Ti Aldaw a Nasken a Laglagipen

DAYTA ti aldaw a naan-anay a nangbalbaliw iti masanguanan ti sangatauan agpaay iti agnanayon a pagimbaganda. Awan ti sabali nga aldaw iti historia nga addaan iti kasta nga epekto iti masanguanan ti tao. Iti dayta nga aldaw nga inturpos ni Jesus ti amin a panggepna nga immay ditoy daga. Idi nailansa iti kayo a pagtutuokan, inyikkisna sakbay a nauyos ti angesna: “Naitungpalen!” (Juan 19:30) Iti ania a panggep nga immay ni Jesus?

“Ti Anak ti tao immay,” kuna ti Biblia, “saan a tapno pagserbian, no di ket tapno agserbi ken tapno itedna ti kararuana kas subbot a kasukat dagiti adu.” (Mateo 20:28) Inted ni Jesus ti kararua, wenno biagna, tapno maispal ti sangatauan manipud iti natawid a basol ken ipapatay. Kinapudnona, “ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Anian a nagpateg a probision ti daton ni Jesus!

Adda pay sabali a rason no apay a nasken a laglagipen ti aldaw ti ipapatay ni Jesus. Iti dayta nga aldaw, ti Anak ti Dios insurona kadagiti apostolna dagiti napateg a leksion a tumulong kadakuada nga agtalinaed a matalek. Ania la ketdin ti pannakatukay ti puspuso dagiti adalanna iti naudi a sasaona! Ania dagiti insurona? Kasanotayo a magunggonaan kadagiti insuro ni Jesus kadakuada? Mausig dagitoy a saludsod iti sumaganad nga artikulo.