Internasional a Kombension iti 2003
IDI Sabado, Oktubre 6, 2001, naangay idiay Jersey City, New Jersey, E.U.A. ti tinawen a miting dagiti kameng ti Watch Tower Bible and Tract Society of Pennsylvania. Kalpasan dayta a miting, tinagiragsak dagiti kameng ken dagiti bisitada ti espesial a programa. Iti simmaganad nga aldaw, kadagiti kanayonan a miting a naangay iti uppat a siudad idiay Canada ken Estados Unidos, kastoy ti impakaammo dagiti kameng ti Bagi a Manarawidwid dagiti Saksi ni Jehova kalpasan ti pangserra a palawagda:
“Bayat a kumitatayo iti masanguanan, nakapatpateg a saan a liwayan dagiti amin nga adipen ti Dios ti agtataripnong. Indagadag ni apostol Pablo nga ad-adda pay koma nga aramidentayo daytoy, kasta met nga agpipinnaregtatayo, ta makitatayo nga umas-asidegen ti dakkel ken nakaam-amak nga aldaw ni Jehova. (Hebreo 10:24, 25) Maitunos iti daytoy Nainkasuratan a bilin, namnamaentayo ti pannakaangay dagiti kombension distrito iti amin a paset ti lubong iti umay a tawen [2002]. Sa inton 2003, no pagayatan ni Jehova, mabalin a maangayto dagiti naisangsangayan nga internasional a kombension iti dadduma a paset ti lubong. Itan ti tiempo nga agtalinaedtayo a siririing ken agsalukag, bayat a palpaliiwentayo dagiti pasamak ditoy lubong.”
Iti baet ti kumarkaro a kinaawan talged ken riribuk bayat nga umas-asideg ti panungpalan daytoy agdama a sistema, masapul nga agtultuloy ti trabaho ti ili ti Dios. Ti naimbag a damag maipapan iti Pagarian, agraman ti pammakdaar a mensahe ti Biblia, ket masapul a maiwaragawag iti amin a nasion, tribu, pagsasao, ken tattao, nga idagadagtayo kadakuada nga ‘agbutengda iti Dios ket idayawda agsipud ta umas-asidegen ti oras ti panangukomna.’ (Apocalipsis 14:6, 7) Gapuna, maitunos iti pagayatan ken pagragsakan ti nailangitan nga Amatayo, maipalplano dagiti internasional a kombension iti nadumaduma a paset ti lubong para iti tawen 2003.
Kas panangirugi, temporario a mayeskediul ti kakasta a panagtataripnong iti sumagmamano a siudad iti Amianan nga America ket di agbayag kalpasanna, idiay Europa. Inton agangay iti 2003, maaramidto dagiti urnos para iti panagbiahe dagiti grupo dagiti delegado iti sumagmamano a siudad iti Asia; ket iti arinunos ti tawen, adda dagiti kanayonan a grupo a mapan iti Africa, Abagatan nga America, ken iti deppaar ti Pasipiko. Makiddawto kadagiti dadduma a sanga nga opisina a mangibaonda iti limitado a bilang dagiti delegado kadagiti espesipiko a lugar a pakaangayan ti kombension, isu a saan a posible a maawis ti amin a tumabuno. Nupay kasta, makaparegta ti maaddaan iti limitado a delegasion a mangibagi iti nadumaduma a pagilian iti tunggal lugar.
Iti saan a mabayag, makaawatto dagiti kongregasion dagiti Saksi ni Jehova iti impormasion maipapan kadagitoy a panagtataripnong. Ti impormasion maipapan kadagiti eksakto a petsa ken espesipiko a siudad a matabunuan dagiti maawis a delegado ket ipaayto dagiti sanga nga opisina iti lugarda. Gapuna, maikalikagum a dikay agsurat wenno agdamag maipapan iti dayta a banag iti daytoy a tiempo.
Dagiti mapili a delegado ket dagidiay laeng dedikado ken bautisado a Saksi a mapagulidanan ken makaipakita iti nainkabsatan nga ayat kadagiti lokal a kakabsat. Maaddaanto met dagitoy a kakabsat iti gundaway a siaayat a mangpasangbay ken sipupudno a mangsangaili kadagiti bisita. (Hebreo 13:1, 2) Agresulta daytoy iti ‘panagsisinnukat iti pammaregta.’ (Roma 1:11, 12) Dagiti kanayonan a detalye maipapan kadagitoy nga urnos ket ipaayto dagiti sanga a maawis a mangibaon kadagiti delegado iti partikular a pagilian wenno pagpagilian.
Iti kaaduan a pagilian, mayurnosto a kas iti dati ti tallo nga aldaw a kombension distrito iti tawen 2003. Babaen ti panagtataripnongtayo, maaddaantay amin iti gundaway nga ‘umimdeng, agsursuro, ken maparegta.’ (Deuteronomio 31:12; 1 Corinto 14:31) Daytoy ti mangipaay iti gundaway kadagiti amin nga adipen ti Dios tapno ‘mananam ket makitada a naimbag ni Jehova.’ (Salmo 34:8) Iti amin nga internasional a kombension, kasta met iti adu a kombension distrito, addanto dagiti misionero, ket maiparangto ti dadduma kadakuada iti programa.
Iti daytoy a tawen, tagiragsakentayo ti “Dagiti Naregta a Manangiwaragawag iti Pagarian” a Kombension Distrito, a manggutugot kadatayo nga ad-adda pay a mangipaay iti pammaneknek. Bayat nga aramidentayo daytoy, sigurado nga ad-adda a magagarantayo a mangsegga iti insagana ni Jehova iti umay a tawen. Tumulong daytoy kadatayo nga ‘agtultuloy nga agbantay, agtalinaed a siririing, ken mangipaneknek a sisasaganatayo’ gapu iti daytoy napeggad ken naisangsangayan a panawen a pagbibiagantayo.—Mateo 24:42-44.