idin, nagtultuloy ti panagrang-ay. Kas pagarigan, idi 1972, naamiris nga ad-adda a maitunos iti wagas ti pannakaaywan dagiti kongregasion Kristiano idi umuna a siglo no adda maysa a bagi dagiti teokratiko a nadutokan a papanglakayen a sangsangkatunos a mangaywan kadagiti kongregasion, nga awan ti natantan-ok a panglakayen ngem iti dadduma. Maysa pay, agarup dua a tawen ti napalabasen, adda maysa manen nga iyaabante. Adda naaramid a panagbalbaliw kadagiti direktor iti dadduma a legal a korporasion, a namagbalin a posible para iti Bagi a Manarawidwid nga ad-adda a mangipamaysa kadagiti naespirituan nga interes ti ili ti Dios imbes a masingada kadagiti inaldaw a legal a transaksion.
11. Asino ti adda iti likudan dagiti panagrang-ay iti organisasion ti ili ni Jehova, ket ania ti resulta dagita a panagbalbaliw?
11 Asino ti adda iti likudan dagitoy a panagrang-ay? Awan sabali no saan a ni Jehova a Dios. Isu ti nagkuna: “Mangyegakto iti balitok.” Ken isu ti nagkuna pay: “Dutokakto ti talna kas dagiti manangaywanmo ken ti kinalinteg kas dagiti manangitudingmo iti akem.” Wen, ni Jehova ti mangay-aywan iti ilina. Ti naipadto a panagrang-ay ti organisasion ket maysa pay a pamay-an a pappapintasenna ti ilina. Kas resultana, nabendisionan iti adu a wagas dagiti Saksi ni Jehova. Iti Isaias 60:18, mabasatayo: “Awanton ti mangngegan a kinaranggas iti dagam, pannakaagaw wenno pannakarba iti uneg dagiti beddengmo. Ket pudno unay a dagiti bukodmo a pader naganemto iti Salakan ken dagiti ruanganmo iti Dayaw.” Anian a makaay-ayo dagita a sasao! Ngem kasano ti pannakatungpalda?
12. Apay nga agraraira ti talna kadagiti pudno a Kristiano?
12 Dagiti pudno a Kristiano ket sipapasnek nga agpannuray iti instruksion ken panangiwanwan ni Jehova, ket impakpakauna ni Isaias ti resultana: “Amin nga annakmo tattaonto a sinursuruan ni Jehova, ket ti talna ti annakmo naruayto.” (Isaias 54:13) Kanayonanna, agtigtignay ti espiritu ni Jehova iti ilina, ket talna ti maysa kadagiti bunga dayta nga espiritu. (Galacia 5:22, 23) Ti inyegna a talna iti ili ni Jehova ti namagbalin kadakuada a gubuayan ti gin-awa iti tengnga ti naranggas a lubong. Ti natalna a kasasaadda, a naibatay iti panagayat dagiti pudno a Kristiano iti maysa ken maysa, ket pakpakauna ti biag iti baro a lubong. (Juan 15:17; Colosas 3:14) Sigurado a magagaran ti tunggal maysa kadatayo a mangtagiragsak ken mangitandudo iti dayta a talna, a pakaitan-okan ken pakaidayawan ti Diostayo, ken maysa a kangrunaan a pakabuklan ti naespirituan a paraisotayo!—Isaias 11:9.
Agtultuloy nga Agsilnag ti Lawag ni Jehova
13. Apay a masiguradotayo nga agnanayon nga agsilnag ti lawag ni Jehova iti ilina?
13 Agtultuloy kadi nga agsilnag ti lawag ni Jehova iti ilina? Wen! Mabasatayo iti Isaias 60:19, 20: “Kenka ti init saanton nga agbalin a lawag iti aldaw, ket ti met laeng bulan saanton a mangted kenka iti lawag maipaay a raniag. Ket ni Jehova agbalinto kenka a maysa a di nakedngan ti kapautna a silaw, ket ti Diosmo ti pintasmo. Saanton a lumnek ti initmo, wenno uray bumassit ti bulanmo; ta ni met laeng Jehova agbalinto kenka a di nakedngan ti kapautna a silaw, ket dagiti aldaw ti panagleddaangmo nairingpaston.” Apaman a nagpatingga idi 1919 ti ‘panagleddaang’ gapu iti naespirituan a pannakaidestiero, nangrugi a nagsilnag kadakuada ti lawag ni Jehova. Nasurok a 80 a tawen kalpasanna, tagtagiragsakenda pay laeng ti anamong ni Jehova bayat nga agtultuloy ti panagsilnag ti lawagna. Ken saan a pulos a kumudrep dayta. No maipapan kadagiti agdaydayaw kenkuana, ti Diostayo ket saan a ‘lumnek’ a kas iti init wenno ‘bumassit’ a kas iti bulan. Imbes ketdi, lawaganna ida iti agnanayon. Anian a nagsayaat dayta a pammatalged kadatayo nga agbibiag kadagitoy maudi nga al-aldaw daytoy nasipngetan a lubong!
14, 15. (a) Iti ania a wagas a ‘nalinteg’ ti amin nga adipen ti Dios? (b) No maipapan iti Isaias 60:21, ania a napateg a pannakatungpal ti namnamaen ti sabsabali a karnero?
14 Imdenganyo ita ti sabali pay a kari ni Jehova maipapan iti naindagaan a pannakabagi ti Sion, ti Israel ti Dios. Kuna ti Isaias 60:21: “No maipapan kadagiti umilim, isuda amin nalintegdanto; agingga iti tiempo a di nakedngan ikutandanto ti daga, ti tarubong ti panagmulak, ti aramid dagiti imak, tapno mapapintasak.” Idi 1919, idi napaganaygay manen nga agtrabaho dagiti napulotan a Kristiano, naisangsangayanda a grupo ti tattao. Iti nakaro a managbasol a lubong, ‘naideklarada a nalinteg’ maibatay iti di magaraw a pammatida iti daton a pangsubbot ni Kristo Jesus. (Roma 3:24; 5:1) Ken kas kadagiti Israelita a nawayawayaan iti pannakakayaw idiay Babilonia, tinagikuada ti “daga,” maysa a naespirituan a daga, wenno kasasaad, a pangtagiragsakanda iti naespirituan a paraiso. (Isaias 66:8) Saanto pulos nga agkupas ti kinaimnas dayta a daga gapu ta, saan a kas iti nagkauna nga Israel, paneknekan ti Israel ti Dios a matalekda kas maysa a nasion. Ti pammati, panagibtur, ken kinaregtada awan sardayna a pakaidayawan ti nagan ti Dios.
15 Amin a kameng dayta naespirituan a nasion ket karaman iti baro a tulag. Naisurat iti pusoda amin ti linteg ni Jehova, ken pinakawanna ti basbasolda maibatay iti daton a pangsubbot ni Jesus. (Jeremias 31:31-34) Indeklarana ida a nalinteg kas “annak” ken tratuenna ida a kasla perpekto. (Roma 8:15, 16, 29, 30) Napakawan met dagiti basol ti kakaduada a sabsabali a karnero maibatay iti daton ni Jesus ket, kas ken Abraham, naideklarada a nalinteg kas gagayyem ti Dios babaen ti pammati. “Linabaanda dagiti pagan-anayda ket pinapudawda ida iti dara ti Kordero.” Mangnamnama pay dagiti kakaduada a sabsabali a karnero iti sabali pay a naisangsangayan a bendision. Kalpasan a malasatanda ti “dakkel a rigat” wenno kalpasan a mapagungarda, makitadanto ti pisikal a pannakatungpal dagiti sasao iti Isaias 60:21 inton agbalin a paraiso ti intero a daga. (Apocalipsis 7:14; Roma 4:1-3) Iti dayta a tiempo, “dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.”—Salmo 37:11, 29.
Agtultuloy ti Panagadu
16. Ania ti naisangsangayan nga inkari ni Jehova, ket kasano a natungpal dayta?
16 Iti maudi a bersikulo ti Isaias 60, mabasatayo ti maudi a kari ni Jehova iti daytoy a kapitulo. Kunana iti Sion: “Daydiay met laeng bassit agbalinto a sangaribu, ket daydiay nagbassitan maysa a mannakabalin a nasion. Siak, ni Jehova, papardasekto dayta iti bukodna a tiempo.” (Isaias 60:22) Iti kaaldawantayo, tinungpal ni Jehova ti saona. Idi napaganaygay manen nga agtrabaho dagiti napulotan a Kristiano idi 1919, manmanoda laeng—pudno a ‘bassitda.’ Immadu ti bilangda idi naayaban dagiti kanayonan a naespirituan nga Israelita. Kalpasanna, nangrugi nga umapon ti nakaad-adu a sabsabali a karnero. Naatrakar ti nakaad-adu a nasingpet panagpuspusoda a tattao gapu iti natalna a kasasaad ti ili ti Dios, ti naespirituan a paraiso nga agraraira iti ‘dagada.’ Gapuna, nagbalin a “mannakabalin a nasion” daydiay “nagbassitan.” Iti agdama, daytoy a “nasion”—ti Israel ti Dios ken ti nasurok nga innem a milion a dedikado a “ganggannaet”—ket dakdakkel ngem iti adu a pagilian iti lubong. (Isaias 60:10) Amin nga umilina ti mangisilsilnag iti lawag ni Jehova, ket dayta ti mamagbalin kadakuada amin a naimnas iti imatangna.
17. Ania ti epektona kadakayo daytoy a panangusig iti Isaias kapitulo 60?
17 Wen, makapabileg iti pammati no usigen dagiti kangrunaan a punto ti Isaias kapitulo 60. Makaliwliwa a maadal nga ammo a nasaksakbay ni Jehova a mapasaran ti ilina ti naespirituan a pannakaidestiero, sa maisubli manen kalpasanna. Pagsiddaawantayo nga ammo a nasaksakbay ni Jehova ti dakkel nga iyaadu ti bilang dagiti pudno nga agdaydayaw iti kaaldawantayo. Kanayonanna, anian a makaliwliwa a laglagipen a dinatay pulos baybay-an ni Jehova! Anian a kinamanagayat ti pammasiguro a kanayon a nakalukat dagiti ridaw “ti siudad” tapno siaayat a mangpasangbay kadagidiay “siuumiso nga agannayas iti agnanayon a biag”! (Aramid 13:48) Agtultuloy a lawagan ni Jehova dagiti adipenna. Agtultuloy ti Sion a pakaigapuan ti panagpannakkel bayat a lumawlawag ti silaw dagiti annakna. (Mateo 5:16) Sigurado nga ad-adda a determinadotayo nga agtalinaed a nasinged iti Israel ti Dios ken ipateg ti pribilehiotayo a mangisilnag iti lawag ni Jehova!
Mailawlawagyo Kadi?
• No maipapan iti ibubusor, iti ania a makapagtalektayo?
• Kasano a dagiti annak ti Sion ‘sinusopda ti gatas dagiti nasion’?
• Iti ania a wagas a ni Jehova ‘nangyeg iti gambang imbes a kayo’?
• Ania a dua a galad ti naitampok iti Isaias 60:17, 21?
• Kasano a “daydiay nagbassitan” nagbalin a “maysa a mannakabalin a nasion”?
[Kahon/Dagiti Ladawan iti panid 18]
TI PADTO NI ISAIAS—Lawag nga Agpaay iti Sangatauan
Ti anag ti material kadagitoy nga artikulo ket naipalawag kabayatan ti 2001/02 a “Dagiti Mannursuro iti Sao ti Dios” a Kombension Distrito. Iti ngudo ti palawag, iti kaaduan a lugar, impakaammo ti ispiker ti pannakairuar ti baro a publikasion a napauluan Ti Padto ni Isaias—Lawag nga Agpaay iti Sangatauan, Tomo Dos. Iti tawen sakbayna, naipablaak Ti Padto ni Isaias—Lawag nga Agpaay iti Sangatauan, Tomo Uno. Iti pannakaipablaak daytoy a baro a publikasion, adda baro a pannakailawlawag ti nganngani amin a bersikulo ti libro nga Isaias. Pudno a nagsayaat a tulong dagitoy a tomo tapno umuneg ti pannakaawat ken apresasiontayo iti makapabileg iti pammati a naimpadtuan a libro nga Isaias.
[Dagiti Ladawan iti panid 15]
Iti laksid ti nakaro nga ibubusor, ‘pinapintas ni Jehova ti ilina babaen ti pannakaisalakan’
[Dagiti Ladawan iti panid 16]
Us-usaren ti ili ti Dios dagiti napapateg a sanikua dagiti nasion tapno itandudoda ti nasin-aw a panagdayaw
[Ladawan iti panid 17]
Ni Jehova binendisionanna ti ilina iti talna ken panagrang-ay ti organisasion