Agturedkayo kas ken Jeremias
“Manginanamaka ken Jehova; bumilegka ket pumigsa koma ta pusom. Wen, manginanamaka ken Jehova.”—SALMO 27:14.
1. Aniada a nabaknang a bendision ti tagtagiragsaken dagiti Saksi ni Jehova?
AGNANAED dagiti Saksi ni Jehova iti naespirituan a paraiso. (Isaias 11:6-9) Iti tengnga daytoy nariribuk a lubong, kaduada dagiti padada a Kristiano iti maysa a naidumduma a naespirituan a kasasaad, a tagtagiragsakenda ti natalna a relasion ken ni Jehova a Dios ken iti tunggal maysa. (Salmo 29:11; Isaias 54:13) Ken agsaksaknap ti naespirituan a paraisoda. Dagidiay ‘amin-kararua a mangar-aramid iti pagayatan ti Dios’ nakatulongda iti pannakapalawa dayta a paraiso. (Efeso 6:6) Kasano? Babaen ti panagbiagda a maitunos kadagiti pagalagadan ti Biblia ken babaen ti panangisuroda kadagiti dadduma a mangaramid met iti kasta, nga iyaw-awisda dagiti nabaknang a bendision iti dayta a paraiso.—Mateo 28:19, 20; Juan 15:8.
2, 3. Ania dagiti nasken nga ibturan dagiti pudno a Kristiano?
2 Ngem uray no agnanaedtayo iti naespirituan a paraiso, makapasartayo latta kadagiti pakasuotan. Imperpektotayo pay laeng ket sagabaentayo dagiti ut-ot nga iyeg ti panagsakit, panaglakay, ken ipapatay. Maysa pay, makitkitatayo ti kaitungpalan dagiti padto maipapan “kadagiti maudi nga aldaw.” (2 Timoteo 3:1) Dagiti gubat, krimen, sakit, bisin, ken dadduma pay a nakaro a pakarigatan sinaplitda ti intero a sangatauan, a pakairamanan dagiti Saksi ni Jehova.—Marcos 13:3-10; Lucas 21:10, 11.
3 Malaksid pay kadagita, ammotay amin a nupay natalged ti naespirituan a paraisotayo, sumangbay ti nakaro nga ibubusor. Pinakdaaran ni Jesus dagiti pasurotna: “Agsipud ta saankayo a paset ti lubong, no di ket pinilikayo manipud iti lubong, gapu iti daytoy guraennakayo ti lubong. Laglagipenyo ti sao a kinunak kadakayo, ti adipen saan a dakdakkel ngem iti apona. No indadanesdak, idadanesdakayto met.” (Juan 15:18-21) Kasta met laeng ti kasasaad ita. Ti panagdayawtayo ket saan pay laeng a maawatan wenno maapresiar ti kaaduan a tattao. Dadduma ti mangkritikar, mangumsi, wenno mangbusor pay ketdi kadatayo—kas impakdaar ni Jesus. (Mateo 10:22) Masansan a datayo ti puntiria ti kinaulbod ken malisioso a propaganda babaen ti media. (Salmo 109:1-3) Wen, maipasangotay amin kadagiti makakarit a kasasaad, ket mabalin a maupay ti dadduma. Kasanotay a makapagibtur?
4. Asino ti makatulong kadatayo nga agibtur?
4 Tulongannatayo ni Jehova. Napaltiingan ti salmista a nangisurat: “Adu ti didigra daydiay nalinteg, ngem manipud kadakuada amin isu ispalen ni Jehova.” (Salmo 34:19; 1 Corinto 10:13) Adu kadatayo ti makapaneknek a no naan-anay nga agtalektayo ken ni Jehova, pabilgennatayo a mangibtur iti aniaman a pakarigatan. Kabaelantayo a daeran ti pannakaupay ken buteng gapu iti ayattayo kenkuana ken iti rag-o a naikabil iti sanguanantayo. (Hebreo 12:2) Gapuna, iti laksid dagiti pakarigatan, makapagtultuloytayo nga agandur.
Ti Sao ti Dios Pinabilegna ni Jeremias
5, 6. (a) Mangdakamat kadagiti pudno nga agdaydayaw a nakapagibtur. (b) Ania ti reaksion ni Jeremias idi naayaban nga agserbi kas propeta?
5 Iti intero a historia, nakapagtalinaed a naragsak dagiti matalek nga adipen ni Jehova iti laksid dagiti nainget a kasasaad. Dadduma ti nakakita idi no kasano a dinadael ni Jehova dagidiay saan a matalek. Karaman kadagiti matalek nga agdaydayaw isu ni Jeremias ken sumagmamano kadagiti kapatadanna, agraman dagiti Kristiano idi umuna a siglo. Dagita a nagkauna a pagwadan ket nairekord iti Biblia tapno agserbi a pammaregta kadatayo, ken adu ti masursurotayo no adalentay dagita. (Roma 15:4) Kas pagarigan, usigentayo ni Jeremias.
6 Ubing pay ni Jeremias idi naayaban nga agserbi kas propeta idiay Juda. Saan a nalaka dayta nga annongen. Adu ti agdaydayaw kadagiti didiosen. Nupay matalek ni Josias nga ari idi rinugian ni Jeremias ti ministeriona, saan a matalek dagiti amin a simmaruno nga ari, ket kaaduan kadagiti addaan iti annongen a mangisuro kadagiti tattao—dagiti propeta ken papadi—dida intandudo ti kinapudno. (Jeremias 1:1, 2; 6:13; 23:11) Ania ngarud ti rikna ni Jeremias idi inayaban ni Jehova nga agserbi kas propeta? Nagbuteng! (Jeremias 1:8, 17) Malagip ni Jeremias ti damo a reaksionna: “Kinunak: ‘Ay, O Soberano nga Apo Jehova! Adtoy pudno a saanko nga ammo ti agsao, ta maysaak laeng nga ubing.’”—Jeremias 1:6.
7. Ania ti reaksion dagiti tattao iti teritoria ni Jeremias, ket ania ti inaramidna?
7 Manangyaleng-aleng ti kaaduan kadagiti tattao iti teritoria ni Jeremias, ken masansan a naipasango iti nakaro nga ibubusor. Naminsan, ni padi a Pasur kinabilna ni Jeremias ken inkabilna iti tul-ong. Imbaga ni Jeremias no ania ti riknana iti dayta a kanito: “Kinunak: ‘Isu [ni Jehova] saanko a dakamaten, ket saanakton nga agsao iti naganna.’” Nalabit kasta met ti panagriknayo no dadduma—kasla kayatyon ti sumuko. Imutektekanyo no ania ti timmulong ken ni Jeremias nga agibtur. Kinunana: “Iti pusok nagbalin dayta [ti sao, wenno mensahe ti Dios] a kas sumsumged nga apuy a napupok kadagiti tulangko; ket nabannogak a nangmedmed, ket saanko a nabaelan nga ibturan.” (Jeremias 20:9) Kasta kadi ti epekto kadakayo ti sao ti Dios?
Dagiti Kakadua ni Jeremias
8, 9. (a) Ania ti nagkapuyan ni propeta Uria, a nagbanag iti ania? (b) Apay a naupay ni Baruc, ken kasano a natulongan?
8 Saan nga agmaymaysa ni Jeremias iti trabahona kas propeta. Adda kakaduana, banag a makapabileg kenkuana. Ngem addada gundaway a saan a sisisirib a nagtignay dagiti kakaduana. Kas pagarigan, maysa a padana a propeta nga agnagan iti Uria ti okupado a mangpakpakdaar kadagiti taga Jerusalem ken Juda “maitunos iti amin a sasao ni Jeremias.” Nupay kasta, idi imbilin ni Ari Jehoiaquim a mapapatay ni Uria, sibubuteng a nagkamang ti propeta idiay Egipto. Saan a dayta ti nangsalbar iti biagna. Kinamat dagiti soldado nga imbaon ti ari, tiniliwda, sada insubli idiay Jerusalem, a nakatayanna. Naklaat ni Jeremias iti dayta!—Jeremias 26:20-23.
9 Ti maysa pay a kadua ni Jeremias isu ni Baruc, ti sekretariona. Ni Baruc ket nasayaat a katulongan ni Jeremias, ngem adda naminsan a kimmapuy ti naespirituan a panangmatmatna. Nagreklamo a kunkunana: “Asiak pay, ita, ta ti rigatko ninayonan ni Jehova iti ladingit! Napakilak gapu iti panagsennaayko, ket awan nasarakak a lugar a paginanaan.” Gapu ta naupay, nangrugi a bumaaw ti apresasion ni Baruc kadagiti naespirituan a bambanag. Kaskasdi, siaasi nga impaayan ni Jehova iti nainsiriban a balakad, ket ni Baruc nailinteg manen. Naipanamnama ngarud a malasatanna ti pannakadadael ti Jerusalem. (Jeremias 45:1-5) Napabileg la ketdi ni Jeremias idi naisubli ti naespirituan a kinatimbeng ni Baruc!
Sinaranay ni Jehova ti Propetana
10. Ania a pannaranay ti inkari ni Jehova ken ni Jeremias?
10 Ti napateg, ni Jehova dina binaybay-an ni Jeremias. Matarusanna ti narikna ti propeta ket impaayna ti bileg ken saranay a kasapulanna. Kas pagarigan, idi rugrugi ti ministerio ni Jeremias idi pinagduaduaanna ti abilidadna, kinuna kenkuana ni Jehova: “Dika agbuteng gapu kadagiti langada, ta ‘addaak kenka tapno ispalenka,’ kuna ni Jehova.” Kalpasanna, apaman a naitedna ti instruksion iti propeta maipapan iti annongenna, kinuna ni Jehova: “Ket sigurado a makirupakdanto kenka, ngem saandanto nga agballigi maibusor kenka, ta ‘addaak kenka,’ kuna ni Jehova, ‘tapno ispalenka.’” (Jeremias 1:8, 19) Anian a makaliwliwa dayta! Talaga a tinungpal ni Jehova ti karina.
11. Kasanotay nga ammo a tinungpal ni Jehova ti karina a saranayenna ni Jeremias?
11 Gapuna, kalpasan a naikabil iti tul-ong ken naibabain iti publiko, sikokompiansa a kinuna ni Jeremias: “Ni Jehova adda idi kaniak kas maysa a nakaam-ames a mannakabalin. Dayta ti makagapu a maitibkolto dagidiay mismo a mangidaddadanes kaniak ket saanda nga agballigi. Sigurado a maibabaindanto unay.” (Jeremias 20:11) Idi ginandatda a papatayen ni Jeremias kadagiti simmaruno a tawtawen, nagtultuloy a sinaranay ni Jehova, ket kas ken Baruc, nalasatan ni Jeremias ti pannakadadael ti Jerusalem ken tinagiragsakna ti wayawayana, idinto a dagiti nangidadanes kenkuana ken dagidiay nangyaleng-aleng kadagiti pakdaarna nadadaelda wenno nakautiboda idiay Babilonia.
12. Nupay adda dagiti pakaigapuan ti pannakaupay, ania ti nasken a laglagipentayo?
12 Kas ken Jeremias, adu a Saksi ni Jehova ita ti mangib-ibtur kadagiti pakarigatan. Kas nadakamat itay, dadduma kadagitoy a pakarigatan ket maigapu iti bukodtayo a kinaimperpekto, iti nariribuk a kasasaad ti lubong, ken kadagidiay bumusbusor iti trabahotayo. Makapaupay dagita. Kas ken Jeremias, mabalin a pagduaduaantayo no kabaelantay pay ti agtultuloy nga agserbi. Pudno, addada panawen a dumteng ti pannakaupay. Ti pannakaupay subokenna ti kadakkel ti panagayattayo ken ni Jehova. No kasta, ditay koma ipalubos a ti pannakaupay ti mangpasardeng iti panagserbitayo ken ni Jehova kas iti inaramid ni Uria. Imbes ketdi, tuladentayo ni Jeremias ket makapagtalektayo a saranayennatayo ni Jehova.
No Kasano a Parmeken ti Pannakaupay
13. Kasanotay a matulad ti ulidan da Jeremias ken David?
13 Regular a nakikomunikar ni Jeremias ken ni Jehova a Dios, nga inyesngawna ti kaunggan a riknana ken nagkiddaw iti bileg. Nasayaat a tuladen dayta. Ni Ari David iti Israel, a nagpannuray iti isu met laeng a Gubuayan ti bileg, insuratna: “Kadagiti sasaok umimdengka, O Jehova; tarusam ti panagsennaayko. Ipangagmo ti timek ti panagpatulongko, O Arik ken Diosko, agsipud ta kenka agkararagak.” (Salmo 5:1, 2) Ti naipaltiing a salaysay ti biag ni David ipakitana nga adu a daras nga impangag ni Jehova ti panangikararag ni David iti tulong. (Salmo 18:1, 2; 21:1-5) Umasping iti dayta, no nakaro dagiti suot wenno kasla ditay kabaelan dagiti parikuttayo, makaliwliwa unay ti panagkararag ken ni Jehova ket iyebkastayo kenkuana ti riknatayo. (Filipos 4:6, 7; 1 Tesalonica 5:16-18) Saannatay a tallikudan ni Jehova. Imbes ketdi, ipanamnamana nga ‘isu maseknan kadatayo.’ (1 Pedro 5:6, 7) Nupay kasta, saan a nainkalintegan ti agkararag ken ni Jehova sa iyaleng-aleng ti sasaona, di ngamin?
14. Ania ti epektona ken ni Jeremias dagiti sasao ni Jehova?
14 Kasano a makisarita kadatayo ni Jehova? Kitaentay manen ti napasamak ken ni Jeremias. Gapu ta ni Jeremias ket maysa a propeta, direkta a nakisarita kenkuana ni Jehova. Dineskribir ni Jeremias no ania ti epekto ti sasao ti Dios iti pusona: “Ti sasaom nasarakan, ket kinnanko ida; ket ti saom agbalin kaniak a panagragsak ken panagrag-o ti pusok; ta ti naganmo naipanagan kaniak, O Jehova a Dios ti buybuyot.” (Jeremias 15:16) Wen, naragsakan ni Jeremias iti kinapudno a nayawag kenkuana ti nagan ti Dios, ken napateg kenkuana ti sasao ni Jehova. Gapuna, kas ken apostol Pablo, sigagagar ni Jeremias a mangideklara iti mensahe a naitalek kenkuana.—Roma 1:15, 16.
15. Kasanotay a mayukuok iti pusotayo dagiti sasao ni Jehova, ken ania dagiti mangtignay kadatayo a mangipakaammo iti nagan ken Pagarianna?
15 Saan a direkta a makikomunikar ni Jehova iti asinoman ita. Kaskasdi, adda kadatayo ti sasao ti Dios babaen dagiti binulong ti Biblia. Gapuna, no sipapasnek nga adalentayo ti Biblia ken usigentayo a naimbag ti maad-adaltayo, ti sao ti Dios ‘paragsaken ken pagrag-oenna’ ti pusotayo. Ken magagarantayo a mangisarita iti nagan ni Jehova no idanontayo dayta kadagiti sabsabali. Ditay koma liplipatan nga awan ti sabali a tattao iti lubong ita a mangipakpakaammo iti nagan ni Jehova. Dagiti laeng Saksina ti mangipakpakaammo iti naimbag a damag ti naipasdek a Pagarian ti Dios ken mangisursuro kadagiti naemma no kasanoda nga agbalin nga adalan ni Jesu-Kristo. (Mateo 28:19, 20) Anian a naparaburantayo! No panunotentayo dagiti naayat a pribilehio nga intalek ni Jehova kadatayo, saantay kadi a matignay a mangipakaammo iti nagan ken Pagarian ti Dios?
Agannad Kadagiti Pakitimpuyogan
16, 17. Ania ti panangmatmat ni Jeremias iti pannakitimpuyog, ken kasanotay a matulad dayta?
16 Impadamag ni Jeremias ti sabali pay a nangpabileg kenkuana. Kinunana: “Saanak a nagtugaw iti nasinged a bunggoy dagidiay agaangaw ket nangrugi a nagrag-o. Gapu iti imam nagtugawak a sisiak, ta pinunnonak iti panangkondenar.” (Jeremias 15:17) Kinaykayat pay ni Jeremias ti agmaymaysa ngem iti agpairubo kadagiti dakes a kakadua. Kasta met laeng ti panangmatmattayo ita. Ditay pulos liplipatan ti pakdaar ni apostol Pablo a “dagiti dakes a pannakitimpuyog dadaelenda dagiti makagunggona nga ugali,” uray dagiti nasayaat a kababalin a nabayagen a nayugalitayo.—1 Corinto 15:33.
17 Ti espiritu ti lubong mabalinna a mulitan ti panagpampanunottayo babaen ti dakes a pannakitimpuyog. (1 Corinto 2:12; Efeso 2:2; Santiago 4:4) No kasta, sanayentayo ti pannakabalintayo a mangilasin tapno mabigbigtayo dagiti makadangran a pannakitimpuyog ket naan-anay a maliklikan dagita. (Hebreo 5:14) No sibibiag koma ni Pablo ditoy daga ita, ania ti namnamaenyo nga ibagana iti maysa a Kristiano nga agbuybuya kadagiti imoral wenno naranggas a pelikula wenno naranggas nga ay-ayam? Ania ti ibalakadna iti maysa a kabsat a makigayyem iti maysa a dina pulos am-ammo iti Internet? Ania ti panangmatmatna iti maysa a Kristiano a mangbusbos iti nagadu nga oras nga agay-ayam kadagiti video game wenno agbuya iti telebision ngem awanan met iti nasayaat nga eskediul nga agadal iti Biblia?—2 Corinto 6:14b; Efeso 5:3-5, 15, 16.
Agtalinaedkayo iti Naespirituan a Paraiso
18. Ania ti makatulong kadatayo nga agtalinaed a natibker iti naespirituan?
18 Ipatpategtayo ti naespirituan a paraisotayo. Awanen ti kasta a masarakantayo ditoy lubong ita. Uray dagiti saan a manamati nasayaat ti komentoda maipapan iti ayat, konsiderasion, ken kinamanangngaasi nga ipakpakita dagiti Kristiano iti maysa ken maysa. (Efeso 4:31, 32) Kaskasdi, ad-adda a kasapulantayo ita a parmeken ti pannakaupay. Ti nasayaat a timpuyog, panagkararag, ken nasayaat nga ugali iti panagadal iti Biblia matulongandatayo nga agtalinaed a natibker iti naespirituan. Mapabilegdatayo a mangsaranget iti aniaman a suot buyogen ti naan-anay a panagtalek ken ni Jehova.—2 Corinto 4:7, 8.
19, 20. (a) Ania ti tumulong kadatayo nga agibtur? (b) Siasino ti nakaiturongan ti sumaganad nga artikulo, ken iti siasino a makapainteres met dayta?
19 Ditay koma pulos guminad ken ikompromiso ti pammatitayo gapu laeng kadagiti bumusbusor iti ipakpakaammotayo a mensahe ti Biblia. Kas kadagiti kabusor a nangidadanes ken ni Jeremias, dagidiay bumusbusor kadatayo busbusorenda ti Dios. Saanda nga agballigi. Ni Jehova, nga adayo a nabilbileg ngem kadagiti kabusortayo, ibagana kadatayo: “Manginanamaka ken Jehova; bumilegka ket pumigsa koma ta pusom. Wen, manginanamaka ken Jehova.” (Salmo 27:14) Buyogen ti nairamut a panagtalek ken ni Jehova iti pusotayo, sapay koma ta determinadotayo nga agaramid iti naimbag. Sapay koma ta agtalektayo nga agapittayto no ditay sumuko, kas inaramid da Jeremias ken Baruc.—Galacia 6:9.
20 Adu a Kristiano ti agtultuloy a makidangdangadang iti pannakaupay. Ngem adda dagiti dakdakkel a karit a naipasango kadagiti agtutubo. Nupay kasta, addaanda met kadagiti dakkel nga oportunidad. Direkta a naiturong kadagiti kakaduatayo nga agtutubo ti sumaganad nga artikulo. Makapainteres met dayta kadagiti nagannak ken kadagiti amin a dedikado a nataengan iti kongregasion a mabalin a tumulong kadagiti agtutubo iti kongregasion babaen ti sao, ulidan, ken direkta a panangsaranay.
Ania ti Sungbatyo?
• Apay a manamnamatayo a dumteng dagiti makapaupay a kasasaad, ken asino ti pagpatulongantayo?
• Kasano a pinarmek ni Jeremias ti pannakaupay iti laksid ti narigat nga annongenna?
• Ania ti mamagbalin iti pusotayo nga ‘agragsak ken agrag-o’ uray iti sidong dagiti pakarigatan?
[Ladawan iti panid 9]
Impagarup ni Jeremias nga isu ket ubing pay ken agkurang iti kapadasan tapno agbalin a propeta
[Ladawan iti panid 10]
Uray idi naidadanes, ammo ni Jeremias nga adda kenkuana ni Jehova “kas maysa a nakaam-ames a mannakabalin”