Surotenyo ti Ulidan ni Jesus iti Nadiosan a Debosion

“Ket awan duadua dakkel ti nasantuan a palimed daytoy nadiosan a debosion: ‘Daydi [ni Jesus] naiparang iti lasag.’”​—1 TIMOTEO 3:16.

1. (a) Ania a saludsod ti di nasungbatan iti nasurok a 4,000 a tawen? (b) Kaano ken kasano a naited ti sungbat?

DAYTAT’ saludsod a di nasungbatan iti nasurok ngem 4,000 a tawen. Nanipud pay idi daydi umuna a tao, a ni Adan, napaay a nangsalimetmet ti kinatarnawna, ti saludsoden ket: Kasanon a maiparangarang ti nadiosan a debosion iti sangatauan? Kamaudiananna, idi umuna a siglo K.P., babaen iti iyaay ti Anak ti Dios ditoy daga, naiteden ti sungbat. Iti tunggal panunot, sao, ken aramid, indemostra ni Jesu-Kristo ti personal a singgalutna ken Jehova. Iti kasta winaknitanna ti ‘nasantuan a palimed ti nadiosan a debosion,’ nga indemostrana ti wagas a panangtaginayon dagiti dedikado a tattao ti kasta a debosion.​—1 Timoteo 3:16.

2. Iti panangsurot ti nadiosan a debosion, apay a rebbengtay nga usigen a naimbag ti ulidan ni Jesus?

² Iti panangsurot iti nadiosan a debosion kas dagiti dedikado, bautisado a Kristiano, nasayaat no “panunoten a naimbag” ti ulidan ni Jesus. (Hebreo 12:3) Apay? Agpaay iti dua a rason. Umuna, ti ulidan ni Jesus tulongannatayo a mangsukay ti nadiosan a debosion. Am-ammo ni Jesus ni Amana a nasaysayaat ngem ti asinoman. (Juan 1:18) Ken nagsinged unay ti panangtulad ni Jesus kadagiti aw-awid ken kualidad ni Jehova a gapu itoy maikunana: “Ti nakakita kaniak nakitana met ni Ama.” (Juan 14:9) Babaen iti biag ken ministerio ni Jesus, ngarud, magun-odantayo ti naun-uneg a panangapresiar kadagiti naayat a kualidad ni Jehova, iti kasta papigsaenna ti personal a pannakaisinggaluttay iti naayat a Namarsuatayo. Maikadua, ti ulidan ni Jesus tulongannatayo iti panangiparangarang ti nadiosan a debosion. Nangted naan-anay nga ehemplo iti kababalin a mangiparangarang iti nadiosan a debosion. Ngarud nasayaat no usigentayo no kasano ti ‘panangikawestayo ken Kristo,’ kayatna a sawen, ti panangala kenkuana kas maysa a padron, a tuladen ti ulidanna.​—Roma 13:14.

3. Aniat’ rebbeng nga iraman ti programa ti personal a panagad-adaltayo ti Biblia, ken apay?

³ Saan nga amin a sinao ken inaramid ni Jesus ket naitalimeng a nakasurat. (Juan 21:25) Gapu itoy, dagiti bambanag a nailanad iti sidong ti nasantuan a pannakaipaltiing ket makapainteres unay kadatayo. Ti programa ti personal a panagadal ti Biblia ket rebbeng ngarud a mangiraman ti regular a panagbasbasa kadagiti Ebanghelio a salaysay ti kabibiag ni Jesus. Ngem tapno ti kasta a panagbasbasa makatulongda kadatayo iti panangsurottay ti nadiosan a debosion, masapul nga ikkantay ti tiempo a mangusig nga addaan panangapresiar ti intay mabasa. Masapul met nga alertotayo a kumita iti addat’ labes ti nalawag a bambanag.

Kas Ama, Kas Anak

4. (a) Aniat’ mangipakita a ni Jesus ket maysa a persona nga addaan nabara ken nauneg a panagrikna? (b) Ania a panagregget ti innala ni Jesus iti pannakilangen kadagiti dadduma?

⁴ Usigenyo ti pangarigan. Ni Jesus ket maysa a tao nga addaan nabara ken nauneg a panagrikna. Kitaenyo manipud Marcos 10:1, 10, 13, 17, ken Mar 10:35 a dagiti tattao iti amin nga edad ken nalikudan ti nakakita kenkuana a nalaka a maas-asitgan. Iti nasursurok ngem maysa nga okasion, inubbana dagiti ubbing kadagiti takkiagna. (Marcos 9:36; 10:16) Apay a dagiti tattao, agraman ub-ubbing, ket nakaam-amoda ken Jesus? Gapu iti napasnek, pudpudno nga interesna kadakuada. (Marcos 1:40, 41) Daytoy ti mapaneknekan pay babaen ti masansan nga umuna a panagtignayna nga umasideg kadagiti dadduma nga agkasapulan ti tulong. Gapuna, mabasatayo a “nakitana” ti balo a babai a taga Nain nga aw-awitenda ti natay nga anakna nga ipompon. Kalpasanna “immasideg” ket pinagungarna ti baro, ket awan aniaman a nasao nga adda asinoman a nangikalikagum nga aramidenna dayta. (Lucas 7:13-15) Uray isu met, a di napagdawatan nga aramidenna dayta, immuna a nagtignay a mangpaimbag ti babai a di makagunay ken ti lalaki nga imbal.​—Lucas 13:11-13; 14:1-4.

5. Aniat’ isuro dagitoy a salaysay ti ministerio ni Jesus kadatayo maipapan kadagiti kualidad ken aw-awid ni Jehova?

⁵ No mabasayo dagita a paspasamak, agsardengkayo ket saludsodanyo ti bagiyo: ‘Gapu ta tinulad a naan-anay ni Jesus ni Amana, aniat’ ibagbaga dagitoy a salaysay kaniak maipapan kadagiti kualidad ken aw-awid ni Jehova?’ Rebbeng nga ipasiguradoda kadatayo a ni Jehova ket maysa a Dios a naayat ken nauneg panagriknana. Ti kinanasged ti di agbaliw nga interesna iti natauan a pamilia ti nangtignay kenkuana nga isut’ umuna nga agtignay iti pannakilangenna kadakuada. Isut’ di kasapulan a piliten a mangipaay ti Anakna “a subbot agpaay kadagiti adu.” (Mateo 20:28; Juan 3:16) Isut’ kumitkita kadagiti gundaway a “maay-ayo” kadagidiay agserbi kenkuana gaput’ ayatda. (Deuteronomio 10:15) Kas kunaen ti Biblia: “Ta dagiti mata [ni Jehova] mapanda nga agsublisubli iti amin a daga tapno isu agparang a napigsa a bumadang kadagidiay a ti pusoda napalungdo a maiturong kenkuana.”​—2 Cronicas 16:9.

6. Aniat’ ibungana no mennamennaentayo ti nabara ken nauneg a panagrikna ni Jehova kas inyulidan ti Anakna?

⁶ Ti panangpampanunot iti kastoy a pamay-an iti kinabara ken nauneg a panagrikna ni Jehova, kas inyulidan ti Anakna, sagidenna ti pusoyo, a punnuenna daytoy iti dakkel a panangapresiar kadagiti naasi ken makaallukoy a kualidad ti Dios. Daytoy met, ti mangguyugoy kadakayo kenkuana. Matignaykayo a siwayawaya nga umadani kenkuana iti kararag iti amin a tiempo ken iti amin a sirkumstansia. (Salmo 65:2) Papigsaen dayta ti personal a singgalutyo kenkuana.

7. Kalpasan ti panangmennamenna ti kinabara ken nauneg a panagrikna ni Jehova, aniat’ rebbeng nga isaludsodyo iti bagiyo, ken apay?

⁷ Ngem, laglagipenyo, a ti nadiosan a debosion ramanenna ti ad-adda pay ngem basta rikna ti panagdayaw. Kas kinuna ti eskolar ti Biblia a ni R. Lenski, dayta “ramanenna ti intero a narespeto, nadayaw, a kababalin ken dagiti tignay a tumaud iti dayta.” (Kuami ti italiko.) Gapuna kalpasan ti panangpampanunot iti nayaat ken nauneg a panagrikna ni Jehova kas inyulidan ni Jesus, saludsodanyo ti bagiyo: ‘Kasanoak nga agbalin nga ad-adda a kas ken Jehova iti daytoy a banag? Nalakaak aya nga as-asitgan dagiti dadduma?’ No maysakay a naganak, masapul a nalakakay nga asitgan dagiti annakyo. Ket no maysakay a panglakayen ti kongregasion, rebbeng a nalakakay met a maas-asitgan. Ania pay, ngarud, ti mamagbalin kadakayo a nalaka a maas-asitgan? Ti kinabara ken nauneg a panagrikna. Masapul a sukayenyo ti napasnek, pudpudno nga interesyo kadagiti sabsabali. No pudno nga adda pannakaseknanyo kadagiti sabsabali ken situtulokkayo a mangitukon ti bagiyo a maipaay kadakuada, mariknada daytoy ket maallukoyda kadakayo.

8. (a) Aniat’ rebbeng a laglagipenyo no basaenyo dagiti salaysay ti Biblia maipapan ken Jesus? (b) Aniat’ intay maadal maipapan ken Jehova manipud kadagiti salaysay a naisitar iti footnote?

⁸ Isu a no makabasakayo ti salaysay ti Biblia maipapan ken Jesus, laglagipenyo a dakkel ti maadalyo maipapan ken Jehova kas maysa a persona manipud kadagiti bambanag a sinao ken inaramid ni Jesus.a Ket no ti panangapresiaryo kadagiti kualidad ti Dios, kas insarming ni Jesus, tignayennakayo a mangpadpadas nga agbalin nga ad-adda a kas Kenkuana, pampaneknekanyo nga addaankay ti nadiosan a debosion.

Panangalagad ti Nadiosan a Debosion kadagiti Kapamiliaan

9, 10. (a) Kasano a ti ayat ken pannakaseknan ni Jesus maipapan ken Maria, nga inana, naiparangarang sumagmamano a kanito sakbay ti ipapatayna? (b) Apay, a nalawag, nga intalek ni Jesus ken ni apostol Juan ti pannakaaywan ken Maria ket saan a kadagiti mismo a kakabsatna iti lasag?

⁹ Ti biag ken ministerio ni Jesu-Kristo dakkel ti ipanayagna no kasano a rebbeng a maiparangarang ti nadiosan a debosion. Ti makatignay-puso a pangarigan ket nailanad idiay Juan 19:25-27, a sadiay mabasatayo: “Ngem agtaktakderda idi iti denna ti kayo a pagtutuokan ni Jesus da inana, ken ti kabsat a babai ni inana, ni Maria nga asawa ni Cleofas, ken ni Maria Magdalena. Ni Jesus, ngarud, idi nakitana ni inana ken ti adalan a dinungdungngona [ni Juan], nga adda idi dinna, kunana ken inana: ‘Babai, Addayta ti anakmo!’ Sana kuna idi adalan: ‘Addayta ti inam!’ Ket nanipud idi nga oras ti adalan innalana iti balayna.”

¹⁰ Agasenyo dayta! Sumagmamano a kanito sakbay nga insukonan ti naindagaan a biagna, ti ayat ken pannakaseknan ni Jesus ti nangtignay kenkuana a mangitalek ti panangaywan iti inana, a ni Maria, (a mabalin maysan a balo ita) ken dungdungnguenna nga apostol Juan. Ngem apay a ni Juan a saan ket nga iti maysa kadagiti mismo a lallaki a kakabsat ni Jesus iti lasag? Gapu ta maseknan ni Jesus saan laeng nga iti pisikal, namaterialan a kasapulan ni Maria no di ket nangnangruna iti naespirituan a pagimbaganna. Ket ni apostol Juan (a mabalin kasinsin ni Jesus) napaneknekannan ti pammatina, idinto ta awan pay pakakitaan a dagiti kakabsat ni Jesus iti lasag, ket manamatida.​—Mateo 12:46-50; Juan 7:5.

11. (a) Sigun ken Pablo, kasanot’ mabalin a panangipamatmat ti Kristiano ti nadiosan a debosion iti mismo a sangakabbalayanna? (b) Apay a ti pudno a Kristiano ipaayanna dagiti natataenganen a dadakkelna?

¹¹ Ita, kasano a daytoy ket panangiparangarang ti nadiosan a debosion? Inlawlawag ni apostol Pablo: “Padayawam dagiti babbai a balo a pudnoda a balo. Ngem no adda balo nga adda annakna wenno appona, ammuem koma dagitoy nga umuna nga ipakitada ti nadiosan a debosion kadagiti kabbalayda met laeng ken panangliwliwada kadagiti naganak kadakuada, ta daytoy makaay-ayo iti imatang ti Dios.” (1 Timoteo 5:3, 4) Ti pammadayaw kadagiti nagannak ti maysa babaen ti panangipaay ti material a tulong no nesesita, kas kinuna ni Pablo, ket ebkas ti nadiosan a debosion. Kasano a kasta? Ni Jehova, ti Namunganayan ti urnos ti pamilia, bilbilinenna dagiti annak a padayawan dagiti dadakkelda. (Efeso 3:14, 15; 6:1-3) Gapuna, bigbigen ti pudno a Kristiano a ti panangaywan iti dayta a responsabilidad ti pamilia ket saan laeng a panangipakita ti ayat kadagiti nagannak ti maysa no di ket panangidemostra met ti panagraem iti Dios ken panagtulnog iti bilbilinna.​—Idiligyo ti Colosas 3:20.

12. Kasanoyo a maalagad ti nadiosan a debosion kadagiti natataengan a nagannak, ket aniat’ rebbeng a motiboda?

¹² Kasano, ngarud, ti panangipakitayo ti nadiosan a debosion kadagiti miembro ti pamilia? Siempre ramanen daytoy ti panangiyurnos ti panangaywan kadagiti naespirituan ken namaterialan a kasapulan dagiti natataenganen a nagannak, kas inaramid ni Jesus. Ti saan a panangaramid iti kasta ket panangipamatmat ti kinakurang ti nadiosan a debosion. (Idiligyo ti 2 Timoteo 3:2, 3, 5.) Ti dedikado a Kristiano ti mangipaay kadagiti agkasapulan a nagannak saan laeng a gaput’ asi wenno annongen no di ket gapu ta ay-ayatenna ti pamiliana, ken bigbigenna ti nangato a panangmatmat nga inkabil ni Jehova iti panangaywan iti kasta a responsabilidad. Gapuna, ti panangaywanna kadagiti natataenganen a nagannakna ket ebkas ti nadiosan a debosion.b

13. Kasano a ti maysa nga ama a Kristiano maalagadna ti nadiosan a debosion iti pamiliana?

¹³ Maalagad met ti nadiosan a debosion iti pagtaengan kadagiti dadduma pay a pamay-an. Kas pangarigan, ti Kristiano nga ama addaan responsabilidad a mangipaay ti kasapulan ti pamiliana iti namaterialan, iti emosional, ken iti naespirituan. Gapuna, mainayon iti panangipaay ti namaterialan a panangsuporta, siaayat nga iyurnosna ti regular a panagadal ti Biblia iti pamilia. Iyiskediolna ti panawen a makiraman a regular iti tay-ak ti ministerio a kadua ti pamiliana. Isut’ natimbeng, a bigbigbigenna met ti pannakasapuldat’ inana ken panaglinglingay. Ken sisisirib nga ikeddengna dagiti bambanag a maipangpangruna, a dina palubosan ti ar-aramid ti kongregasion a makaigaput’ pakaliwayanna iti pamiliana. (1 Timoteo 3:5, 12) Apay nga ar-aramidenna amin daytoy? Saan laeng a kas annongen no di ket gaput’ ayatna iti pamiliana. Bigbigenna ti kinapateg nga ikabkabil ni Jehova iti panangaywan ti pamilia ti maysa. Babaen ngarud ti panangtungpalnat’ responsabilidadna kas asawa a lalaki ken ama, al-alagadenna ti nadiosan a debosion.

14. Kasano a maiparangarang ti Kristiano nga asawa a babai ti nadiosan a debosion iti pagtaengan?

¹⁴ Dagiti Kristiano nga assawa a babbai addaanda met ti responsabilidad a mangalagad ti nadiosan a debosion iti pagtaengan. Kasano? Kuna ti Biblia a ti asawa a babai ket rebbeng nga “agpasakop” ken lakayna ket rebbeng a maaddaan ti “nauneg a panagraem” ken lakayna. (Efeso 5:22, 33) Uray no ni lakayna ket di mamati, ti babai rebbeng nga “agpasakop” kenkuana. (1 Pedro 3:1) Idemdemostra ti babai a Kristiano ti kasta a panagpasakop ti asawa babaen ti panangsuportarna ken lakayna kadagiti desison nga ar-aramidenna la ketdi no dagitoy saanda a sumuppiat kadagiti linlinteg ti Dios. (Aramid 5:29) Ken apay nga akseptarenna daytoy nga akem? Saan laeng a gapu ta inayatna ni lakayna no di ket nangnangruna agsipud ta bigbigbigenna a dayta ket “mayannugot iti Apo”​—kayatna a sawen, daytat’ urnos ti Dios maipaay iti pamilia. (Colosas 3:18) Ti situtulok a panagpasakopna ken lakayna ngarud ket ebkas ti nadiosan a debosionna.

“Ta Maipuon Itoy Immayak”

15. Iti ania a naisangsangayan a pamay-an nga imparangarang ni Jesus ti nadiosan a debosion?

¹⁵ Maysa kadagiti naisangsangayan a pamay-an a nangiparangarangan ni Jesus ti nadiosan a debosion ket babaen ‘ti panangipakaammo ti naimbag a damag ti pagarian ti Dios.’ (Lucas 4:43) Kalpasan ti bautismona idiay Jordan idi 29 K.P., binusbos ni Jesus ti sumaganad a tallo ket kagudua a tawen a nasged unay iti daytoy kapapatgan-amin a trabaho. “Ta maipuon itoy immayak,” inlawlawagna. (Marcos 1:38; Juan 18:37) Ngem kasano a panangiparangarang daytoy iti nadiosan a debosionna?

16, 17. (a) Aniat’ nangtignay ken Jesus tapno isut’ nasged iti panangasaba ken panangisuro? (b) Apay a ti ministerio ni Jesus a panangaskasaba ken panangisuro ket panangiparangarang ti nadiosan a debosionna?

¹⁶ Laglagipenyo a ti nadiosan a debosion ramanenna ti panagbiag iti pamay-an a makaay-ayo iti Dios agsipud ta isut’ inayatyo ken patgenyo unay dagiti nakaay-ayat a kualidadna. Ania, ngarud, ti nangtignay ken Jesus a mangbusbos kadagiti maudi a tawtawenna ditoy daga a nasged unay iti panangasaba ken panangisurona? Maysa laeng kadi a panagrikna ti annongen wenno obligasion? Awan duadua nga isut’ maseknan kadagiti tattao. (Mateo 9:35, 36) Ken naan-anay a bigbigenna a ti pannakapulotna ti nasantuan nga espiritu ti nangdutok ken nangbilin kenkuana a mangitungpal ti ministeriona. (Lucas 4:16-21) Kaskasdi, dagiti motibona ket naun-uneg pay.

¹⁷ “Ayatek ni Ama,” sibabatad nga imbaga ni Jesus kadagiti apostolna iti maudi a rabii ti naindagaan a panagbiagna. (Juan 14:31) Dayta nga ayat ket naibatay iti nakaun-uneg, nasinged a pannakaammona kadagiti kualidad ni Jehova. (Lucas 10:22) Natignay iti puso nga addaan nauneg a panangipateg, naaddaan ragsak ni Jesus iti panangar-aramid ti pagayatan ti Dios. (Salmo 40:8) Dayta ti “taraonna”​—a nasken unay maipaay iti biag, a nakanannanam. (Juan 4:34) Isut’ nangted ti perpekto nga ulidan ti “biruken nga umuna ti pagarian” imbes nga ipangpangruna ti bagitayo. (Mateo 6:33) Gapuna saan laeng a ti inaramidna wenno no kasano kadakkel ti naaramidanna no di ket no apay nga inaramidna dayta ti namagbalin iti ministeriona a panangaskasaba ken panangisuro kas ebkas ti nadiosan a debosionna.

18. Apay a ti pannakiramraman met bassit iti ministerio saan a nesesita a panangiparangarang ti nadiosan a debosion?

¹⁸ Kasanotay a suroten ti ulidan ti “modelo,” a ni Jesus, itoy a banag? (1 Pedro 2:21) Amin a mangabrasa iti awis ni Jesus nga “umayka surotennak” ket addaan ti nadiosan a komision a mangikasaba ti naimbag a damag ti Pagarian ken agaramid ti ad-adalan. (Lucas 18:22; Mateo 24:14; 28:19, 20) Kayat kadi a sawen daytoy a babaen ti pannakiramantay met iti panangiwaragawag ti naimbag a damag, sursurotentayon ti nadiosan a debosion? Saan a nesesita a kasta. No makiramramantayo iti ministerio iti paspasaray wenno kasla pakita laeng, wenno tapno pagustuan laeng dagiti miembro ti pamiliatayo wenno ti dadduma, narigat a maibilang dayta kas ‘aramid ti nadiosan a debosion.’​—2 Pedro 3:11.

19. (a) Aniat’ rebbeng a kangrunaan a rason iti ar-aramidentayo iti ministerio? (b) Ania dagiti ibungana no matignaytayo iti nauneg-pannakairamutna a panagayat iti Dios?

¹⁹ Kas ken Jesus, masapul a dagiti motibotayo naun-unegda pay koma. Kuna ni Jesus: “Ket ayatem ni Jehova a Diosmo iti amin a pusom [dagiti emosion, tartarigagay, ken ti rikna ti tao a makin-uneg] ken iti amin a kararuam [ti biagmo ken ti intero a kinataom] ken iti amin a panunotmo [dagiti pannakabalin ti pannakaawatyo] ken kadagiti isuamin a pigsam.” Iti daytoy, innayon ti mannakaawat nga eskriba: “Daytoy . . . napatpateg ngem dagiti amin a daton ken sagut.” (Marcos 12:30, 33, 34) Ngarud saan laeng a no aniat’ aramidentayo ti napateg no di ket no apay nga ar-aramidentayo dayta. Ti nauneg-pannakairamutna a panagayat iti Dios a ramanenna ti amin a pigsatayo ket rebbeng nga isut’ kangrunaan a rason iti ar-aramidentayo iti ministerio. No kasta ti kaso, saantayto a kontento laeng iti paspasaray a pannakiramraman, no di ket matignaytayo a mangidemostra ti kinauneg ti nadiosan a debosiontayo babaen ti panangaramid ti inggat’ kabaelantayo. (2 Timoteo 2:15) Maigiddato iti dayta, no ayat ti Dios ti motibotayo, saantayo met nga agbalin a manangbabalaw, nga idildilig ti ministeriotayo kadagiti dadduma.​—Galacia 6:4.

20. Kasanotay a magunggonaan a naan-anay iti ulidan ni Jesus iti panangsurot ti nadiosan a debosion?

²⁰ Anian a yamantayo nga impalgak ni Jehova kadatayo ti nasantuan a palimed ti nadiosan a debosion! Babaen ti panangadal a siaannad kadagiti bambanag a kinuna ken inaramid ni Jesus ken babaen ti panagreggettay a mangtulad kenkuana, agpadpada a matulongantayto a mangsukay ken mangiparangarang ti nadiosan a debosion iti dakdakkel a rukodna. Bendisionannatayto a sibabaknang ni Jehova no surotentayo ti ulidan ni Jesus iti panangsurot ti nadiosan a debosion kas dagiti dedikado, bautisado a Kristiano.​—1 Timoteo 4:7, 8.

[Dagiti Footnote]

Malagipyo Aya

◻ Iti panangsurot ti nadiosan a debosion, apay a masapul nga usigentayo ti ulidan ni Jesus?

◻ Aniat’ maadaltayo maipapan ken Jehova manipud iti kinabara ken nauneg a panagrikna nga inyulidan ni Jesus?

◻ Kasanotay a maiparangarang ti nadiosan a debosion kadagiti miembro ti pamiliatayo?

◻ Aniat’ rebbeng a motibotayo tapno ti ministeriotayo ket agbalin nga ebkas ti nadiosan a debosion?

[Ladawan iti panid 21]

Ti Kristiano nga ama ket responsable a mangipaay iti namaterialan, emosional, ken naespirituan a kasapulan ti pamiliana

[Ladawan iti panid 23]

“Ngem no adda balo nga adda annakna wenno appona, dagitoy . . . ipakitada ti rebbeng a panangsubad kadagiti nagannakda ken ap-apongda.”