Maliwliwatayo iti Umiso a Pannakaammo iti Dios

KADAGITI dadduma a tattao, mamataud kadagiti narikut a saludsod ti ibagbaga ti Biblia maipapan iti ayat ken asi ti Dios. Iyimtuodda: No tarigagayan ti Dios a pasardengen ti kinadakes, ammona nga aramiden dayta, ken addaan iti pannakabalin a mangaramid iti dayta, apay nga agtultuloy a lumanlanlan ti kinadakes? Saanda a mapagtutunos ti tallo a banag: (1) mannakabalin-amin ti Dios; (2) naayat ken naimbag ti Dios; ken (3) agtultuloy dagiti makadidigra a pasamak. Irasonda a yantangay ti maikatlo a banag ket di mailibak a mapaspasamak, saan ngarud a pudno ti immuna a dua wenno ti maysa kadagitoy. Para kadakuada, ti Dios dina kabaelan a pasardengen ti kinadakes wenno saan a talaga a maseknan.

Sumagmamano nga aldaw kalpasan ti pannakadadael ti World Trade Center idiay New York, kinuna ti maysa a prominente a lider ti relihion idiay Estados Unidos: “Nayimtuod kaniak . . . iti ginasuten a daras no apay nga ipalpalubos ti Dios ti didigra ken panagsagaba. Aminek a talaga a diak ammo ti naan-anay a sungbat, uray pakapnekak laeng koma.”

Iti reaksionna iti daytoy a komento, insurat ti maysa a propesor ti teolohia a magustuanna ti “nasayaat a teolohia” nga inkasaba daytoy a lider ti relihion. Inanamonganna met ti panangmatmat ti maysa nga eskolar a nagsurat: “Ti imposible a pannakaawat iti panagsagaba ket paset ti imposible a pannakaawat iti Dios.” Ngem imposible kadi a talaga a maawatan no apay nga ipalpalubos ti Dios ti panagsagaba?

Ti Nangrugian ti Kinadakes

Maikontra iti ibagbaga dagiti lider ti relihion, ipakita ti Biblia a posible a maawatan ti panangipalubos ti Dios iti kinadakes. Tapno maawatantayo ti maipapan iti kinadakes, napateg a bigbigentayo a saan a nangparsua ni Jehova iti dakes a lubong. Pinarsuana a perpekto, awanan iti basol ti umuna a pagassawaan. Nakita ni Jehova a “nasayaat unay” dagiti pinarsuana. (Genesis 1:26, 31) Panggepna nga isaknap da Adan ken Eva ti Paraiso ti Eden iti intero a daga ken punnuenda iti naragsak a tattao iti sidong ti pannalaknib ti naayat a kinasoberanona.​—Isaias 45:18.

Nangrugi ti kinadakes manipud iti maysa nga espiritu a parsua a dati a matalek iti Dios, ngem tinarigagayanna ti maidayaw. (Santiago 1:14, 15) Naiparangarang ti iyaalsana ditoy daga idi inimpluensiaanna ti umuna a pagassawaan tapno dumasigda kenkuana a bumusor iti Dios. Imbes a surotenda ti nalawag a bilin ti Dios a saanda a kanen wenno sagiden ti bunga ti kayo ti pannakaammo iti naimbag ken dakes, nangala da Adan ken Eva iti bunga ket kinnanda. (Genesis 3:1-6) Iti pannanganda, saanda laeng a simmukir iti Dios no di pay ket impakitada a tinarigagayanda ti maisina kenkuana.

Timmaud ti Moral nga Isyu

Daytoy a panagrebelde idiay Eden ket namataud iti moral nga isyu, maysa a sapasap a karit. Pinagduaduaan wenno kinuestion dagiti rebelde a tattao no umiso met laeng ti panangituray ni Jehova kadagiti parsuana. Adda kadi kalintegan ti Namarsua a mangkalikagum iti naan-anay a panagtulnog ti sangatauan? Nasaysayaat ngata ti pagbanagan dagiti tattao no surotenda ti kaykayatda?

Rinisut ni Jehova daytoy a karit iti turayna iti pamay-an a mangipakita iti perpekto a kinabalanse ti ayat, hustisia, sirib, ken pannakabalinna. Mabalin nga usarenna ti pannakabalinna a mangguped a dagus iti daydi nga iyaalsa. Agparang a kinahustisia dayta, yantangay addaan ti Dios iti kalintegan a mangaramid iti dayta. Ngem saan a masungbatan dagiti timmaud a moral a saludsod no kasta ti napasamak. Iti sabali a bangir, mabalin a basta palabsen ti Dios ti basol. Kasla naayat dayta a tignay iti panangmatmat ti dadduma ita. Kaskasdi, saanna met a sungbatan ti ibagbaga ni Satanas a nasaysayaat no dagiti tattao ti mangituray iti bagbagida. Kanayonanna, saan kadi a ti kasta a tignay paregtaenna ti sabsabali a sumiasi iti dalan ni Jehova? Agresulta dayta iti awan inggana a panagsagaba.

Sisisirib nga impaayan ni Jehova dagiti tattao iti tiempo nga agbiag nga agwaywayas. Nupay nagbanag dayta iti temporario a panangipalubosna iti kinadakes, dayta ti nangted kadagiti tattao iti gundaway a mangipakita no kabaelanda nga iturayan a sibaballigi ti bagbagida a naisina iti Dios, nga agbiagda babaen dagiti bukodda a pagalagadan no ania ti naimbag ken dakes. Ania ti resultana? Ti historia ti tao ket kanayon a namansaan iti gubat, kinaawan hustisia, panangirurumen, ken panagsagaba. Ti naan-anay a pannakapaay ti iyaalsa ken ni Jehova agnanayonton a risutenna dagiti isyu a timmaud idiay Eden.

Kabayatanna, impakita ti Dios ti ayatna babaen ti panangipaay iti Anakna, ni Jesu-Kristo, a nangidatag iti natauan a biagna kas pangsubbot a daton. Babaen daytoy, makaruk-at dagiti tattao manipud iti pannakakondenar iti basol ken ipapatay a resulta ti kinasukir ni Adan. Amin a mangal-alagad iti pammati ken ni Jesus mabalinda ti agbiag nga agnanayon babaen ti subbot.​—Juan 3:16.

Addaantayo iti makaliwliwa a pammatalged ni Jehova a temporario laeng ti panagsagaba ti tao. “Iti apagbiit laengen a kanito, ket daydiay nadangkes awanton,” insurat ti salmista. “Pudno unay nga imutektekamto ti lugarna, ket isu awanton. Ngem dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.”​—Salmo 37:10, 11.

Masanguanan a Kinatalged ken Kinaragsak

Ipakita ti kaitungpalan dagiti padto ti Biblia nga asidegen ti tiempo a pagpatinggaen ti Dios ti sakit, ladingit, ken ipapatay. Imutektekanyo ti nakaskasdaaw a sirmata a naited ken ni apostol Juan maipapan kadagiti bambanag a mapasamak. Insuratna: “Nakitak ti maysa a baro a langit ken maysa a baro a daga; ta ti immuna a langit ken ti immuna a daga naglabasdan, ket ti baybay awanen. . . . Ket ti Dios a mismo addanto [iti sangatauan]. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.” Kadagiti sasao a mangipagpaganetget iti kinamapagtalkan dagitoy a kari, naibaga ken ni Juan: “Isuratmo, agsipud ta dagitoy a sasao matalek ken napudnoda.”​—Apocalipsis 21:1-5.

Dagiti ngay binilion nga inosente a tattao a pimmusay sipud iyaalsa idiay Eden? Inkari ni Jehova a pagungarenna dagiti natay. Kinuna ni apostol Pablo: “Adda inanamak iti Dios . . . nga addanto panagungar agpadpada dagiti nalinteg ken dagiti nakillo.” (Aramid 24:15) Maaddaan dagitoy iti namnama nga agbiag iti lubong a sadiay “agtaeng ti kinalinteg.”​—2 Pedro 3:13.

Kas iti naayat nga ama a mangipalubos a maipasidong ti anakna iti naut-ot nga operasion no ammona a mangyeg dayta kadagiti agpaut a pagimbagan, ni Jehova impalubosna met nga agpasar dagiti tattao iti temporario a kinadakes ditoy daga. Ngem agur-uray dagiti agnanayon a bendision kadagiti amin a mangaramid iti pagayatan ti Dios. Inlawlawag ni Pablo: “Ti sangaparsuaan naipasakup iti kinabarengbareng, saan a babaen ti bukodna a nakem no di ket babaen kenkuana a nangipasakup iti dayta, a maibatay iti namnama a ti mismo a sangaparsuaan met mawayawayaanto iti pannakaadipen iti panagrupsa ken maaddaan iti nadayag a wayawaya ti annak ti Dios.”​—Roma 8:20, 21.

Talaga a damag daytoy​—saan a kas kadagiti mabuybuya iti telebision wenno mabasbasatayo kadagiti periodiko, no di ket naimbag a damag. Dayta ti kasayaatan a damag manipud iti “Dios ti amin a liwliwa,” a talaga a maseknan kadatayo.​—2 Corinto 1:3.

[Dagiti Ladawan iti panid 6]

Ipakita ti historia a dagiti tattao saanda a sibaballigi a maiturayan ti bagbagida no naisinada iti Dios

[Credit Lines]

Pamilia idiay Somalia: UN PHOTO 159849/M. GRANT; bomba atomika: USAF photo; kampo konsentrasion: U.S. National Archives photo