PANAGBIAG KAS KRISTIANO
Dagiti Tinawen a Kombension—Gundaway nga Ipakita ti Ayat
Apay a maragragsakantayo unay kadagiti tinawen a kombensiontayo? Kas iti nagkauna nga Israel, dagiti kombensiontayo ita ket gundaway a makapagdaydayawtayo ken Jehova a kadua ti ginasut wenno rinibu pay ketdi a kapammatiantayo. Maen-enjoy-tayo ti nakaad-adu a naespirituan a makan. Maay-ayatantayo met a makikadua kadagiti gagayyem ken kapamiliatayo. Gapu iti apresasiontayo, matignaytayo nga umatender iti tallo nga aldaw a kombension.
Iti panawen nga agtataripnongtayo, saan laeng a ti pagimbagantayo ti panunotentayo. Panunotentayo met no kasanotayo a maipakita ti ayat iti dadduma. (Ga 6:10; Heb 10:24, 25) No ilukatantayo ti ridaw dagiti kakabsattayo, wenno agreserbatayo laeng iti tugaw a para kadatayo, ipakpakitatayo a pampanunotentayo ti pagimbagan ti dadduma. (Fil 2:3, 4) Kadagiti kombension, makaam-ammotayo kadagiti baro a gagayyem. Sakbay ken kalpasan ti programa ken iti pangngaldaw, ikagumaantayo ti makiam-ammo iti dadduma. (2Co 6:13) Dagiti panaggagayyem a nangrugi kadagita nga okasion ket mabalin nga agpaut iti agnanayon! Kangrunaanna, dagiti makapalpaliiw kadatayo nga ipakpakitatayo ti pudno nga ayat, mabalin nga agdesisiondanto met a makikadua kadatayo nga agserbi ken Jehova.—Jn 13:35.
BUYAEN TI VIDEO A “TI AYAT SAAN A PULOS AGPATINGGA”! NGA INTERNASIONAL A KOMBENSION, SA SUNGBATAN DAGITOY:
Kasano a naipakita ti ayat kadagiti delegado iti 2019 nga internasional a kombension?
Apay a naidumduma ti panagkaykaysa ken ayat iti ili ni Jehova?
Ania dagiti aspeto ti Nakristianuan nga ayat ti inlawlawag dagiti miembro ti Bagi a Manarawidwid?
Ania ti maaramidam tapno makita nga adda ayat kadagiti kombensiontayo?
Kasano a nakatulong ti Nakristianuan nga ayat tapno adda panagkaykaysa dagiti kakabsat idiay Germany ken idiay South Korea?
Ania koma ti determinasiontayo?