Watchtower ONLINE A LIBRARIA
Watchtower
ONLINE A LIBRARIA
Iloko
  • BIBLIA
  • PUBLIKASION
  • GIMONG
  • w04 3/15 pp. 8-9
  • ‘Nadadaegka Ngem Kadagiti Bantay’

Awan video-na ti napilim.

Pasensiakan, adda problema iti pannakai-load ti video.

  • ‘Nadadaegka Ngem Kadagiti Bantay’
  • Ti Pagwanawanan Mangibumbunannag iti Pagarian ni Jehova—2004
  • Umasping a Material
  • Bantay
    Pannakatarus iti Kasuratan, Tomo 1
  • Dagiti Bantay—No Apay a Kasapulantayo Ida
    Agriingkayo!—2005
  • Bambantay—Dagiti Obra Maestra ti Panamarsua
    Agriingkayo!—1994
  • Dagiti Bantay—Asino ti Mangispal Kadagitoy?
    Agriingkayo!—2005
Kitaen ti Ad-adu Pay
Ti Pagwanawanan Mangibumbunannag iti Pagarian ni Jehova—2004
w04 3/15 pp. 8-9

Ti Kinadayag Dagiti Parsua ni Jehova

‘Nadadaegka Ngem Kadagiti Bantay’

NAKALLALAGIP a kapadasan a mapaliiw ti panagbannawag no addaka iti tapaw ti Mount Fuji. Maysa a dumardarang ti kolorna nga init ti sumingsingising, a raniaganna ti puraw a niebe ken dapuen a lava a bato. Bayat a mangrugi ti maysa manen nga aldaw, dagus nga agminar ti anniniwan ti bantay kadagiti turturod ken tantanap a sumagmamano a kilometro ti kaadayoda.

Kas iti Mount Fuji​—a naminsan a naisurat idi iti alpabeto dagiti Hapones a kaipapananna “awan kaaspingna”​—kanayon nga agsiddaawtayo gapu iti kinadaeg dagiti bantay. Kinapudnona, mariknatayo ti kinabassittayo no makitatayo ti kadakkelda! Nadaeg unay dagiti bantay nga uray la patien ti adu a tattao a ti kangatuan a tapawna, a masansan a naabbungotan iti angep ken ulep, ket pagnanaedan kano dagiti dios.

Ti kakaisuna a Dios a talaga a padayawan dagiti tapaw ti bantay isu ti nalaing a Namarsua kadagita, ni Jehova. Isu laeng ti “Nangporma iti bambantay.” (Amos 4:13) Bambantay ti dandani kakapat ti daga, ken idi pinarsua ti Dios ti planeta, nangikabil kadagiti puersa a nangpataud idi agangay kadagiti makapaamanga a taptapaw ken kabambantayan. (Salmo 95:4) Kas pagarigan, adda dagiti mamati a timmaud ti kabambantayan kadagiti Himalaya ken Andes babaen dagiti napipigsa a panagluab iti kaunggan ti daga ken panaggaraw ti rabaw ti daga.

Datayo a tattao saantayo a naan-anay a maawatan no kasano ken apay a nagadda dagiti bantay. Kinapudnona, ditay masungbatan dagitoy a saludsod a nayimtuod ken ni nalinteg a Job: “Sadino ti ayanmo idi imbangonko [ni Jehova] ti daga? . . . Iti ania ti nakailumloman ti sulluop a batbatayna?”​—Job 38:4-6.

Ngem ammotayo a ti biagtayo ket agpannuray kadagiti bantay. Naawaganda kas gubuayan ti danum ti nakaparsuaan, yantangay amin a dadakkel a karayan ket aggapu kadagiti bantay ken kagudua kadagiti tattao ditoy daga ti agpampannuray iti danum manipud kadagiti bantay. (Salmo 104:13) Sigun iti magasin a New Scientist, “aggapu kadagiti bantay ti innem kadagiti 20 a kangrunaan a mula ditoy lubong a pagtaudan ti taraon.” Iti sidong dagiti ekolohikal a balanse a kasasaad iti naikari a baro a lubong ti Dios, “maaddanto ti naruay a bukbukel iti daga; iti tapaw dagiti bantay addanto ti panaglaplapusanan.”​—Salmo 72:16; 2 Pedro 3:13.

No maipapan kadagiti bantay, malagip ti adu dagiti European Alp. Dagitoy a bambantay, agraman ti Mount Civetta a makita ditoy, ket makaay-ayo a pammaneknek nga adda Namarsua kadagita. (Salmo 98:8) Itan-okda ni Jehova, daydiay ‘nangipasdek a sititibker kadagiti bantay babaen ti pannakabalinna.’​—Salmo 65:6.a

Nakaskasdaaw a talaga ti kinadayag dagiti nangato a bambantay, a dagiti tapaw ken bangkirigda ket nakalupkopan iti yelo, a dagiti darisdis, tanap, dan-aw, ken karuotanda ket naabbungotan iti niebe. Ni Ari David impabigbigna ni Jehova kas “Daydiay mamagtubo iti berde a ruot kadagiti bantay.”​—Salmo 147:8.

Dagiti katurturodan​—kas kadagitoy a turod idiay Guilin, China​—nalabit nga agparang a saan unay a nakaskasdaaw a kas kadagiti natatayag a bantay, ngem naisangsangayan ti kinangayedda. Dagiti intar dagiti tapaw a tisa a bato, a masarakan iti Li River, ket magustuan unay dagiti bisita gapu iti kinangayedda. Ti panangpaliiw kadagiti nalitnaw a danum nga agay-ayus kadagitoy a turod ipalagipna dagiti sasao ti salmista: “Isu [ni Jehova] mangibaon kadagiti ubbog nga agturong kadagiti naapres a ginget; iti baet dagiti bantay agtultuloyda a mapan.”​—Salmo 104:10.

Umiso laeng a magustuantayo dagiti bantay agsipud ta bigbigentayo dagitoy kas nadaeg a paset ti naayat a probision ti Namarsua agpaay iti pagimbagan ken pagragsakan ti sangatauan. Ngem nakaskasdaaw man dagiti bantay, awan pakaimudinganda iti kinadaeg ni Jehova. Isu ket pudno a “nadadaeg ngem dagiti bantay.”​—Salmo 76:4.

[Footnote]

a Kitaenyo ti 2004 Calendar of Jehovah’s Witnesses, Marso/Abril.

[Kahon/Ladawan iti panid 9]

Agnanaed iti bambantay ti sangapulo porsiento iti populasion ti lubong. Ngem dayta ket saan a lapped kadagidiay mangipakpakaammo iti naimbag a damag ti Pagarian ti Dios. Dagitoy a Kristiano a ministro okupadoda unay kadagiti adu a kabambantayan a rehion. Ken “anian a nagimnas iti rabaw dagiti bantay ti saksaka daydiay mangip-ipan iti naimbag a damag, daydiay mangipabpablaak iti talna, daydiay mangyeg iti naimbag a damag ti maysa a banag a nasaysayaat, daydiay mangipabpablaak iti pannakaisalakan!”​—Isaias 52:7.

“Dagiti nangato a bantay agpaayda kadagiti kalding iti bantay,” inkanta ti salmista. (Salmo 104:18) Dagiti kalding iti bantay, kas ti nagsayaat ti sarana a Nubian ibex, ket maysa kadagiti katibkeran ti sakada nga agnanaed iti bantay. Magnada kadagiti nakarangrangkis a dalan a kasla narigat a lasaten. Nakabalan dagiti ibex nga agbiag kadagiti di madanon a luglugar. Ti maysa a makagapu ket ti klase dagiti sakada. Mabalin a mabennat ti dapanna no ibaddekna, isu a makakapet a naimbag ti animal no agtaktakder wenno magmagna kadagiti akikid a parudipad a batbato. Talaga a maysa nga obra maestra ti ibex!

[Ladawan iti panid 9]

Mount Fuji, Honshu, Japan

    Dagiti Publikasion iti Iloko (1984-2025)
    Ag-log out
    Ag-log in
    • Iloko
    • I-share
    • Ti Kayatmo a Setting
    • Copyright © 2025 Watch Tower Bible and Tract Society of Pennsylvania
    • Pagannurotan iti Panagusar
    • Pagannurotan iti Kinapribado
    • Privacy Settings
    • JW.ORG
    • Ag-log in
    I-share