Ti Pangrabii ti Apo—Kasano a Rambakan?
ITI panangilawlawagna no kasano a rambakan ti Pangrabii ti Apo, insurat ni Kristiano nga apostol Pablo: “Inawatko iti Apo daydiay inyawatko met kadakayo, a ni Apo Jesus iti rabii a pannakayawatna nangala iti tinapay ket, kalpasan a nakapagyaman, pinispisina ket kinunana: ‘Daytoy kaipapananna ti bagik maigapu kadakayo. Itultuloyyo nga aramiden daytoy kas panglaglagip kaniak.’ Kasta met ti inaramidna maipapan iti kopa, kalpasan a nakapangrabii, a kunkunana: ‘Daytoy a kopa kaipapananna ti baro a tulag babaen ti bileg ti darak. Itultuloyyo nga aramiden daytoy, a masansan nga uminumkayo iti dayta, kas panglaglagip kaniak.’ Ta no masansan a kanenyo daytoy a tinapay ken uminumkayo itoy a kopa, iwarwaragawagyo ti ipapatay ti Apo, agingga iti idadatengna.”—1 Corinto 11:23-26.
Kas kuna ni Pablo, inyussuat ni Jesus ti Pangrabii ti Apo ‘iti rabii a ni Jesus ket inyawat’ ni Judas Iscariote kadagiti Judio a panguluen ti relihion a nangpilit kadagidi Romano a mangilansa ken Kristo. Naangay dayta a pannangan iti rabii ti Huebes, Marso 31, 33 K.P. Natay ni Jesus iti pagtutuokan a kayo iti Biernes ti malem, Abril 1. Yantangay dagiti aldaw iti kalendario dagiti Judio ket mangrugi iti rabii agingga iti sumaganad a rabii, naaramid ngarud iti maymaysa nga aldaw ti Pangrabii ti Apo ken ti ipapatay ni Jesu-Kristo—Nisan 14, 33 K.P.
Dagiti mangan iti tinapay ken uminum iti arak nasken nga ‘itultuloyda nga aramiden dayta’ kas panglaglagip ken ni Jesus. Sigun iti sabali a patarus, kinuna ni Jesus: “Aramidenyo daytoy kas pananglagip kaniak.” (1 Corinto 11:24, The Jerusalem Bible) Ti Pangrabii ti Apo ket naawagan met kas Pananglaglagip iti ipapatay ni Kristo.
Apay a Rambakan ti Ipapatay ni Jesus?
Masungbatan dayta no matarusantayo ti nainaig iti ipapatay ni Jesus. Natay ni Jesus kas ti kangrunaan a manangitandudo iti kinasoberano ni Jehova. Pinaneknekanna ngarud nga ulbod ni Satanas iti akusasionna a dagiti tattao agserserbida iti Dios maigapu laeng iti managimbubukodan a motibo. (Job 2:1-5; Proverbio 27:11) Babaen ti ipapatayna kas perpekto a tao, ni Jesus ‘intedna met ti kararuana kas subbot a kasukat dagiti adu.’ (Mateo 20:28) Idi nagbasol ni Adan maibusor iti Dios, napukawna ti perpekto a biag ken dagiti iyegna a pagimbagan. Ngem “ti Dios inayatna ti lubong [ti sangatauan] iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Kinapudnona, “dagiti isupapak ti basol isu ti ipapatay, ngem ti sagut nga ipaay ti Dios isu ti agnanayon a biag babaen ken Kristo Jesus nga Apotayo.”—Roma 6:23.
Gapuna, ti ipapatay ni Jesu-Kristo ket nainaig iti dua a katan-okan nga ebkas ti ayat—ti naindaklan nga ayat nga impakita ni Jehova agpaay iti sangatauan idi impaayna ti Anakna ken ti managsakripisio nga ayat nga impakita ni Jesus para iti sangatauan babaen ti situtulok a panangidatonna iti natauan a biagna. Ti Pananglaglagip iti ipapatay ni Jesus pagminarenna dagitoy a dua nga ebkas ti ayat. Yantangay nayebkas kadatayo daytoy nga ayat, saan aya a rumbeng nga ipakitatayo ti panagyamantayo iti dayta? Maysa a pamay-an a maipakitatayo dayta ket babaen ti itatabunotayo iti pannakarambak ti Pangrabii ti Apo.
Ti Kaipapanan ti Tinapay ken Arak
Idi inyussuatna ti Pangrabii ti Apo, nagusar ni Jesus iti tinapay ken maysa a kopa ti nalabaga nga arak kas emblema, wenno simbolo. Nangala ni Jesus iti tinapay, ket “kalpasan a nakapagyaman, pinispisina ket kinunana: ‘Daytoy [a tinapay] kaipapananna ti bagik maigapu kadakayo.’” (1 Corinto 11:24) Masapul a mapisi ti tinapay tapno nalaka a maibunong ken makan agsipud ta nakarandikang daytoy a tinapay a naaramid iti arina ken danum nga awanan iti lebadura. Iti Kasuratan, ti lebadura isimbolona ti basol. (Mateo 16:11, 12; 1 Corinto 5:6, 7) Awan basol ni Jesus. Gapuna, ti perpekto a bagina kas tao ket maitutop a daton a pangsubbot iti sangatauan. (1 Juan 2:1, 2) Anian a maitutop ta awan lebadurana ti tinapay a nausar a mangisimbolo iti awan basolna a bagi ni Kristo!
Inkararagan met ni Jesus ti kopa ti puro a nalabaga nga arak ket kinunana: “Daytoy a kopa kaipapananna ti baro a tulag babaen ti bileg ti darak.” (1 Corinto 11:25) Ti nalabaga nga arak iti kopa isimbolona ti dara ni Jesus. No kasano a ti dara dagiti naidaton a toro ken kalding pinatalgedanna ti tulag ti Linteg iti nagbaetan ti Dios ken ti nasion ti Israel idi 1513 K.K.P., kasta met a ti dara ni Jesus a naiparukpok idi matay pinatalgedanna ti baro a tulag.
Siasino Dagiti Makiraman?
Tapno maammuantayo no siasino dagiti maitutop a makiraman kadagiti emblema ti Memorial, nasken a maawatantayo no ania ti baro a tulag ken no siasino dagiti paset ti tulag. Kuna ti Biblia: “‘Adtoy! Adda um-umayen nga al-aldaw,’ kuna ni Jehova, ‘ket mamatalgedakto iti baro a tulag iti balay ti Israel ken iti balay ti Juda . . . Ikabilkonto ti lintegko iti unegda, ket iti pusoda isuratkonto dayta. Ket agbalinakto a Diosda, ket isuda agbalindanto nga ilik. . . . Pakawanekto ti biddutda, ket ti basolda saankonton a lagipen.’”—Jeremias 31:31-34.
Babaen ti baro a tulag, posible ti maaddaan iti naisangsangayan a relasion ken ni Jehova a Dios. Babaen daytoy a tulag, adda grupo dagiti indibidual nga agbalin nga ilina ket isu ti agbalin a Diosda. Ti linteg ni Jehova naisurat iti kaungganda, iti pusoda, ken uray dagiti saan a paset dagiti literal a nakugit a Judio mabalinda ti maaddaan iti relasion iti Dios iti sidong ti baro a tulag. (Roma 2:29) Ti mannurat ti Biblia a ni Lucas dinakamatna a panggep ti Dios nga ‘iturong ti asikasona kadagiti nasion tapno mangala kadakuada iti ili a maipaay iti naganna.’ (Aramid 15:14) Sigun iti 1 Pedro 2:10, ‘idi naminsan saanda a maysa nga ili, ngem itan ket ili ti Dios.’ Ti Kasuratan tukoyenna ida kas ti “Israel ti Dios,” kayatna a sawen, naespirituan nga Israel. (Galacia 6:16; 2 Corinto 1:21) Gapuna, ti baro a tulag ket maysa a tulag iti nagbaetan ni Jehova a Dios ken ti naespirituan nga Israel.
Iti maudi a rabii a kaduana dagiti adalanna, adda sabali pay a tulag nga inaramid ni Jesus iti nagbaetanda. “Mangaramidak iti tulag kadakayo,” kinunana kadakuada, “kas iti panangaramid ni Amak iti maysa a tulag kaniak, maipaay iti maysa a pagarian.” (Lucas 22:29) Isu daytoy ti tulag ti Pagarian. Agdagup iti 144,000 ti bilang dagiti imperpekto a tattao a naitulag iti Pagarian. Kalpasan a mapagungarda nga agturong idiay langit, makipagturayda ken Kristo kas ar-ari ken papadi. (Apocalipsis 5:9, 10; 14:1-4) Gapuna, dagidiay karaman iti baro a tulag ken ni Jehova a Dios karamanda met iti tulag ti Pagarian nga inyussuat ni Jesu-Kristo. Isuda laeng ti addaan iti kalintegan a makiraman kadagiti emblema iti Pangrabii ti Apo.
Kasano a dagiti maikari a mangan ken uminum kadagiti emblema ti Memorial ammoda a naisangsangayan ti relasionda iti Dios ken makipagtawid ken Kristo? Inlawlawag ni Pablo: “Ti mismo [a nasantuan] nga espiritu mangsaksi a buyogen ti espiritutayo [panagpampanunottayo] a datayo ket annak ti Dios. Ngarud, no datayo ket annak, agtawidtayo met: pudno a dagiti agtawid ti Dios, ngem makipagtawid ken Kristo, no la ket agsagabatayo a sangsangkamaysa tapno maipadayagtayo met a sangsangkamaysa.”—Roma 8:16, 17.
Babaen ti nasantuan nga espiritu, wenno aktibo a puersana, pulotan ti Dios dagiti kadua ni Kristo nga agturay. Gapu iti dayta, masiguradoda a makipagtawidda iti Pagarian. Kadagiti napulotan a Kristiano, kaipapananna dayta a maaddaanda iti nailangitan a namnama. Matmatanda nga agaplikar kadakuada ti amin a kunaen ti Biblia maipapan iti nailangitan a biag. Kanayonanna, situtulokda a mangisakripisio iti amin a bambanag ditoy daga, agraman ti biagda kas tao ken amin a relasionda kadagiti tattao. Nupay mabigbig dagiti napulotan iti espiritu a Kristiano a naisangsangayan ti biag iti Paraiso a daga, saan a dayta ti namnamada. (Lucas 23:43) Kas resulta ti panagtignay ti espiritu ti Dios, saan ket a gapu kadagiti palso a narelihiosuan a panangmatmat, addaanda iti di agbaliw a nailangitan a namnama. Iti kasta, maikarida a makiraman kadagiti emblema ti Memorial.
Kas pagarigan ta ti maysa a tao saanna a masigurado nga isu ket paset ti baro a tulag ken ti tulag ti Pagarian. Kasano no awan ti pammatalged ti espiritu ti Dios nga isu ket makipagtawid ken Kristo? No kasta, saan a maiparbeng nga isu ket makiraman kadagiti emblema ti Memorial. Kinapudnona, saan a maay-ayo ti Dios no ti maysa a tao ket agpabigbig kas naayaban nga ari ken padi idiay langit no saan a talaga a naayaban.—Roma 9:16; Apocalipsis 22:5.
Kasano Kasansan a Rambakan?
Ti kadi ipapatay ni Jesus rumbeng a rambakan iti linawas wenno nalabit inaldaw pay ketdi? Bueno, inyussuat ni Kristo ti Pangrabii ti Apo ken awan gapgapuna a napapatay idi Aldaw ti Paskua. Maminsan laeng kada tawen, iti Nisan 14, a narambakan ti Paskua a nangipalagip iti pannakaispal ti Israel manipud iti pannakaadipen idiay Egipto. (Exodo 12:6, 14; Levitico 23:5) Isu a ti ipapatay ni “Kristo a paskuatayo” masapul a rambakan maminsan laeng kada tawen, saan a linawas wenno inaldaw. (1 Corinto 5:7) Iti panangrambak iti Pangrabii ti Apo, suroten dagiti Kristiano ti isu met laeng a pamay-an kas iti inaramid ni Jesus idi inyussuatna dayta.
Ania, ngarud, ti kaipapanan dagitoy a sasao ni Pablo: “Ta no masansan a kanenyo daytoy a tinapay ken uminumkayo itoy a kopa, iwarwaragawagyo ti ipapatay ti Apo, agingga iti idadatengna”? (1 Corinto 11:26) Iti daytoy a teksto, nagusar ni Pablo iti sao a kaipapananna “tunggal,” wenno “kada.” No kasta, ibagbagana a kada makipaset dagiti napulotan a Kristiano kadagiti emblema, iwaragawagda ti pammatida iti daton a pangsubbot ni Jesus.
Dagiti napulotan a Kristiano lagipenda ti ipapatay ni Kristo “agingga iti idadatengna.” Agtultuloy daytoy a panangrambak agingga iti idadateng ni Jesus a mangawat kadagiti napulotan a pasurotna idiay langit babaen ti panagungarda iti espiritu a biag bayat ti ‘kaaddana.’ (1 Tesalonica 4:14-17) Maitunos daytoy kadagiti sasao ni Kristo kadagiti 11 a nasungdo nga apostolna: “No mapanak ket mangisaganaak iti lugar a maipaay kadakayo, umayak manen ket awatenkayto nga ikuyog kaniak, tapno no sadino ti ayanko addakayo met koma.”—Juan 14:3.
Ania ti Kaipapananna Kadakayo?
Masapul kadi a makiraman kadagiti emblema ti Memorial tapno magunggonaan iti daton ni Jesus ket umawat iti biag nga agnanayon ditoy daga? Saan. Ti Biblia awan ti ibagana a dagiti managbuteng iti Dios a tattao a kas kada Noe, Abraham, Sara, Isaac, Rebecca, Jose, Moises, ken David ket makiramandanto kadagiti emblema kalpasan ti pannakapagungarda ditoy daga. Kaskasdi, dagitoy ken amin a dadduma pay nga agtarigagay iti biag nga agnanayon ditoy daga nasken nga alagadenda ti pammati iti Dios ken Kristo ken iti probision ni Jehova a daton a pangsubbot ni Jesus. (Juan 3:36; 14:1) Tapno magun-od ti biag nga agnanayon, masapul met nga alagadenyo ti kasta a pammati. Ti kaaddayo bayat ti tinawen a panangrambak iti ipapatay ni Kristo ti mangipalagip kadakayo iti dayta a naindaklan a daton ken parayrayenna ti panagyamanmo iti dayta.
Ni apostol Juan impaganetgetna ti kinapateg ti daton ni Jesus idi kinunana: “Isursuratko kadakayo [pada a napulotan] dagitoy a banag tapno saankayo a makaaramid iti basol. Ket kaskasdi, no ti asinoman makaaramid iti basol, addaantayo iti katulongan iti Ama, ni Jesu-Kristo, daydiay nalinteg. Ken isu ket pangikappia a sakripisio maipaay kadagiti basoltayo, ngem saan a maipaay kadatayo laeng no di ket maipaay met iti intero a lubong.” (1 Juan 2:1, 2) Maibaga dagiti napulotan a ti daton ni Jesus ket maysa a pangikappia a pangabbong kadagiti basbasolda. Ngem naidatag met dayta a daton tapno mapakawan ti basbasol ti intero a lubong, a mamagbalin a posible iti biag nga agnanayon para iti natulnog a sangatauan!
Dumar-aykayto kadi inton Abril 4, 2004, tapno rambakan ti ipapatay ni Jesus? Dagiti Saksi ni Jehova iti sangalubongan angayenda dayta kadagiti paggigimonganda. No dumar-aykayo, magunggonaankayo a makangngeg iti nakapatpateg a palawag a naibatay iti Biblia. Maipalagip kadakayo no ania dagiti natan-ok a banag nga inaramid ni Jehova a Dios ken ni Jesu-Kristo nga agpaay kadatayo. Makagunggona met iti naespirituan ti pannakitaripnong kadagiti tattao nga addaan iti nauneg a panagraem iti Dios ken ni Kristo ken iti daton a pangsubbot ni Jesus. Ti okasion parayrayenna ti tarigagayyo nga umawat iti di kaikarian a kinamanangngaasi ti Dios, a mangiturong iti biag nga agnanayon. Diyo ipalubos nga adda manglapped kadakayo. Dumar-aykayo iti daytoy nakaay-ayat a pananglaglagip a mangpadayaw ken mangay-ayo iti nailangitan nga Amatayo, ni Jehova a Dios.
[Ladawan iti panid 5]
Ti ipapatay ni Jesus ket nainaig iti dua a katan-okan nga ebkas ti ayat
[Ladawan iti panid 6]
Ti awan lebadurana a tinapay ken ti arak ket maitutop a simbolo ti awan basolna a bagi ken naiparukpok a dara ni Jesus