No Kasano a Maipakitatayo ti Panagayattayo iti Dios
SAAN laeng a maysa nga akademiko a panagsanay ti panangsukay iti panagayat iti Dios. Kas paneknekan dagiti adipen ti Dios iti intero a lubong, rumayray ti pudno a panagayat iti Dios bayat nga ad-adalen ti personalidadna, ken ad-adda a bumara dayta nga ayat bayat nga umun-uneg ti pannakaammo ti maysa no ania ti kaay-ayo, kagura, ken kalikaguman ti Dios.
Siaayat nga impaay ni Jehova ti Saona, ti Biblia, tapno ipalgakna ti kinasiasinona. Babaen iti dayta, masursurotayo no kasano a tinaming ni Jehova ti nagduduma a kasasaad. No kasano a makaipaay iti dakkel a ragsak ti surat ti maysa nga ing-ingungoten, kasta met ti ragsak nga iyeg kadatayo ti Biblia bayat a masursurotayo dagiti baro nga aspeto ti personalidad ni Jehova.
Ngem no dadduma, kas mapaliiwtayo no mangasabatayo, adda dagidiay saan a matignay a mangayat iti Dios uray no maadalda ti kinasiasinona. Kinuna ni Jesus iti sumagmamano a manangyaleng-aleng a Judio idi kaaldawanna: “Suksukimatenyo dagiti Kasuratan, agsipud ta pagarupenyo a babaen kadakuada maaddaankayto iti agnanayon a biag; . . . ngem pagaammok unay nga awan kadakayo ti ayat iti Dios.” (Juan 5:39, 42) Dadduma ti adu a tawenen a mangad-adal kadagiti naayat nga aramid ni Jehova ngem kaskasdi a parparawpaw ti panagayatda kenkuana. Apay? Dida naawatan ti kaipapanan dagiti maad-adalda. Maisupadi iti dayta, minilion a napasnek a tattao nga iyad-adalantayo iti Biblia ti makarikna nga agtultuloy a rumayrayray ti panagayatda iti Dios. Apay? Gapu ta kas iti inaramidtayo, tinuladda ti ulidan ni Asaf. Iti ania a wagas?
Agmennamenna Buyogen ti Panangipateg
Inkeddeng ni Asaf a sukayen ti panagayatna ken ni Jehova. Insuratna: “Buyogen ti pusok mangipakitaakto iti pannakaseknan . . . Lagipekto ti ar-aramid ni Jah; ta lagipekto ti nakaskasdaaw a gapuanam iti nabayagen a tiempo. Ket pudno unay a mennamennaekto ti isuamin nga aramidmo, ket kadagiti pannakilangenmo maseknanakto.” (Salmo 77:6, 11, 12) Ti maysa a tao rumayray ti panagayatna iti Dios bayat nga ut-utobenna dagiti dalan ni Jehova kas inaramid ti salmista.
Maysa pay, ti pananglagip kadagiti kapadasan a tinagiragsaktayo bayat ti panagserbitayo ken ni Jehova pabilgenna ti relasiontayo kenkuana. Kinuna ni apostol Pablo a ‘katrabahuannatayo’ ti Dios, ket naisangsangayan a panaggayyem ti mabalin a rumusing iti nagbaetan dagiti agkatrabahuan. (1 Corinto 3:9) Apresiaren ni Jehova no iyebkastayo ti panagayattayo kenkuana, ket makaparagsak dayta iti pusona. (Proverbio 27:11) Sa no agpatulongtayo ken ni Jehova ket iwanwannatayo kadagiti narikut a kasasaad, ammotayo a dinatay baybay-an, ket dayta ti mangpauneg iti panagayattayo kenkuana.
Masukay ti panaggayyem ti dua a tao no iyebkasda ti rikriknada iti tunggal maysa. Umasping iti dayta, no ibagatayo ken ni Jehova no apay a dedikadotayo kenkuana, bumileg ti panagayattayo kenkuana. Mayanninawtayo ti sasao ni Jesus: “Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo ken buyogen ti intero a pigsam.” (Marcos 12:30) Ania ti aramidentayo tapno sigurado nga agtultuloy a maayattayo ni Jehova iti amin a puso, kararua, panunot, ken pigsatayo?
Ayatentayo ni Jehova iti Amin a Pusotayo
Dinakamat ti Kasuratan ti piguratibo a puso, ti katatao—dagiti tarigagay, kababalin, ken rikriknatayo. No kasta, ti panagayat ken ni Jehova iti amin a pusotayo kaipapananna a ti kangrunaan a tarigagaytayo isu ti panangay-ayo iti Dios. (Salmo 86:11) Ipakitatayo nga adda kasta nga ayattayo babaen ti panangaramidtayo iti personalidadtayo a makaay-ayo kenkuana. Ikagumaantayo a tuladen ti Dios babaen ti ‘pananggura iti kinadakes ken kumpet iti naimbag.’—Roma 12:9.
Ti panagayattayo iti Dios apektaranna ti panangmatmattayo iti amin a banag. Kas pagarigan, mabalin a makapainteres wenno mangala iti dakkel a panawen ti panggedantayo, ngem dita kadi a nakasentro ti pusotayo? Saan. Gapu ta ay-ayatentayo ni Jehova iti amin a pusotayo, prioridadtayo ti panagbalin a ministro ti Dios. Umasping iti dayta, kayattayo a paragsaken ti nagannak, asawa, ken amotayo, ngem maipakitatayo ti amin-puso a panagayattayo ken ni Jehova no un-unaentayo ti panangay-ayo kenkuana. Total, maiparbeng a ti Dios ti umun-una iti pusotayo.—Mateo 6:24; 10:37.
Ayatentayo ni Jehova iti Amin a Kararuatayo
Iti Kasuratan, ti sao a “kararua” kangrunaan a tukoyenna ti intero a katataotayo agraman ti biag nga ik-ikutantayo. No kasta, ti panagayat ken ni Jehova iti amin a kararuatayo kaipapananna nga usarentayo ti biagtayo a mangidayaw kenkuana ken mangpaneknek nga ay-ayatentayo ti Dios.
Siempre, adda dadduma a tarigagaytayo, kas iti panagsursuro iti maysa a trabaho, panagnegosio, wenno maaddaan iti bukod a pamilia. Ngem mapaneknekantayo ti amin-kararua a panagayattayo ken ni Jehova babaen ti panangaramidtayo kadagiti bambanag iti wagas a kayatna ken babaen ti panangtaginayon kadagiti sabali a bambanag iti umiso a lugarda iti biagtayo, tapno ‘mayun-unatayo ti pagarian ken ti kinalintegna.’ (Mateo 6:33) Ti amin-kararua a panagdayaw kaipapananna met ti panagbalin a naregta. Maipakitatayo nga ay-ayatentayo ni Jehova babaen ti naregta a panangikasaba iti mensahe ti Pagarian, panangipaay kadagiti makapabileg a komento kabayatan dagiti gimong, wenno panangtulong kadagiti kakabsattayo a Kristiano. Iti amin a banag, itultuloytayo nga ‘aramiden ti pagayatan ti Dios iti amin a kararua.’—Efeso 6:6.
Impakita ni Jesus ti amin-kararua a panagayatna iti Dios babaen ti dina panangpanuynoy iti bagina. Inyun-unana ti pagayatan ti Dios ket sumaruno laeng dagiti personal a kasapulanna. Iparparegta ni Jesus a tuladentayo ti ulidanna. Kinunana: “No ti asinoman kayatna ti sumurot kaniak, paglikudanna koma ti bagina ket bagkatenna ti kayona a pagtutuokan ket agtultuloy a surotennak.” (Mateo 16:24, 25) Ti di panangpanuynoy iti bagbagitayo kalikagumanna ti panagdedikar. Kaipapananna nga ay-ayatentayo unay ti Dios ket ipabiangtayon kenkuana ti biagtayo, no kasano a ti maysa nga Israelita idi panawen ti Biblia ket permanente nga ipasakupna ti biagna iti apona gapu iti kasta unay a panagayatna kenkuana. (Deuteronomio 15:16, 17) Ti panangidedikar iti biagtayo ken ni Jehova ket kanayonan a pammaneknek nga ay-ayatentayo ti Dios.
Ayatentayo ni Jehova iti Amin a Panunottayo
Ti panagayat ken ni Jehova iti amin a panunottayo kaipapananna a pagreggetantayo a tarusan ti personalidad, pangpanggep, ken kalikagum ni Jehova. (Juan 17:3; Aramid 17:11) Iyebkastayo ti panagayattayo ken ni Jehova babaen ti panangusartayo iti amin a siribtayo a tumulong kadagiti sabsabali tapno masursuroda met nga ayaten ni Jehova ken babaen ti panangpasayaattayo iti arte ti panangisurotayo. “Patibkerenyo dagiti panunotyo maipaay iti trabaho,” imparegta ni apostol Pedro. (1 Pedro 1:13) Maysa pay, ikagumaantayo nga ipakita ti interes kadagiti dadduma, nangnangruna kadagiti padatayo nga agserserbi iti Dios. Ammuentayo dagiti kasasaadda ken nasiputtayo koma no kaano a maitutop ti komendasion wenno no kasapulan ti panangliwliwa.
Maipakitatayo nga ay-ayatentayo ni Jehova iti amin a panunottayo babaen ti panangtuladtayo iti panagpampanunotna. Ikagumaantayo a matmatan dagiti bambanag sigun iti panangmatmatna, ikabilangantayo ti pagayatanna no agdesisiontayo, ken agtalektayo a ti pamay-anna ti kasayaatan. (Proverbio 3:5, 6; Isaias 55:9; Filipos 2:3-7) Ngem bayat nga itultuloytayo nga ayaten ti Dios, kasanotayo a mausar ti pigsatayo?
Ayatentayo ni Jehova iti Amin a Pigsatayo
Adu nga agtutubo iti kongregasion Kristiano ti mangus-usar iti pigsada a mangidaydayaw ken ni Jehova. (Proverbio 20:29; Eclesiastes 12:1) Ti maysa a pamay-an dagiti adu nga agtutubo a Kristiano a mangipakita nga ay-ayatenda ni Jehova iti amin a pigsada ket babaen ti pannakiramanda iti panagpayunir, ti amin-tiempo a ministerio. Adu nga inna ti makiraman iti panangasaba bayat nga adda iti eskuelaan dagiti annakda. Maipakita dagiti matalek a panglakayen nga ay-ayatenda ni Jehova iti amin a pigsada no makiramanda iti panagipastor a panagsarungkar, malaksid iti panangipaayda iti kasapulan dagiti bukodda a pamilia. (2 Corinto 12:15) Pabilgen ni Jehova dagidiay mangnamnama kenkuana, iti kasta, maipakitada ti panagayatda babaen ti panangidaydayawda kenkuana, aniaman ti pigsa nga ik-ikutanda.—Isaias 40:29; Hebreo 6:11, 12.
Rumayray ti ayat no umiso ti pannakasukayna. Gapuna, iwayaantayo ti panagmennamenna. Lagipentayo dagiti inaramid ni Jehova agpaay kadatayo ken no apay a maikari ti Dios iti debosiontayo. Kas imperpekto a kaputotan ni Adan, pulos a ditay maikari kadagiti “bambanag nga insagana ti Dios kadagidiay agayat kenkuana,” ngem maipakitatayo nga ay-ayatentayo ni Jehova buyogen ti amin nga ik-ikutantayo. Itultuloytayo koma nga aramiden ti kasta!—1 Corinto 2:9.
[Ladawan iti panid 20]
Iyebkastayo ti panagayattayo iti Dios babaen ti aramid