Malagipyo Pay?

Nagustuanyo met laeng kadi a binasa dagiti nabiit pay a ruar Ti Pagwanawanan? Bueno, kitaenyo no masungbatanyo dagiti sumaganad a saludsod:

• Ania ti mabalin nga aramiden ti maysa a Kristiano no makapasar iti emosional ken naespirituan a pannakapaksuy?

Nasken a mabigbigtayo no ania ti pakaigapuan ti pannakabannogtayo. Mabalin a makatulong ti panangilista kadagiti aktibidad ken ik-ikutantayo, ket ikkaten dagiti di napateg a dadagsen. Mabalintay ti mangipasdek kadagiti realistiko a kalat sigun iti kasasaadtayo. Napateg ti panangaywantayo iti naespirituan a salun-attayo, nga agkalikagum iti regular a panagkararag ken panagmennamenna.​—8/15, panid 23-6.

• Apay a matmatan dagiti Saksi ni Jehova a literal ti numero a 144,000?

Kalpasan a naipakaammo ken ni apostol Juan ti maipapan iti 144,000, nakitana ti “maysa a dakkel a bunggoy, nga awan ti tao a nakabael a mangbilang.” (Apocalipsis 7:4, 9) No simboliko ti numero a 144,000, awan serserbi ti panangidilig kadagita a dua a grupo. Tinukoy ni Jesus dagidiay kakaduana nga agturay kas ti “bassit nga ipastoran.” (Lucas 12:32)​—9/1, panid 30.

• Apay a ti maysa nga Israelita mabalinna idi nga ilako ti di napadara a bangkay ti animal iti maysa a ganggannaet?

Ti maysa a ganggannaet nga umili a saan a proselita ket awan iti sidong ti Linteg. Gapuna, napalubosan ti Israelita a mangited wenno mangilako iti kasta nga animal. (Deuteronomio 14:21) Ngem adda ti proselita iti sidong ti Linteg isu a dina mabalin a kanen ti karne ti kasta a di napadara nga animal. (Levitico 17:10)​—9/15, panid 26.

• Ania ti biomimetics, ken apay a makapainteres dayta kadagiti Kristiano?

Maysa dayta a tay-ak ti siensia a mangikagkagumaan a mangtulad kadagiti disenio ti nakaparsuaan. Kas pagarigan, ti agkabsat a Wright dinisenioda ti maysa nga eroplano kalpasan nga inadalda dagiti dadakkel a tumatayab. No kasta, ti biomimetics mabalinna a tignayen ti Kristiano a mangipadayag iti Namarsua.​—10/1, panid 9.

• Siasino daydiay naipan iti paraiso, kas dakamaten ti 2 Corinto 12:2-4?

Sumarsaruno dayta a teksto kalpasan dagiti bersikulo a naglaon iti panangidepensa ni Pablo iti kinaapostolna. Yantangay awan ti sabali a tao a dinakamat ti Biblia a nakapadas iti kasta ken ni laeng Pablo ti nangisalaysay kadatayo maipapan iti dayta, mabalin a ni Pablo ti nakasirmata iti dayta.​—10/15, panid 8.

• Ania ti sumagmamano kadagiti galad ni Jesus a namagbalin kenkuana a maikari nga agserbi kas Lider a pinili ti Dios?

Sinalimetmetan ni Jesus ti naan-anay a kinatarnaw, a napudno ken nalinteg ti ar-aramidna. Isu ket naan-anay a dedikado iti Dios. Maseknan unay kadagiti tattao ken sidadaan nga agtrabaho.​—11/1, panid 6-7.

• Sadinonto ti ayan dagiti demonio kabayatan ti Milenio?

Lohikal laeng a panunoten a maigarangugongdanto a kadua ni Satanas kabayatan ti Milenio a Panagturay ni Kristo. (Apocalipsis 20:1-3) Impadto ti Genesis 3:15 ti pannakadunor ti ulo ti serpiente, a pakairamanan ti pannakaigarangugongna kabayatan ti Milenio. Iraman ti bin-ina dagiti dakes nga anghel wenno demonio. Ti panagbutengda a maigarangugong ipamatmatna nga ammoda ti umad-adani a pannakaipupokda. (Lucas 8:31)​—11/15, panid 30-1.

• Apay a nasken nga agannad ti maysa a tao no maipapan iti panaginum iti alkohol, uray pay liklikanna ti mabartek?

Adda dagidiay saan a madlaw a nabartek uray adu ti nainumdan. Ngem mabalin nga in-inut nga agbalindanto nga alkoholiko ken ‘adipen iti adu nga arak.’ (Tito 2:3) Namakdaar ni Jesus di la ket ta ‘mapadagsenan ti maysa iti nalabes a pampannangan ken nakaro a panagin-inum.’ (Lucas 21:34, 35) Uray saan a nabartek ti maysa, mabalin a makarikna iti panagdungsa ken panaglaladut​—iti pisikal agraman iti naespirituan.​—12/1, panid 19-21.