Salimetmetam Kadi ti Kinatarnawmo?

MANO a billit-tuleng ti natay idi kalman? Awan ti makaammo, ken nalabit manmano ti maseknan iti dayta gapu ta nakaad-adu ti tumatayab. Ngem maseknan ni Jehova. Idi tukoyenna dagitoy kasla awan pategda a tumatayab, kinuna ni Jesus kadagiti adalanna: “Awan maysa kadakuada ti matnag iti daga a saan nga ammo ni Amayo.” Innayonna: “Dikay agbuteng: napatpategkayo ngem iti adu a billit-tuleng.”​—Mateo 10:29, 31.

Idi agangay, ad-adda a natarusan dagiti adalan no kasano ti panangipateg ni Jehova kadakuada. Insurat ti maysa kadakuada, ni apostol Juan: “Babaen itoy naiparangarang ti ayat ti Dios iti kasasaadtayo, agsipud ta ti Dios imbaonna ti bugbugtong nga Anakna ditoy lubong tapno magun-odantayo ti biag babaen kenkuana.” (1 Juan 4:9) Saan laeng nga impaay ni Jehova ti subbot no di pay ket impatalgedna met iti tunggal maysa kadagiti adipenna: “Saankanto a pulos panawan ket saankanto a pulos baybay-an.”​—Hebreo 13:5.

Nalawag, di agbaliw ti panagayat ni Jehova iti tattaona. Ngem tumaud ti saludsod, ‘Nadekket kadi ti relasiontayo ken Jehova isu a ditayto pulos panawan?’

Ikagumaan ni Satanas a Dadaelen ti Kinatarnawtayo

Idi impabigbig ni Jehova ken ni Satanas ti kinatarnaw ni Job, inkalintegan ni Satanas: “Dayawennaka ngata ni Job no awan ti magunggonana?” (Job 1:9, Today’s English Version) Imparipiripna a nasungdo laeng dagiti tattao iti Dios no adda ‘magunggonada.’ No pudno daytoy, mabalin a maikompromiso ti kinatarnaw ti asinoman a Kristiano​—no talaga a makaguyugoy ti gunggona.

Iti kaso ni Job, immuna a kinuna ni Satanas a mapukaw ti kinatarnaw ni Job iti Dios no maawan dagiti kapatgan a sanikuana. (Job 1:10, 11) Idi napaneknekan nga ulbod daytoy a panangumsi, inkalintegan ni Satanas: “Awan ti saan nga isuko ti maysa a tao tapno agtalinaed a sibibiag.” (Job 2:4, TEV) Mabalin a pudno iti dadduma ti kinuna ni Satanas, ngem ni Job saanna nga inkompromiso ti kinatarnawna. Dayta ti paneknekan ti rekord ti historia. (Job 27:5; 42:10-17) Kasta kadi ti kinasungdom? Wenno ipalubosmo kadi a dadaelen ni Satanas ti kinatarnawmo? Usigem ti bagim bayat nga anagentayo ti sumagmamano a kinapudno a pakairamanan ti tunggal Kristiano.

Patien ni apostol Pablo a nabileg unay ti pudno a Nakristianuan a kinasungdo. Insuratna: “Kombinsidoak nga uray ti ipapatay wenno ti biag . . . wenno ti bambanag nga addan wenno ti bambanag nga umayto . . . wenno ti aniaman a sabali pay a parsua saandatayto a kabaelan nga isina iti ayat ti Dios nga adda ken Kristo Jesus nga Apotayo.” (Roma 8:38, 39) Maaddaantayo iti isu met laeng a kombiksion no nabileg ti panagayattayo ken Jehova. Awan ti makabalin a mangdadael iti singgalut ti kasta nga ayat, uray pay ni patay.

No addaantayo iti kasta a relasion iti Dios, pulos a ditay isaludsod, ‘Kalpasan ti sumagmamano a tawen, agserserbiakto pay laeng ngata ken Jehova?’ Ti kasta a panagpangpangadua ipasimudaagna a ti kinatarnawtayo iti Dios ket agpannuray iti mapasamak kadatayo bayat ti panagbiagtayo. Ti pudno a kinatarnaw ket saan nga apektaran dagiti makinruar a kasasaad. Agpannuray dayta iti kita ti makin-uneg a kinataotayo. (2 Corinto 4:16-18) No ay-ayatentayo ni Jehova iti amin a pusotayo, ditayto pulos paayen.​—Mateo 22:37; 1 Corinto 13:8.

Ngem masapul a laglagipentayo nga agtultuloy nga ikagumaan ni Satanas a dadaelen ti kinatarnawtayo. Nalabit a sulisogennatayo a tumulok iti tarigagay ti lasag, rumukma iti impluensia dagiti kapatada, wenno mangtallikud iti kinapudno gapu iti nagduduma a kita ti pakarigatan. Ti lubong a naisina iti Dios ti kangrunaan a kabinnadang ni Satanas iti daytoy nga iraraut, nupay ti bukodtayo a kinaimperpekto ti mangpalaka iti gakatna. (Roma 7:19, 20; 1 Juan 2:16) Nupay kasta, addaantayo iti sumagmamano a bentaha iti daytoy a dangadang. Ti maysa a kangrunaan kadagitoy ket ti kinapudno a saantayo nga ignorante kadagiti gakat ni Satanas.​—2 Corinto 2:11.

Ania dagiti gakat ni Satanas? Dineskribir ni Pablo dagitoy iti suratna kadagiti taga Efeso kas dagiti “pangallilaw a pamuspusan.”a (Efeso 6:11) Nangikabil ni Satanas kadagiti pangallilaw iti sanguanantayo tapno madadael ti kinatarnawtayo. Agyamantayo ta mabalintay a mabigbig dagitoy a nasikap nga aramid, yantangay dagiti wagas ti Diablo ket nairekord iti Sao ti Dios tapno mapakaammuantayo. Dagiti panangikagumaan ni Satanas a mangdadael iti kinatarnaw ni Jesus ken ni Job ti mangipakita iti sumagmamano a wagas nga us-usarenna a pangdadael iti Nakristianuan a kinatarnawtayo.

Saan a Madadael ti Kinatarnaw ni Jesus

Iti rugrugi ti ministerio ni Jesus, sidudursok a sinulisog ni Satanas ti Anak ti Dios babaen ti panangkaritna kenkuana a pagbalinenna a tinapay ti bato. Anian a kinasikap! Saan a nangnangan ni Jesus iti 40 nga aldaw, isu nga awan duadua a kasta unay ti bisinna. (Lucas 4:2, 3) Insingasing ni Satanas a penneken a dagus ni Jesus ti natural a tarigagayna, iti pamay-an a maibusor iti pagayatan ni Jehova. Kasta met ita, ti propaganda ti lubong iparparegtada ti dagus a panangpennek iti tarigagay, a saanen a panunoten dagiti ibungana. Ti mensahe ket, ‘Masapulmo dayta itan,’ wenno, ‘Basta aramidem!’

No pinennek ni Jesus ti nakaro a bisinna a dina inutob dagiti ibungana, nagballigi koma ni Satanas a nangallilaw ken Jesus a mangikompromiso iti kinatarnawna. Naespirituan ti panangmatmat ni Jesus iti bambanag, ket sibibileg nga insungbatna: “Adda a naisurat, ‘Ti tao saan nga agbiag babaen iti tinapay laeng.’”​—Lucas 4:4; Mateo 4:4.

Gapuna, binaliwan ni Satanas ti taktikana. Gapu ta napaay a nangyaplikar iti Kasuratan, a masansan nga usaren ni Jesus, imparegta ti Diablo ken Jesus a tumpuak manipud iti pannakabaluarte ti templo. ‘Adda anghel a mangispal kenka,’ kinuna ni Satanas. Awan ti panggep ni Jesus nga agkiddaw iti milagro a pannalaknib manipud ken Amana tapno laeng pagsiddaawanda. “Dika suboken ni Jehova a Diosmo,” kinuna ni Jesus.​—Mateo 4:5-7; Lucas 4:9-12.

Kamaudiananna, nagusar ni Satanas iti mas direkta a taktika. Pinadasna ti makitinnulag ken Jesus babaen ti panangitukonna kenkuana iti intero a lubong ken ti dayagna, a kasukat ti maysa laeng a tignay ti panagdayaw. Dayta laengen ti mabalin a maitukon ni Satanas. Ngem kasano koma a maaramid ni Jesus a pagrukbaban ti kangrunaan a kabusor ni Amana? Dina pulos pinanunot nga aramiden ti kasta! “Ni Jehova a Diosmo ti masapul a daydayawem, ket kenkuana laeng ti masapul a pangipaayam ti sagrado a panagserbi,” insungbat ni Jesus.​—Mateo 4:8-11; Lucas 4:5-8.

Kalpasan a napaay dagidi a tallo a panangsulisog, ‘pimmanaw ni Satanas ken Jesus agingga iti sabali pay a mainugot a tiempo.’ (Lucas 4:13) Daytoy ti mangipakita a nagtultuloy a nagsapul ni Satanas iti gundaway tapno suotenna ti kinatarnaw ni Jesus. Kalpasan ti agarup dua ket kagudua a tawen, dimteng ti mainugot a tiempo, idi inrugi ni Jesus a sanayen dagiti adalanna maipaay iti umadanin nga ipapatayna. Kinuna ni apostol Pedro: “Kaasiam ta bagim, Apo; saanto a pulos mapasamak kenka daytoy a pagtungpalan.”​—Mateo 16:21, 22.

Saan ngata a naay-ayo ni Jesus iti kasta a mangisakit ngem biddut a balakad, yantangay inyebkas dayta ti maysa kadagiti adalanna? Dagus a nabigbig ni Jesus nga inyanninaw dagita a sasao ti pagayatan ni Satanas, saan a ti pagayatan ni Jehova. Sibibileg nga insungbat ni Kristo: “Inka iti likudak, Satanas! Maysaka a pakaitibkolak, agsipud ta pampanunotem, saan a ti pampanunot ti Dios, no di ket ti pampanunot ti tattao.”​—Mateo 16:23.

Gapu iti di agkupas a panagayat ni Jesus ken Jehova, saan a nadadael ni Satanas ti kinatarnawna. Awan ti maitukon ti Diablo, wenno uray nakaro a pakasuotan a mabalin a mangpakapuy iti kinatarnaw ni Jesus iti nailangitan nga Amana. Addaantayo ngata iti kasta a determinasion no dumteng dagiti kasasaad a mangsuot iti kinatarnawtayo? Ti ulidan ni Job tulongannatayo a mangtarus a nasaysayaat kadagiti nakaro a pakarigatan a sanguentayo.

Kinatarnaw iti Laksid ti Pakarigatan

Kas napasaran ni Job, mabalin a sumangbay kadatayo dagiti pakarigatan iti aniaman a tiempo. Naragsak a lalaki ni Job, addaan iti asawa ken sangapulo nga annak, ken nasayaat ti espiritualidadna. (Job 1:5) Ngem saan nga ammo ni Job a ti kinatarnawna iti Dios ket nagbalin a susik idiay langit, ken determinado ni Satanas a mangdadael iti kinatarnawna iti amin a pamay-an a mabalinanna.

Iti apagkanito, napukaw ti material a kinabaknang ni Job. (Job 1:14-17) Ngem nasalimetmetan ni Job ti kinatarnawna agsipud ta di pulos nagtalek iti kuarta. Idi malaglagip ni Job ti dati a kinabaknangna, kinunana: “No insaadko ti balitok kas pagkammatalkak, . . . no agragrag-oak idi agsipud ta adu ti sanikuak, . . . maysa met dayta a biddut . . . , ta inlibakko koma ti pudno a Dios sadi ngato.”​—Job 31:24, 25, 28.

Ita, iti apagkanito, posible met a mapukaw ti amin a sanikuatayo. Maysa a negosiante a Saksi ni Jehova ti sinaurda iti dakkel a kantidad ti kuarta, ket nganngani nabangkarote. Inadmitirna: “Nganngani maatake ti pusok. Kinapudnona, naatakeak koma no saan a gapu iti relasionko iti Dios. Ngem gapu iti daytoy a kapadasan, naamirisko a talaga a saan a dagiti naespirituan a banag ti impangpangrunak. Kasla awanen ti sabali a napateg kaniak gapu iti gagarko a maaddaan iti kuarta.” Sipud idin, saanen nga impangpangruna daytoy a Saksi ti negosiona, ken regular nga agserserbi kas auxiliary pioneer, a mangbusbos iti 50 nga oras iti makabulan wenno nasursurok pay iti Nakristianuan a ministerio. Ngem mabalin nga adda pay nakarkaro a parparikut ngem ti pannakapukaw kadagiti sanikua ti maysa a tao.

Madama pay laeng a maipadpadamag ken ni Job ti pannakapukaw ti kinabaknangna idi maipakaammo a natay dagiti sangapulo nga annakna. Kaskasdi, kinunana: “Ti nagan ni Jehova agtultuloy koma a mabendito.” (Job 1:18-21) Mataginayontayo ngata ti kinatarnawtayo no addada kapamiliatayo a kellaat a matay? Ni Francisco, maysa a Kristiano a manangaywan idiay España, ket natayan iti dua nga annak gapu iti nakalkaldaang nga aksidente iti bus. Naliwliwa gapu iti ad-adda nga iyaadanina ken ni Jehova ken ad-adda a pannakipasetna iti Nakristianuan a ministerio.

Uray kalpasan ti nakaay-ay-ay nga ipapatay dagiti annakna, saan a namingga ti pakasuotan ni Job. Impalak-am ni Satanas kenkuana ti makadurmen, naut-ot a sakit. Iti dayta a kanito, sibibiddut a binalakadan ti asawana. “Ilunodmo ti Dios ket matayka!” indagadagna kenkuana. Saan nga inkankano ni Job ti balakadna, ken saan a nagbasol “babaen kadagiti bibigna.” (Job 2:9, 10) Natarnaw ni Job, saan a gapu iti emosional a tulong ti pamiliana, no di ket gapu iti personal a relasionna ken Jehova.

Naawatan ni Flora ti narikna ni Job gapu ta ti asawana ken ti inauna nga anakna a lalaki ket simiasi iti Nakristianuan a panagbiag nasurok sangapulo a tawenen ti napalabas. “Nasaem unay no kellaat a mapukawmo ti pammabileg ti kapamiliam,” inadmitirna. “Ngem ammok a diak masapulan ti kinaragsak iti ruar ti organisasion ni Jehova. Isu a nagtalinaedak a sititibker ken impangpangrunak ni Jehova bayat nga inkagumaak ti nagtultuloy kas naimbag nga asawa ken ina. Nagkararagak a naynay, ket pinabilegnak ni Jehova. Naragsakak agsipud ta nayugalik ti agpannuray a naan-anay ken Jehova iti laksid ti determinado nga ibubusor ni lakayko.”

Nairaman dagiti tallo a kakadua ni Job iti simmaganad a pamay-an ni Satanas a mangdadael iti kinatarnawna. (Job 2:11-13) Naldaangan la ketdi iti kasta unay idi babalawenda. No namati kadagiti argumentoda, sigurado a napukawna ti panagtalekna ken Jehova a Dios. Ti mangupay a balakadda ti mabalin a mangpakapuy koma kenkuana ken mangdadael iti kinatarnawna, ket iti kasta nagballigi koma ti gakat ni Satanas.

Ngem sititibker ni Job a nangikuna: “Agingga a mauyos ti biagko saankonto nga ikkaten kaniak ti kinatarnawko!” (Job 27:5) Saanna a kinuna, ‘Saanko nga ipalubos a dakayo a lallaki ti mangikkat iti kinatarnawko!’ Ammo ni Job a ti kinatarnawna ket agpannuray kenkuana ken iti ayatna ken ni Jehova.

Daan a Pangallilaw a Mangkemmeg iti Baro a Biktima

Us-usaren pay laeng ni Satanas ti biddut a balakad wenno nasakit a komento manipud kadagiti gagayyem ken kapammatian. Ti pakaupayan iti uneg ti kongregasion ket nalaklaka a mangpakapuy iti kinamatalektayo ngem ti panangidadanes ti lubong. Sigun iti maysa a Kristiano a panglakayen a dati a soldado, ti pannakibakalna idi ket maidilig iti saem a napasaranna gapu iti di naannad a sasao ken ar-aramid ti sumagmamano a pada a Kristiano. Maipapan iti kasta a sasao ken ar-aramid, kinunana: “Dayta ti karigatan a napasarak.”

Iti sabali a bangir, mabalin a mariribukantayo gapu iti kinaimperpekto dagiti kapammatiantayo ket adda dagiti ditayon kasasao wenno langanantayo pay ketdin dagiti Nakristianuan a gimong. Kasla ketdin kapatgan nga isyu ti panangiliwliwagtay iti sakit ti nakemtayo. Ngem anian a nakalkaldaang ti kasta nga akikid a panangmatmat ket ipalubostayo lattan a madadael ti kapatgan a sanikuatayo​—ti relasiontayo ken Jehova​—gapu iti aramid wenno sasao ti sabsabali. No ipalubostayo a mapasamak dayta, mabalin a matnagtayo iti maysa kadagiti nabayagen a taktika ni Satanas.

Umiso laeng a namnamaentayo ti nangato a pagalagadan iti kongregasion Kristiano. Ngem no nalabes ti namnamaentayo kadagiti padatayo nga agdaydayaw, a di pay met perpekto, mapaaytayo la ketdi. Maisungani iti dayta, ti laeng mabalinan dagiti adipenna ti namnamaen ni Jehova. No tuladentayo ti ulidanna, nakasaganatayo a mangpalabas iti pagkapuyanda. (Efeso 4:2, 32) Imbalakad ni apostol Pablo: “No agungetkayo, diyo ipalubos a ti pungtot ti mangituggod kadakayo nga agbasol; saan koma a lumnek ti init a sipupungtotkayo pay laeng; dikay ikkan ti lugar ti diablo.”​—Efeso 4:26, 27, The New English Bible.

Kas nalawag nga ipakita ti Biblia, agus-usar ni Satanas iti nagduduma a nasikap a pamay-an tapno makasapul​—no mabalinanna​—iti wagas a mangdadael iti Nakristianuan a kinatarnaw. Dadduma kadagiti taktikana ket makaay-ayo iti managbasol a lasag, ti dadduma ket pakaigapuan ti saem. Iti nailawlawag, makitam a nasken a nakasaganaka koma a kanayon. Babaen ti naimpusuan a panagayatmo iti Dios, determinado a paneknekam nga ulbod ti Diablo ket maparagsakmo ti puso ni Jehova. (Proverbio 27:11; Juan 8:44) Laglagipem, masapul a di pulos maikompromiso ti pudno a Nakristianuan a kinatarnaw, aniaman ti pakasuotan a sanguentayo.

[Footnote]