Salsaludsod Dagiti Agbasbasa
Ammo kadi ni Abel a masapul ti daton nga animal tapno maay-ayo ti Dios?
Ababa unay ti salaysay ti Biblia maipapan iti panagidaton da Cain ken Abel. Iti Genesis 4:3-5, mabasatayo: “Naaramid iti panagngudo ti sumagmamano a tiempo a ni Cain nangyeg iti sumagmamano a bunga ti daga kas daton ken Jehova. Ngem no maipapan ken Abel, nangyeg met iti sumagmamano nga inauna ti arbanna, dagiti mismo a nalulukmeg kadakuada. Ita bayat a ni Jehova kumitkita buyogen ti panangpabor ken Abel ken iti datonna, saan a kimmita buyogen ti aniaman a panangpabor ken Cain ken iti datonna.”
Awan ti nadakamat iti Biblia a sakbay daytoy a panagidaton nangipaay ni Jehova iti aniaman nga espesipiko nga impormasion maipapan kadagiti daton wenno no ania dagiti kita ti daton a makaay-ayo kenkuana. No kasta, bukod a nakem da Cain ken Abel ti panagidatonda. Naparitanda a sumrek iti Paraiso a nagtaengan idi damo dagiti nagannak kadakuada; nariknadan dagiti epekto ti basol; ken naisinada iti Dios. Iti managbasol ken nakaay-ay-ay a kasasaadda, nariknada la ketdi unay a masapul nga agpannurayda iti tulong ti Dios. Ti panangipaay iti sagut iti Dios ket mabalin a boluntario a tignay iti biangda tapno maay-ayoda ti Dios.
Kas napasamak, inanamongan ti Dios ti daton ni Abel ngem linaksidna ti daton ni Cain. Apay? Gapu kadi ta umiso ti indaton ni Abel ket saan nga umiso ti indaton ni Cain? Saantayo a masigurado no ti kita ti daton ti makagapu, yantangay saan a naibaga kadakuada no ania ti makaay-ayo ken di makaay-ayo. Ngem mabalin a makaay-ayo ti aniaman kadagiti indatonda. Iti Linteg nga inted ni Jehova iti nasion ti Israel idi agangay, dagiti makaay-ayo a daton ket saan laeng a dagiti animal wenno paset ti animal no di ket uray dagiti kinirog a bukel, dagiti binettek a sebada, namayekmek nga arina, tinapay, ken arak. (Levitico 6:19-23; 7:11-13; 23:10-13) Nalawag a saan laeng a ti mismo a daton da Cain ken Abel ti makagapu nga inanamongan ti Dios ti maysa ket linaksidna ti sabali.—Idiligyo ti Isaias 1:11; Amos 5:22.
Adu a siglo kalpasanna, kinuna ni apostol Pablo: “Babaen iti pammati indaton ni Abel iti Dios ti maysa a sakripisio a dakdakkel ti pategna ngem ni Cain, a babaen iti dayta a pammati naipaayan iti panangsaksi nga isu nalinteg, a ti Dios ti nangsaksi maipapan kadagiti sagutna.” (Hebreo 11:4) No kasta, ti Dios imbilangna ni Abel a nalinteg gapu iti pammatina. Ngem pammati iti ania? Pammati iti kari ni Jehova nga ipaayna ti Bin-i, a ‘mangdunor iti ulo ti serpiente’ ken mangisubli iti talna ken kinaperpekto a tinagiragsak idi ti sangatauan. Babaen ti sasao a ti Bin-i ket ‘madunor iti mukod,’ mabalin a napanunot ni Abel a masapul ti daton a pakairamanan ti pannakaiparukpok ti dara. (Genesis 3:15) Uray pay kasta, ti ebkas ti pammati ni Abel ti namagbalin iti datonna a “maysa a sakripisio a dakdakkel ti pategna ngem ni Cain.”
Kasta met, di naanamongan ni Cain, saan a gapu ta nangidaton iti di umiso a kita ti sakripisio, no di ket gapu ta awanan iti pammati, kas impasimudaag dagiti aramidna. Imbatad ni Jehova ken ni Cain: “No tumurongka iti panagaramid iti naimbag, awanto aya ti pannakaitan-ok?” (Genesis 4:7) Linaksid ti Dios ni Cain saan a gapu ta di naay-ayo iti datonna, no di ket “agsipud ta nadangkes ti bukodna nga ar-aramid”—nga impasimudaag ti panagimon, gura, ken panangpapatay kalpasanna.—1 Juan 3:12.