Salsaludsod Dagiti Agbasbasa
Saan ngata nga inkompromiso ni apostol Pablo ti Nakristianuan a pammatina idi kinunana iti saklang ti Sanhedrin: “Maysaak a Fariseo”?
Tapno matarusantayo ti kinuna ni Pablo a masarakan iti Aramid 23:6, masapul nga usigentayo ti konteksto dayta a bersikulo.
Kalpasan a rinaut dagiti Judio idiay Jerusalem, kinasarita ni Pablo ti bunggoy. Dinakamatna nga isu ket ‘nagadal [idiay Jerusalem] iti sakaanan ni Gamaliel, a nasursuruan sigun iti kinainget ti Linteg dagiti inapo.’ Nupay apagbiit nga immimdeng ti bunggoy iti pannakirinnason ni Pablo, bimmara idi agangay ti pungtot ti bunggoy, isu a ti komandante ti militar impanna ni Pablo iti kuartel dagiti soldado. Sakbay ti pannakasaplitna, kinuna ni Pablo: “Nainkalintegan kadi a saplitenyo ti tao a taga Roma ken di nakondenar?”—Aramid 21:27–22:29.
Iti simmaruno nga aldaw, ti komandante impanna ni Pablo iti saklang ti nangato a korte ti Judio, ti Sanhedrin. Miningmingan a naimbag ni Pablo ti Sanhedrin ket nakitana a buklen dayta dagiti Saduceo ken Fariseo. Kinunana ngarud: “Lallaki, kakabsat, maysaak a Fariseo, maysa nga anak dagiti Fariseo. Mauk-ukomak maipapan iti namnama a panagungar dagiti natay.” Kas resultana, timmaud ti panagririkiar iti nagbabaetan dagiti Fariseo ken Saduceo, “ta kuna dagiti Saduceo nga awan panagungar wenno uray anghel wenno uray espiritu, ngem dagiti Fariseo silalatak nga ideklarada amin dagita.” Makapungtot a kinuna dagiti kameng ti Fariseo: “Awan masarakanmi a dakes itoy a tao.”—Aramid 23:6-10.
Gapu ta agdindinamag ni Pablo kas maysa a nakaregregta a Kristiano, saanna a komkombinsiren ti Sanhedrin nga isu ket aktibo a kameng ti sekta dagiti Fariseo. Dagiti presente a Fariseo dida bigbigen a kaduada ti asinoman a saan a mamati kadagiti amin a sursuroda. Gapuna, adda laeng limitado a saklawen ti sasao ni Pablo idi kinunana nga isu ket maysa a Fariseo. Ammo dagiti presente a Fariseo no ania ti kayatna a sawen.
Idi kinunana nga isu ket mauk-ukom gapu iti namnama a panagungar dagiti natay, nalawag a kayat a sawen ni Pablo nga iti dayta a banag a kapadana dagiti Fariseo. No adda panagsusupiat iti daytoy a topiko, adda ni Pablo iti dasig dagiti Fariseo yantangay saan a mamati dagiti Saduceo iti panagungar.
Ti patpatien ni Pablo kas Kristiano ket saan a maisupadi kadagiti patpatien dagiti Fariseo no maipapan iti panagungar, anghel, ken dadduma nga aspeto ti Linteg. (Filipos 3:5) Gapuna, no maipapan kadagitoy a bambanag, innaig ni Pablo ti bagina kadagiti Fariseo, ket dayta ti kayat a sawen ni Pablo a naawatan dagiti presente iti Sanhedrin. Us-usarenna ngarud ti nalikudanna kas maysa a Judio tapno sarangtenna ti mangidumduma a korte suprema dagiti Judio.
Ngem ti kangrunaan a pammaneknek a saan nga inkompromiso ni Pablo ti pammatina ket ti agtultuloy nga anamong ni Jehova. Iti rabii kalpasan nga insawang ni Pablo dayta a napagduaduaan a balikasna, kinuna ni Jesus: “Agtalgedka! Ta no kasano a nangipapaayka iti naan-anay a pangsaksi iti bambanag maipapan kaniak ditoy Jerusalem, kasta met a masapul a mangsaksika idiay Roma.” Gapu ta nataginayon ni Pablo ti anamong ti Dios, maikunatayo a saan nga inkompromiso ni Pablo ti Nakristianuan a pammatina.—Aramid 23:11.