Salsaludsod Dagiti Agbasbasa
Aniada a kasasaad ti nangituggod ken ni Juda a makidenna iti maysa a babai nga impagarupna a balangkantis, kas nadakamat iti Genesis 38:15, 16?
Kinapudnona, saan a balangkantis ti babai a dinennaan ni Juda, nupay impagarupna a kasta. Kastoy ti napasamak sigun iti Genesis kapitulo 38.
Gapu ta “dakes idi kadagiti mata ni Jehova,” napapatay ti inauna nga anak a lalaki ni Juda a di pulos nakaputot. (Genesis 38:7) Nabalo ti asawana a ni Tamar. Kadagidi a panawen, maan-annurot ti kostumbre ti pannakiasawa iti kayong. Iti daytoy a kostumbre, no matay ti lalaki nga awanan iti putot, ti kabsatna a lalaki masapul a dennaanna ti nabalo nga ipagna tapno addanto ti agtawid. Ngem ni Onan, ti maikadua nga anak a lalaki ni Juda, nagkedked a mangtungpal iti dayta nga obligasionna. Gapuna, pinapatay ti Dios. Pinagawid ni Juda ti manugangna a ni Tamar iti balay ni amana agingga a ni Sela, ti maikatlo nga anak a lalaki ni Juda, ket dumteng iti edad a mabalinna nga asawaen ni Tamar. Ngem iti panaglabas dagiti tawtawen, ni Juda dina nayasawa ni Sela ken ni Tamar. Isu nga idi nabalo ni Juda, impamuspusan ni Tamar a maaddaan iti anak ken ni Juda, ti Israelita a katuganganna. Tapno maibanagna dayta, nagpammarang ni Tamar kas maysa a balangkantis iti templo ket nagtugaw iti ammona a pagdalanan ni Juda.
Gapu ta dina nalasin ni Tamar, dinennaanna. Sitataktika a nagkiddaw ni Tamar kadagiti bambanag ken ni Juda a kasukat ti pannakidennana kenkuana, ket idi agangay, inusarna dagitoy kas pammaneknek nga isu ti nangsikog kenkuana. Idi natakuatan ni Juda ti kinapudno, saanna a pinabasol ni Tamar no di ket sipapakumbaba a kinunana: “Isu nalinlinteg ngem siak, iti rason a diak inted ken Sela nga anakko a lalaki.” Ket sigurado a “saanen a nakidenna kenkuana kalpasan dayta.”—Genesis 38:26.
Saan a husto ti inaramid ni Juda ta dina inyasawa ni Sela ken ni Tamar kas inkarina. Nakidenna pay iti babai nga impagarupna a balangkantis iti templo. Maikaniwas daytoy iti panggep ti Dios a ti lalaki makidenna laeng iti asawana. (Genesis 2:24) Ngem iti kinapudnona, saan a balangkantis ti dinennaanna. Imbes ketdi, di inggagara nga intungpalna ti obligasion ti anakna a ni Sela iti urnos ti pannakiasawa iti kayong. Iti kasta, nagbalin nga ama ti maysa a lehitimo nga anak.
No maipapan ken ni Tamar, saan nga imoral ti inaramidna. Ti singin nga annakna saanda a maibilang nga annak ti pannakikamalala. Idi a ni Boaz a taga Betlehem inasawana ni Ruth a Moabita iti sidong ti urnos ti pannakiasawa iti kayong, nasayaat ti komento dagiti lallakay idiay Betlehem maipapan ken ni Perez nga anak ni Tamar, idi a kinunada ken Boaz: “Ti balaymo agbalin koma a kas iti balay ni Perez, nga impasngay ni Tamar ken Juda, manipud iti putot nga itedto kenka ni Jehova nga aggapu iti daytoy nga agtutubo a babai.” (Ruth 4:12) Naibilang met ni Perez iti listaan dagiti kapuonan ni Jesu-Kristo.—Mateo 1:1-3; Lucas 3:23-33.