‘Mangipangagtayo nga Ad-adda Ngem iti Gagangay’

“Ti bambanag a nangngegtayo nasken nga ipaayantayo iti panangipangag nga ad-adda ngem iti gagangay, tapno saantayo a pulos mayayus.”​—HEBREO 2:1.

1. Ilawlawagyo no kasano nga agbanag iti didigra ti pannakasinga.

ITI Estados Unidos laengen, agarup 37,000 ti matay kada tawen gapu iti aksidente ti lugan. Kuna dagiti eksperto nga adu kadagitoy nga ipapatay ti naliklikan koma no impamaysa dagiti drayber ti atensionda iti dalan. Masinga ti dadduma a motorista kadagiti karatula ken billboard wenno babaen ti panangusar iti cell phone-da. Adda met dagidiay mangmangan bayat nga agmanmanehoda. Kadagita a kasasaad, ti pannakasinga ket mangiturong iti didigra.

2, 3. Ania ti imbalakad ni Pablo kadagiti Hebreo a Kristiano, ken apay a naintiempuan ti balakadna?

² Nganngani 2,000 a tawen sakbay a naimbento ti lugan, tinukoy ni apostol Pablo ti maysa a kita ti pakasingaan a namagpeggad iti dadduma a Hebreo a Kristiano. Impaganetget ni Pablo a naitan-ok ni napagungar a Jesu-Kristo iti saad a nangatngato ngem iti amin nga anghel, ta nakatugaw iti makannawan ti Dios. Kalpasanna, kinuna ti apostol: “Dayta ti makagapu a ti bambanag a nangngegtayo nasken nga ipaayantayo iti panangipangag nga ad-adda ngem iti gagangay, tapno saantayo a pulos mayayus.”​—Hebreo 2:1.

³ Apay a dagiti Hebreo a Kristiano masapul nga ‘ipangagda nga ad-adda ngem iti gagangay ti bambanag a nangngegda’ maipapan ken Jesus? Gapu ta nganngani 30 a tawen idi nga awanen ni Jesus ditoy daga. Iti kaawan ti Apoda, dadduma a Hebreo a Kristiano ti mangrugrugi nga umikay iti pudno a pammati. Nasingada iti Judaismo, ti dati a relihionda.

Kasapulan ti Ad-adda a Panangipangagda

4. Apay a naguyugoy idi ti dadduma a Hebreo a Kristiano nga agsubli iti Judaismo?

⁴ Apay a maguyugoy ti maysa a Kristiano nga agsubli iti Judaismo? Bueno, ti sistema ti panagdayaw iti sidong ti Linteg ket mangiraman kadagiti makita a bambanag. Dagiti tattao makitada dagiti papadi ken maangotda dagiti mapupuoran a daton. Ngem iti dadduma nga aspeto, dakkel ti nakaidumaan ti Kristianidad. Dagiti Kristiano ket addaan iti Nangato a Padi, ni Jesu-Kristo, ngem tallo a dekadan idi nga awan ti nakakita kenkuana ditoy daga. (Hebreo 4:14) Adda temploda, ngem idiay langit a mismo ti nasantuan a dissona. (Hebreo 9:24) Saan a kas iti Linteg a pisikal ti pannakakugit, ti pannakakugit dagiti Kristiano ket “pannakakugit ti puso babaen ti espiritu.” (Roma 2:29) Gapuna, kadagiti Hebreo a Kristiano, mabalin a mangrugi idin a matmatanda nga awan ti pisikal nga aspeto ti Kristianidad.

5. Kasano nga impakita ni Pablo a nasaysayaat ti sistema ti panagdayaw nga inyussuat ni Jesus ngem iti panagdayaw iti sidong ti Linteg?

⁵ Adda nagpateg a banag a masapul a bigbigen idi dagiti Hebreo a Kristiano maipapan iti sistema ti panagdayaw nga inyussuat ni Kristo. Ad-adda a naibatay dayta iti pammati imbes nga iti panagkita, kaskasdi natantan-ok dayta ngem iti Linteg a naipaulog babaen ken propeta a Moises. “Ta no ti dara dagiti kalding ken dagiti toro ken dagiti dapo ti maysa a bumalasang a baka a naiwarsi kadagidiay natulawan mangsantipikar agingga iti pannakadalus ti lasag,” insurat ni Pablo, “anian nga ad-adda pay a ti dara ni Kristo, a babaen iti agnanayon nga espiritu indatonna ti bagina nga awan pakapilawanna iti Dios, dalusannanto dagiti konsiensiatayo manipud iti natay nga ar-aramid tapno mangipaaytayo iti sagrado a panagserbi iti sibibiag a Dios?” (Hebreo 9:13, 14) Wen, ti pammakawan a magun-od babaen ti pammati iti pangsubbot a daton ni Jesu-Kristo ket adayo a nasaysayaat iti adu a wagas ngem iti daydiay pammakawan a nagun-od babaen dagiti daton a naidatag iti sidong ti Linteg.​—Hebreo 7:26-28.

6, 7. (a) Ania ti kasasaad idi a namagbalin a naganat kadagiti Hebreo a Kristiano nga ‘ipangagda nga ad-adda ngem iti gagangay dagiti bambanag a nangngegda’? (b) Idi inlanad ni Pablo ti suratna kadagiti Hebreo, kasano pay kawatiwat ti panawen a nabati para iti Jerusalem? (Kitaenyo ti footnote.)

⁶ Adda sabali pay a rason no apay a masapul a siiinget nga ipangag dagiti Hebreo a Kristiano ti bambanag a nangngegda maipapan ken Jesus. Impakpakaunana a madadael ti Jerusalem. Kinuna ni Jesus: “Umayto kenka dagiti aldaw inton dagiti kabusormo mangbangonda iti aglikmutmo iti sarikedked nga addaan natirad a kaykayo ket lakubendakanto ken parigatendaka iti tunggal sikigan, ket agingga iti daga rebbekendakanto ken ti annakmo nga adda iti unegmo, ket saandanto a mangibati kenka iti bato iti rabaw ti bato, agsipud ta saanmo a nailasin ti tiempo a pannakasukimatmo.”​—Lucas 19:43, 44.

⁷ Kaano a mapasamak dayta? Saan nga impalgak ni Jesus ti aldaw ken oras. Imbes ketdi, nangted iti instruksion: “Inton makitayo ti Jerusalem a nalikmut kadagiti nagkampo a buyot, iti kasta ammuenyo a ti pannakalangalangna immasidegen. Iti kasta dagidiay adda idiay Judea rugianda koma ti agkamang iti bambantay, ket dagidiay adda iti tengngana pumanawda koma, ket dagidiay adda iti aw-away saanda koma a sumrek kenkuana.” (Lucas 21:20, 21) Kabayatan ti 30 a tawen kalpasan nga insawang ni Jesus dagita a sasao, saanen a nakarikna iti kinaganat ti dadduma a Kristiano idiay Jerusalem ket nasingada. Kasda la imbaw-ing ti panagkita manipud iti dalan. No saanda a balbaliwan ti panagpampanunotda, sigurado a mapasaranda ti didigra. Pinanunotda man dayta wenno saan, umad-adani idin ti pannakadadael ti Jerusalem!a Mabalin a ti balakad ni Pablo riniingna dagiti Kristiano idiay Jerusalem a matmaturog iti naespirituan.

“Panangipangag nga Ad-adda Ngem iti Gagangay” Ita

8. Apay a masapul nga ‘ipangagtayo nga ad-adda ngem iti gagangay’ dagiti kinapudno a masarakan iti Sao ti Dios?

⁸ Kas kadagiti Kristiano idi umuna a siglo, masapul nga ‘ipangagtayo nga ad-adda ngem iti gagangay’ dagiti kinapudno a masarakan iti Sao ti Dios. Apay? Gapu ta maipasangotayo met iti umad-adani a pannakadadael, saan laeng a pannakadadael ti maysa a nasion, no di ket ti intero a sistema ti bambanag. (Apocalipsis 11:18; 16:14, 16) Siempre, ditay ammo ti eksakto nga aldaw ken oras no kaano nga aramiden daytoy ni Jehova. (Mateo 24:36) Kaskasdi, saksitayo iti pannakatungpal dagiti padto ti Biblia a nalawag a mangipamatmat nga agbibiagtayo “kadagiti maudi nga aldaw.” (2 Timoteo 3:1-5) Gapuna, nasken nga agannadtayo iti aniaman a mangsinga kadatayo. Nasken nga ipangagtayo ti Sao ti Dios ken taginayonen ti pannakarikna iti kinaganat. Babaen laeng ti panangaramid iti dayta a ‘makalisitayo kadagitoy amin a banag a naikeddeng a mapasamak.’​—Lucas 21:36.

9, 10. (a) Kasano a maipakitatayo nga ipangpangagtayo dagiti naespirituan a bambanag? (b) Kasano a ti Sao ti Dios ket ‘pagsilawan iti sakatayo’ ken ‘silaw iti danatayo’?

⁹ Kadagitoy napeggad a panawen, kasanotayo a maipakita nga ‘ipangpangagtayo nga ad-adda ngem iti gagangay’ dagiti naespirituan a bambanag? Ti maysa a pamay-an isu ti regular nga itatabunotayo kadagiti Nakristianuan a gimong, asamblea, ken kombension. Naaneptayo met koma nga estudiante ti Biblia tapno makaadanitayo iti Autorna, ni Jehova. (Santiago 4:8) No gumun-odtayo iti pannakaammo maipapan ken Jehova babaen ti personal a panagadal ken pannakigimong, kaslatayo iti salmista a nagkuna iti Dios: “Ti saom ket pagsilawan iti sakak, ken silaw iti danak.”​—Salmo 119:105.

¹⁰ Agserbi ti Biblia kas ‘silaw iti danatayo’ ta ibagana kadatayo dagiti panggep ti Dios iti masanguanan. ‘Pagsilawan met dayta ti sakatayo.’ Iti sabali a pannao, matulongannatay iti sumaruno nga addangtayo no maipasangotay kadagiti narikut a pakarigatan iti biag. Dayta ti makagapu a napateg a ‘mangipangagtayo nga ad-adda ngem iti gagangay’ no agtataripnongtayo nga agkakapammatian agpaay iti instruksion ken no personal a basaentayo ti Sao ti Dios. Ti impormasion a magun-odtayo tulongannatayo a mangaramid kadagiti nainsiriban ken makagunggona a desision a makaay-ayo ken ni Jehova ken mamagrag-o iti pusona. (Proverbio 27:11; Isaias 48:17) Kasano a maparang-aytayo ti kapaut ti panagimdengtayo kadagiti gimong ken bayat dagiti panawen ti personal a panagadal tapno magun-odtayo ti kasayaatan a gunggona nga iyeg dagiti naespirituan a probision ti Dios?

Panangparang-ay iti Panagatensiontayo Kadagiti Gimong

11. Apay a karit no dadduma ti agatension kadagiti Nakristianuan a gimong?

¹¹ No dadduma, makakarit ti agatension kadagiti Nakristianuan a gimong. Nalaka la a masinga ti panunot, nalabit babaen ti sangit ti maysa a maladaga wenno dagiti naladaw nga agsapul kadagiti pagtugawanda. Kalpasan ti agmalmalem a trabaho, mabalin a nabannogtayo. Mabalin a saan unay a makapainteres ti panagpalawag ti ispiker, ket ditay mapupuotan nga agkalkallautang ti panunottayo​—agdudungsatayo pay ketdi! Gapu kadagiti agkakapateg nga impormasion a maipalpalawag, nasken a parang-ayentayo ti abilidadtayo nga agimdeng kadagiti gimong ti kongregasion. Ngem kasanotayo a maaramid dayta?

12. Ania ti mamagbalin a nalaklaka ti agatension kadagiti gimong?

¹² Kadawyanna a nalaklaka ti agatension kadagiti gimong no nakasaganatayo a naimbag. No kasta, apay a diyo iwayaan ti nasaksakbay a panangisagana kadagiti material a mausig? Sumagmamano la a minuto kada aldaw ti kasapulan tapno mabasa ken mamennamenna ti maysa a paset dagiti nayeskediul a kapitulo para iti linawas a panagbasa iti Biblia. Babaen ti panagplano, maiwayaantayo met ti agsagana para iti Panagadal ti Kongregasion iti Libro ken ti Panagadal iti Pagwanawanan. Aniaman ti eskediul a pilientayo, daytoy ti sigurado: Ti panagsagana tulongannatayo nga agatension iti material a maus-usig kadagiti gimong ti kongregasion.

13. Ania ti makatulong kadatayo a makapagimdeng kadagiti material a maipalpalawag kadagiti gimong?

¹³ Malaksid iti panagsagana a naimbag, nakita ti dadduma nga ad-adda a makapagimdengda kadagiti gimong no agtugawda iti asideg ti plataporma. Ti naynay a panangkita iti ispiker, panangukag iti Biblia no adda maibasa a teksto, ken panaginotar ket sumagmamano a wagas tapno maliklikan nga agalla-alla ti panunottayo. Kaskasdi, ti nakasagana a puso ket napatpateg nga amang ngem iti aniaman a partikular a metodo ti panagimdeng. Nasken nga apresiarentayo ti panggep ti panagtataripnongtayo. Makigimongtayo a kadua dagiti kapammatian kangrunaanna tapno idayaw ni Jehova. (Salmo 26:12; Lucas 2:36, 37) Dagiti gimong ket napateg nga urnos ti pannakataraontayo iti naespirituan. (Mateo 24:45-47) Maysa pay, mangipaayda kadagiti gundaway tapno ‘maparegtatayo ti maysa ken maysa iti ayat ken nasayaat nga ar-aramid.’​—Hebreo 10:24, 25.

14. Ania a talaga ti mamagballigi iti gimong?

¹⁴ Mabalin a rukoden ti dadduma ti kalidad ti gimong babaen ti kinalaing dagiti kakabsat a mangiparang iti pasetda. No nalaing nga agpalawag dagiti ispiker, makunatayo a makaay-ayo dayta a gimong. Ngem no kasla saan nga epektibo ti panangisuroda, mabalin a panunotentayo a saan a naballigi ti gimong. Pudno, dagidiay naikkan iti paset nasken nga aramidenda ti amin a kabaelanda a mangipakat iti arte ti panangisuro ken nangnangruna ti panangdanon kadagiti puso. (1 Timoteo 4:16) Kaskasdi, saantayo koma a manangkritikar kas agdengdengngeg. Nupay napateg ti abilidad ti panangisuro dagidiay addaan iti paset, saan a dayta ti kakaisuna a mamagballigi iti gimong. Saankayo kadi nga umanamong a ti kangrunaan koma a pakaseknantayo ket no nalaingtayo met laeng nga umimdeng, saan a ti kinalaing ti ispiker nga agpalawag? No makigimongtayo ken umimdeng kadagiti maipalpalawag, agdaydayawtayo iti Dios maitunos iti pagayatanna. Dayta ti mamagballigi iti gimong. No sigagagar a gumun-odtayo iti pannakaammo maipapan iti Dios, magunggonaantayo kadagiti gimong, aniaman ti abilidad ti ispiker. (Proverbio 2:1-5) Determinadotayo koma ngarud a ‘mangipangag nga ad-adda ngem iti gagangay’ kadagiti gimong.

Naan-anay a Magunggonaan iti Personal a Panagadal

15. Kasano a makagunggona kadatayo ti panagadal ken panagmennamenna?

¹⁵ Dakkel ti magunggonatayo no ‘mangipangagtayo nga ad-adda ngem iti gagangay’ kabayatan dagiti panawen ti personal a panagadal ken panagmennamenna. Ti panangbasa ken panangusig iti Biblia ken kadagiti Nakristianuan a publikasion mangipaayda kadagiti nagsayaat a gundaway a mangitukit iti pusotayo dagiti kinapudno a masarakan iti Sao ti Dios. Daytoy ti dakkel a mangapektar iti panagpampanunot ken panagtigtignaytayo. Talaga a tulongannatayo nga agbalin a naragsak a mangaramid iti pagayatan ni Jehova. (Salmo 1:2; 40:8) Gapuna, nasken a sukayentayo ti abilidad nga agimdeng tapno pudno a makagunggona dagitoy no agadaltayo. Naglaka la ti masinga! Dagiti babassit a pakasingaan​—awag iti cellphone wenno ti ariwawa mabalin a dadaelenda ti konsentrasiontayo. Wenno nalabit talaga nga ababa ti aanusantayo nga agadal. Mabalin a ti pannangan iti naespirituan a taraon ti pudpudno a panggeptayo bayat a rugiantayo ti agadal, ngem di agbayag, agalla-alla ti panunottayo. Kasano nga ‘agipangagtayo nga ad-adda ngem iti gagangay’ bayat ti personal a panagadal iti Sao ti Dios?

16. (a) Apay a napateg a mangyeskediultayo iti personal a panagadal? (b) Kasanoyo nga inyeskediul ti panagadalyo iti Sao ti Dios?

¹⁶ Makagunggona no agaramid iti eskediul ken mangpili iti lugar a maibagay iti panagadal. Kaaduan kadatayo ti addaan iti bassit a tiempo para iti personal a banag. Gapu iti inaldaw nga aktibidad, mabalin a mariknatayo a kaslatay naganus a sanga a mayayus iti napegges a karayan. Masapul ngarud a subaentayo ti ayus ti karayan, no ar-arigen, ket mangiwayatayo iti tiempo para iti personal a panagadal. Saan a mabalin a ti gundaway ti urayentayo nga umasideg. Imbes ketdi, masapul a datayo ti mangkontrol iti situasion babaen ti panangiwaya iti panagadal. (Efeso 5:15, 16) Dadduma ti mangiwaya iti ababa a tiempo iti bigat ta basbassit ti pakasingaan. Adda met dagidiay mangiwaya iti rabii ta nasaysayaat dayta a gundaway para kadakuada. Ti punto isu ti ditay panangbaybay-a iti kinapateg ti pananggun-od iti umiso a pannakaammo maipapan iti Dios ken iti Anakna. (Juan 17:3) Mangyeskediultayo ngarud iti personal a panagadal ket salimetmetan dayta nga eskediul.

17. Ania ti panagmennamenna, ken kasano a makagunggona dayta kadatayo?

¹⁷ Napateg ti panagmennamenna​—ti panangutob kadagiti nasursuro babaen ti panagadal. Tulongannatayo a mangagsep iti kapanunotan ti Dios manipud iti nayimprenta a panid agturong iti pusotayo. Ti panagmennamenna tulongannatayo a mangbigbig no kasano a mayaplikar ti balakad ti Biblia tapno agbalintayo a “managtungpal iti sao, ket saan a managdengngeg laeng.” (Santiago 1:22-25) Maysa pay, ti panagmennamenna tulongannatayo nga ad-adda a suminged ken ni Jehova yantangay ipaayannatayo iti gundaway a mangusig kadagiti galadna ken no kasano a naitampok dagita iti material nga us-usigentayo bayat ti panagadal.

18. Ania dagiti kalikaguman ti epektibo a panagmennamenna?

¹⁸ Tapno naan-anay a magunggonaantayo iti panagadal ken panagmennamenna, nasken a maiwaksi iti isiptayo dagiti pakasingaan. Tapno makasursurotayo kadagiti baro nga impormasion bayat ti panagmennamenna, nasken nga iwaksitayo dagiti pakaringgoran iti agdama a panagbiag. Ti panagmennamenna kalikagumanna ti tiempo ken panagmaymaysa. Kaskasdi, anian a makapabang-ar ti gumun-od iti naespirituan a taraon ken kadagiti danum ti kinapudno a masarakan iti Sao ti Dios!

19. (a) No maipapan iti personal a panagadal, ania ti timmulong iti dadduma a nangparang-ay iti konsentrasionda? (b) Ania koma ti kababalintayo iti panagadal, ken ania dagiti magunggonatayo iti daytoy nagpateg nga aktibidad?

¹⁹ Kasano no ababa ti aanusantayo ken mangrugi nga agkallautang ti panunottayo kalpasan ti sumagmamano la a minuto ti panagadal? Nabaelan ti dadduma a parang-ayen ti konsentrasionda babaen ti panangrugi iti ababa a tiempo ti panagadal sada in-inut a pinaatiddog. Ti kalattayo isu ti panangbusbos iti umdas a tiempo iti panagadal imbes nga agdardaras iti dayta. Masapul a patanorentayo ti nasged nga interes iti suheto nga ad-adalentayo. Ken makaaramidtayo iti kanayonan a panagsirarak babaen ti panangusar kadagiti nakaad-adu a material nga ipapaay ti klase matalek ken masirib nga adipen. Nagdakkel ti magunggona no adalen ti “nauneg a bambanag ti Dios.” (1 Corinto 2:10) Ti panangaramidtayo iti dayta pabaknangenna ti pannakaammotayo maipapan iti Dios ken patademenna ti pannakaawattayo. (Hebreo 5:14) No naaneptayo nga agadal iti Sao ti Dios, agbalintayo met a ‘naan-anay a kualipikado a mangisuro iti sabsabali.’​—2 Timoteo 2:2.

20. Kasano a mapatanor ken mataginayontayo ti nasinged a relasion ken ni Jehova a Dios?

²⁰ Ti itatabuno kadagiti Nakristianuan a gimong ken ti personal a panagadal dakkel ti maitulongda kadatayo no maipapan iti panangpatanor ken panangtaginayon iti nasinged a relasion ken ni Jehova. Agparang a kasta ti napasamak iti salmista a nagkuna iti Dios: “Anian a panagayatko iti lintegmo! Iti intero nga agmalem isu dayta ti pakaseknak.” (Salmo 119:97) Gapuna, ikagumaantayo koma ti regular nga itatabuno kadagiti gimong, asamblea, ken kombension. Ken iwayaantayo koma ti agadal ken mangmennamenna iti Biblia. Nagdakkelto ti magunggonatayo gapu ta ‘impangagtayo nga ad-adda ngem iti gagangay’ iti Sao ti Dios.

[Footnote]

Malagipyo Pay?

• Apay nga immikay ti dadduma a Hebreo a Kristiano manipud iti pudno a pammati?

• Kasano a makapagtalinaedtayo nga atentibo kadagiti Nakristianuan a gimong?

• Ania ti tumulong tapno magunggonaantayo iti personal a panagadal iti Biblia ken panagmennamenna?

[Ladawan iti panid 11]

Masapul nga agsalukag idi dagiti Hebreo a Kristiano maipapan iti umad-adani a pannakadadael ti Jerusalem

[Ladawan iti panid 13]

Dagiti nagannak matulonganda dagiti annakda a magunggonaan kadagiti Nakristianuan a gimong