Inayonyo ti Nadiosan a Debosion iti Panagibturyo
“Inayonyo iti pammatiyo . . . ti panagibtur, iti panagibturyo ti nadiosan a debosion.”—2 PEDRO 1:5, 6.
1, 2. (a) Ania a panagdakkel ti manamnama iti maysa nga ubing? (b) Kasano kapateg ti naespirituan a panagmataengan?
NAPATEG ti panagdakkel ti maysa nga ubing, ngem saan la a pisikal a panagdakkel ti matarigagayan. Manamnama met ti mental ken emosional a panagmataengan. Inton agangay, iwaksina ti inuubingan a tignayna ket agbalinto a naan-anay a nataengan. Tinukoy daytoy ni apostol Pablo idi insuratna: “Idi ubingak, nagsasaoak a kas ubing, nagpampanunotak a kas ubing, nagrasrasonak a kas ubing; ngem ita ta nataenganakon, inidiakon dagiti kababalin ti maysa nga ubing.”—1 Corinto 13:11.
2 Napateg ti ipagpaganetget ni Pablo maipapan iti naespirituan a panagmataengan. Masapul a rumang-ay dagiti Kristiano manipud iti naespirituan a kinaubing ket agbalinda a “nataenganen kadagiti pannakabalin ti pannakaawat.” (1 Corinto 14:20) Nasken nga ikagumaanda a ragpaten ti “rukod ti kinatayag ti kinanaan-anay ti Kristo.” Iti kasta, saanda nga “agub-ubinganen, a mayallo-allon a kas panangyallon dagiti dalluyon ket iyallaalla ditoy ken idiay ti tunggal angin ti sursuro.”—Efeso 4:13, 14.
3, 4. (a) Ania ti masapul nga aramidentayo tapno agmataengantayo iti naespirituan? (b) Aniada a nadiosan a galad ti nasken nga iparangarangtayo, ken kasano kapateg dagita?
3 Kasano nga agmataengantayo iti naespirituan? Nupay nganngani automatiko ti pisikal a panagdakkel iti sidong ti normal a kasasaad, ti naespirituan a panagmataengan kalikagumanna ti panagregget. Mangrugi dayta babaen ti pananggun-od iti umiso a pannakaammo iti Sao ti Dios ken panagtignay a maitunos iti naadaltayo. (Hebreo 5:14; 2 Pedro 1:3) Iti kasta, maiparangarangtayo dagiti nadiosan a galad. No kasano a ti nadumaduma nga aspeto ti pisikal a panagdakkel ket aggigiddan a rumang-ay, kasta met kadagiti nadumaduma a nadiosan a galad. Insurat ni apostol Pedro: “Babaen ti panangipaayyo iti isuamin a napasnek a panagregget kas isusungbat, inayonyo iti pammatiyo ti kinasingpet, iti kinasingpetyo ti pannakaammo, iti pannakaammoyo ti panagteppel, iti panagteppelyo ti panagibtur, iti panagibturyo ti nadiosan a debosion, iti nadiosan a debosionyo ti nainkabsatan a panagayat, iti nainkabsatan a panagayatyo ti ayat.”—2 Pedro 1:5-7.
4 Napateg ti tunggal galad a dinakamat ni Pedro, ket awan ti mabalin nga ikkaten. Innayonna: “No adda kadakayo dagitoy a banag ken aglippiasda, lapdandanto ti panagbalinyo a di aktibo wenno di nabunga maipapan iti umiso a pannakaammo ken ni Apotayo a Jesu-Kristo.” (2 Pedro 1:8) Usigentayo no apay a kasapulan nga inayontayo ti nadiosan a debosion iti panagibturtayo.
No Apay a Kasapulan ti Panagibtur
5. Apay a kasapulantayo ti panagibtur?
5 Da Pedro ken Pablo agpada nga innaigda ti nadiosan a debosion iti panagibtur. (1 Timoteo 6:11) Ti panagibtur ket saan laeng a basta panangandur iti rigat ken panagtalinaed a determinado. Iramanna ti kinaanus, kinamaingel, ken kinatibker, a di maawanan iti namnama no maipasango kadagiti suot, tubeng, sulisog, wenno pannakaidadanes. Kas kadagidiay agbibiag “buyogen ti nadiosan a debosion a mainaig ken Kristo Jesus,” manamnamatayo a maidadanestayo. (2 Timoteo 3:12) Nasken nga agibturtayo no kayattayo a paneknekan ti panagayattayo ken ni Jehova ken sukayen dagiti galad a kasapulan iti pannakaisalakan. (Roma 5:3-5; 2 Timoteo 4:7, 8; Santiago 1:3, 4, 12) No awan ti panagibtur, saantay a masagrap ti biag nga agnanayon.—Roma 2:6, 7; Hebreo 10:36.
6. Ti panagibtur agingga iti panungpalan ket kaipapananna ti panangaramid iti ania?
6 Uray kasano kasayaat ti panangirugitayo, ti kapatgan isu ti panagibturtayo. Kinuna ni Jesus: “Ti nakapagibtur agingga iti panungpalan isunto ti maisalakan.” (Mateo 24:13) Wen, nasken nga agibturtayo agingga iti panungpalan, dayta man ket panungpalan ti agdama a biagtayo wenno panungpalan daytoy dakes a sistema ti bambanag. Aniaman kadagita, masapul a taginayonentayo ti kinatarnawtayo iti Dios. Ngem no ditay inayon ti nadiosan a debosion iti panagibturtayo, ditay maay-ayo ni Jehova, ken ditay magun-od ti biag nga agnanayon. Ania aya ti nadiosan a debosion?
No Ania ti Kaipapanan ti Nadiosan a Debosion
7. Ania ti nadiosan a debosion, ket tignayennatayo nga agaramid iti ania?
7 Ti nadiosan a debosion ket personal a panagraem, panagdayaw, ken panagserbi ken ni Jehova a Dios kas resulta ti kinasungdotayo iti sapasap a kinasoberanona. Tapno maaddaantayo iti nadiosan a debosion ken ni Jehova, masapul a maaddaantayo iti umiso a pannakaammo maipapan kenkuana ken kadagiti dalanna. Nasken a personal ken sidudungngo nga am-ammuentayo ti Dios. Daytoy ti mangtignay kadatayo a naimpusuan a makisinninged kenkuana, a maiparangarang babaen ti tigtignay ken wagas ti panagbiagtayo. Nasken a pagreggetantayo ti agbalin a kas ken Jehova agingga iti kabaelantayo—a tuladentayo dagiti wagasna ken iyanninaw dagiti galad ken personalidadna. (Efeso 5:1) Kinapudnona, tignayennatayo ti nadiosan a debosion a maaddaan iti tarigagay a mangay-ayo iti Dios iti amin nga aramidentayo.—1 Corinto 10:31.
8. Kasano nga agdanggay ti nadiosan a debosion ken ti naipamaysa a debosion?
8 Tapno maiparangarangtayo ti pudno a nadiosan a debosion, nasken a ni Jehova laeng ti pagdayawantayo, a ditay ipalubos nga adda sabali a mangala iti lugarna iti pusotayo. Kas Namarsua kadatayo, adda kalinteganna a mangkalikagum iti naipamaysa a debosiontayo kenkuana. (Deuteronomio 4:24; Isaias 42:8) Kaskasdi, dinatayo piliten ni Jehova nga agdayaw kenkuana. Tarigagayanna ti naimpusuan a debosiontayo. Ti panagayattayo iti Dios, a naibatay iti umiso a pannakaammo kenkuana, ti mangtignay kadatayo a mangdalus iti biagtayo ken mangaramid iti situtulok a panagdedikar kenkuana ken agbiag a maitunos iti dayta.
Patanoren ti Relasion iti Dios
9, 10. Kasano a mapatanor ken masalimetmetantayo ti nasinged a relasion iti Dios?
9 Kalpasan ti panangisimbolotayo iti dedikasiontayo iti Dios babaen ti panagpabautisar, masapul a patanorentayo ti nasingsinged pay a personal a relasion kenkuana. Ti tarigagaytayo a mangaramid iti dayta ken makapagserbi a matalek ken ni Jehova ti mangtignay ngarud kadatayo nga agtultuloy nga agadal iti Saona ken mangmennamenna iti dayta. Bayat nga ipalubostayo nga agtignay ti espiritu ti Dios iti isip ken pusotayo, umuneg ti panagayattayo ken ni Jehova. Agtultuloy a kapatgan iti biagtayo ti relasiontayo kenkuana. Ibilangtayo ni Jehova kas ti kasingedan a Gayyemtayo ken kayattayo nga ay-ayuen iti amin a gundaway. (1 Juan 5:3) Ad-adda a makaparagsak ti makaay-ayo a relasiontayo iti Dios, ket agyamantayo ta siaayat nga isuronatayo ken tubngarennatayo no kasapulan.—Deuteronomio 8:5.
10 Mabalin a bumaaw ti nagsayaat a relasiontayo ken ni Jehova no ditay itultuloy nga ikagumaan a palagdaen dayta. No mapasamak dayta, saan a basol ti Dios, ta ni Jehova “saan nga adayo iti tunggal maysa kadatayo.” (Aramid 17:27) Anian a yamantayo ta pinagbalin ni Jehova a saan a narigat ti iyaadani kenkuana! (1 Juan 5:14, 15) Siempre, nasken a pagreggetantayo a taginayonen ti nasinged a personal a relasiontayo ken ni Jehova. Ngem tulongannatayo nga umadani kenkuana babaen ti panangipaayna iti amin a probision a kasapulantayo a mangpatanor ken mangsalimetmet iti nadiosan a debosion. (Santiago 4:8) Kasano a naan-anay a mausartayo amin dagitoy a naayat a probision?
Agtalinaed a Natibker iti Naespirituan
11. Ania ti sumagmamano nga ebkas ti nadiosan a debosiontayo?
11 Ti nairamut a panagayattayo iti Dios tignayennatayo a mangiparangarang no kasano kauneg ti nadiosan a debosiontayo, maitunos iti balakad ni Pablo: “Aramidem ti amin a kabaelam a mangiparang iti bagim a naanamongan iti Dios, maysa a mangmangged nga awan ti aniaman nga ibainna, nga aramatem a siuumiso ti sao ti kinapudno.” (2 Timoteo 2:15) Tapno maaramidtayo daytoy, masapul a salimetmetantayo ti nasayaat a rutina ti regular a panagadal iti Biblia, pannakigimong, ken pannakiraman iti ministerio iti tay-ak. Mataginayontayo met ti kinasinged ken ni Jehova babaen ti ‘panagkararag a di agressat.’ (1 Tesalonica 5:17) Dagita ket nabagas nga ebkas ti nadiosan a debosiontayo. No liwayantayo ti aniaman kadagita, mabalin nga agsakittayo iti naespirituan ken nalakatayo a matnag kadagiti silo ni Satanas.—1 Pedro 5:8.
12. Kasano a madaerantayo dagiti pakasuotan?
12 Madaerantayo met ti adu a pakasuotantayo no agtalinaedtay a nabileg ken aktibo iti naespirituan. Mabalin nga agtaud dagiti pakasuotan kadagiti gubuayan a nakaro a mangsubok kadatayo. Ti pannakayaleng-aleng, ibubusor, ken pannakaidadanes ket nalabit narigrigat nga ibturan no nagtaudda kadagiti kapamilia, kabagian, wenno kaarruba. Mabalin a tumaud iti pagtrabahuan wenno eskuelaan dagiti nasikap a panangpilit tapno ikompromisotayo dagiti Nakristianuan a prinsipiotayo. Mabalin a kumapuytayo iti pisikal gapu iti pannakaupay, sakit, ken panagleddaang ket aramidenda a narigrigat ti panangdaer kadagiti pakasuotan ti pammati. Ngem madaerantayo ti amin a pakasuotan no agporsegitayo “kadagiti nasantuan a panagbibiag ken ar-aramid ti nadiosan a debosion, nga ur-urayenyo ken agtaltalinaedkayo a silalagip unay iti kaadda ti aldaw ni Jehova.” (2 Pedro 3:11, 12) Ken mataginayontayo ti rag-o a mangaramid iti dayta, bayat nga agtalektayo iti bendision ti Dios.—Proverbio 10:22.
13. Ania ti nasken nga aramidentayo tapno agtultuloy a maiparangarangtayo ti nadiosan a debosion?
13 Nupay dagidiay mangiparparangarang iti nadiosan a debosion ti puntiria ni Satanas, di rumbeng nga agbutengtayo. Apay? Gapu ta “ammo ni Jehova no kasano ti mangispal kadagiti tattao nga addaan nadiosan a debosion manipud iti pannakasuot.” (2 Pedro 2:9) Tapno maibturan dagiti pakasuotan ken mapasaran ti kasta a pannakaispal, nasken a ‘tallikudantayo ti di kinanadiosan ken nailubongan a tartarigagay ken agbiag a buyogen ti kinasimbeng ti panunot ken kinalinteg ken nadiosan a debosion iti tengnga daytoy agdama a sistema ti bambanag.’ (Tito 2:12) Kas Kristiano, nasken nga agannadtayo tapno ti nadiosan a debosiontayo ket saan nga apektaran ken perdien ti aniaman a pagkapuyan mainaig kadagiti nainlasagan a tarigagay ken aramid. Usigentayo ita ti sumagmamano kadagitoy a peggad.
Agannad Kadagiti Mamagpeggad iti Nadiosan a Debosion
14. Ania ti nasken a laglagipentayo no magargaritayo iti silo ti materialismo?
14 Adu ti nasiluan iti materialismo. Mabalin nga al-allilawentayo uray ti bagitayo, no ‘pagarupentayo a ti nadiosan a debosion ket panggun-od iti [material a] gunggona.’ Iti kasta, pumigsa ti nakemtayo a manggundaway iti panagtalek nga ipakpakita dagiti kapammatiantayo. (1 Timoteo 6:5) Mabalin pay ketdi a sibibiddut nga ipapantayo nga awan ti dakesna no allukoyentayo ti maysa nga adda mabalinna a Kristiano tapno pautangannatayo iti gatad a mabalin a ditay kabaelan a bayadan. (Salmo 37:21) Ngem ti nadiosan a debosion, saan a ti pananggun-od iti material a bambanag, ti “addaan kari a biag itan ken daydiay nga umay.” (1 Timoteo 4:8) Yantangay ‘awan ti inyegtayo iti lubong, ken saantay a mabalin ti mangitugot iti aniaman a banag,’ ad-adda koma a determinadotayo a mangbirok iti “nadiosan a debosion agraman iti pannakapnek” ken bay-antayo ti bagitayo a ‘mapnek no adda pagtaraon ken pagkawestayo.’—1 Timoteo 6:6-11.
15. Ania ti aramidentayo no agpeggad a malpes ti nadiosan a debosiontayo gapu iti panangipangpangruna iti ragragsak?
15 Ti panangipangpangruna iti ragragsak leppesenna ti nadiosan a debosion. Mabalin kadi a kasapulantayo ti madagdagus a panagbalbaliw iti daytoy a banag? Pudno, adda magunggona kadagiti panagwatwat iti bagi ken panaglinglingay. Kaskasdi, bassit laeng dagita a gunggona no idilig iti biag nga agnanayon. (1 Juan 2:25) Iti agdama, adu ti “managayat iti ragragsak imbes a managayat iti Dios, nga addaanda iti langa ti nadiosan a debosion ngem libakenda ti pannakabalin dayta,” ket masapul a liklikantayo ti kasta a tattao. (2 Timoteo 3:4, 5) Dagidiay mangipateg iti nadiosan a debosion ket “sitatalged nga agurnongda maipaay iti bagbagida iti nasayaat a pamuon maipaay iti masanguanan, tapno mapetpetanda a sititibker ti pudpudno a biag.”—1 Timoteo 6:19.
16. Ania dagiti dakes a tarigagay a manglaplapped iti dadduma a mangtungpal kadagiti nalinteg a kalikagum ti Dios, ket kasano a maparmektayo dagita a tarigagay?
16 Ti panagbartek ken panagdroga, imoralidad, ken dakes a tarigagay mabalin a perdienda ti nadiosan a debosiontayo. Saantay a matungpal dagiti nalinteg a kalikagum ti Dios no matnagtayo kadagitoy nga aramid. (1 Corinto 6:9, 10; 2 Corinto 7:1) Uray ni Pablo masapul idi nga ibturanna ti agtultuloy a dangadang iti managbasol a bagina. (Roma 7:21-25) Masapul dagiti napasnek nga addang tapno maiwaksi dagiti di umiso a tarigagay. Nasken a determinadotayo nga agtalinaed a nadalus iti moral. Ibaga kadatayo ni Pablo: “Papatayenyo . . . dagiti kameng ti bagiyo nga adda iti rabaw ti daga no maipapan iti pannakiabig, kinarugit, panaggartem iti sekso, makapasakit a tarigagay, ken kinaagum, a dayta ket idolatria.” (Colosas 3:5) Mapapatay dagiti kameng ti bagitayo mainaig kadagita a basol no determinadotayo a mangiwaksi kadagita. No napasnek nga ikararagtayo ti tulong ti Dios, maparmektayo dagiti di umiso a tarigagay ken maipangpangrunatayo ti kinalinteg ken nadiosan a debosion iti tengnga daytoy dakes a sistema ti bambanag.
17. Ania koma ti panangmatmatyo iti disiplina?
17 Ti pannakaupay mabalin a pakapuyenna ti panagibturtayo ken addaan iti dakes nga epekto iti nadiosan a debosiontayo. Adu kadagiti adipen ni Jehova ti nakapasar iti pannakaupay. (Numeros 11:11-15; Esdras 4:4; Jonas 4:3) Nangnangruna a nasaem ti pannakaupay no nabuyogan dayta iti sakit ti nakem gapu ta nasair wenno natubngar wenno nadisiplinatayo. Ngem ti pannubngar wenno disiplina ket pammaneknek nga interesado ken siaayat a maseknan kadatayo ti Dios. (Hebreo 12:5-7, 10, 11) Saan koma a mamatmatan ti disiplina kas maysa la a pannusa no di ket maysa a wagas ti pannakasanaytayo iti dalan ti kinalinteg. No napakumbabatayo, apresiaren ken awatentayo ti balakad, a bigbigentayo a “dagiti pannubngar ti disiplina isuda ti dalan ti biag.” (Proverbio 6:23) Daytoy ti tumulong kadatayo a maaddaan iti nasayaat a naespirituan a panagrang-ay no maipapan iti panangsalimetmet iti nadiosan a debosion.
18. Ania ti nasken nga aramidentayo no adda dagiti personal a panagkamali?
18 Mabalin a makarit ti nadiosan a debosiontayo gapu kadagiti di pagkikinnaawatan ken personal a panagkamali. Mabalin a mangyeg daytoy iti panagdanag wenno tignayenna ti dadduma a di nainsiriban a mangisina iti bagida kadagiti naespirituan a kakabsatda. (Proverbio 18:1) Ngem nasayaat a laglagipen a ti agimulmula iti sakit ti nakem wenno ti agtultuloy a manggura iti sabsabali ket mabalin a makadadael iti relasiontayo ken ni Jehova. (Levitico 19:18) Kinapudnona, “ti saan nga agayat iti kabsatna, a nakitana, saanna a mabalin nga ayaten ti Dios, a saanna a nakita.” (1 Juan 4:20) Iti Sermonna iti Bantay, inyunay-unay ni Jesus a masapul a mangaramid a dagus kadagiti addang a mangrisut kadagiti personal a di pagkikinnaawatan. Kinunana kadagiti agdengdengngeg: “No, ngarud, ip-ipanmo ti sagutmo iti altar ket sadiay malagipmo a ti kabsatmo addaan iti maysa a banag a maibusor kenka, panawam ti sagutmo sadiay sanguanan ti altar, ket mapanka; umuna a makikappiaka ken kabsatmo, ket kalpasanna, inton nakasublikan, idatonmo ti sagutmo.” (Mateo 5:23, 24) Ti panagpadispensar ket mabalin a mangep-ep iti sugat nga inyeg ti makapasakit a sasao wenno tigtignay. Mabalin a maikkat ti sakit ti nakem ken maisubli ti natalna a relasion no agkiddawtayo iti pammakawan ken aminentay a nagkamalitayo. Nangted met ni Jesus iti balakad no kasano a tamingen dagiti di pagkikinnaawatan. (Mateo 18:15-17) Anian a ragsaktayo no agballigi ti panagreggettayo a mangrisut kadagiti parikut!—Roma 12:18; Efeso 4:26, 27.
Tuladenyo ti Ulidan ni Jesus
19. Apay a nakapatpateg a tuladen ti ulidan ni Jesus?
19 Sigurado a dumteng dagiti pakasuotantayo, ngem saan koma a dagita ti manglapped kadatayo iti lumba agpaay iti biag nga agnanayon. Laglagipenyo a maispalnatayo ni Jehova kadagiti pakasuotan. Bayat nga ‘ikkatentayo ti tunggal dadagsen’ ken ‘buyogen ti panagibtur a tarayentayo ti lumba a naikabil iti sanguanantayo,’ sapay koma ta “kumitatayo a sipapasnek iti Kangrunaan nga Ahente ken Manangan-anay iti pammatitayo, ni Jesus.” (Hebreo 12:1-3) Ti naannad a panangusig iti ulidan ni Jesus ken ti panangikagumaan a mangtulad kenkuana iti sao ken aramid ti tumulong kadatayo a mangpatanor ken ad-adda a mangiparangarang iti nadiosan a debosion.
20. Aniada a gunggona ti iyeg ti panagibtur ken nadiosan a debosion?
20 Mapatalgedan ti pannakaisalakantayo no agpada nga addaantayo iti panagibtur ken nadiosan a debosion. Babaen ti panangiparangarang kadagitoy nga agkakapateg a galad, simamatalek a maitultuloytayo ti sagrado a panagserbitayo iti Dios. Uray no maipasidong iti suot, naragsaktayo latta bayat a tagiragsakentayo ti nadungngo a panagayat ken bendision ni Jehova gapu ta nakapagibtur ken iparparangarangtayo ti nadiosan a debosion. (Santiago 5:11) Maysa pay, impanamnama a mismo ni Jesus kadatayo: “Babaen ti panagibturyo magun-odanyonto dagiti kararuayo.”—Lucas 21:19.
Ania ti Sungbatyo?
• Apay a napateg ti panagibtur?
• Ania ti nadiosan a debosion, ken kasano a maiparangarang dayta?
• Kasano a mapatanor ken masalimetmetantayo ti nasinged a relasion iti Dios?
• Ania ti sumagmamano a mamagpeggad iti nadiosan a debosiontayo, ket kasano a maliklikantayo dagita?
[Dagiti Ladawan iti panid 12]
Ti nadiosan a debosion ket maiparangarang iti nadumaduma a wagas
[Dagiti Ladawan iti panid 14]
Agannad kadagiti mamagpeggad iti nadiosan a debosionyo