Ti Karit ti Panangsanay iti Ubing Ita
GAPU ta rabii unayen, maysa nga akinkua iti restawran ti agsagsaganan nga agserra ken agawid. Ngem dua a babbai ken maysa nga ubing ti simrek ken nagpaala iti taraon. Nabannogen ti akinkua iti restawran ket ngannganina la nga ibaga nga agserran ti restawran, ngem inkeddengna nga idasaran ida. Bayat ti panagpatang dagiti dua a babbai, nagtaraytaray ti ubing iti uneg ti restawran, a napayatpayatanna dagiti natintinnagna a biskuit. Imbes a pasardengenna, immisem la ti ina. Idi rummuardan, ti nabannogen nga akinkukua iti restawran inan-anusanna a dinalusan ti rugit.
Pagaammoyo la ketdi a daytoy a pudno a situasion ipakitana a saan a naballigi ti panangsanay iti ubbing iti adu a pamilia. Nagduduma ti rason. Adda dagiti nagannak a napanuynoy iti kayat dagiti annakda, nga ipagarupda a rumbeng a maipaayan iti wayawaya dagiti ubbing iti panagdakkelda. Wenno gapu ta okupado unay dagiti nagannak, saanda a maipaayan dagiti annakda iti umdas nga atension ken pannakasanay. Ipapan ti dadduma a nagannak a ti panageskuela ti anakda ti kapatgan a banag, isu nga ipaayda iti anakda ti nganngani amin a wayawaya no la ket ta nasayaat ti gradona iti eskuelaan ken makastrek iti mabigbigbig nga unibersidad.
Nupay kasta, kuna ti dadduma a nasken a mabalbaliwan dagiti pagalagadan dagiti nagannak ken ti intero a kagimongan. Kunada a makiramraman dagiti ubbing iti amin a kita ti krimen ken agtultuloy a kumarkaro ti kinaranggas iti eskuelaan. Gapuna, maysa a prinsipal iti haiskul idiay Seoul, Republic of Korea, ti nangipaganetget a nasken a maipangpangruna ti panangpasayaat iti personalidad dagiti ubbing. Kinunana: “Pasayaatem pay nga umuna ti katataona sakbay a makagun-od iti pannakaammo.”
Adu a nagannak nga agtarigagay a makapagkolehio ken makapagballigi ti anakda ti di nangikankano kadagiti patigmaan. No maysakayo a nagannak, ania a kita a tao ti kayatyo a pagbalinan ti anakyo? Maysa a nasingpet ken responsable nga adulto? Maysa a nakonsiderar kadagiti sabsabali, mannakibagay, ken addaan iti positibo a kababalin? No kasta, pangngaasiyo ta usigenyo ti sumaganad nga artikulo.