Ni Jesu-Kristo ti Epekto ti Mensahena iti Biagmo

“Immayak tapno maaddaanda iti biag ket siwawadwad a maaddaanda iti dayta.” ​—JUAN 10:10.

IMMAY ni Jesu-Kristo ditoy daga kangrunaanna tapno mangipaay, saan a tapno umawat. Babaen ti ministeriona, nangipaay iti nakapatpateg a sagut iti sangatauan​—ti mensahe a nangipalgak iti kinapudno maipapan iti Dios ken iti pagayatanna. Dagidiay mangipangag iti dayta a mensahe matagiragsakda ti nasaysayaat a biag itan, kas patalgedan ti minilmilion a pudno a Kristiano.a Ngem naibugas iti mensahe nga inkasaba ni Jesus ti sagut a kapatgan iti amin​—ti perpekto a biag nga impaayna maigapu kadatayo. Ti agnanayon a pagimbagantayo ket agpannuray iti reaksiontayo iti daytoy nagpateg a paset ti mensahena.

No ania ti impaay ti Dios ken ti Kristo Ammo ni Jesus nga isu ket agsagabanto iti nasaem nga ipapatay babaen kadagiti kabusorna. (Mateo 20:17-19) Nupay kasta, iti pagaammo a sasaona iti Juan 3:16, kinunana: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” Imbaga pay ni Jesus nga immay “tapno itedna ti kararuana [wenno biagna] kas subbot a kasukat dagiti adu.” (Mateo 20:28) Apay nga imbagana a naited ti biagna?

Gapu iti di maartapan nga ayatna, nangipaay ti Dios iti probision para kadagiti tattao tapno maispalda manipud natawid a basol ken kadagiti imbungana​—kinaimperpekto ken ipapatay. Inaramid dayta ti Dios babaen ti panangibaonna iti bugbugtong nga Anakna ditoy daga tapno matay kas sakripisio. Sidadaan a nagtungpal ni Jesus, nga intedna ti perpekto a biagna maigapu kadatayo. Daytoy a probision a naawagan iti subbot, ti katatan-okan a sagut ti Dios para iti sangatauan.b Maysa dayta a sagut a mangiturong iti biag nga agnanayon.

No ania ti masapul nga aramidem Ibilangmo kadi ti subbot kas sagut nga agpaay kenka a mismo? Agpannuray dayta kenka. Kas panangyilustrar: Ipapanmon nga adda mangituktukon kenka iti nabungon a sagut. Siempre, saanmo a matagikua dayta a sagut no dika agtignay a mangawat iti dayta. Kasta met, ni Jehova iyaw-awatna kenka ti subbot, ngem saanmo a matagikua dayta malaksid no agtignayka ket awatem dayta. Kasano?

Kinuna ni Jesus a dagidiay “mangwatwat iti pammati” kenkuana ti umawat iti biag nga agnanayon. Ti pammati ramanenna ti wagas ti panagbiag. (Santiago 2:26) Ti panangipakita iti pammati ken Jesus kaipapananna nga agbiagka maitunos iti kinuna ken inaramidna. Tapno maaramidmo dayta, masapul nga am-ammuem a naimbag ni Jesus ken ni Amana. “Daytoy kaipapananna ti agnanayon a biag,” kinuna ni Jesus, “ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”​—Juan 17:3.

Agarup 2,000 a tawen ti napalabasen, inranud ni Jesu-Kristo ti maysa a mensahe a nangbalbaliw iti biag ti minilmilion a tattao iti intero a lubong. Kayatmo kadi a maammuan ti ad-adu pay maipapan iti dayta a mensahe ken no kasano a magunggonaanka iti dayta agraman dagiti ipatpategmo iti biag, saan laeng nga ita, no di ket iti agnanayon? Maragsakan dagiti Saksi ni Jehova a tumulong kenka.

Kadagiti sumaganad nga artikulo, ad-adda pay a mailawlawag kenka ti maipapan ken Jesu-Kristo, ti tao a nangikasaba iti mensahe a mabalin a mangbalbaliw iti biagmo iti agnanayon.

[Footnotes]