Salsaludsod Dagiti Agbasbasa
Gapu ta ni Ari Solomon iti nagkauna nga Israel tinallikudanna ti Dios bayat ti kinalakayna, maikunatayo kadi nga isu ket saanen a mapagungar?—1 Ar-ari 11:3-9.
Nupay ti Biblia dakamatenna ti dadduma a lallaki ken babbai nga adipen ti Dios a sigurado a mapagungar, saanna nga espesipiko a dinakamat ti amin a nagan dagidiay mapagungar. (Hebreo 11:1-40) No maipapan ken ni Solomon, maaddaantayo iti kapanunotan iti panangmatmat ti Dios babaen ti panangidiligtayo iti napasamak kenkuana idi natay ken iti napasamak kadagiti dadduma a matalek idi natayda.
Dinakamat ti Kasuratan ti dua laeng a mabalin a pagbanagan dagiti natay—ti temporario a kinaawan ti biag ken ti agnanayon nga ipapatay. Dagidiay naukom a di maikari iti panagungar naitapuakda iti “Gehenna,” wenno “iti danaw nga apuy.” (Mateo 5:22; Marcos 9:47, 48; Apocalipsis 20:14) Karaman kadakuada ti umuna nga agassawa, da Adan ken Eva, ti manangliput a ni Judas Iscariote, ken dagidiay pinapatay ti Dios a kas kadagiti tattao idi kaaldawan ni Noe ken dagiti taga-Sodoma ken Gomorra.a No matayda, dagidiay maparaburan iti panagungar addada iti tanem ti sangatauan—ti Sheol, wenno Hades. No maipapan iti masakbayanda, kuna ti Biblia: “Ti baybay inyawatna dagidiay natay nga adda kenkuana, ket ni patay ken ti Hades inyawatda dagidiay natay nga adda kadakuada, ket naukomda a tumunggal maysa sigun kadagiti aramidda.”—Apocalipsis 20:13.
Dagiti ngarud matalek a nadakamat iti Hebreo kapitulo 11 addada iti Sheol, wenno Hades, nga ur-urayenda ti panagungar. Karaman kadagita dagiti nasungdo nga adipen ti Dios kas ken Abraham, Moises, ken David. Ita, usigentayo ti kuna ti Biblia no maipapan iti ipapatayda. “No maipapan kenka,” kinuna ni Jehova ken ni Abraham, “mapankanto a sitatalna kadagidi ammam; maitabonkanto iti naimbag a kinalakay.” (Genesis 15:15) Kinuna ni Jehova ken ni Moises: “Adtoy! Makikaiddaka kadagidi ammam.” (Deuteronomio 31:16) No maipapan ken ni David nga ama ni Solomon, kuna ti Biblia: “Nakikaidda ni David kadagidi ammana ket naitabon idiay Siudad ni David.” (1 Ar ari 2:10) Gapuna, ti ebkas a ‘pannakikaidda kadagiti amma’ ket sabali a pamay-an ti panangibaga a napan ti maysa a tao iti Sheol.
Ania ti napasamak ken ni Solomon idi natay? Sumungbat ti Biblia: “Dagiti aldaw a panagturay ni Solomon idiay Jerusalem iti intero nga Israel uppat a puloda a tawen. Kalpasanna nakikaidda ni Solomon kadagidi ammana, ket naitabon idiay Siudad ni David nga amana.” (1 Ar-ari 11:42, 43) Gapuna, rasonable a panunoten nga adda ni Solomon idiay Sheol, wenno Hades, ket ur-urayenna ti panagungarna.
Ipasimudaag daytoy a konklusion a posible a mapagungar dagidiay espesipiko a tinukoy ti Kasuratan kas ‘nakikaidda kadagiti ammada.’ Kinapudnona, adu kadagiti saan a matalek nga ari a simmaruno ken ni Solomon ti natukoy met a nakikaidda kadagiti ammada idi natayda. Saan a pagsiddaawan dayta a konklusion yantangay “addanto panagungar agpadpada dagiti nalinteg ken dagiti nakillo.” (Aramid 24:15) Siempre, kalpasan laeng a mapagungar “dagidiay adda kadagiti pakalaglagipan a tanem” a masiertotayo no siasino dagidiay naparaburan iti panagungar. (Juan 5:28, 29) Imbes ngarud nga agbalin a dogmatiko no siasino kadagiti nagkauna a tattao ti mapagungar, aguraytayo buyogen ti panagtalek nga awan pagkurangan ti pangngeddeng ni Jehova.
[Footnote]