Dagiti Milagro ni Jesus​—Ania ti Maadalmo?

NALABIT masdaawkayo no maammuanyo a ti orihinal a sao para iti “milagro” ket saan pulos a nausar kadagiti salaysay ti Biblia maipapan iti biag ni Jesus ditoy daga. No dadduma, ti Griego a sao (dyʹna·mis) a naipatarus kas “milagro” ket literal a kaipapananna “pannakabalin.” (Lucas 8:46) Mabalin met a maipatarus dayta kas “kabaelan” wenno “mannakabalin nga aramid.” (Mateo 11:20; 25:15) Sigun iti maysa nga eskolar, daytoy a Griego a sao “ipaganetgetna ti datdatlag a gapuanan, ken nangnangruna ti pannakabalin a nausar a nangitungpal iti dayta. Ipakitana no kasano nga agtignay ti pannakabalin ti Dios.”

Sabali pay a Griego a sao (teʹras) ti masansan a naipatarus kas “tanda” wenno “datdatlag.” (Juan 4:48; Aramid 2:19) Daytoy a sao itampokna ti reaksion dagiti nakaimatang. Masansan a nasdaaw wenno naklaat dagiti bunggoy ken dagiti adalan gapu kadagiti mannakabalin nga aramid ni Jesus.​—Marcos 2:12; 4:41; 6:51; Lucas 9:43.

Ti maikatlo a Griego a sao (se·meiʹon) a tumukoy kadagiti milagro ni Jesus ipasimudaagna ti “pagilasinan.” Dayta ket “kanayon a tumukoy iti naun-uneg a kaipapanan ti milagro,” kuna ni eskolar Robert Deffinbaugh. Innayonna: “Ti pagilasinan ket maysa a milagro a mangipalgak iti maysa a kinapudno maipapan ken ni Jesus nga Apotayo.”

Ilusion Wenno Inted-Dios a Pannakabalin?

Saan nga ibaga ti Biblia a dagiti milagro ni Jesus ket kinasikap wenno ilusion a nadisenio a manglinglingay kadagiti tattao. Dagitoy ket parangarang ti “natan-ok a pannakabalin ti Dios,” kas iti kaso ti maysa nga ubing a nagunggan ti sairo a pinagtalaw ni Jesus. (Lucas 9:37-43) Dagiti kadi kasta a datdatlag saan a kabaelan nga aramiden ti Mannakabalin-amin a Dios​—Daydiay nadakamat nga addaan iti ‘naruay a dinamiko nga enerhia’? (Isaias 40:26) Siempre kabaelanna!

Kadagiti salaysay ti Ebanghelio, adda nadakamat nga agarup 35 a milagro ni Jesus. Ngem saan a naipalgak ti pakadagupan a bilang dagiti milagrona. Kas pagarigan, kuna ti Mateo 14:14: “[Ni Jesus] nakitana ti maysa a dakkel a bunggoy; ket simnek ti asina kadakuada, ket inagasanna dagiti masakitda.” Saan a nadakamat no mano a masakit ti pinaimbagna iti dayta a kanito.

Napateg dagiti kasta a datdatlag iti panangipabigbig ni Jesus nga isu ti Anak ti Dios, ti naikari a Mesias. Kinapudnona, ipakita ti Kasuratan a naaramidan ni Jesus dagiti milagro gapu iti pannakabalin nga inted ti Dios. Ni apostol Pedro tinukoyna ni Jesus kas “maysa a lalaki nga imparang a silalatak kadakayo ti Dios babaen kadagiti mannakabalin nga aramid ken kadagiti tanda ken kadagiti pagilasinan nga inaramid ti Dios babaen kenkuana iti nagtetengngaanyo, a kas iti pagaammoyo a mismo.” (Aramid 2:22) Iti sabali a gundaway, impaganetget ni Pedro a ni Jesus ket “pinulotan ti Dios iti nasantuan nga espiritu ken pannakabalin, ket namagpagna iti daga nga ar-aramidenna ti naimbag ket papaimbagenna amin dagidiay inrurumen ti Diablo; agsipud ta ti Dios adda kenkuana.”​—Aramid 10:37, 38.

Dagiti milagro ni Jesus ket nainaig unay iti mensahena. Dakamaten ti Marcos 1:21-27 ti reaksion dagiti tattao iti pannursuro ni Jesus ken iti maysa kadagiti milagrona. Kuna ti Marcos 1:22 a dagiti tattao “nagsiddaawda unay iti wagas ti panangisurona,” ken ti bersikulo 27 ibagana a ‘nagmalmalanga’ dagiti tattao idi pinaruarna ti sairo. Dagiti milagro ken mensahe ni Jesus agpada a paneknekanda nga isu ti naikari a Mesias.

Saan la a basta kinuna ni Jesus nga isu ti Mesias; malaksid kadagiti sao ken dadduma nga aramidna, pinaneknekanna nga isu ti Mesias babaen ti inted-Dios a pannakabalinna a naiparangarang kadagiti milagrona. Idi timmaud dagiti saludsod maipapan iti akem ken autoridadna, situtured nga insungbat ni Jesus: “Addaanak iti pangsaksi a dakdakkel ngem iti pangsaksi ni Juan [a Mammautisar], ta ti mismo nga ar-aramid nga intuding kaniak ni Amak nga itungpalko, dagiti mismo a trabaho nga ar-aramidek, saksianda ti maipapan kaniak a ti Ama imbaonnak.”​—Juan 5:36.

Dagiti Pammaneknek nga Autentiko

Apay a masiguradotayo nga agpayso, autentiko dagiti milagro ni Jesus? Usigenyo ti sumagmamano a pammaneknek nga autentiko dagita.

Idi inaramidna dagiti milagrona, saan a pulos a nagpannakkel ni Jesus. Siniguradona a ti Dios ti mapadayawan ken maipadayag kadagiti aniaman a milagrona. Kas pagarigan, sakbay a pinaimbagna ti maysa a lalaki a bulsek, inggunamgunam ni Jesus a maaramid ti pannakapaimbag “tapno maiparangarang dagiti aramid ti Dios iti kasasaadna.”​—Juan 9:1-3; 11:1-4.

Saan a kas kadagiti ilusionista, salamangkero, ken mangngagas babaen ti pammati, saan a pulos a nagusar ni Jesus iti hipnotismo, kinasikap, mamag-amanga a panagpabuya, sinasalamangka nga orasion, wenno emosional a ritual. Saan a nagusar iti panaganito wenno reliko. Imutektekanyo ti saan a naparammag a panangpaimbag ni Jesus iti dua a bulsek. “Idi simnek ti asina,” kuna ti salaysay, “sinagid ni Jesus dagiti matada, ket dagus a nakakitada, ket simmurotda kenkuana.” (Mateo 20:29-34) Awan ti ritual, seremonia, wenno naparammag a panagipabuya. Saan a nalimed ti panangaramid ni Jesus kadagiti milagrona, masansan nga adu ti nakaimatang kadagita. Saan a nagusar iti espesial a silaw, entablado, wenno dekorasion. Maisupadi iti dayta, masansan a di mapaneknekan dagiti maibagbaga a moderno a milagro.​—Marcos 5:24-29; Lucas 7:11-15.

No dadduma, binigbig ni Jesus ti pammati dagidiay nagunggonaan kadagiti milagrona. Ngem ti kinaawan pammati ti maysa a tao saan a nakalapped ken ni Jesus a mangaramid iti milagro. Bayat ti kaaddana idiay Capernaum iti Galilea, “dagiti tattao nangyegda kenkuana iti adu a tattao a nagunggan ti sairo; ket pinaruarna dagiti espiritu babaen iti sao, ken inagasanna amin nga agsagsagaba iti nakaro.”​—Mateo 8:16.

Naaramid dagiti milagro ni Jesus tapno maipaay dagiti pisikal a kasapulan dagiti tattao, saan a tapno mapagustuan dagiti managusioso. (Marcos 10:46-52; Lucas 23:8) Ken saan a pulos a nangaramid ni Jesus kadagiti milagro para iti aniaman a pagnam-ayanna.​—Mateo 4:2-4; 10:8.

Mapagtalkan Kadi Dagiti Salaysay ti Ebanghelio?

Naisalaysay kadatayo dagiti milagro ni Jesus babaen dagiti uppat nga Ebanghelio. Addada kadi rason a mapagpiaran dagitoy a salaysay bayat a sukimatentayo ti kinaagpayso dagiti milagro ni Jesus? Wen, addada.

Kas nadakamaten, naimatangan ti publiko dagiti milagro ni Jesus. Naisurat dagiti kaunaan nga ebanghelio bayat a sibibiag pay ti kaaduan kadagiti nakasaksi. Mainaig iti kinamapagpiaran dagiti mannurat ti Ebanghelio, kuna ti libro a The Miracles and the Resurrection: “Di pulos nainkalintegan ti akusasion a dagiti mannurat ti Ebanghelio ginagarada nga inlimed dagiti historikal a kinapudno babaen dagiti adu a milagro tapno maitandudoda ti narelihiosuan a pammati. . . . Pudno dagiti insuratda.”

Dagiti Judio a bumusbusor iti Kristianidad saanda a pulos a sinupiat dagiti milagro a nadeskribir kadagiti Ebanghelio. Kinuestionda laeng ti pannakabalin a makinggapuanan kadagita. (Marcos 3:22-26) Uray dagiti simmaruno a kritiko dida nailibak dagiti milagro ni Jesus. Imbes ketdi, bayat ti umuna ken maikadua a siglo K.P., adda dagiti reperensia a nangtukoy kadagiti milagro nga inaramid ni Jesus. Nalawag, addaantayo kadagiti natalged a rason a mangibilang nga autentiko dagiti salaysay dagiti Ebanghelio maipapan kadagiti milagrona.

Ti Tao a Nangaramid Kadagiti Milagro

Saan a naan-anay ti panangusig kadagiti milagro ni Jesus no naibatay laeng dayta kadagiti lohikal nga argumento maipapan iti kinaautentiko dagita. Iti panangdeskribirda kadagiti milagro ni Jesus, ipalgak dagiti Ebanghelio ti maysa a tao a mannakipagrikna ken di maartapan ti kinamanangngaasina, a maseknan unay iti pagimbagan dagiti padana a tao.

Utobenyo ti kaso ti maysa nga agkukutel nga immasideg ken ni Jesus ket impakpakaasina: “No kayatmo laeng koma, kabaelannak a dalusan.” “Simnek ti asi” ni Jesus ket sinagidna ti agkukutel, a kunkunana: “Kayatko. Madalusanka koma.” Dagus nga immimbag ti lalaki. (Marcos 1:40-42) Mannakipagrikna ngarud ni Jesus ket dayta ti nangtignay kenkuana nga agaramid iti milagro babaen ti pannakabalin nga inted kenkuana ti Dios.

Ania ti napasamak idi nasabet ni Jesus ti maysa a pamumpon manipud siudad ti Nain? Ti natay a barito ket kakaisuna nga anak ti maysa a balo a babai. Idi “simnek ti asina” iti babai, immasideg ni Jesus ket kinunana kenkuana: “Sumardengka nga agsangsangit.” Kalpasanna, pinagungarna ti anak ti balo.​—Lucas 7:11-15.

Ti makaliwliwa a leksion kadagiti milagro ni Jesus isu ti panagtignayna a tumulong kadagiti tattao gapu ta “simnek ti asina.” Ngem saan la a basta historia dagita a milagro. “Ni Jesu-Kristo isu met laeng idi kalman ken ita, ken iti agnanayon,” kuna ti Hebreo 13:8. Ni Jesus ket agturturay itan kas Ari idiay langit, a nakasagana ken makabael a mangusar iti inted-Dios a milagro a pannakabalinna iti nasaksaknap a pamay-an ngem iti inaramidna idi ditoy daga kas maysa a tao. Iti din agbayag, usaren dagita ni Jesus a mangpaimbag iti natulnog a sangatauan. Dagiti Saksi ni Jehova siaayatda a tumulong kadakayo a mangammo iti ad-adu pay maipapan iti daytoy naraniag a masanguanan.

[Dagiti Ladawan iti panid 4, 5]

Dagiti milagro ni Jesus ket parangarang ti “natan-ok a pannakabalin ti Dios”

[Ladawan iti panid 7]

Mannakipagrikna ni Jesus