Dagiti Milagro—Pudno Wenno Parbo?
DAGUS a nadlaw ti maysa a lalaki ti nakasurat iti sango ti lumablabas a lugan, “Mapaspasamak Dagiti Milagro—Saludsodem Kadagiti Anghel.” Nupay isu ket relihioso, saanna a masigurado no ania ti kaipapanan dayta. Kayatna kadi a sawen a ti drayber ket mamati kadagiti milagro? Wenno maysa dayta nga angaw a mangipasimudaag iti di panamati kadagiti milagro ken anghel?
Mabalin nga interesadokayo iti kinuna ti Aleman nga autor a ni Manfred Barthel: “Ti milagro ket maysa a sao a dagus a mangbingay kadagiti agbasbasa iti dua nga agduma a kapanunotan.” Dagidiay mamati kadagiti milagro kombinsidoda a mapasamak dagita ken mabalin a masansan a mapasamakda.a Kas pagarigan, naipadamag nga idiay Grecia kadagitoy naglabas a sumagmamano a tawen, dagiti mamati iti milagro ibagada a mapaspasamak dagita agarup maminsan iti kada bulan. Daytoy ti makagapu a namakdaar ti obispo ti Greek Orthodox Church: “Dagiti manamati matmatanda ti Dios, ni Maria, ken dagiti sasanto a kas tao. Saan koma a lablabsen dagiti manamati ti panangmatmatda kadagiti bambanag.”
Ti panamati kadagiti milagro ket saan unay a nasaknap kadagiti dadduma a pagilian. Sigun iti surbey ti Allensbach a naipablaak idiay Alemania idi 2002, 71 porsiento kadagiti Aleman ti saan a mamati iti milagro. Ngem karaman kadagiti nakurang a kakatlo a mamati kadagiti milagro ket dagiti tallo a babbai a mangibagbaga a nakaawatda iti mensahe manipud ken Birhen Maria. Sumagmamano a bulan kalpasan ti panagparang kano kadakuada ni Maria—a kadua dagiti anghel ken maysa a kalapati—impadamag ti Aleman a pagiwarnak a Westfalenpost: “Agingga ita, ti nasirmata dagiti babbai ket paginteresan unay ti agarup 50,000 a peregrino, tattao nga agsapsapul iti pannakapaimbag, agraman dagiti agus-usioso.” Adda kanayonan a 10,000 a manamnama nga agaaripuno iti purok tapno maimatanganda ti panagparang manen ni Maria. Dagiti kasta a panagparang ni Birhen Maria ket napasamak kano idiay Lourdes, Francia, idi 1858, ken idiay Fátima, Portugal, idi 1917.
Dagiti Ngay Saan a Kristiano a Relihion?
Ti panamati kadagiti milagro ket agraraira iti nganngani amin a relihion. Ilawlawag ti The Encyclopedia of Religion a dagiti nangipasdek iti Budismo, Kristianidad, ken Islam nagduduma ti panangmatmatda iti milagro, ngem kunana: “Awan duadua nga ipakita ti nagtultuloy a pakasaritaan dagitoy a relihion a dagiti milagro ken estoria maipapan iti milagro ket nagbalin a napateg a paset ti narelihiosuan a biag ti tao.” Kuna daytoy a reperensia a “no dadduma, mangaramid met kadagiti milagro ti mismo a Buddha.” Kalpasan a “nakagteng idiay Tsina ti Budismo, dagiti misionerona ti masansan a mangipakita kadagiti namilagruan a bileg.”
Kalpasan ti panangtukoyna iti kasta a nadumaduma a maipagarup a milagro, kuna dayta nga ensiklopedia: “Ti maysa a tao mabalin a saan a kaskarina a mamati kadagitoy amin nga estoria dagiti relihioso a biograpo maipapan iti milagro, ngem awan duadua a napartuat dagitoy buyogen ti nasayaat a panggep a mangipadayag iti Buddha, a makaipaay iti pannakabalin kadagidiay napinget a pasurotna tapno makaaramidda iti milagro.” Ti isu met laeng a reperensia kunana maipapan iti Islam: “Kaaduan iti komunidad ti Islam nagtultuloyda a nangnamnama iti milagro. Sigun kadagiti sarsarita (hadīths), namin-adu a nagaramid ni Muhammad kadagiti milagro iti publiko. . . . Uray kalpasan ti ipapatayda, dagiti naitanem a sasanto mapapati nga agaramidda iti milagro agpaay kadagiti matalek, ken sipapasnek a maidawdawat ti tulongda.”
Dagiti Ngay Milagro iti Kristianidad?
Agsasabali ti kapanunotan ti adu a kameng ti Kristianidad. Adda dagiti mamati iti salaysay ti Biblia maipapan kadagiti milagro nga inaramid ni Jesu-Kristo wenno dagiti adipen ti Dios sakbay ti panawen Kristiano. Ngem adu ti umanamong iti Protestante a Repormador a ni Martin Luther. Kuna ti The Encyclopedia of Religion maipapan kenkuana: “Agpada nga insurat da Luther ken Calvin a nagngudon ti panawen dagiti milagro ken saan a rumbeng a namnamaen ti pannakapasamak manen dagita.” Ti Iglesia Katolika agtultuloy a mamati kadagiti milagro ngem “saanna nga ilawlawag no kasano ti pannakapasamak dayta,” kuna dayta a reperensia. Nupay kasta, “dagiti managadal a Protestante patienda a ti Kristianidad ket kaaduanna a mainaig iti moralidad, ket ti Dios wenno ti naespirituan a lubong saan a pulos a nakibiang iti biag ti tao iti aniaman a naindaklan a pamay-an.”
Dadduma nga agkunkuna a Kristiano, agraman ti dadduma a klero, pagduaduaanda ti kinapudno dagiti milagro a nadakamat iti Biblia. Alaentayo a pagarigan ti maipapan iti umap-apuy a kayo a naisalaysay iti Biblia iti Exodo 3:1-5. Ti libro a What the Bible Really Says ilawlawagna nga adu nga Aleman a teologo ti di mangibilang iti dayta kas literal a salaysay ti maysa a milagro. Imbes ketdi, tarusanda dayta kas “simbolo ti makin-uneg a pannakidangadang ni Moises iti pannakasidir ken umap-apuy nga ut-ot ti konsiensia.” Kuna pay ti libro: “Dagiti darang mabalin met a matarusan kas sabsabong a kellaat nga agbukirad gapu iti lawag ti init a mangiparangarang iti kaadda ti Dios.”
Mabalin a saan a makapnek kadakayo ti kasta a panangilawlawag. Gapuna, ania ti patiem? Realistiko kadi a patien a napasamak idi dagiti milagro? Ti ngay maipapan kadagiti moderno a milagro? Yantangay ditay mapagsaludsodan dagiti anghel, siasino ti pagsaludsodantayo?
Ti Panangmatmat ti Biblia
Awan ti makailibak a ti Biblia ibagana a bimmallaet idi ti Dios tapno mangaramid kadagiti banag nga imposible a maaramid dagiti tattao. Maipapan kenkuana, mabasatayo: “Inruarmo ti ilim nga Israel manipud iti daga ti Egipto, babaen kadagiti pagilasinan ken babaen kadagiti milagro ken babaen iti maysa a napigsa nga ima ken babaen iti maysa a siuunnat a takiag ken babaen iti dakkel a pagbutbutngan.” (Jeremias 32:21) Panunotenyo, naibabain ti kabilgan a nasion idi kaaldawan ni Moises babaen ti sangapulo a saplit nga impaay ti Dios, agraman ti ipapatay ti inauna nga annakna. Talaga a milagro dayta!—Exodo, kapitulo 7 agingga iti 14.
Sinigsiglo kalpasanna, dagiti uppat a mannurat ti Ebanghelio dineskribirda ti agarup 35 a milagro nga inaramid ni Jesus. Kinapudnona, ipakita dagiti sasaoda nga ad-adu pay a milagro ti inaramidna ngem kadagiti naisalaysay. Pudno kadi wenno parbo dagita a salaysay?b—Mateo 9:35; Lucas 9:11.
No ti Biblia ket talaga a Sao ti Dios a naglaon iti kinapudno, adda ngarud nalawag a rasonmo a mamati kadagiti milagro nga isalaysayna. Nalawag ti panangisalaysay ti Biblia a napasamak dagiti milagro kadagiti nagkauna a tiempo—milagro a panangpaimbag, panangpagungar, ken dadduma pay—ngem ibatadna met nga awanen dagiti kasta a milagro, (Kitaenyo ti kahon a “No Apay a Saanen a Mapaspasamak ti Dadduma a Milagro,” iti panid 4.) Gapuna, kaipapanan kadi daytoy nga uray dagiti mamati iti Biblia saanda a patien dagiti moderno a milagro? Pangngaasiyo ta sukimatenyo ti sungbat iti sumaganad nga artikulo.
[Footnotes]
a Iti daytoy nga artikulo, ti sao a “milagro” ket nausar sigun iti panangdepinar ti maysa a diksionario ti Biblia: “Dagiti gapuanan iti pisikal a lubong a mangartap iti amin a pagaammo a natauan wenno natural a bileg isu a makuna a gapuanan ti karkarna a puersa.”
b Mabalinyo nga usigen dagiti ebidensia a ti Biblia ket nakappapati. Naidatag dagita nga ebidensia iti libro a Ti Biblia—Saot’ Dios Wenno iti Tao nga impablaak dagiti Saksi ni Jehova.
[Kahon iti panid 4]
NO APAY A SAANEN A MAPASPASAMAK TI DADDUMA A MILAGRO
Iti Biblia, nadakamat ti nagduduma a kita ti milagro. (Exodo 7:19-21; 1 Ar-ari 17:1-7; 18:22-38; 2 Ar-ari 5:1-14; Mateo 8:24-27; Lucas 17:11-19; Juan 2:1-11; 9:1-7) Adu kadagitoy a milagro nagserbida a mangipabigbig ken ni Jesus kas ti Mesias, ken pinaneknekanda nga adda kenkuana ti anamong ti Dios. Dagiti nagkauna nga adalan ni Jesus imparangarangda dagiti namilagruan a sagut, kas iti panagsao iti nadumaduma a lenguahe ken pannakatarus kadagiti naipaltiing a sasao. (Aramid 2:5-12; 1 Corinto 12:28-31) Dakkel ti usar dagiti kasta a namilagruan a sagut idi mangrugrugi ti kongregasion Kristiano. Kasano?
Bueno, manmano pay la idi ti kopia ti Kasuratan. Kaaduanna a dagiti laeng nababaknang ti addaan kadagiti aniaman a kita ti lukot wenno libro. Dagiti tattao kadagiti pagano a pagilian dida ammo ti maipapan iti Biblia wenno iti Autorna, ni Jehova. Maiyallatiw laeng ti Nakristianuan a sursuro babaen ti pannakisarita. Nausar dagiti namilagruan a sagut tapno maipakita a ti Dios us-usarenna ti kongregasion Kristiano.
Ngem inlawlawag ni Pablo nga agpatingga dagita a sagut inton awanen ti pakausaranda. “Uray no adda sagsagut ti panagipadto, mapukawdanto; uray no adda dagiti pagsasao, agsardengdanto; uray no adda pannakaammo, mapukawto. Ta addaantayo iti sangkapaset a pannakaammo ken agipadtotayo iti sangkapaset; ngem inton dumteng daydiay naan-anay, daydiay sangkapaset mapukawto.”—1 Corinto 13:8-10.
Ita, dagiti tattao mabalindan ti maaddaan kadagiti Biblia, agraman dagiti konkordansia ken ensiklopedia. Nasurok nga innem a milion a nasanay a Kristiano ti tumultulong kadagiti sabsabali a gumun-od iti naibatay iti Biblia a pannakaammo maipapan iti Dios. Gapuna, saanen a kasapulan dagiti milagro a mangpasingked a ti Dios dinutokanna ni Jesu-Kristo kas Manangispal wenno mangpaneknek nga an-anamongan ni Jehova dagiti adipenna.