Ipatpategnakayo ni Jehova

“Iyallatiwyo [iti Dios] ti isuamin a pakaringgoranyo, agsipud ta isu maseknan kadakayo.”​—1 PEDRO 5:7.

1. Iti ania a napateg a banag a naan-anay nga agduma ni Jehova ken ni Satanas?

NAAN-ANAY nga agduma ni Jehova ken ni Satanas. Sigurado a kagura ti Diablo ti asinoman nga agtarigagay nga umadani ken ni Jehova. Dayta a panagduma ket naitampok iti maysa a mararaem a reperensia. No maipapan kadagiti aramid ni Satanas kas naisalaysay iti libro ti Biblia a Job, kuna ti Encyclopædia Britannica (1970): ‘Trabaho ni Satanas ti agsursor iti daga tapno birokenna ti kinadakes wenno tattao nga agaramid iti kinadakes; ngarud, ti trabahona ket kasungani ti ar-aramiden “dagiti mata ti Apo,” nga agsursursor iti daga tapno pabilgenna ti amin a naimbag (II Cron. xvi, 9). Umsien ni Satanas ti napudno a kinaimbag ti tao ket mapalubosan a mangsubok iti dayta iti sidong ti autoridad ken pannakabalin ti Dios ken iti uneg ti beddeng nga insaad ti Dios.’ Wen, anian a panagduma!​—Job 1:6-12; 2:1-7.

2, 3. (a) Kasano a ti kaipapanan ti sao a “Diablo” ket napaneknekan iti napasamak ken ni Job? (b) Kasano nga ipakita ti Biblia nga agtultuloy nga akusaran ni Satanas dagiti adipen ni Jehova ditoy daga?

² Ti sao a “Diablo” ket nagtaud iti Griego a sao a kaipapananna “manangpadakes,” “mamarpardaya.” Iti libro a Job, ipalgakna nga inakusar ni Satanas ni Job, ti matalek nga adipen ni Jehova, nga agserserbi kano iti Dios gapu iti personal nga interes, a kunkunana: “Agpaay aya iti awan kapapay-anna a ni Job nagbuteng iti Dios?” (Job 1:9) Ti salaysay iti libro a Job ipakitana nga iti laksid dagiti pannubok ken pannakasuotna, ad-adda nga immadani ni Job ken ni Jehova. (Job 10:9, 12; 12:9, 10; 19:25; 27:5; 28:28) Kalpasan ti panagrigatna, kinunana iti Dios: “Iti alimadamad nangngegko ti maipapan kenka, ngem ita ti bukodko a mata makitanaka.”​—Job 42:5.

³ Nagsardeng kadin ni Satanas a mangak-akusar kadagiti matalek nga adipen ti Dios manipud idi panawen ni Job? Saan. Ipakita ti libro nga Apocalipsis nga iti daytoy panawen ti panungpalan, agtultuloy nga ak-akusaran ni Satanas dagiti napulotan a kakabsat ni Kristo ket sigurado nga uray met dagiti matalek a kakaduada. (2 Timoteo 3:12; Apocalipsis 12:10, 17) Gapuna, datayo amin a pudno a Kristiano ad-adda a kasapulan nga agpasakuptayo iti naayat a Diostayo a ni Jehova, nga agserbitayo kenkuana gapu ta ay-ayatentayo unay ket iti kasta, mapaneknekan nga ulbod ti akusasion ni Satanas. No aramidentayo dayta, maparagsaktayo ti puso ni Jehova.​—Proverbio 27:11.

Ikagkagumaan ni Jehova ti Tumulong Kadatayo

4, 5. (a) Maisupadi ken Satanas, ania ti kitkitaen ni Jehova ditoy daga? (b) Tapno magun-odtayo ti anamong ni Jehova, ania ti masapul nga aramidentayo?

⁴ Agsursursor ti Diablo ditoy daga, a mangbirbirok iti akusaran ken alun-onenna. (Job 1:7, 9; 1 Pedro 5:8) Iti kasumbangirna, ikagkagumaan ni Jehova a tulongan dagidiay agkasapulan iti bilegna. Kinuna ni propeta Hanani ken ni Ari Asa: “No maipapan ken Jehova, mapan nga agsublisubli dagiti matana iti intero a daga tapno ipakitana ti pigsana maigapu kadagidiay a ti pusoda naan-anay kenkuana.” (2 Cronicas 16:9) Anian a nagduma ti napnuan gura a panangsukimat ni Satanas ken ti naayat a panangipateg ni Jehova!

⁵ Saannatayo a sipsiputan ni Jehova tapno agbirok iti kamali ken pagkurangantayo. Insurat ti salmista: “No dagiti biddut O Jah, ti siputam koma, O Jehova, siasino ti makapagtakder?” (Salmo 130:3) Ti nabatad a sungbat ket: awan. (Eclesiastes 7:20) No umadanitayo ken ni Jehova buyogen ti naan-anay a puso, kitaennatayo, saan a tapno mangkondenar, no di ket tapno paliiwenna dagiti panagreggettayo ken sungbatanna no umararawtayo iti tulong ken pammakawan. Insurat ni apostol Pedro: “Dagiti mata ni Jehova addada kadagidiay nalinteg, ket dagiti lapayagna situturong iti ararawda; ngem ti rupa ni Jehova bumusor kadagidiay agar-aramid iti dakes a bambanag.”​—1 Pedro 3:12.

6. Kasano a ti napasamak ken ni David ket agpadpada a makaliwliwa ken agserbi a pakdaar kadatayo?

⁶ Imperpekto ni David ken nakabasol iti nadagsen. (2 Samuel 12:7-9) Ngem imbukbokna ti riknana ken ni Jehova ket immadani kenkuana babaen ti napasnek a kararag. (Salmo 51:1-12) Impangag ni Jehova ti kararagna ket pinakawanna, nupay napasaran ni David dagiti napait a bunga ti basolna. (2 Samuel 12:10-14) Agserbi koma daytoy kas liwliwa ken pakdaar kadatayo. Makaliwliwa a maammuan a sidadaan a pakawanen ni Jehova dagiti basoltayo no pudno nga agbabawitayo, ngem tandaanantayo a dagiti basol ket masansan a mangyeg kadagiti nasaem a resulta. (Galacia 6:7-9) No kayattayo ti umadani ken ni Jehova, ikagumaantayo nga adaywan ti aniaman a kagurana.​—Salmo 97:10.

Ni Jehova Iyadanina Kenkuana ti Ilina

7. Ania a kita dagiti tattao ti birbiroken ni Jehova, ket kasanona nga iyadani dagitoy kenkuana?

⁷ Insurat ni David iti maysa kadagiti salmona: “Ni Jehova nangato, ket kaskasdi a makitana daydiay napakumbaba; ngem daydiay napangato ammona laeng iti adayo.” (Salmo 138:6) Umasping iti dayta, kuna ti sabali pay a salmo: “Siasino ti kas ken Jehova a Diostayo, daydiay mangar-aramid ti pagnaedanna iti nangato? Isu agpakumbaba tapno kumita iti langit ken daga, nga ibangonna daydiay nanumo manipud iti mismo a tapok.” (Salmo 113:5-7) Wen, agpakumbaba ti mannakabalin-amin a Namarsua iti uniberso tapno kumita ditoy daga, ken birokenna “daydiay napakumbaba,” “daydiay nanumo,” dagiti tattao nga “agsensennaay ken umas-asug gapu iti amin a nakarimrimon a bambanag a maar-aramid.” (Ezequiel 9:4) Iyadanina kenkuana dagiti kasta a tattao babaen ti Anakna. Idi adda ditoy daga, kinuna ni Jesus: “Awan ti tao a makaumay kaniak malaksid no ti Ama, a nangibaon kaniak, ti mangyasideg kenkuana . . . Awan ti makaumay kaniak malaksid no ipalubos kenkuana ti Ama.”​—Juan 6:44, 65.

8, 9. (a) Apay a kasapulantayo amin ti umadani ken ni Jesus? (b) Ania ti naisangsangayan maipapan iti pannakaipaay ti subbot?

⁸ Amin a tattao rumbeng nga umadanida ken ni Jesus ken masapul a mamatida iti pangsubbot a datonna gapu ta nayanakda a managbasol, naisina iti Dios. (Juan 3:36) Masapul a makikappiada iti Dios. (2 Corinto 5:20) Saan nga inuray ti Dios a nagpakaasi kenkuana dagiti managbasol sakbay a nangipaay kadagiti urnos ti pannakikappia kenkuana. Insurat ni apostol Pablo: “Ti Dios irekomendana ti bukodna nga ayat kadatayo ta, bayat a managbasoltayo pay laeng idi, ni Kristo natay a maipaay kadatayo. . . . Ta no, idi datayo ket kabkabusor, naikappiatayo iti Dios babaen ti ipapatay ti Anakna, ad-adda pay, itan ta naikappiatayon, maisalakantayto babaen ti biagna.”​—Roma 5:8, 10.

⁹ Iti suratna, pinatalgedan ni apostol Juan ti makaay-ayo a kinapudno a ti Dios iyad-adanina dagiti tattao kenkuana: “Babaen itoy naiparangarang ti ayat ti Dios iti kasasaadtayo, agsipud ta ti Dios imbaonna ti bugbugtong nga Anakna ditoy lubong tapno magun-odantayo ti biag babaen kenkuana. Ti ayat adda itoy a banag, saan a gapu ta inayattayo ti Dios, no di ket gapu ta inayatnatayo ket imbaonna ti Anakna a kas pangikappia a sakripisio maipaay kadagiti basoltayo.” (1 Juan 4:9, 10) Ti Dios ti immuna a nagtignay, saan a ti tao. Saankayo kadi a matignay nga umadani iti Dios a mangipakpakita iti dakkel a panagayatna kadagiti “managbasol” a tattao, a maibilang pay ketdi a “kabusor”?​—Juan 3:16.

Masapul a Birokentayo ni Jehova

10, 11. (a) Ania ti masapul nga aramidentayo tapno mabirokantayo ni Jehova? (b) Ania koma ti panangmatmattayo iti sistema ti bambanag ni Satanas?

¹⁰ Siempre, saannatayo a piliten ni Jehova nga umadani kenkuana. Masapul a birokentayo ti Dios, ‘nga arikapen ket pudno a masarakan, nupay, iti kinapudnona, saan nga adayo iti tunggal maysa kadatayo.’ (Aramid 17:27) Nasken a bigbigentayo ti kalintegan ni Jehova a mangkalikagum iti panagpasakuptayo. Insurat ni adalan a Santiago: “Ngarud, agpasakupkayo iti Dios; ngem busorenyo ti Diablo, ket isu agtalawto kadakayo. Umadanikayo iti Dios, ket isu umadaninto kadakayo. Dalusanyo dagiti imayo, dakayo a managbasol, ket gugoranyo dagiti pusoyo, dakayo a di makapangngeddeng.” (Santiago 4:7, 8) Ditay agpangadua a sititibker a dumasig ken ni Jehova ket busorentayo ti Diablo.

¹¹ Kaipapanan daytoy a liklikantayo ti dakes a sistema ti bambanag ni Satanas. Insurat pay ni Santiago: “Saanyo aya nga ammo a ti pannakigayyem iti lubong ket pannakibusor iti Dios? Siasinoman, ngarud, nga agtarigagay nga agbalin a gayyem ti lubong ibilbilangna ti bagina a kabusor ti Dios.” (Santiago 4:4) Iti kasumbangirna, no kayattayo ti agbalin a gagayyem ni Jehova, masapul a namnamaentayo a guraennatayo ti lubong ni Satanas.​—Juan 15:19; 1 Juan 3:13.

12. (a) Ania a makaliwliwa a sasao ti insurat ni David? (b) Ania a pakdaar ti impaay ni Jehova babaen ken propeta Azarias?

¹² No busorennatayo ti lubong ni Satanas iti aniaman a pamay-an, nangnangruna a masapul nga umadanitayo ken ni Jehova iti kararag, a kiddawentayo ti tulongna. Kas pangliwliwa kadatayo, kastoy ti insurat ni David, a nakarikna iti panangisalakan ni Jehova iti adu a gundaway: “Ni Jehova asideg kadagidiay amin nga umaw-awag kenkuana, kadagidiay amin nga umawag kenkuana iti kinapudno. Ti tarigagay dagidiay agbuteng kenkuana aramidennanto, ken ti panagpatulongda denggennanto, ket isalakannanto ida. Ni Jehova saluadanna amin dagidiay mangay-ayat kenkuana, ngem amin dagidiay nadangkes talipuposennanto.” (Salmo 145:18-20) Ipakita daytoy a salmo a maisalakannatayo ni Jehova no masuboktayo kas indibidual ken isalakanna ti ilina kas maysa a grupo inton tiempo ti “dakkel a rigat.” (Apocalipsis 7:14) Agtalinaed a nasinged ni Jehova kadatayo no agtalinaedtayo a nasinged kenkuana. Iti panangiwanwan “ti espiritu ti Dios,” dinakamat ni propeta Azarias ti makuna a nasaknap ti aplikasionna a kinapudno: “Adda kadakayo ni Jehova agingga nga addakayo kenkuana; ket no isu birokenyo, ipalubosnanto nga isu masarakanyo, ngem no baybay-anyo baybay-annakayto.”​—2 Cronicas 15:1, 2.

Masapul a Pudpudno Kadatayo ni Jehova

13. Kasano a maipakitatayo a pudpudno kadatayo ni Jehova?

¹³ Insurat ni apostol Pablo a ‘nagtalinaed a natibker ni Moises a kasla kitkitaenna daydiay Maysa a di makita.’ (Hebreo 11:27) Siempre, pulos a di nakita ni Moises ni Jehova. (Exodo 33:20) Ngem pudpudno unay kenkuana ni Jehova a kas man la nakitanan. Umasping iti dayta, kalpasan ti pannakasuotna, dagiti mata ti pammati ni Job nalawlawag ti pannakakitada ken ni Jehova, kas maysa a Dios a mangipalubos a masuot dagiti matalek nga adipenna ngem dina pulos baybay-an ida. (Job 42:5) Nakuna a ‘nakipagna iti Dios’ da Enoc ken Noe. Inaramidda dayta babaen ti panangikagumaanda nga ay-ayuen ti Dios ken agtulnog kenkuana. (Genesis 5:22-24; 6:9, 22; Hebreo 11:5, 7) No pudpudno kadatayo ni Jehova a kas iti panangmatmat da Enoc, Noe, Job, ken Moises, ‘isu ket imutektekantayo’ iti amin a danatayo, ket isu ‘palintegennanto dagiti danatayo.’​—Proverbio 3:5, 6.

14. Ania ti kaipapanan ti ‘kumpet’ ken ni Jehova?

¹⁴ Sakbay unay a simrek dagiti Israelita iti Naikari a Daga, binalakadan ida ni Moises: “Rebbeng a sumurotkayo ken Jehova a Diosyo, ket rebbeng nga agbutengkayo kenkuana, ket rebbeng a salimetmetanyo ti bilbilinna, ket rebbeng nga umimdengkayo iti timekna, ket rebbeng nga agserbikayo kenkuana, ket rebbeng a kumpetkayo kenkuana.” (Deuteronomio 13:4) Rumbeng a sumurot, agbuteng, agtulnog, ken kumpetda ken ni Jehova. No maipapan iti sao a naipatarus ditoy kas ‘kumpet,’ maysa nga eskolar ti Biblia ti nagkuna a dayta a “sao ipamatmatna ti nasinged unay ken nadekket a relasion.” Kinuna ti salmista: “Ti kinasinged ken Jehova kukua dagidiay agbuteng kenkuana.” (Salmo 25:14) Matagiragsaktayo daytoy nagpateg, nasinged a relasion ken ni Jehova no isu ket pudpudno kadatayo ken maamaktayo a mangpagura kenkuana iti aniaman a wagas gapu iti kasta unay a panagayattayo kenkuana.​—Salmo 19:9-14.

Pagaammoyo Kadi ti Panangaywan ni Jehova?

15, 16. (a) Kasano nga ipakita ti Salmo 34 nga ay-aywanannatayo ni Jehova? (b) Ania ti nasken nga aramidentayo no marigatantayo a manglagip kadagiti kinaimbag nga impakita ni Jehova kadatayo?

¹⁵ Maysa kadagiti nasikap nga aramid ni Satanas isu ti panangikagumaanna a malipatantayo ti kinapudno a ni Jehova a Diostayo kanayon nga ay-aywananna dagiti matalek nga adipenna. Ni David nga ari ti Israel pagaammona unay ti panangsalaknib ni Jehova kenkuana idi naipasango iti napeggad a situasion. Idi napilitan nga aginmamauyong iti imatang ni Aquis nga ari ti Gat, nangputar ni David iti samiweng, maysa a nakapimpintas a salmo, a naglaon kadagitoy nga ebkas ti pammati: “O itan-okyo ni Jehova a maibuyog kaniak, ket itandudotayo a sangsangkamaysa ti naganna. Nagimtuodak ken Jehova, ket sinungbatannak, ket kadagiti amin nga aliawko inispalnak. Ti anghel ni Jehova agpakpakarso iti intero nga aglikmut dagidiay agbuteng kenkuana, ket alawenna ida. O nanamenyo ken kitaenyo a ni Jehova naimbag; naragsak ti nabaneg a lalaki nga agkamang kenkuana. Ni Jehova asideg kadagidiay nadunor ti pusoda; ket dagidiay a naidagel iti espiritu isalakanna. Adu ti didigra daydiay nalinteg, ngem manipud kadakuada amin isu ispalen ni Jehova.”​—Salmo 34:3, 4, 7, 8, 18, 19; 1 Samuel 21:10-15.

¹⁶ Kombinsidokayo kadi iti pannakabalin ni Jehova a mangisalakan? Pagaammoyo kadi ti pannalaknib nga ipapaayna babaen dagiti anghelna? Personal kadi a napadasan ken nakitayo a naimbag ni Jehova? Kaano ti naudi a nariknayo ti kinaimbag ni Jehova? Padasenyo a lagipen. Napasamak kadi dayta iti maudi a balay a nangasabaanyo, idi mariknayo a kasla nabannogkayon? Nalabit naragsak ti panagpatangyo iti bumalay. Nagyamankayo met laeng kadi ken ni Jehova gapu iti impaayna a kanayonan a pigsa a kasapulanyo ken iti panangbendisionna kadakayo? (2 Corinto 4:7) Iti sabali a bangir, mabalin a marigatankayo a manglagip iti partikular a kinaimbag nga impakita kadakayo ni Jehova. Mabalin a nasken a panunotenyo ti naglabas a lawas, bulan, tawen, wenno nasursurok pay. No kasta ti kasasaad, apay a diyo pagreggetan ti umadani ken ni Jehova ket ikagumaanyo a kitaen no kasano ti panangiwanwan ken panangiturongna kadakayo? Imbalakad ni apostol Pedro kadagiti Kristiano: “Agpakumbabakayo . . . iti sidong ti mannakabalin nga ima ti Dios . . . bayat nga iyallatiwyo kenkuana ti isuamin a pakaringgoranyo, agsipud ta isu maseknan kadakayo.” (1 Pedro 5:6, 7) Kinapudnona, masdaawkayo no kasano kadakkel ti panangipategna kadakayo!​—Salmo 73:28.

Itultuloyyo a Biroken ni Jehova

17. Ania ti kasapulan tapno agtultuloy ti panangbiroktayo ken ni Jehova?

¹⁷ Masapul nga itultuloytayo a taginayonen ti relasiontayo ken ni Jehova. Inkararag ni Jesus iti Amana: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Ti pananggun-od iti pannakaammo maipapan ken ni Jehova ken iti Anakna kalikagumanna ti agtultuloy a panagregget iti biangtayo. Kasapulantayo ti tulong ti kararag ken ti nasantuan nga espiritu tapno maawatantayo “ti nauneg a bambanag ti Dios.” (1 Corinto 2:10; Lucas 11:13) Kasapulantayo met ti panangiwanwan ti “matalek ken masirib nga adipen” tapno mataraonan ti isiptayo kadagiti naespirituan a taraon a maipapaay “iti umiso a tiempo.” (Mateo 24:45) Babaen dayta a kalasugan, balakadannatayo ni Jehova a basaentayo nga inaldaw ti Saona, regular a tumabunotayo kadagiti Nakristianuan a gimong, ken naimpusuan a makipasettayo iti panangikasaba iti “naimbag a damag ti pagarian.” (Mateo 24:14) No kasta ti aramidentayo, agtultuloy ti panangbiroktayo iti naayat a Diostayo, ni Jehova.

18, 19. (a) Ania koma ti determinado nga aramidentayo? (b) Kasano a mabendisionantayo no sititibker a busorentayo ti Diablo ken itultuloytayo a biroken ni Jehova?

¹⁸ Ar-aramiden ni Satanas ti amin a kabaelanna a mangyeg iti panangidadanes, ibubusor, ken rigat iti ili ni Jehova manipud iti aniaman a gubuayan. Ikagkagumaanna a kiburen ti talna nga adda kadatayo ken dadaelen ti nasayaat a takdertayo iti Dios. Dina kayat ti agtultuloy a panangbiroktayo kadagiti nasingpet-panagpuspusoda a tattao ken panangtulong kadakuada a dumasig ken ni Jehova no maipapan iti isyu ti sapasap a kinasoberano. Ngem nasken a determinadotayo nga agtalinaed a nasungdo ken ni Jehova, nga agtalektayo nga ispalennatayo iti daydiay nadangkes. No agpaiwanwantayo iti Sao ti Dios ken agtalinaedtayo nga aktibo iti uneg ti makitkita nga organisasionna, makasiguradotayo a kanayon a suportarannatayo.​—Isaias 41:8-13.

¹⁹ Sapay koma ngarud ta sititibker a sarangtentayo amin ti Diablo ken dagiti nasikap nga aramidna, a kanayon a birokentayo ti naayat a Diostayo, ni Jehova, a sigurado a ‘mangpatibker, mangpapigsa kadatayo.’ (1 Pedro 5:8-11) Iti kasta, ‘mapagtalinaedtayo ti bagbagitayo iti ayat ti Dios, bayat nga ur-urayentayo ti asi ni Apotayo a Jesu-Kristo a maipaay iti agnanayon a biag.’​—Judas 21.

Ania ti Sungbatyo?

• Ania ti kaipapanan ti sao a “Diablo,” ket kasano a pinaneknekan ti Diablo a maitutop kenkuana dayta nga awag?

• Kasano a naiduma ni Jehova iti Diablo no maipapan iti panangpaliiwna kadagiti tattao ditoy daga?

• Apay a nasken a patien ti tao ti subbot no isu ket umadani ken ni Jehova?

• Ania ti kaipapanan ti ‘kumpet’ ken ni Jehova, ken kasano nga agtultuloy a birokentayo ti Dios?

[Ladawan iti panid 15]

Iti laksid dagiti pakasuotanna, binigbig ni Job ti panangaywan kenkuana ni Jehova

[Dagiti Ladawan iti panid 16, 17]

Mapalagipantayo iti panangipateg ni Jehova no inaldaw a basaentayo ti Biblia, regular a tumabuno kadagiti Nakristianuan a gimong, ken sireregta a makipaset ti trabaho a panangasaba