Salsaludsod Dagiti Agbasbasa
Ti kadi sao a “nalabit” iti Sofonias 2:3 kaipapananna a dagiti adipen ti Dios saanda a masigurado a magun-od ti biag nga agnanayon?
Kuna dayta a teksto: “Sapulenyo ni Jehova, dakayo amin a naemma iti daga, a nangannurot iti bukodna a hudisial a pangngeddeng. Sapulenyo ti kinalinteg, sapulenyo ti kinaemma. Nalabit maitalimengkayo iti aldaw ti unget ni Jehova.” Apay nga inusar daytoy a bersikulo ti “nalabit”?
Tapno matarusantayo no kasano a tamingen ni Jehova inton Armagedon dagidiay matalek kenkuana, makatulong a lagipen ti kuna ti Biblia maipapan iti no ania ti aramiden ti Dios kadagidiay matay sakbay dayta a tiempo ti panangukom. Dadduma ti mapagungar iti imortal a biag kas espiritu a parparsua idiay langit, idinto a dadduma ti mapagungar ditoy daga buyogen ti namnama nga agbiagda nga agnanayon iti Paraiso. (Juan 5:28, 29; 1 Corinto 15:53, 54) No laglagipen ken gunggonaan ni Jehova dagiti nasungdo kenkuana a natay sakbay ti Armagedon, sigurado a kasta met laeng ti aramidenna kadagiti adipenna a sibibiag bayat ti aldaw ti pungtotna.
Makaparegta met dagiti naipaltiing a sasao ni apostol Pedro. Insuratna: “[Ti Dios] inaywananna ni Noe, maysa a manangaskasaba iti kinalinteg, a sitatalged agraman ti pito a sabsabali pay idi nangyeg iti layus iti lubong dagiti di nadiosan a tattao; ket babaen ti panangpadapo kadagiti siudad ti Sodoma ken Gomorra kinondenarna ida, . . . ket inispalna ni nalinteg a Lot, . . . Ammo ni Jehova no kasano ti mangispal kadagiti tattao nga addaan nadiosan a debosion manipud iti pannakasuot, ngem isaganana dagiti nakillo a tattao maipaay iti aldaw a panangukom tapno magessatda.” (2 Pedro 2:5-9) Nupay dinadael ni Jehova dagiti nadangkes idi naglabas, inispalna da Noe ken Lot, a simamatalek a nagserbi kenkuana. Iti panangdadaelna kadagiti nadangkes inton Armagedon, ispalen met ni Jehova dagiti tattao nga addaan iti nadiosan a debosion. Makalasatto ti “maysa a dakkel a bunggoy” dagiti nalinteg a tattao.—Apocalipsis 7:9, 14.
Agparang ngarud a ti pannakausar ti “nalabit” iti Sofonias 2:3 ket saan a gapu ta mapagduaduaan ti abilidad ti Dios a mangispal kadagidiay anamonganna. Imbes ketdi, ti pannakaitalimeng ti maysa a tao iti aldaw ti pungtot ni Jehova ket maysa a posibilidad no rugiannan a sapulen ti kinalinteg ken kinaemma. Agpannuray ti pannakaispal ti maysa iti panangitultuloyna a mangsapul iti kinaemma ken kinalinteg.—Sofonias 2:3.
[Ladawan iti panid 31]
“Ammo ni Jehova no kasano ti mangispal kadagiti tattao nga addaan nadiosan a debosion manipud iti pannakasuot”