Panangummong Kadagiti Bambanag Idiay Langit ken Ditoy Daga

‘Maitunos iti pakaragsakanna unay nga ummongenna a sangsangkamaysa manen ken Kristo ti amin a bambanag, ti bambanag iti langlangit ken ti bambanag iti daga.’​—EFESO 1:9, 10.

1. Ania ti ‘pakaragsakan unay’ ni Jehova agpaay iti langit ken iti daga?

TALNA ITI INTERO NGA UNIBERSO! Dayta ti nadayag a panggep ni Jehova, “ti Dios ti talna.” (Hebreo 13:20) Pinaltiinganna ni apostol Pablo a mangisurat a ti “pakaragsakanna unay” isu ti ‘panangummongna a sangsangkamaysa manen ken Kristo ti amin a bambanag, ti bambanag iti langlangit ken ti bambanag iti daga.’ (Efeso 1:9, 10) Ania aya ti ipasimudaag ti sao a naipatarus iti daytoy a bersikulo kas ‘panangummong a sangsangkamaysa manen’? Kuna ti eskolar ti Biblia a ni J. B. Lightfoot: “Dayta nga ebkas ipasimudaagna ti panagtutunos ti intero nga uniberso, nga awanto dagiti agduduma ken agsusupadi nga elementona, no di ket naisentro ken naikaykaysadanto amin ken ni Kristo. Awanton ti basol ken ipapatay, ladingit ken pannakapaay ken panagsagaba.”

“Ti Bambanag iti Langlangit”

2. Siasino “ti bambanag iti langlangit” a nasken a maummong?

² Ginupgop ni apostol Pedro ti nakaskasdaaw a namnama dagiti pudno a Kristiano idi insuratna: “Adda baro a langlangit ken baro a daga nga ur-urayentayo sigun iti karina, ket kadagitoy agtaeng ti kinalinteg.” (2 Pedro 3:13) Ti naikari ditoy a “baro a langlangit” tuktukoyenna ti baro a mangituray nga autoridad, ti Mesianiko a Pagarian. “Ti bambanag iti langlangit” a dinakamat ni Pablo iti suratna kadagiti taga-Efeso maummongdanto “ken ni Kristo.” Isuda dagidiay mangbukel iti limitado a bilang dagiti tattao a napili a makipagturay ken ni Kristo idiay langit. (1 Pedro 1:3, 4) Dagitoy a 144,000 a napulotan a Kristiano ‘nagatangda manipud iti daga,’ ‘nagatangda manipud iti sangatauan,’ tapno makipagtawidda ken ni Kristo iti nailangitan a Pagarianna.​—Apocalipsis 5:9, 10; 14:3, 4; 2 Corinto 1:21; Efeso 1:11; 3:6.

3. Apay a makuna a dagiti napulotan ket ‘situtugaw kadagiti nailangitan a disso’ uray addada pay laeng ditoy daga?

³ Dagiti napulotan a Kristiano mayanakda manen babaen ti nasantuan nga espiritu tapno agbalinda a naespirituan nga annak ni Jehova. (Juan 1:12, 13; 3:5-7) Gapu ta inampon ida ni Jehova kas ‘annakna,’ agbalindan a kakabsat ni Jesus. (Roma 8:15; Efeso 1:5) Gapuna, uray no addada pay laeng ditoy daga, makuna a ‘naibangonda a sangsangkamaysa ken nagtugawda a sangsangkamaysa kadagiti nailangitan a disso a naikaykaysa ken Kristo Jesus.’ (Efeso 1:3; 2:6) Tagtagiragsakenda dayta a naitan-ok a naespirituan a saad gapu ta ‘naselioanda iti naikari a nasantuan nga espiritu, a maysa a tanda a pakpakauna iti tawidda’ a nakasagana agpaay kadakuada idiay langit. (Efeso 1:13, 14; Colosas 1:5) No kasta, isuda “ti bambanag iti langlangit,” a masapul nga ummongen ni Jehova sigun iti inkeddengna a bilangda.

Mangrugi ti Panagummong

4. Kaano ken kasano a nangrugi ti panangummong kadagiti “bambanag iti langlangit”?

⁴ Maitunos iti “panangaywan” wenno wagas ti panangimaton ni Jehova kadagiti bambanag, ti panangummong kadagiti “bambanag iti langlangit” ket mangrugi “agingga iti naan-anay a pagpatinggaan dagiti naituding a tiempo.” (Efeso 1:10) Dimteng dayta a tiempo idi Pentecostes 33 K.P. Iti dayta nga aldaw, naiparukpok ti nasantuan nga espiritu kadagiti apostol ken kadagiti adalan a lallaki ken babbai. (Aramid 1:13-15; 2:1-4) Nangted dayta iti pammaneknek a nangrugin a maipatungpal ti baro a tulag, a tanda ti pannakaipasngay ti kongregasion Kristiano ken ti baro a nasion ti naespirituan nga Israel, “ti Israel ti Dios.”―Galacia 6:16; Hebreo 9:15; 12:23, 24.

5. Apay a nangbukel ni Jehova iti baro a “nasion” a mangsukat iti nainlasagan nga Israel?

⁵ Ti Linteg ti tulag iti nagbaetan ti Dios ken ti nainlasagan nga Israel ket saan a nakapataud iti “maysa a pagarian ti papadi ken maysa a nasantuan a nasion” nga agserbi nga agnanayon idiay langit. (Exodo 19:5, 6) Kinuna ni Jesus kadagiti narelihiosuan a panguluen dagiti Judio: “Ti pagarian ti Dios maikkatto kadakayo ket maited iti nasion a mangpatpataud kadagiti bungana.” (Mateo 21:43) Dayta a nasion, ti naespirituan nga Israel, ket buklen dagiti napulotan a Kristiano a naipan iti baro a tulag. No maipapan kadakuada, insurat ni apostol Pedro: “Dakayo ket ‘maysa a napili a puli, maysa a naarian a kinapadi, maysa a nasantuan a nasion, maysa nga ili nga agpaay a naisangsangayan a sanikua, tapno ideklarayo a sisasaknap dagiti kinatan-ok’ daydiay nangayab kadakayo manipud iti kinasipnget nga agturong iti nakaskasdaaw a lawagna. Ta idi naminsan saankayo a maysa nga ili, ngem itan ket ili ti Dios.” (1 Pedro 2:9, 10) Nawaswasen ti tulag nga inaramid ni Jehova iti nainlasagan nga Israel. (Hebreo 8:7-13) Kas impakpakauna ni Jesus, naikkat kadakuada ti pribilehio a makipaset iti Mesianiko a Pagarian ket naited dayta kadagiti 144,000 a kameng ti naespirituan nga Israel.―Apocalipsis 7:4-8.

Naipan iti Tulag ti Pagarian

6, 7. Ania a naisangsangayan a tulag ti inaramid ni Jesus kadagiti napulotan iti espiritu a kakabsatna, ket ania ti kaipapanan dayta kadakuada?

⁶ Iti daydi a rabii nga inyussuat ni Jesus ti Panglaglagip iti ipapatayna [wenno Memorial], kinunana kadagiti matalek nga apostolna: “Dakayo dagidiay nagtalinaed kaniak kadagiti pannakasusuotko; ket mangaramidak iti tulag kadakayo, kas iti panangaramid ni Amak iti maysa a tulag kaniak, maipaay iti maysa a pagarian, tapno mabalinyo ti mangan ken uminum iti lamisaanko idiay pagariak, ket agtugawkayo kadagiti trono tapno ukomenyo ti sangapulo ket dua a tribu ti Israel.” (Lucas 22:28-30) Dinakamat ditoy ni Jesus ti maysa a naisangsangayan a tulag nga inaramidna kadagiti 144,000 a napulotan iti espiritu a kakabsatna, dagidiay agtalinaed a “matalek uray agingga ken patay” ken mangpaneknek a ‘nagballigida.’―Apocalipsis 2:10; 3:21.

⁷ Dagiti kameng daytoy a limitado a grupo dida pulos tarigagayan ti agbiag nga agnanayon ditoy daga kas tattao. Makipagturayda ken ni Kristo idiay langit, nga agtugawda kadagiti trono tapno ukomenda ti sangatauan. (Apocalipsis 20:4, 6) Usigentayo ita ti dadduma a kasuratan nga agaplikar laeng kadagitoy a napulotan, a mangipakita no apay a ti “sabsabali a karnero” dida makipaset kadagiti emblema ti Memorial.―Juan 10:16.

8. Ania ti ipamatmat ti pannakipaset dagiti napulotan a Kristiano iti emblema a tinapay? (Kitaenyo ti kahon iti panid 23.)

⁸ Sagabaen dagiti napulotan no ania ti sinagaba ni Kristo ken sidadaanda a matay kas iti ipapatayna. Kas maysa a kameng dayta a grupo, kinuna ni Pablo nga isu ket sisasagana a mangaramid iti aniaman a panagsakripisio tapno ‘magun-odna ni Kristo tapno isu maammuanna ken ti pannakabalin ti panagungarna ken pannakiraman kadagiti panagsagaba ni Jesus.’ Wen, situtulok ni Pablo a ‘matay a kas iti ipapatay ni Kristo.’ (Filipos 3:8, 10) Adu a napulotan a Kristiano ti nangibtur iti “makapapatay a pannakatrato a naipaay ken Jesus.”​—2 Corinto 4:10.

9. Ania ti irepresentar ti tinapay ti Memorial?

⁹ Idi inyussuatna ti Pangrabii ti Apo, kinuna ni Jesus: “Daytoy kaipapananna ti bagik.” (Marcos 14:22) Tuktukoyenna ti literal a bagina, nga asidegen a makabkabil ken mapadara. Maitutop a mangisimbolo iti bagina ti awan lebadurana a tinapay. Apay? Gapu ta iti Biblia, ti lebadura ket mangipasimudaag iti basol wenno kinadakes. (Mateo 16:4, 11, 12; 1 Corinto 5:6-8) Perpekto ni Jesus, isu a saan a namulitan iti basol ti natauan a bagina. Idatonna dayta a perpekto a bagina kas pangikappia a sakripisio. (Hebreo 7:26; 1 Juan 2:2) Magunggonaan iti dayta ti amin a matalek a Kristiano, ti namnamada man ket agbiag idiay langit wenno agbiag nga agnanayon iti maysa a paraiso a daga.―Juan 6:51.

10. Kasano a dagidiay uminom iti arak iti Memorial ‘makiramanda iti dara ni Kristo’?

¹⁰ No maipapan iti arak nga inumen dagiti napulotan a Kristiano kabayatan ti Memorial, insurat ni Pablo: “Ti kopa ti bendision a bendisionantayo, saan aya a pannakiraman dayta iti dara ti Kristo?” (1 Corinto 10:16) Iti ania nga anag a dagidiay uminom iti arak ‘makiramanda iti dara ni Kristo’? Dina kayat a sawen a makiramanda iti panangipaay iti pangsubbot a daton, yantangay isuda a mismo kasapulanda ti masubbot. Babaen ti pammatida iti mangsubbot a pannakabalin ti dara ni Kristo, mapakawan dagiti basolda ken maideklarada a nalinteg agpaay iti biag idiay langit. (Roma 5:8, 9; Tito 3:4-7) Babaen ti naiparukpok a dara ni Kristo, dagiti 144,000 a makipagtawid ken ni Kristo ket ‘masantipikar,’ mailasin, magugoran manipud iti basol tapno agbalinda a “sasanto.” (Hebreo 10:29; Daniel 7:18, 27; Efeso 2:19) Wen, babaen ti naiparukpok a darana a “nanggatang [ni Kristo] iti tattao maipaay iti Dios manipud iti tunggal tribu ken pagsasao ken ili ken nasion, ket pinagbalinmo ida a kas pagarian ken papadi iti Diostayo, ket agturayda a kas ar-ari iti daga.”​—Apocalipsis 5:9, 10.

11. Ania ti ipampamatmat dagiti napulotan no uminumda iti arak ti Memorial?

¹¹ Idi inyussuat ni Jesus ti Panglaglagip iti ipapatayna, impasana ti kopa ti arak kadagiti matalek nga apostolna sana kinuna: “Uminumkayo manipud iti dayta, dakayo amin; ta daytoy kaipapananna ti bukodko a ‘dara ti tulag,’ a maiparukpok maigapu iti adu maipaay iti pannakapakawan dagiti basol.” (Mateo 26:27, 28) No kasano a ti dara dagiti toro ken kalding pinatalgedanna ti tulag ti Linteg iti nagbaetan ti Dios ken ti nasion ti Israel, ti dara ni Jesus pinatalgedanna met ti baro a tulag nga inaramid ni Jehova iti naespirituan nga Israel, a nangrugi idi Pentecostes 33 K.P. (Exodo 24:5-8; Lucas 22:20; Hebreo 9:14, 15) Babaen ti pananginumda iti arak a mangisimbolo iti “dara ti tulag,” ipampamatmat dagiti napulotan nga addada iti baro a tulag ken tagtagiragsakenda dagiti gunggona nga itden dayta.

12. Kasano a dagiti napulotan mabautisaranda iti ipapatay ni Kristo?

¹² Adda sabali pay a naipalagip kadagiti napulotan. Kinuna ni Jesus kadagiti matalek nga adalanna: “Iti kopa nga in-inumak uminumkayto, ket iti bautismo a pakabautisarak mabautisarankayto.” (Marcos 10:38, 39) Idi agangay, kinuna ni apostol Pablo a dagiti Kristiano ‘mabautisaranda iti ipapatay’ ni Kristo. (Roma 6:3) Adu ti insakripisio dagiti napulotan bayat ti kaadda ditoy daga. Ti ipapatayda ket maysa a sakripisio yantangay tinallikudanda ti aniaman a namnamada a biag nga agnanayon ditoy daga. Dagitoy a napulotan a Kristiano ti naan-anayto a mabautisaran iti ipapatay ni Kristo kalpasan a matayda a matalek ken mapagungar kas espiritu a parsua nga ‘agturay a sangsangkamaysa kas ar-ari’ a kadua ni Kristo idiay langit.​—2 Timoteo 2:10-12; Roma 6:5; 1 Corinto 15:42-44, 50.

Pannakipaset Kadagiti Emblema

13. Apay a dagidiay addaan iti naindagaan a namnama saanda a makipaset kadagiti emblema ti Memorial, ngem apay a tumabunoda latta iti Memorial?

¹³ Gapu ta amin dagitoy a bambanag ket nainaig iti pannakipaset kadagiti emblema a tinapay ken arak a maipasa kabayatan ti Memorial, nalawag a saan a maiparbeng a makipaset dagidiay addaan iti naindagaan a namnama. Maawatanda a saanda a karaman kadagiti napulotan a kameng ti bagi ni Kristo, ken saanda met a karaman iti baro a tulag nga inaramid ni Jehova kadagidiay makipagturay ken ni Jesu-Kristo. Yantangay ti “kopa” irepresentarna ti baro a tulag, dagidiay laeng adda iti baro a tulag ti makipaset kadagiti emblema. Dagidiay mangnamnama nga agbiag nga agnanayon kas perpekto a tattao ditoy daga iti sidong ti Pagarian saanda a nabautisaran iti ipapatay ni Kristo ken saanda met a makipagturay kenkuana idiay langit. No makipasetda kadagiti emblema, ar-aramidenda ti maysa a banag a saan a maitutop kadakuada. Gapuna, saanda a makipaset kadagiti emblema, nupay tumabunoda iti Memorial kas nadayaw nga agpaliiw. Agyamanda iti amin nga inaramid ni Jehova para kadakuada babaen ti Anakna, agraman ti ipaayna a pammakawan maibatay iti naiparukpok a dara ni Kristo.

14. Kasano a mapabpabileg ti espiritualidad dagiti napulotan no makipasetda kadagiti emblema a tinapay ken arak?

¹⁴ Asidegen a mairingpas ti naan-anay a pannakaselio ti nakabasbassit a bilang dagiti Kristiano a naayaban a makipagturay ken ni Kristo idiay langit. Agingga a di nauyos ti insakripisioda a natauan a biagda, mapabpabileg ti espiritualidad dagiti napulotan babaen ti pannakipasetda kadagiti emblema ti Memorial. Mariknada a naikaykaysada kadagiti napulotan a kakabsatda kas kameng ti bagi ni Kristo. Ti pannakipasetda kadagiti emblema a tinapay ken arak ipalagipna kadakuada ti determinasionda nga agtalinaed a matalek agingga ken patay.―2 Pedro 1:10, 11.

Panangummong “iti Bambanag iti Daga”

15. Siasino dagiti naummong iti dasig dagiti napulotan a Kristiano?

¹⁵ Sipud idi ngalay ti dekada 1930, ti dumakdakkel a bilang ti “sabsabali a karnero,” a saan a paset ti “bassit nga ipastoran” ken addaan iti namnama a biag nga agnanayon ditoy daga, supsuportaranda dagiti napulotan. (Juan 10:16; Lucas 12:32; Zacarias 8:23) Nagbalinda a nasungdo a kakadua dagiti kakabsat ni Kristo, ket mangipapaayda iti dakkel a tulong tapno maikasaba “daytoy naimbag a damag ti pagarian” a pangsaksi kadagiti amin a nasion. (Mateo 24:14; 25:40) Gapu ta kasta ti inaramidda, addaanda iti gundaway tapno ibilang ida ni Kristo kas ‘karnerona,’ a maisaadda iti “makannawanna” tapno matagiragsakda ti anamongna inton umayna ukomen dagiti nasion. (Mateo 25:33-36, 46) Gapu iti pammatida iti dara ni Kristo, buklendanto ti “dakkel a bunggoy,” a makalasat iti “dakkel a rigat.”―Apocalipsis 7:9-14.

16. Siasino dagiti “bambanag iti daga,” ken kasano a maaddaanda amin iti gundaway nga agbalin nga “annak ti Dios”?

¹⁶ Inton naan-anay a maselioan ti 144,000, mapalusposanen dagiti “angin” ti pannakadadael maibusor iti dakes a sistema ti bambanag ni Satanas ditoy daga. (Apocalipsis 7:1-4) Kabayatan ti Sangaribu a Tawen a Panagturay ni Kristo ken dagiti kakaduana nga ar-ari ken papadi, maikaduanto iti dakkel a bunggoy ti di mabilang a napagungar a tattao. (Apocalipsis 20:12, 13) Maaddaan dagitoy iti gundaway nga agbalin a permanente a naindagaan a sakup ti Mesianiko nga Ari, ni Kristo Jesus. Iti ngudo ti Milenio a Turay, amin dagitoy a “bambanag iti daga” maipasangodanto iti maudi a pannubok. Dagidiay agtalinaed a matalek agbalindanto a naindagaan nga “annak ti Dios.”​—Efeso 1:10; Roma 8:21; Apocalipsis 20:7, 8.

17. Kasano a matungpalto ti panggep ni Jehova?

¹⁷ No kasta, gapu iti di matukod a kinasirib ti “panangaywan” wenno wagas ti panangimatonna kadagiti bambanag, maitungpalen ni Jehova ti panggepna a ‘mangummong iti amin a bambanag a sangsangkamaysa manen ken Kristo, ti bambanag iti langlangit ken ti bambanag iti daga.’ Amin nga adda nakemna a parsua idiay langit ken ditoy daga maummongdanto a sangsangkamaysa iti sidong ti sapasap a talna, a siraragsakda nga agpasakup iti nalinteg a soberania ti Naindaklan a Managpanggep, ni Jehova.

18. Kasano a makagunggona agpadpada kadagiti napulotan ken iti sabsabali a karnero ti itatabunoda iti Memorial?

¹⁸ Anian a makapabileg iti pammati dagiti bassit a bilang dagiti napulotan ken dagiti minilion a kakaduada a sabsabali a karnero no agtataripnongda inton Abril 12, 2006! Rambakanda ti Panglaglagip iti ipapatay ni Kristo, kas imbilin ni Jesus: “Itultuloyyo nga aramiden daytoy kas panglaglagip kaniak.” (Lucas 22:19) Masapul a laglagipen ti amin a tumabuno no ania ti naaramidan ni Jehova agpaay kadakuada babaen ti dungdungnguenna nga Anak, ni Kristo Jesus.

Pangrepaso

• Ania ti panggep ni Jehova agpaay kadagiti bambanag idiay langit ken bambanag ditoy daga?

• Siasino “ti bambanag iti langlangit,” ken kasanoda a naummong?

• Siasino “ti bambanag iti daga,” ket ania ti namnamada?

[Kahon iti panid 23]

“Ti Bagi ni Kristo”

Iti 1 Corinto 10:16, 17, kas panangilawlawag iti pateg ti tinapay kadagiti napulotan iti espiritu a kakabsat ni Kristo, inusar ni Pablo ti sao a “bagi” iti naisangsangayan nga anag. Kinunana: “Ti tinapay a pisientayo, saan aya a pannakiraman dayta iti bagi ti Kristo? Agsipud ta adda maymaysa a tinapay, datayo, nupay adutayo, ket maymaysa a bagi, ta makiramramantayo amin iti dayta maymaysa a tinapay.” No kanen dagiti napulotan a Kristiano ti tinapay ti Memorial, ipakpakaammoda ti panagkaykaysada kas kongregasion dagiti napulotan, a kasla maysa a bagi a ni Kristo ti Ulona.―Mateo 23:10; 1 Corinto 12:12, 13, 18.

[Dagiti Ladawan iti panid 23]

Apay a dagiti laeng napulotan ti makipaset iti emblema a tinapay ken arak?

[Ladawan iti panid 25]

Babaen ti panangaywan ni Jehova, mapagkaykaysanto ti amin a parsua idiay langit ken ditoy daga