“Maipakaammo Koma Dagiti Dawatyo iti Dios”
“Iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios.”—FILIPOS 4:6.
1. Siasino ti pribilehiotayo a makasarita, ken apay a nagsayaat dayta?
NO KIDDAWEM a makasaritam ti agturay iti pagilianyo, ania ti manamnamam a sungbat? Nalabit a mangted iti nadayaw a subalit ti opisinana, ngem dakkel ti posibilidadna a saandaka a patgan a makisarita iti mismo nga agturay. Ngem saan a kasta ti katan-okan nga Agturay iti amin, ni Jehova a Dios, ti Soberano iti uniberso. Mabalintayo ti makisarita kenkuana iti sadinoman ken iti kaanoman a pilientayo. Kanayon a makadanon kenkuana dagiti makaay-ayo a kararag. (Proverbio 15:29) Nagsayaat la ketdi dayta! No talaga nga apresiarentayo dayta, saantay kadi a matignay a kanayon nga agkararag iti Daydiay maitutop a maawagan iti “Managdengngeg iti kararag”?―Salmo 65:2.
2. Ania ti napateg tapno ipangag ti Dios dagiti kararagtayo?
2 Ngem mabalin nga adda mangyimtuod, ‘Ania dagiti kararag nga ipangag ti Dios?’ Ibaga ti Biblia ti maysa a banag a kasapulan tapno maipangag dagiti kararagtayo: “No awan ti pammati isu di mabalin nga ay-aywen a naan-anay, ta ti umadani iti Dios masapul a patienna nga isu adda ken isu agbalin a mananggunggona kadagidiay sipapasnek a mangsapsapul kenkuana.” (Hebreo 11:6) Wen, kas nailawlawag iti immuna nga artikulo, kasapulan ti pammati tapno makaadanitayo iti Dios. Sidadaan ti Dios a mangipangag kadagiti kararag dagidiay umadani kenkuana, ngem masapul nga aramidenda dayta buyogen ti pammati ken umiso nga ar-aramid, agraman ti kinapasnek ken umiso a kababalin ti puso.
3. (a) Maibatay kadagiti kararag dagiti matalek nga adipen idi ugma, ania dagiti mabalin nga iyebkas kadagiti ikararag? (b) Ania dagiti nagduduma a kita ti kararag?
3 Indagadag ni apostol Pablo kadagiti Kristiano idi kaaldawanna: “Dikay maringgoran iti aniaman, no di ket iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios.” (Filipos 4:6, 7) Naglaon ti Biblia iti nagadu a pagarigan maipapan kadagidiay nangikararag kadagiti pakaseknanda iti Dios. Karaman kadagita da Anna, Elias, Ezekias, ken Daniel. (1 Samuel 2:1-10; 1 Ar-ari 18:36, 37; 2 Ar-ari 19:15-19; Daniel 9:3-21) Nasken a tuladentayo ti ulidanda. Siputanyo met ta ipakita ti sasao ni Pablo a mabalin a nagduduma ti kita ti kararag. Dinakamatna ti panagyaman, ti kararag a pangyebkasantayo iti apresasiontayo kadagiti inaramid ti Dios agpaay kadatayo. Mabalin a napakuyogan dayta iti panangidaydayaw. Ti araraw tukoyenna ti napakumbaba, napasnek a panagpakaasi. Mabalintayo met nga ipakaammo dagiti dawat wenno kiddawtayo no adda espesipiko a banag a kasapulantayo. (Lucas 11:2, 3) Maragsakan ti nailangitan nga Amatayo a mangipangag iti kararagtayo iti aniaman kadagita a wagas.
4. Nupay ammo ni Jehova dagiti kasapulantayo, apay a masapul nga ipakaammotayo latta kenkuana dagiti dawattayo?
4 Mabalin nga iyimtuod ti dadduma, ‘Saan kadi nga ammon ni Jehova ti amin a kasapulantayo?’ Wen, ammona. (Mateo 6:8, 32) Apay ngarud a kayatna pay laeng nga ipakaammotayo kenkuana dagiti dawattayo? Usigenyo daytoy a pagarigan: Maysa a makinkukua iti tiendaan ti nalabit a mangitukon iti sagut kadagiti kostumerna. Ngem tapno maalada ti sagut, masapul a mapan kenkuana dagiti kostumer ket kiddawenda dayta. Dagidiay saan a sidadaan a mangaramid iti dayta ket mangipakita a saanda a talaga nga apresiaren ti sagut. Umasping iti dayta, ti ditay panangyebkas kadagiti dawattayo babaen ti kararag ket panangipakita a ditay apresiaren ti ipapaay ni Jehova. Kinuna ni Jesus: “Dumawatkayo ket umawatkayto.” (Juan 16:24) No aramidentayo dayta, ipakpakitatayo nga agtalektayo iti Dios.
Kasano ti Rumbeng nga Iyaadanitayo iti Dios?
5. Apay a masapul nga agkararagtayo babaen ti nagan ni Jesus?
5 Saan a nangipasdek ni Jehova iti nagadu a nainget a pagannurotan no kasano ti agkararag. Kaskasdi, masapul a sursuruentayo ti umiso nga iyaadani iti Dios, a nailawlawag iti Biblia. Kas pagarigan, insuro ni Jesus kadagiti pasurotna: “No dumawatkayo iti Ama iti aniaman a banag itednanto dayta kadakayo iti naganko.” (Juan 16:23) Gapuna, masapul nga agkararagtayo babaen ti nagan ni Jesus, a bigbigentayo a ni Jesus laeng ti kakaisuna a pamay-an nga iburay ti Dios dagiti bendisionna iti intero a sangatauan.
6. Ania ti nasken a posisiontayo no agkararagtayo?
6 Ania ti nasken a posisiontayo no agkararagtayo? Awan ti partikular a posision a dinakamat ti Biblia tapno maipangag ti kararagtayo. (1 Ar-ari 8:22; Nehemias 8:6; Marcos 11:25; Lucas 22:41) Ti napateg ket agkararagtayo iti Dios buyogen ti kinapasnek ken umiso a kababalin ti puso.―Joel 2:12, 13.
7. (a) Ania ti kayat a sawen ti “amen”? (b) Kasano ti umiso a pannakausarna kadagiti kararag?
7 Komusta met ngay ti panangusar iti sao nga “amen”? Ipamatmat ti Kasuratan a masansan a maitutop daytoy a sao kas pangserra kadagiti kararagtayo, nangnangruna no agkararagtayo iti publiko. (Salmo 72:19; 89:52) Ti Hebreo a sao nga ʼa·menʹ ket addaan iti kaipapanan a “sigurado.” Sigun iti Cyclopedia da McClintock ken Strong, ti panangibaga iti “Amen” iti ngudo dagiti kararag ket “panangpasingked kadagiti immun-una a naibaga, ken panangidawat a matungpal koma dagita.” Gapuna, no ingudo ti maysa ti kararagna babaen ti napasnek nga “Amen,” ipakpakitana a nasged ti riknana maipapan kadagiti kalkalpasna nga inyebkas. No ti maysa a Kristiano a mangidaulo iti kararag iti kongregasion ket agngudo iti daytoy nga ebkas, dagidiay agdengdengngeg ti mabalin met a mangikuna iti “Amen” iti pusoda wenno iti wagas a mangngeg kas panangipakita nga umanamongda iti kalkalpas a nayebkas.―1 Corinto 14:16.
8. Kasano a mabalin nga umarngi dagiti kararagtayo kadagiti kararag ni Jacob wenno ni Abraham, ken ania ti ipakitana maipapan kadatayo?
8 Adda dagiti gundaway nga ipalubos ti Dios nga ipakitatayo no kasanotayo kapasnek kadagiti bambanag nga ikarkararagtayo. Nalabit a kasapulan nga agbalintayo a kas ken Jacob idi ugma, a nakigubal nga agpatnag iti maysa nga anghel tapno magun-odna ti maysa a bendision. (Genesis 32:24-26) Wenno adda dagiti kasasaad a masapul a tuladentayo ni Abraham, a maulit-ulit a nagpakaasi ken ni Jehova maigapu ken ni Lot ken iti asinoman a nalinteg a tao nga agnanaed idiay Sodoma. (Genesis 18:22-33) Nalabit a kasta met ti aramidentayo a panagpakaasi maipapan kadagiti bambanag a napateg kadatayo, nga umararawtayo maibatay iti kinahustisia ken naayat a kinamanangngaasina.
Ania ti Mabalintayo a Kiddawen?
9. Ania ti kangrunaan koma a pakaseknantayo no agkarkararagtayo?
9 Lagipenyo ti kinuna ni Pablo: “Iti amin a banag . . . maipakaammo koma dagiti dawatyo iti Dios.” (Filipos 4:6) Gapuna, dagiti personal a kararag mabalin a mainaigda iti dandani amin a pakaseknan iti biag. Ngem ti rumbeng nga umuna a pakaseknan dagiti kararagtayo ket agpaay koma kadagiti interes ni Jehova. Nangipasdek ni Daniel iti nasayaat nga ulidan maipapan iti dayta. Idi nagsagaba iti pannusa ti Israel gapu kadagiti basolna, inkararag ni Daniel a mangipakita koma ni Jehova iti asi, idi a kinunana: ‘Dika agtaktak, maipagapu kenka met laeng, O Diosko, maipagapu iti bukodmo a nagan.’ (Daniel 9:15-19) Umasping iti dayta, ipakita kadi dagiti kararagtayo a ti pannakasantipikar ti nagan ni Jehova ken ti pannakatungpal ti pagayatanna ti kangrunaan a pakaseknantayo?
10. Kasanotayo nga ammo a maitutop nga ikararag dagiti personal a pakaseknan?
10 Nupay kasta, maitutop met ti agkiddaw maipapan kadagiti personal a pakaseknantayo. Kas pagarigan, kas inaramid ti salmista, mabalin nga ikararagtayo ti naun-uneg a naespirituan a pannakaawat. Inkararagna: “Ikkannak iti pannakaawat, tapno matungpalko ti lintegmo ken tapno masalimetmetak dayta buyogen ti isuamin a puso.” (Salmo 119:33, 34; Colosas 1:9, 10) “Nangidaton ni [Jesus] kadagiti araraw ken kasta met kadagiti dawat iti Daydiay a makabalin a mangisalakan kenkuana iti ipapatay.” (Hebreo 5:7) Iti panangaramidna iti dayta, impakita ni Jesus a nainsiriban ti agkiddaw iti bileg no maipasangotayo iti peggad wenno pakasuotan. Idi insurona ti modelo a kararag kadagiti adalanna, inraman ni Jesus dagiti bambanag a personal a pakaseknan ti tao, kas iti panangpakawan kadagiti basol ken pananggun-od iti inaldaw a taraon.
11. Kasano a matulongannatayo ti kararag a di tumulok kadagiti sulisog?
11 Iti dayta a modelo a kararag, inraman ni Jesus daytoy a kiddaw: “Saannakami nga iyeg iti pannakasulisog, no di ket ispalennakami iti daydiay nadangkes.” (Mateo 6:9-13) Idi agangay, imbalakadna: “Agtultuloykayo nga agbantay ken agkararagkayo nga agpatpatuloy, tapno saankayo a sumrek iti pannakasulisog.” (Mateo 26:41) Napateg ti kararag no maipasangotayo iti pannulisog. Nalabit a magargaritayo a mangyaleng-aleng kadagiti prinsipio ti Biblia no addatayo iti pagtrabahuan wenno eskuelaan. Mabalin nga awisendatayo dagiti saan a Saksi tapno makipasettayo kadagiti aktibidad a saan a maitutop kadagiti Kristiano. Nalabit a kiddawenda nga aramidentayo ti maysa a banag a maisalungasing kadagiti nalinteg a prinsipio. Kadagiti kasta a gundaway, nasken nga ipangagtayo ti balakad ni Kristo nga agkararagtayo―sakbay ken no agdama a maipaspasangotayo iti sulisog―a kiddawentayo iti Dios a tulongannatayo tapno ditay tumulok iti sulisog.
12. Ania dagiti pakaringgorantayo a mabalin a mangtignay kadatayo nga agkararag, ken ania ti manamnamatayo ken ni Jehova?
12 Nadumaduma a rigat ken pakaringgoran ti sumangbay iti biag dagiti adipen ti Dios ita. Ti sakit ken pannakabannog ti isip ket kangrunaan a pakaigapuan ti pannakaringgor ti adu a tattao. Makapaksuy ti biag gapu kadagiti naranggas a kasasaad iti aglawlawtayo. Dagiti parikut iti ekonomia pagbalinenda a narigat ti agbirok iti pagbiag. Anian a makaliwliwa a maammuan nga ipangag ni Jehova dagiti adipenna a mangyuman kenkuana kadagitoy a banag! Kuna ti Salmo 102:17 maipapan ken ni Jehova: “Sigurado a bumaw-ingto iti kararag dagidiay nauksoban iti isuamin, ket saanna nga umsien ti kararagda.”
13. (a) Ania dagiti personal a banag a maitutop nga ikararag? (b) Mangisalaysay iti pagarigan ti kasta a kararag.
13 Kinapudnona, maitutop nga ikararag ti aniaman a banag a mangapektar iti panagserbitayo ken ni Jehova wenno iti relasiontayo kenkuana. (1 Juan 5:14) No adda dagiti desisionanyo maipapan iti pannakiasawa wenno trabaho wenno iti panangpalawa iti ministerioyo, dikay koma agpangadua a mangyuman iti dayta ken ni Jehova, a kiddawenyo ti panangiwanwanna. Kas pagarigan, maysa nga agkabannuag a babai iti Pilipinas ti agtarigagay a makipaset iti amin-tiempo a ministerio. Ngem awan ti trabahona a pangsuportana iti bagina. Kunana: “Iti maysa a Sabado, espesipiko nga inkararagko ken ni Jehova ti maipapan iti tarigagayko nga agpayunir. Iti dayta met laeng nga aldaw, bayat ti panangasabak, intukonko ti maysa a libro iti maysa a tin-edyer. Pagam-ammuan, kinuna ti balasitang: ‘Inton Lunes ti bigat, sapsapaem ti mapan idiay eskuelaanmi.’ Dinamagko no apay. Inlawlawagna nga adda naganat a bakante a trabaho. Napanak, ket dagus nga inawatdak. Nagpartak dagiti pasamak.” Adu a Saksi iti intero a lubong ti addaan iti kasta nga umasping a kapadasan. Gapuna, dikay koma agpangadua a mangikararag iti Dios dagiti naimpusuan a dawatyo!
No Ngay Nakabasoltayo?
14, 15. (a) Apay a saan koma a bumdeng nga agkararag ti maysa a nakabasol? (b) Malaksid iti personal a panagkararag, ania pay ti makatulong iti maysa a tao tapno umimbag manen kalpasan ti panagbasolna?
14 Kasano a makatulong ti kararag iti maysa a nakabasol? Gapu iti bain, agkitakit nga agkararag ti dadduma a nakabasol. Ngem saan a nainsiriban ti kasta a tignay. Kas pangyilustrar: Ammo dagiti piloto iti eroplano a no maitawtawda, mabalinda ti agpatulong kadagidiay mangimatmaton iti trapiko iti tangatang. Ngem kasano ngay no agkedked nga agpatulong ti maysa a piloto gapu ta mabain iti pannakaitawtawna? Mabalin nga agturong dayta iti didigra! Umasping iti dayta, mabalin nga agsagaba iti dakdakkel a pannakadangran no ti maysa a tao a nakabasol ket mabain nga agkararag iti Dios. Saan koma a dayta ti manglapped kenkuana a makisarita ken ni Jehova. Kinapudnona, iyaw-awis ti Dios nga agkararag kenkuana dagidiay nakabasol iti nadagsen. Indagadag ni propeta Isaias kadagiti managbasol idi kaaldawanna nga umawagda ken ni Jehova, “ta dakkelto ti pammakawanna.” (Isaias 55:6, 7) Siempre, sakbay a ‘mapaluknengna ti rupa ni Jehova,’ masapul nga agpakumbaba nga umuna ti maysa, a tallikudanna ti managbasol a danana, ken sipapasnek nga agbabawi.—Salmo 119:58; Daniel 9:13.
15 Adda sabali pay a rason no apay a napateg ti kararag iti kaso ti maysa a nakabasol. Dinakamat ni adalan a Santiago ti maipapan iti maysa nga agkasapulan iti naespirituan a tulong: “Ayabanna koma dagiti lallakay iti kongregasion, ket ikararaganda koma, . . . ket isu ibangonto ni Jehova.” (Santiago 5:14, 15) Wen, nasken a personal nga ipudno ti maysa ti basolna ken ni Jehova babaen ti kararag, ngem mabalinna met ti agpatulong kadagiti papanglakayen tapno ikararaganda. Dayta ti tumulong kenkuana nga umimbag manen iti naespirituan.
Sungbat Kadagiti Kararag
16, 17. (a) Kasano ti panangsungbat ni Jehova kadagiti kararag? (b) Aniada a kapadasan ti mangyilustrar a dakkel ti maaramidan ti kararag iti trabaho a panangasaba?
16 Kasano ti pannakasungbat dagiti kararag? Adda dagidiay nalabit a masungbatan a dagus ken nabatad. (2 Ar-ari 20:1-6) Dadduma ti medio mabayag a masungbatan, ken nalabit a saan a nakakadkadlaw. Kas ipakita ti ilustrasion ni Jesus maipapan iti balo a nagsublisubli iti saklang ti ukom, mabalin a kasapulan ti naynay a panangikararag iti maysa a banag. (Lucas 18:1-8) Nupay kasta, masiguradotayo a no agkararagtayo maitunos iti pagayatan ti Dios, saan a pulos nga ibaga kadatayo ni Jehova: “Sumardengka a mangrirriribuk kaniak.”—Lucas 11:5-9.
17 Adun ti nakita dagiti adipen ni Jehova a nasungbatan a kararagda. Masansan a nabatad dayta iti tay-ak ti ministeriotayo. Kas pagarigan, dua a kabsat a babbai iti Pilipinas ti mangipapaima kadagiti literatura ti Biblia iti maysa a nasulinek a lugar iti pagilian. Idi pinaimaanda ti maysa a babai iti polieto, nakalua ti babai. Kinunana: “Idi rabii inkararagko iti Dios a mangibaon koma iti maysa a mangisuro kaniak iti Biblia, ket panagkunak, isu daytoy ti sungbat ti kararagko.” Di nagbayag kalpasanna, nangrugi a makigimong iti Kingdom Hall. Iti sabali a paset ti Abagatan a Daya nga Asia, maysa a kabsat a lalaki ti agpangadua a mangasaba iti dakkel nga apartment a nainget ti pannakaguardiana. Kaskasdi, nagkararag ken ni Jehova, nagurnong iti tured, sa simrek iti patakder. Nagtuktok iti ridaw ti apartment, ket rimmuar ti maysa nga agkabannuag a babai. Idi inlawlawag ti kabsat ti rason ti isasarungkarna, nangrugi nga agsangit ti babai. Kinunana a binirbirokna dagiti Saksi ni Jehova ken inkarkararagna ti tulong a masarakanna koma ida. Siraragsak a tinulongan ti kabsat tapno mabirokanna ti kongregasion dagiti Saksi ni Jehova iti dayta a lugar.
18. (a) No masungbatan dagiti kararagtayo, ania koma ti aramidentayo? (b) Ania ti maipanamnama kadatayo no aprobetsarentayo ti tunggal gundaway nga agkararag?
18 Pudno a nagsayaat a probision ti kararag. Sidadaan ni Jehova nga umimdeng ken mangsungbat kadagiti kararagtayo. (Isaias 30:18, 19) Ngem masapul a nasiputtayo no kasano ti panangsungbat ni Jehova kadagiti kararagtayo yantangay mabalin a saanna a kanayon a sungbatan dayta iti wagas a namnamaentayo. Ket no nadlawtayo ti panangiwanwanna, ditay koma pulos liplipatan ti agyaman ken mangidaydayaw kenkuana. (1 Tesalonica 5:18) Maysa pay, kanayon a laglagipenyo ti balakad ni apostol Pablo: “Iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios.” Wen, aprobetsarenyo ti tunggal gundaway a mabalinyo a makasarita ti Dios. Iti kasta, agtultuloy a mapaneknekanyo a pudno ti kinuna ni Pablo maipapan kadagidiay masungsungbatan ti kararagda: “Ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo.”—Filipos 4:6, 7.
Ania ti Sungbatyo?
• Ania ti nagduduma a kita ti kararag?
• Kasano ti rumbeng a panagkararagtayo?
• Ania dagiti mabalintayo nga ikararag?
• Ania ti maaramidan ti kararag no makabasol ti maysa?
[Dagiti Ladawan iti panid 29]
Ti napasnek a kararag tulongannatayo a di tumulok kadagiti sulisog
[Dagiti Ladawan iti panid 31]
Babaen ti kararag, mayebkastayo iti Dios ti panagyaman, pakaseknan, ken ar-ararawtayo