Ania a Talaga ti Impierno?

ANIAMAN ti mapanunotmo maipapan iti sao nga “impierno,” patien ti kaaduan a tattao a ti impierno ket maysa a lugar a pakadusaan ti nagbasol. Maipapan iti basol ken iti epektona, kuna ti Biblia: “Babaen iti maysa a tao simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao agsipud ta nagbasolda amin.” (Roma 5:12) Kuna pay ti Kasuratan: “Dagiti isupapak ti basol isu ti ipapatay.” (Roma 6:23) Yantangay ipapatay ti supapak ti basol, ti nasken a saludsod tapno maammuantayo no ania a talaga ti kaipapanan ti impierno isu daytoy: Ania ti mapasamak kadatayo no mataytayo?

Adda kadi aniaman a biag nga agtultuloy kalpasan ti ipapatay? Ania ti impierno, ken ania a kita ti tattao ti mapan sadiay? Adda kadi aniaman a namnama dagidiay adda iti impierno? Mangted ti Biblia iti pudno ken makapnek a sungbat kadagitoy a saludsod.

Biag Kalpasan ti Ipapatay?

Addaantayo kadi iti aniaman a banag, kas iti kararua wenno espiritu, nga agtultuloy nga agbiag kalpasan a matay ti bagitayo? Usigenyo no kasano a naaddaan iti biag ti umuna a tao a ni Adan. Kuna ti Biblia: “Ni Jehova a Dios binukelna ti tao manipud tapok a naggapu iti daga ket impuyotna kadagiti abut ti agongna ti anges ti biag.” (Genesis 2:7) Nupay nataginayon ti biagna babaen ti panaganges, ti panangikabil iti “anges ti biag” iti agongna ket ramanenna saan la a basta panangipuyot iti angin kadagiti barana. Kaipapananna nga inkabil ti Dios iti awan biagna a bagi ni Adan ti mangted-biag a puersa​—“ti puersa ti biag,” nga agtigtignay iti amin a parsua ditoy daga. (Genesis 6:17; 7:22) “Espiritu” ti awag ti Biblia iti daytoy mangted-biag a puersa. (Santiago 2:26) Dayta nga espiritu ket maidilig iti koriente a mangpaandar iti makina wenno alikamen tapno mausar iti nakairantaanna. No kasano a ti koriente ket pulos a di mabukel a kapadpada ti porma ti alikamen a papaandarenna, ti puersa ti biag ket saan a mabukel a kapada ti aniaman kadagiti porma dagiti parsua a bibiagenna. Awanan iti personalidad ken awanan iti abilidad nga agpanunot.

Ania ti mapasamak iti espiritu no matay ti maysa a tao? Kuna ti Salmo 146:4: “Ti espirituna pumanaw, isu agsubli iti dagana; iti dayta nga aldaw mapukaw dagiti panunotna.” No matay ti maysa a tao, ti di persona nga espirituna saan nga agtultuloy ti kaaddana iti sabali a disso kas maysa nga espiritu a parsua. “Agsubli iti pudno a Dios a nangted iti dayta.” (Eclesiastes 12:7) Kaipapananna nga aniaman a namnama iti masanguanan a biag maipaay iti dayta a tao ket naan-anay nga agpannuray itan iti Dios.

Dagiti nagkauna a Griego a pilosopo a da Socrates ken Plato patienda a ti kararua iti maysa a tao ket agtultuloy nga agbiag kalpasan ti ipapatay ken pulos a di matay. Ania ti isursuro ti Biblia maipapan iti kararua? Ni Adan “nagbalin a kararua a sibibiag,” kuna ti Genesis 2:7. Saan a naaddaan iti kararua; isu ket kararua​—sibubukel a tao. Dakamaten ti Kasuratan a ti kararua ket agtrabaho, tarigagayanna ti mangan, maitalaw, di makaturog, ken dadduma pay. (Levitico 23:30; Deuteronomio 12:20; 24:7; Salmo 119:28) Wen, kararua ti mismo a tao. No matay ti tao, matay dayta a kararua.​—Ezequiel 18:4.

Ania ngarud ti kasasaad ti natay? Idi sinentensiaanna ni Adan, kinuna ni Jehova: “Tapokka ket iti tapok agsublikanto.” (Genesis 3:19) Sadino ti ayan ni Adan sakbay a binukel ti Dios manipud iti tapok ti daga ken inikkanna iti biag? Awan pay idi ti Adan! Idi natay, nagsubli ni Adan iti naan-anay a kinaawan. Ti kasasaad dagiti natay ket nailawlawag iti Eclesiastes 9:5, 10, a pakabasaantayo: “Awan ti ammo dagiti natay . . . Iti tanem, a papanam, awan ti panagaramid wenno panagplano wenno pannakaammo wenno sirib.” (New International Version) Sigun iti Biblia, ti ipapatay ket kasasaad ti kinaawan. Dagiti natay awananda iti puot, rikna, ken panunot.

Agnanayon a Pannakatutuok Wenno Gagangay a Tanem?

Yantangay awan puot dagiti natay, ti impierno ket saan a mabalin a maysa nga umap-apuy a lugar a pagtutuokan dagiti nadangkes kalpasan ti ipapatayda. Ania ngarud ti impierno? Ti panangusig iti napasamak ken Jesus idi natay ket tumulong a mangsungbat iti dayta a saludsod. Kuna ti mannurat iti Biblia a ni Lucas: “Saan a nabaybay-an [ni Jesus] iti Hades [impierno, King James Version] ket saan met a nakita ti lasagna ti panagrupsa.”a (Aramid 2:31) Sadino ti impierno a napanan uray ni Jesus? Insurat ni apostol Pablo: “Inyawatko kadakayo . . . a ni Kristo natay maipaay kadagiti basoltayo sigun iti Kasuratan; ket isu naitabon, wen, nga isu naibangon iti maikatlo nga aldaw sigun iti Kasuratan.” (1 Corinto 15:3, 4) Adda ngarud ni Jesus idiay impierno, ti tanem, ngem saan a nabaybay-an sadiay, agsipud ta naibangon, wenno napagungar.

Utobenyo met ti maipapan iti nalinteg a lalaki a ni Job, a nagsagaba iti kasta unay. Gapu ta kayatna nga agpatingga koman ti panagsagabana, impakaasina: “Siasino ti mangaramid kaniak iti kastoy, a salaknibannak koma idiay impierno [Sheol], ket italimengnak agingga nga aglabas ti pungtotmo?”b (Job 14:13, Douay Version) Anian a di nainkalintegan a panunoten a tinarigagayan ni Job ti mapan iti gumilgil-ayab a lugar tapno masalakniban! Para ken ni Job, ti “impierno” ket tanem laeng, a sadiay agpatingga ti panagsagabana. No kasta, ti impierno a dakdakamaten ti Biblia isu ti gagangay a tanem ti sangatauan nga agpada a papanan dagiti naimbag ken dakes a tattao.

Umap-apuy nga Impierno​—Naan-anay a Pannakapukaw?

Mabalin ngata a ti apuy ti impierno ket simbolo ti naan-anay a pannakapukaw, wenno naan-anay a pannakadadael? Iti panangidumana iti apuy iti Hades, wenno impierno, kuna ti Kasuratan: “Ni patay ken ti Hades naitapuakda iti danaw nga apuy.” Simboliko ti “danaw” a nadakamat ditoy, yantangay saan a literal a mauram ti patay ken ti impierno (Hades) a maitapuak dita. “Daytoy [danaw nga apuy] kaipapananna ti maikadua nga ipapatay”​—ipapatay nga awan namnama a panagungar.​—Apocalipsis 20:14.

Ti danaw nga apuy ket umarngi ti kaipapananna iti “umap-apuy a Gehenna [impierno nga apuy, King James Version]” a nadakamat ni Jesus. (Mateo 5:22; Marcos 9:47, 48) Ti Gehenna ket 12 a daras nga agparang iti Kristiano a Griego a Kasuratan, ket tuktukoyenna ti tanap ti Hinnom, iti ruar dagiti pader ti Jerusalem. Idi adda ni Jesus ditoy daga, nausar daytoy a tanap kas pagbasuraan, “a pakaibellengan dagiti natay a kriminal, ken ti bangkay dagiti animal, ken tunggal dadduma a kita ti rugit.” (Smith’s Dictionary of the Bible) Agtultuloy a gumilgil-ayab ti apuy babaen ti pananginayonda iti asupre tapno mauram ti basura. Inusar ni Jesus dayta a tanap kas maitutop a simbolo ti agnanayon a pannakadadael.

Kas iti Gehenna, ti danaw nga apuy isimbolona ti agnanayon a pannakadadael. “Maitapuak” ti patay ken Hades iti dayta iti anag a mapukawdanto no mawayawayaan ti sangatauan iti basol ken iti lunod ni patay. Dagiti sipapakinakem, di agbabawi a managbasol adda met “bingayda” iti dayta a danaw. (Apocalipsis 21:8) Mapukawdanto met nga agnanayon. Iti sabali a bangir, adda nakaskasdaaw a masanguanan dagidiay malagip ti Dios nga adda iti impierno​—ti gagangay a tanem ti tao.

Iruruar iti Impierno!

Kuna ti Apocalipsis 20:13: “Ti baybay inyawatna dagidiay natay nga adda kenkuana, ket ni patay ken ti Hades inyawatda dagidiay natay nga adda kadakuada.” Wen, rummuarto dagiti adda iti impierno a dakdakamaten ti Biblia. Kas inkari ni Jesus, “um-umayen ti oras nga amin dagidiay adda kadagiti pakalaglagipan a tanem mangngegdanto ti timekna [ni Jesus] ket rummuarda.” (Juan 5:28, 29) Nupay napukawda ti biagda, minilion a natay nga adda iti lagip ni Jehova a Dios ti mapagungar, wenno agbiag manen, iti naisubli a paraiso ditoy daga.​—Lucas 23:43; Aramid 24:15.

Iti baro a lubong ti Dios, saanton a matay dagiti napagungar a tattao a mangannurot kadagiti nalinteg a bilbilinna. (Isaias 25:8) Ni Jehova “punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot.” Kinapudnona, ‘ti immuna a bambanag aglabasdanto.’ (Apocalipsis 21:4) Anian a bendision ti agur-uray kadagidiay adda iti impierno​—dagiti “pakalaglagipan a tanem”! Daytoy a bendision ti pudno nga umanay a panggapuantayo a mangammo nga ad-adda ken ni Jehova a Dios ken iti Anakna a ni Jesu-Kristo.​—Juan 17:3.

[Footnotes]

[Ladawan iti panid 5]

Inkararag ni Job a masalakniban koma idiay impierno

[Ladawan iti panid 6]

Umap-apuy a Gehenna​—simbolo ti agnanayon a pannakadadael

[Ladawan iti panid 7]

‘Dagidiay adda iti pakalaglagipan a tanem rummuardanto’