Dagiti Agtutubo a Makaparag-o iti Puso ni Jehova

“Agmasiribka, anakko, ket pagrag-oem ti pusok, tapno makaipaayak iti sungbat iti daydiay mangrurrurod kaniak.”​—Proverbio 27:11.

Dagitoy a maadal nga artikulo ket nangnangruna a nairanta kadagiti agtutubo a Saksi ni Jehova. Gapuna, paregtaendakayo nga agtutubo nga adalenyo a naimbag daytoy a material ken siwayawaya nga agkomentokayo no mausig daytoy iti kongregasion iti Panagadal iti Pagwanawanan.

1, 2.(a) Ilawlawagmo a ti basta pannakaatrakar kadagiti bambanag iti lubong kaipapananna a saanka a maikari nga agbalin a Kristiano. (Roma 7:21) (b) Ania ti masursurom iti napasamak ken ni Asaf? (Kitaen ti kahon iti panid 13.)

IPAPANMO a gumatgatangka kadagiti kawes. Iti panagsukainmo, nagustuam a dagus ti maysa a kawes. Maibagay kenka ti kolor ken estilona, ken ipakita ti presiona a talaga a maysa daytoy a baratilio. Ngem sinukimatmo a naimbag. Nasdaawka ta nadlawmo a nagkupasen dagiti igidna, ken saan a nasayaat ti pannakadaitna. Nupay napintas ti kawes, nababa ti kalidadna. Gatangem kadi ti kasta a produkto?

² Idiligmo daytoy iti kasasaad a mabalin a pakaipasanguam kas maysa a Kristiano nga agtutubo. Iti apagkita, kasla makaay-ayo unay dagiti bambanag ditoy lubong​—kas iti nadakamat a kawes. Kas pagarigan, mabalin nga agatender dagiti kaeskuelaam kadagiti makapagagar a party, makiramanda iti panagdroga, panaginum, saan a serioso a panagdeyt, ken panagdenna sakbay ti panagasawa. Addada kadi gundaway a tarigagayam ti kasta a klase ti panagbiag? Kayatmo kadi a padasen ti aw-awaganda a wayawaya uray apagbiit laeng? No wen, saanmo koma a dagus a panunoten a dakeska a tao ken di maikari nga agbalin a Kristiano. Total, bigbigen ti Biblia a makagargari unay ti lubong​—uray iti maysa a tao nga agtarigagay a mangay-ayo iti Dios.​—2 Timoteo 4:10.

3. (a) Apay a kinamaag ti panangtarigagay kadagiti bambanag iti lubong? (b) Kasano a dineskribir ti maysa a Kristiano ti kinaubbaw dagiti nailubongan a kalat?

³ Ita, sukimatem a naimbag, kas iti panangsukimatmo iti kawes a kayatmo a gatangen. Saludsodem iti bagim, ‘Ania ti kalidad ti tela ken pannakadaitna, no an-anagen, daytoy sistema ti bambanag?’ Kuna ti Biblia a “ti lubong aglabas.” (1 Juan 2:17) Temporario laeng ti aniaman a ragsak a magun-odmo uray iti sidong ti kasayaatan a kasasaad. Maysa pay, serioso dagiti ibunga ti dakes a kondukta. Saanmo a laglag-anen dagita. Maysa a Kristiano, a nangandur iti inawaganna kas “dagiti saem nga inyeg ti di umiso a panangusar iti kinaagtutubo,” ti nagkuna: “Agparang a makapagagar ken makaay-ayo ti lubong. Ken kayat ti lubong a patiem a di mangyeg iti didigra dagiti ragragsakna. Ngem nalawag nga imposible dayta. Gundawayannaka ti lubong, ket inton malpasnaka nga usaren, ibellengnakanto.”a Apay a sayangem ti kinaagtutubom iti awan serserbina a wagas ti panagbiag?

Pannakasalaknib Manipud “iti Daydiay Nadangkes”

4, 5. (a) Sakbay unay ti ipapatayna, ania ti kiniddaw ni Jesus iti kararagna ken ni Jehova? (b) Apay a maiparbeng daytoy a kiddaw?

⁴ Gapu ta nabigbigda nga awan ti natalged a maitukon daytoy a lubong, ikagkagumaan dagiti agtutubo a Saksi ni Jehova a liklikan ti makigayyem iti daytoy a lubong. (Santiago 4:4) Maysaka kadi kadagitoy a matalek nga agtutubo? No wen, komendarandaka. Pudno, saan a nalaka a sarangten ti impluensia ti sabali a tattao ken ti agbalin a naiduma, ngem adda makatulong kenka.

⁵ Sakbay unay ti ipapatayna, inkararag ni Jesus nga ‘aywanan’ ni Jehova dagiti adalanna “gapu iti daydiay nadangkes.” (Juan 17:15) Adda naimbag a rason no apay a kiniddaw daytoy ni Jesus. Ammona a saan a nalaka ti agbalin a natarnaw para kadagiti pasurotna, aniaman ti edadda. Apay? Binigbig ni Jesus a maipasango dagiti adalanna iti maysa a nabileg, di makita a kabusor​—“daydiay nadangkes,” ni Satanas a Diablo. Kuna ti Biblia a daytoy dakes nga espiritu a parsua ket “agsursursor a kasla leon a ngumerngernger, nga agsapsapul iti alun-onenna.”​—1 Pedro 5:8.

6. Kasanotayo nga ammo nga awanan iti asi ni Satanas kadagiti agtutubo?

⁶ Iti intero a historia, sadistiko a pagragsakan ni Satanas nga iyeg ti kaulpitan a pammarigat kadagiti tattao. Panunotem dagiti nakaal-alinggaget a didigra nga inyeg ni Satanas ken ni Job ken iti pamiliana. (Job 1:13-19; 2:7) Nalabit malagipmo pay dagiti pasamak a naipadamag iti panawenmo a mangpaneknek iti kinaranggas ni Satanas. Agsursursor ti Diablo, ket gapu iti tarigagayna a mangalun-on, awan ti pakawanenna nga agtutubo. Kas pagarigan, idi rugrugi ti umuna a siglo K.P., ginandat ni Herodes a papatayen ti amin a lallaki nga agtawen iti dua wenno ub-ubing pay idiay Betlehem. (Mateo 2:16) Agparang a ni Satanas ti nangisungsong ken ni Herodes​—daytoy ti pamay-an a mapapatayna ti ubing nga inkari ti Dios nga agbalinto a Mesias ken mangiwayat iti panangukom ti Dios ken ni Satanas! (Genesis 3:15) Nalawag nga awanan iti asi ni Satanas kadagiti agtutubo. Ti kakaisuna a panggepna isu ti panangalun-onna iti adu a tattao agingga iti kabaelanna. Nangnangruna a pudno daytoy ita, ta naitapuaken ni Satanas ditoy daga manipud langit, “nga addaan iti dakkel nga unget, yantangay ammona nga ababan ti periodo ti tiempona.”​—Apocalipsis 12:9, 12.

7. (a) Kasano a naiduma unay ni Jehova ken ni Satanas? (b) Ania ti kayat ni Jehova no maipapan iti panangtagiragsakmo iti biag?

⁷ Saan a kas ken ni Satanas, nga addaan iti “dakkel nga unget,” ni Jehova ket addaan iti “nadungngo a panangngaasi.” (Lucas 1:78) Isu ti mismo nga anag ti ayat. Kinapudnona, kasta unay ti panangiparangarang ti Namarsua kadatayo iti daytoy naindaklan a galad isu a kunaen ti Biblia: “Ti Dios ket ayat.” (1 Juan 4:8) Anian a nagduma ti dios daytoy sistema ti bambanag ken ti Dios a pribilehiom a pagdayawan! No ikagkagumaan ni Satanas ti mangalon-on, ni Jehova “saanna a tarigagayan a madadael ti asinoman.” (2 Pedro 3:9) Matmatanna a napateg ti tunggal biag dagiti tattao​—agraman ti biagmo. No paregtaennaka ni Jehova babaen ti Saona a dika makipaset iti lubong, saanna nga ipapaidam kenka ti naragsak a biag wenno kedkedngan ti wayawayam. (Juan 15:19) Iti kasumbangirna, bambantayannaka gapu iti daydiay nadangkes. Nasaysayaat nga amang ti panggep ti nailangitan nga Amam para kenka ngem kadagiti aglabas a ragragsak daytoy a lubong. Kayatna a masagrapmo “ti pudpudno a biag”​—ti biag nga agnanayon iti paraiso a daga. (1 Timoteo 6:17-19) Kayat ni Jehova nga agballigika, ket idagdagadagna kenka dayta a kalat. (1 Timoteo 2:4) Maysa pay, adda naisangsangayan nga iyaw-awis kenka ni Jehova. Ania dayta?

“Pagrag-oem ti Pusok”

8, 9. (a) Ania a sagut ti mabalinmo nga ited ken ni Jehova? (b) Kasano a ni Satanas um-umsienna ni Jehova, kas nayilustrar iti napasamak ken ni Job?

⁸ Adda kadin ginatangmo a regalo para iti nasinged a gayyemmo ket nakitam iti rupana no kasano a nasorpresa ken inapresiarna apaman a naawatna dayta? Mabalin a pinanunotmo a naimbag no ania a regalo ti ad-adda a maibagay iti dayta a tao. Ita, usigem daytoy a saludsod: Ania a sagut ti maitedmo iti Namarsua kenka, ni Jehova a Dios? No damo, kasla nakakatkatawa dayta a kapanunotan. Ania koma ti kasapulan ti Mannakabalin-amin manipud iti maysa laeng a tao? Ania koma ti maitedmo nga awan kenkuana? Sumungbat ti Biblia iti Proverbio 27:11: “Agmasiribka, anakko, ket pagrag-oem ti pusok, tapno makaipaayak iti sungbat iti daydiay mangrurrurod kaniak.”

⁹ Naammuam manipud iti panagadalmo iti Biblia a ni Satanas a Diablo um-umsienna ni Jehova. Kunana nga agserserbi kano ti tattao iti Dios, saan a gapu iti ayat, no di ket gapu iti inaagum a motibo. Sigun ken ni Satanas, sigurado a tallikudan dagiti tattao ti pudno a panagdayaw no palubosan ti Dios nga agsagabada iti rigat. Usigem, kas pagarigan, ti kinuna ni Satanas ken ni Jehova maipapan iti nalinteg a tao a ni Job: “Saan aya a sika nangikabilka iti alad iti aglikmutna ken iti aglikmut ti balayna ken iti aglikmut ti tunggal banag nga adda kenkuana iti intero nga aglawlaw? Ti aramid dagiti imana binendisionam, ket dagiti met laeng dinguenna nagwaras a sisasaknap iti daga. Ngem, kas pamaliwan, iyunnatmo ta imam, pangngaasim, ket sagidem ti isuamin nga adda kenkuana ket kitaem no saannakanto nga ilunod ita mismo a rupam.”​—Job 1:10, 11.

10. (a) Kasano nga ammotayo a saan laeng a ti kinatarnaw ni Job ti pinagduaduaan ni Satanas? (b) Kasano a nairamanka iti isyu ti kinasoberano?

¹⁰ Kas naipalgak iti salaysay ti Biblia, pinagduaduaan ni Satanas saan laeng a ti kinasungdo ni Job no di pay ket ti kinasungdo ti amin nga agserserbi iti Dios​—a pakairamanam. Kinapudnona, idi tinukoyna ti sangatauan, kinuna ni Satanas ken ni Jehova: “Isuamin nga adda iti maysa a tao [saan la a ni Job no di ket siasinoman] itednanto maigapu iti kararuana.” (Job 2:4) Makitam kadi ti pasetmo iti daytoy napateg nga isyu? Kas ipamatmat ti Proverbio 27:11, ibagbaga ni Jehova nga adda maitedmo kenkuana​—maysa a pakaibatayan ti sungbatna iti daydiay mangum-umsi kenkuana, ni Satanas. Rabakem​—aw-awisennaka ti Sapasap a Soberano tapno makiramanka iti panangsungbat iti kadakkelan nga isyu iti intero a historia. Anian a nagsayaat a responsabilidad ken pribilehio ti naipasango kenka! Maaramidmo kadi ti kidkiddawen ni Jehova kenka? Nabaelan dayta ni Job. (Job 2:9, 10) Kasta met ken ni Jesus ken ti di mabilang a tattao iti intero a historia, agraman ti adu nga agtutubo. (Filipos 2:8; Apocalipsis 6:9) Maaramidmo met dayta. Ngem laglagipem a saan a mabalin a neutral ti takdermo iti daytoy a banag. Babaen ti tigtignaymo, maipakitam no ti supsuportaram ket ti panangumsi ni Satanas wenno ti sungbat ni Jehova. Ania ti piliem nga itandudo?

Ipatpategnaka ni Jehova!

11, 12. Adda kadi epektona ken ni Jehova no piliem ti agserbi kenkuana wenno saan? Ilawlawagmo.

¹¹ Napateg kadi ken ni Jehova no ania ti piliem? Saan kadi nga umdasen dagiti tattao a nagtalinaed a matalek kenkuana tapno maipaay ti naan-anay a sungbat ken ni Satanas? Pudno, kuna ti Diablo nga awan ti uray maysa nga agserbi ken ni Jehova a maigapu iti ayat, ngem napaneknekanen nga ulbod. Kaskasdi, kayat ni Jehova a dumasigka kenkuana iti isyu ti kinasoberano gapu ta ipatpategnaka kas indibidual. Kinuna ni Jesus: “Di matarigagayan a banag ken ni Amak nga adda sadi langit a mapukaw ti maysa kadagitoy a babassit.”​—Mateo 18:14.

¹² Nalawag nga interesado ni Jehova iti piliem a dasig. Malaksid iti dayta, adda epektona kenkuana. Nalawag ti kuna ti Biblia a dakkel ti epektona iti rikna ni Jehova ti naimbag wenno dakes a tignay dagiti tattao. Kas pagarigan, idi maulit-ulit a nagrebelde dagiti Israelita, ‘nasaktan’ ni Jehova. (Salmo 78:40, 41) Sakbay ti Delubio idi kaaldawan ni Noe, idi a “ti kinadakes ti tao naruay,” ‘nasaktan ti puso’ ni Jehova. (Genesis 6:5, 6) Usigem ti kaipapanan daytoy. No surotem ti dakes a dana, masaktam ti rikna ti Namarsua kenka. Saan a kayat a sawen daytoy a nakapuy wenno emosional unay ti Dios. Imbes ketdi, ay-ayatennaka ken maseknan iti pagimbagam. Iti sabali a bangir, no aramidem ti umiso, maragsakan ti puso ni Jehova. Maragsakan saan laeng a gapu ta adda pangsungbatna ken ni Satanas no di pay ket agbalin itan a Mananggunggona kenka. Ket dayta ti kayatna nga aramiden. (Hebreo 11:6) Anian a managayat nga Ama ni Jehova a Dios!

Dagiti Nabaknang a Gunggona Ita

13. Kasano a mangyeg kadagiti bendision ita ti panagserbi ken ni Jehova?

¹³ Saan laeng nga iti masanguanan a masagrap dagiti bendision nga iyeg ti panagserbi ken ni Jehova. Adu nga agtutubo kadagiti Saksi ni Jehova ti nagunggonaan iti rag-o ken pannakapnek uray itan, ken nainrasonan dayta. “Dagiti bilin manipud ken Jehova nalintegda, mamagrag-o iti puso,” insurat ti salmista. (Salmo 19:8) Ni Jehova, saan a ti tao, ti makaammo no ania ti kasayaatan para kadatayo. Babaen ken propeta Isaias, kinuna ni Jehova: “Siak, ni Jehova, ti Diosmo, Daydiay mangisursuro kenka tapno magunggonaam ti bagim, Daydiay mangpappapagna kenka iti dalan a rebbeng a pagnaam. O no koma laeng pudno nga ipangagmo dagiti bilinko! Iti kasta ti talnam agbalin a kas iti maysa a karayan, ket ti kinalintegmo kas kadagiti dalluyon ti baybay.”​—Isaias 48:17, 18.

14. Kasano a matulongannaka dagiti prinsipio ti Biblia a mangliklik kadagiti ut-ot nga iyeg ti utang?

¹⁴ Ti panangitunosmo iti biagmo kadagiti prinsipio ti Biblia tulongannaka a mangliklik kadagiti adu nga ut-ot ken saem. Kas pagarigan, kuna ti Biblia a dagidiay agayat iti kuarta “sinalputda ti intero a bagbagida iti adu nga ut-ot.” (1 Timoteo 6:9, 10) Adda kadi asinoman kadagiti kapatadam ti nakapasar iti napait a kinapudno daytoy a teksto? Addada agtutubo a lallaki ken babbai a naigamer iti utang gapu laeng ta kayatda ti maaddaan kadagiti kabaruan a nangina a kawes ken uso nga alikamen. Maysa a kita ti naut-ot a pannakaadipen ti mailumlom iti napaut, nangato ti interesna nga utang para kadagiti bambanag a talaga a dimo kabaelan a gun-oden!​—Proverbio 22:7.

15. Kadagiti ania a wagas a salaknibannaka dagiti prinsipio ti Biblia manipud iti ut-ot nga iyeg ti seksual nga imoralidad?

¹⁵ Usigem met ti seksual nga imoralidad. Iti intero a lubong iti kada tawen, di mabilang nga awanan iti asawa a tin-edyer ti masiksikogan. Dadduma ti mangipasngay iti ubing a dida kayat wenno dida kabaelan a padakkelen. Agparegreg ti dadduma ken sagabaenda ti matutuok a konsiensia. Adda met dagidiay agtutubo a lallaki ken babbai a naakaran iti sakit babaen ti sekso, kas iti AIDS. Siempre, iti daydiay makaam-ammo ken ni Jehova, ti kasaeman a sagabaenna isu ti pannakadadael ti relasionna ken ni Jehova.b (Galacia 5:19-21) Adda nasayaat a rason ti Biblia idi kinunana: “Adaywanyo ti pannakiabig.”​—1 Corinto 6:18.

Panagserbi iti “Naragsak a Dios”

16. (a) Kasanotayo nga ammo a kayat ni Jehova a tagiragsakem ti kinaagtutubom? (b) Apay a nangipasdek ni Jehova kadagiti pagalagadan nga annurotem?

¹⁶ Deskribiren ti Biblia ni Jehova kas “ti naragsak a Dios.” (1 Timoteo 1:11) Kayatna met a naragsakka. Kinapudnona, kuna ti mismo a Saona: “Ganasenyo ti kinaagtutuboyo. Agragsakkayo bayat ti kinaubingyo.” (Eclesiastes 11:9, Naimbag a Damag Biblia) Ngem makita ni Jehova no ania ti mapasamak iti masanguanan ken ammona no ania ti agpaut a resulta agpadpada ti naimbag ken ti dakes nga aramid. Dayta ti makagapu a balakadannaka: “Lagipem, itan, ti Naindaklan a Namarsuam kadagiti aldaw ti kinaagtutubom, sakbay nga umay dagiti makadidigra nga aldaw, wenno dimtengen dagiti tawen inton kunaem: ‘Awan pakaragsakak kadakuada.’”​—Eclesiastes 12:1.

17, 18. Kasano nga inyebkas ti maysa nga agtutubo a Kristiano ti ragsakna nga agserserbi ken ni Jehova, ket kasano a masagrapmo ti kasta met la a rag-o?

¹⁷ Ita, adu nga agtutubo ti nakasarak iti dakkel a ragsak iti panagserbi ken ni Jehova. Kas pagarigan, kuna ti agtawen iti 15 a ni Lina: “Diak mabain. Nasalun-atak gapu ta diak agsigarilio ken agdroga. Adda napateg a panangiwanwan nga ipapaay kaniak ti kongregasion a tumulong a mangsaranget iti nakaro nga impluensia ni Satanas. Naragsak ti rupak gapu iti makapabileg a timpuyog a masarakan iti Kingdom Hall. Kangrunaan iti amin, addaanak iti kasayaatan a namnama nga agbiag nga agnanayon ditoy daga.”

¹⁸ Kas ken Lina, adu a Kristiano nga agtutubo ti sipipinget a makidangdangadang agpaay iti pammati, ket mangyeg daytoy iti rag-o kadakuada. Mabigbigda a ti biagda​—nupay narigat no dadduma​—ket addaan iti pudpudno a panggep ken masakbayan. Itultuloymo ngarud ti agserbi iti Dios a pudpudno a maseknan no ania ti kasayaatan para kenka. Paragsakem ti pusona, ket paragsakennaka ita ken iti agnanayon!​—Salmo 5:11.

[Footnotes]

Malagipmo Pay?

• Ania a peggad ti ipaspasango kenka “daydiay nadangkes,” ni Satanas?

• Kasano a maparagsakmo ti puso ni Jehova?

• Kasano nga ipakita ti Biblia nga ipatpategnaka ni Jehova?

• Ania ti sumagmamano a bendision nga itden ti panagserbi ken ni Jehova?

[Kahon/Ladawan iti panid 13]

Gistay Naisagmak ti Maysa a Nalinteg a Tao

Ni Asaf ket maysa a prominente a Levita a tumutokar iti templo ni Jehova iti nagkauna nga Israel. Nangputar pay ketdi kadagiti kanta a nausar iti publiko a panagdayaw. Ngem iti laksid ti naisangsangayan a pribilehiona, naminsan nga inapalanna ti di nadiosan a kondukta dagiti kapatadanna, a kasla dida agikaro uray labsingenda dagiti linteg ti Dios. “Gistay simiasi dagiti sakak, nganngani naikaglis dagiti addangko,” inamin idi agangay ni Asaf. “Nagbalinak a naapal kadagiti managpasindayag, no makitak ti mismo a talna dagiti nadangkes a tattao.”​—Salmo 73:2, 3.

Idi agangay, napan ni Asaf iti santuario ti Dios ket inkararagna dayta a banag. Buyogen ti napabaro a naespirituan a panangmatmat, natarusanna a kagura ni Jehova ti kinadakes ken inton agangay, agpadpada nga apiten dagiti nadangkes ken dagiti nalinteg ti immulada. (Salmo 73:17-20; Galacia 6:7, 8) Pudno a dagiti nadangkes addada iti nagalis a pagsaadan. Ti ultimona, mapasarandanto ti pannakatnag inton dadaelen ni Jehova daytoy dakes a sistema.​—Apocalipsis 21:8.

[Dagiti Ladawan iti panid 15]

Maseknan ni Jehova no ania ti kasayaatan para kenka, idinto ta kayat ni Satanas nga alun-onennaka

[Ladawan iti panid 16]

Adu nga agtutubo ti nangsagrap iti kadakkelan a ragsak babaen ti panagserbida ken ni Jehova a kadua dagiti pada a Kristiano