Napasnek a Panagregget​—Kaano a Bendisionan ni Jehova?

“PALUBOSANNAK a pumanaw, ta nagbannawagen.”

“Saanka a palubosan a pumanaw agingga nga umuna pay a bendisionannak.”

“Ania ti naganmo?”

“Jacob.”

“Saankanton a mapanaganan iti Jacob no di ket Israel, agsipud ta nakirangetka iti Dios ken kadagiti lallaki iti kasta nangabakka iti kamaudiananna.”​—Genesis 32:26-28.

Dayta a makapainteres a panagsarita ket resulta ti naisangsangayan a panangipakita ni Jacob iti pigsana idi agtawen iti 97. Nupay saan nga inladawan ti Biblia kas atleta, nagpatnag a nakigabbo ni Jacob iti maysa nga anghel. Apay? Maseknan unay ni Jacob iti kari ni Jehova iti apongna​—ti tawidna.

Adu a tawen sakbayna, inted kenkuana ni Esau a kabsatna ti kalintegan kas inauna a kasukat ti sangamalukong a gisado. Ita, nadamag ni Jacob nga um-umay ni Esau a kaduana ti 400 a lallaki. Gapu ta madanagan, kayat ni Jacob a siguraduen ti pannakatungpal ti kari ni Jehova a rumang-ay ti pamiliana iti daga iti ballasiw ti Karayan Jordan. Maitunos kadagiti kararagna, nagtignay ni Jacob. Sipaparabur a nangipatulod kadagiti sagut ken ni Esau a sumungsungad a sumabat kenkuana. Kasta met, kas panagannad, biningayna iti dua a bunggoy ti kampona ken imballasiwna dagiti assawa ken annakna iti paset ti karayan a lumasat iti Jaboc. Kalpasanna, nagsangsangit ken sipipinget a nakigabbo iti agpatnag iti maysa nga anghel tapno “ipakaasina ti parabur maipaay kenkuana.”​—Oseas 12:4; Genesis 32:1-32.

Usigenyo ti napasamak sakbayna mainaig ken ni Raquel, ti maikadua nga asawa ni Jacob nga ipatpategna unay. Pagaammo ni Raquel nga inkari ni Jehova a bendisionanna ni Jacob. Ni Lea a kabsatna, ti umuna nga asawa ni Jacob, ket naparaburan iti uppat nga annak a lallaki ngem lupes ni Raquel. (Genesis 29:31-35) Imbes nga ay-ayenna ti bagina, intultuloy ni Raquel ti immararaw ken ni Jehova ken nagtignay maitunos kadagiti kararagna. Kas iti inaramid ni apongna a Sara ken ni Agar, inted ni Raquel ken ni Jacob ni Bilha a tagabona kas maikadua nga asawa tapno, kas kinuna ni Raquel, “siak, siak a mismo, makagun-odak iti annak manipud kenkuana.”a Naaddaan ni Bilha iti dua nga annak a lallaki ken ni Jacob​—da Dan ken Neftali. Idi naipasngay ni Neftali, inyebkas ni Raquel ti kasta unay nga emosional a pannakidangadangna: “Buyogen dagiti napinget a pannakigubal nakigubalak iti kabsatko a babai. Nangabakak met!” Naparaburan pay ni Raquel iti dua a bukodna nga annak a lallaki, da Jose ken Benjamin.​—Genesis 30:1-8; 35:24.

Apay a binendisionan ni Jehova ti pisikal ken emosional a pannakidangadang da Jacob ken Raquel? Impangrunada ti pagayatan ni Jehova ken impategda ti tawidda. Sipapasnek nga inkararagda ti panangbendisionna iti biagda ken nagtignayda a maitunos iti pagayatan ti Dios ken kadagiti dawatda.

Kas kada Jacob ken Raquel, adu ita ti makapaneknek a nasken ti napinget a panagregget tapno bendisionan ida ni Jehova. Masansan a mabuyogan ti panagreggetda iti lulua, pannakaupay, ken pannakapaay. Malagip ni Elizabeth, maysa a Kristiano nga ina, a masapul idi a sipapasnek nga ikarigatanna ti tumabuno manen a regular kadagiti Nakristianuan a gimong kalpasan ti nabayag a dina itatabuno. Saan a kaskarina ti maaddaan iti lima a babassit pay nga annak, di manamati nga asawa, ken mapan iti kaasitgan a Kingdom Hall a 30 kilometro ti kaadayona. “Nasken nga ikarigatak ti makigimong a regular ta ammok nga agpaay daytoy a pagimbaganmi nga agiina. Nakatulong dayta kadagiti annakko a makabigbig iti kinapateg ti panangaramid iti kasta.” Binendisionan ni Jehova ti panagreggetna. Kadagiti tallo nga annakna a lallaki nga aktibo iti kongregasion Kristiano, dua ti adda iti amin-tiempo a ministerio. Naragsakan ni Elizabeth iti panagrang-ayda iti naespirituan. Kinunana: “Naunaandak a rimmang-ay iti naespirituan.” Pudno a nasupapakan ti napasnek a panagreggetna!

Napasnek a Panagregget a Bendisionan ni Jehova

Di pagduaduaan a makagunggona ti napasnek a panagregget ken panagbannog. No ad-adda nga igaedtayo nga aramiden ti maysa a proyekto wenno annongen, dakdakkel a pannakapnek ti itden dayta kadatayo. Inaramidnatayo ni Jehova a kasta. “Ti tunggal tao mangan ken pudno nga uminum ken makakita iti imbag iti isuamin a napinget a panagtrabahona. Dayta ti sagut ti Dios,” insurat ni Ari Solomon. (Eclesiastes 3:13; 5:18, 19) Ngem tapno bendisionannatayo ti Dios, masapul nga umiso ti nakaiturongan ti panagreggettayo. Kas pagarigan, nainkalintegan aya a namnamaentayo nga anamongan ni Jehova ti estilo ti panagbiag a mangikabil kadagiti naespirituan a banag iti maikadua a lugar? Manamnama aya ti maysa a dedikado a Kristiano ti anamong ni Jehova no awatenna ti trabaho wenno pannakaital-o ngem masansan a malangananna dagiti makapabileg-pammati a pannakitimpuyog ken pannursuro kadagiti Nakristianuan a gimong?​—Hebreo 10:23-25.

Ti panangigaed ti maysa a tao a mangragpat iti sekular a karera wenno material a kinarang-ay dina kaipapanan a ‘makitana ti imbag’ no mabaybay-anna dagiti naespirituan a banag. Iti ilustrasionna maipapan iti agmulmula, impakita ni Jesus ti pagbanagan ti di umiso a panagregget. Maipapan iti bukel a “naimula iti nagbabaetan dagiti sisiitan,” inlawlawag ni Jesus a “daytoy daydiay dumdumngeg iti sao, ngem ti pakaringgoran daytoy a sistema ti bambanag ken ti makaallilaw a pannakabalin ti kinabaknang leppesenda ti sao, ket isu agbalin a di nabunga.” (Mateo 13:22) Namallaag met ni Pablo maipapan iti umasping a palab-og ken innayonna a dagiti materialistiko “matnagda iti sulisog ken iti silo ken iti adu a minamaag ken makapasakit a tartarigagay, a mangipalned kadagiti tattao iti pannakadadael ken pannakarba.” Ania ti solusion ti kasta a wagas ti panagbiag a makadadael iti espiritualidad? Intuloy ni Pablo: ‘Umadayokayo kadagitoy a banag ket isadagyo ti namnamayo, saan nga iti pagduaduaan a kinabaknang, no di ket iti Dios, a sibabaknang a mangipaay kadatayo iti amin a bambanag a pagragsakantayo.’​—1 Timoteo 6:9, 11, 17.

Aniaman ti edadtayo wenno uray kasano ti kabayagtayon nga agserserbi ken Jehova, magunggonaantayo amin no tuladentayo ti napasnek a panagregget da Jacob ken Raquel. Iti ayatda a gumun-od iti pabor ti Dios, pulos a dida linipatan ti tawidda, uray no makapadanag wenno makapaupay ti kasasaadda. Iti kaaldawantayo, mabalin a makapadanag, makapaupay, wenno makapaladingit pay ketdi dagiti parikut ken rigat a mapasarantayo. Nalabit maumatayon ket agbalin a biktima ni Satanas. Mabalin nga usarenna ti aniaman a pamay-an, paglinglingayan man wenno pagpalpaliwaan, isport wenno dagiti pagesman, karera wenno material a kinarang-ay, tapno maibanagna ti panggepna. Masansan a maipanamnama dagiti makaay-ayo a resulta ngem manmano a maragpat dagitoy. Masansan a pannakaupay ti pagtungpalan dagidiay maallilaw wenno maallukoy nga agaramid kadagita a banag. Kas kada Jacob ken Raquel idi ugma, sipapasnek a makidangadangtayo tapno maparmektayo dagiti pangallilaw ni Satanas.

Kayat ti Diablo a mapaaytayo, a mariknatayo nga ‘awanen ti namnama a sumayaat pay ti kasasaadtayo. Awanen a pulos ti maaramidantayo.’ No kasta, nasken a ditay mapukawan iti namnama. Ditay koma panunoten nga ‘awan ti mangay-ayat kadatayo’ wenno ‘linipatannatayon ni Jehova.’ Makadadael ti kasta a panagpampanunot. Saan ngata nga ipasimudaag dayta a naumatayon a mangikagkagumaan a gumun-od iti bendision? Laglagipenyo, bendisionan ni Jehova ti napasnek a panagreggettayo.

Itultuloyyo ti Makidangadang Agingga a Bendisionannakayo ni Jehova

Ti nasayaat a kasasaadtayo iti naespirituan ket agpannuray unay iti pannakabigbigtayo iti dua a napateg a kinapudno maipapan iti biagtayo kas adipen ni Jehova. (1) Mapasaran ti amin a tao dagiti parikut, an-annayen, wenno narigat a kasasaad iti biag, ken (2) ipangag ni Jehova ti araraw dagidiay sipapasnek a dumawat kenkuana iti tulong ken bendision.​—Exodo 3:7-10; Santiago 4:8, 10; 1 Pedro 5:8, 9.

Uray kasano karigat ti kasasaadyo wenno uray no ti panagriknayo ket limitado ti maaramidanyo, dikay tumulok iti “basol a silalaka a mangsagud kadatayo”​—kaawan ti pammati. (Hebreo 12:1) Itultuloyyo ti makidangadang agingga a magun-odyo ti bendision. Aganuskayo, a laglagipenyo ni lakayen a Jacob, a nagpatnag a nakigabbo tapno magun-odna ti bendision. Kas iti mannalon nga agmula iti primavera ken aguray iti panagani, siaanus nga urayenyo ti panangbendision ni Jehova iti naespirituan a trabahoyo, uray no iti panagriknayo ket limitado ti maaramidanyo. (Santiago 5:7, 8) Ken kanayon a laglagipenyo ti kinuna ti salmista: “Dagidiay agimulmula iti bin-i buyogen iti lulua agapitdanto buyogen a mismo ti narag-o nga ikkis.” (Salmo 126:5; Galacia 6:9) Agtalinaedkayo a natibker, ken itultuloyyo ti makidangadang.

[Footnote]