Liwliwa iti Tiempo ti Rigat
TALAGA a saan a makaliwliwa dagiti damag kadagitoy a panawen. Maysa a tao ti nagsurat: “Makapaladingit unay dagiti agdama a pasamak a masansan a ditay pay mairusok a buyaen dagiti baro a damag iti agsapa.” Napno ti lubong iti gubat, terorismo, panagsagaba, krimen, ken sakit—dagiti kinadakes a mabalin a direkta a mangapektar kadatayo iti di mabayag, no saan pay a napasamak dagitoy.
Siuumiso nga impakpakauna ti Biblia daytoy a kasasaad. Iti panangdeskribirna iti kaaldawantayo, kinuna ni Jesus nga addanto dagiti dadakkel a gubat, angol, kinakirang ti taraon, ken ginggined. (Lucas 21:10, 11) Nagsurat met ni apostol Pablo maipapan kadagiti “napeggad a tiempo a narigat a pakilangenan,” a dagiti tattao narungsot, managayat iti kuarta, ken awananda iti panagayat iti kinaimbag. Inawaganna dayta a tiempo kas dagiti “maudi nga aldaw.”—2 Timoteo 3:1-5.
Gapuna, iti panangdeskribirna iti kasasaad ti lubong, adda dagiti ipakaammo ti damag nga umasping kadagiti impakpakauna ti Biblia. Ngem agingga la dita ti nagpadaanda. Adda ilawlawag ti Biblia nga awan kadagiti damag. Babaen ti naipaltiing a Sao ti Dios, matarusantayo saan laeng a no apay a nakaro ti kinadakes no di pay ket no ania ti agur-uray iti masanguanan.
Ania ti Panangmatmat ti Dios iti Kinadakes
Ilawlawag ti Biblia no ania ti panangmatmat ti Dios kadagiti narigat a kasasaad iti kaaldawantayo. Nupay ammonan a nasaksakbay dagiti parikut iti agdama, saanna a pakaay-aywan wenno panggep nga ipalubos dagitoy iti agnanayon. “Ti Dios ket ayat,” insurat ni apostol Juan. (1 Juan 4:8) Sidudungngo nga ay-aywanan ni Jehova ti ilina ken kagurana ti amin a kinadakes. Maitutop unay nga iti Dios ti pagpannurayantayo iti liwliwa, yantangay isu ket naimbag ken naasi ken addaan iti pannakabalin ken tarigagay a mangpasardeng iti kinadakes ditoy daga. Insurat ti salmista: “[Ti dinutokan ti Dios nga Ari idiay langit] ispalennanto daydiay napanglaw nga agpatpatulong, kasta met daydiay naparigatan ken siasinoman nga awanan katulongan. Isu maasianto iti daydiay nanumo ken iti daydiay napanglaw, ket dagiti kararua dagidiay napanglaw isalakannanto. Iti pannakairurumen ken iti kinaranggas subbotennanto ti kararuada, ket ti darada napategto kadagiti matana.”—Salmo 72:12-14.
Maasiankayo kadi kadagiti agsagsagaba? Nalabit kasta ti mariknayo. Pinarsuanatayo ni Jehova nga addaan iti galad a mannakipagrikna, agsipud ta naparsuatayo a kaladladawanna. (Genesis 1:26, 27) Makapagtalektayo ngarud a maseknan ni Jehova kadagiti tattao nga agsagsagaba. Ni Jesus, nga ad-adu ti ammona maipapan ken Jehova ngem iti asinoman, insurona a maseknan unay kadatayo ni Jehova ken napno iti nadungngo a kinamanangngaasi.—Mateo 10:29, 31.
Ti panamarsua patalgedanna a mismo a maseknan ti Dios iti sangatauan. Kinuna ni Jesus a ti Dios “pagleggakenna ti initna kadagiti nadangkes a tattao ken kadagiti naimbag ket pagtuduenna kadagiti nalinteg a tattao ken kadagiti nakillo.” (Mateo 5:45) Kadagiti umili iti siudad ti Listra, kinuna ni apostol Pablo: “[Ti Dios] saanna a binay-an nga awan mangsaksi iti bagina iti panagaramidna ti naimbag, nga inikkannakayo kadagiti tudo manipud langit ken kadagiti nabunga a panawen, a pinunnona a naan-anay dagiti pusoyo iti taraon ken ragsak.”—Aramid 14:17.
Siasino ti Mapabasol iti Kinadakes?
Makapainteres met ti kinuna ni Pablo kadagiti umili ti Listra: “Kadagiti napalabas a kaputotan pinalubosan [ti Dios] dagiti amin a nasion a magnada kadagiti dalanda.” Gapuna, dagiti nasion—wenno dagiti mismo a tattao—ti nangruna a mapabasol iti kaaduan kadagiti pakarigatan a sagsagabaenda. Saan a ti Dios ti mapabasol.—Aramid 14:16.
Apay nga ipalpalubos ni Jehova a mapasamak dagiti kinadakes? Risutennanto kadi dayta? Iti laeng Sao ti Dios a masarakan ti sungbat kadagita a saludsod. Ngamin, ti sungbat ket nainaig unay iti sabali pay nga espiritu a persona ken iti isyu a pinataudna idiay langit.
[Dagiti Ladawan iti panid 4]
Ammo dagiti tattao ti makipagrikna. Saan kadi nga ad-adda a maseknan ti Dios kadagiti tattao nga agsagsagaba?
[Picture Credit Lines iti panid 2]
AKKUB: Tangke: UN PHOTO 158181/J. Isaac; ginggined: San Hong R-C Picture Company
[Picture Credit Line iti panid 3]
Makinngato a kannigid, Croatia: UN PHOTO 159208/S. Whitehouse; mabisbisinan nga ubing: UN PHOTO 146150 BY O. MONSEN