Liklikan ti Di Umiso a Panagpampanunot!

IDI agsagsagaba iti didigra ni patriarka a Job, isu ket sinarungkaran dagiti tallo a gagayyemna a da Elifaz, Bildad, ken Zofar. Immayda makipagrikna ken mangliwliwa. (Job 2:11) Ni Elifaz ti kaimpluensiaan ken nalabit kalakayan kadakuada a tallo. Isu ti immuna a nagsao ken kaaduan iti imbaga. Ania a panagpampanunot ti imparangarang ni Elifaz kadagiti tallo nga argumentona?

Insalaysayna ti karkarna a kapadasanna: “Ti maysa nga espiritu a mismo limmabas iti rupak; ti dutdot ti lasagko nangrugi a sumgar. Nagtakderen a siiintek, ngem saanko a nailasin ti langana; maysa a porma adda idi iti sanguanan dagiti matak; adda idi talinaay, ket nakangngegak ita iti timek.” (Job 4:15, 16) Ania nga espiritu ti nangimpluensia iti panagpampanunot ni Elifaz? Sigurado a saan a maysa kadagiti nalinteg nga anghel ti Dios gapu ta mangumsi ti tono dagiti simmaruno a sinaona. (Job 4:17, 18) Maysa dayta a dakes nga espiritu. Ta no saan, apay koma a tinubngar ni Jehova da Elifaz ken ti dua a kakaduana gapu iti panagsaoda iti kinaulbod? (Job 42:7) Wen, ni Elifaz ket inimpluensiaan ti maysa a demonio. Dagiti komentona iyanninawda ti dakes a panagpampanunot.

Aniada a kapanunotan ti iyanninaw dagiti sasao ni Elifaz? Apay a napateg nga agannadtayo maibusor ti di umiso a panagpampanunot? Ken ania dagiti mabalintay nga aramiden tapno maliklikantayo dayta?

“Kadagiti Adipenna Isu Awanan iti Pammati”

Kadagiti tallo a panagbitla ni Elifaz, pinagparangna a ti Dios napalalo, nga awan ti aniaman nga aramiden dagiti adipenna a mabalin a mangay-ayo kenkuana. “Adtoy! Kadagiti adipenna isu awanan iti pammati,” kinuna ni Elifaz ken ni Job, “ket dagiti mensaherona [wenno, anghelna] pabasolenna iti panagbiddut.” (Job 4:18) Kalpasanna kinuna ni Elifaz maipapan iti Dios: “Isu awanan panamati kadagidiay sasantona, ket dagiti met laeng langit pudno a saanda a nadalus kadagiti matana.” (Job 15:15) Iyimtuodna pay: “Addaan aya ti Mannakabalin-amin iti aniaman a pakaragsakan ta nalintegka?” (Job 22:3) Immanamong ni Bildad iti dayta a panangmatmat ta kinunana: “Adda uray ti bulan, ket saan a naraniag; ket dagiti met laeng bituen saanda a napaneknekan a nadalus kadagiti mata [ti Dios].” (Job 25:5).

Masapul nga agannadtayo tapno saantayo a maimpluensiaan iti kasta a panagpampanunot. Mabalin nga ituggodnatayo a panunoten a nalabes ti kalkalikaguman ti Dios kadatayo. Dangran ti kasta a panangmatmat ti mismo a relasiontayo ken ni Jehova. Maysa pay, no tuladentayo ti kasta a panagrasrason, anianto ti reaksiontayo no adda mangted kadatayo iti kasapulantayo a disiplina? Imbes a sipapakumbaba nga ipangagtayo ti panangatur, mabalin ketdi a ti pusotayo “makapungtot a maibusor ken Jehova a mismo,” ket agsakit ti nakemtayo iti Dios. (Proverbio 19:3) Anian a makadadael dayta iti espiritualidadtayo!

“Ti Maysa a Nabaneg a Lalaki Addaan Aya iti Usar iti Dios?”

Ti kapanunotan a nakais-istrikto ti Dios ket mainaig unay iti ideya nga awan kano ti serserbi dagiti tattao iti panangmatmat ti Dios. Ti maikatlo nga imbitla ni Elifaz ket naglaon iti kastoy a saludsod: “Ti maysa a nabaneg a lalaki addaan aya iti usar iti Dios a mismo, iti kasta rebbeng nga addaan usar maipaay kenkuana ti asinoman nga adda pannakatarusna?” (Job 22:2) Iparparipirip ni Elifaz nga awan serserbi dagiti tattao iti imatang ti Dios. Umasping iti dayta, inrason ni Bildad: “Kasano a ti mortal a tao adda iti umiso iti imatang ti Dios, wenno kasano a nadalus ti maysa a nayanak iti babai?” (Job 25:4) Sigun iti dayta a panagrasrason, apay koma a ni Job, a maysa laeng a mortal, ibilangna nga adda nalinteg a takderna iti imatang ti Dios?

Dadduma a tattao ita ti negatibo ti panagriknada kadagiti bagida. Mabalin a resulta dayta ti wagas ti pannakapadakkel, pannakaisarang kadagiti pakarigatan ti biag, wenno panagbalin a biktima ti pananggura iti rasa wenno puli. Pagragsakan met ni Satanas ken dagiti demoniona ti mangikuspil iti maysa a tao. No maipariknada iti indibidual nga awan ti aniaman nga aramidna a makaay-ayo iti Mannakabalin-amin a Dios, nalaklaka a maupay dayta nga indibidual. Inton agangay, sumiasi dayta a tao, umadayonto pay ketdi, manipud iti sibibiag a Dios.​—Hebreo 2:1; 3:12.

Ti panaglakay ken panagkapuy ti salun-at limitaranda ti magapuanantayo. Mabalin a kasla basbassit ti maar-aramidantayo a panagserbi iti Pagarian no idiligtayo iti naaramidantayo idi ub-ubing, nasalsalun-at, ken napigpigsatayo. Anian a nagpateg a laglagipentayo a kayat ni Satanas ken dagiti demoniona a mariknatayo a saan a makaay-ayo iti Dios ti aniaman nga aramidentayo! Nasken a liklikantayo ti kasta a panagpampanunot.

No Kasano a Liklikan ti Negatibo a Panagpampanunot

Nupay pinagsagaba ni Satanas a Diablo, kinuna ni Job: “Agingga a mauyos ti biagko saankonto nga ikkaten kaniak ti kinatarnawko!” (Job 27:5) Gapu ta ay-ayatenna ti Dios, determinado ni Job a mangtaginayon iti kinatarnawna aniaman ti mapasamak, ket awan ti aniaman a mamagbalbaliw iti dayta. Masursurotayo ditoy ti maysa a napateg a tulong tapno maliklikantayo ti negatibo a panagpampanunot. Masapul a maawatantayo a naimbag ti ayat ti Dios ken patanorentayo ti naimpusuan a panangipateg iti dayta. Kasapulan met a maaddaantayo iti nasged nga ayat kenkuana. Maaramidtayo dayta no regular nga adalentayo ti Sao ti Dios ken sikakararag a mennamennaentayo dagiti maad-adaltayo.

Kas pagarigan, kuna ti Juan 3:16: “Ti Dios inayatna ti lubong iti kasta unay isu nga intedna ti bugbugtong nga Anakna.” Kasta unay ti panagayat ni Jehova iti sangatauan, ket naiparangarang dayta nga ayat kadagiti pannakilangenna kadagiti tattao iti panaglabas ti panawen. Ti panangmennamenna kadagiti pagarigan kadagiti naglabas tulongannatayo a mangipateg ken ni Jehova ken mangparayray iti panagayattayo kenkuana, a tumulong tapno maliklikan ti di umiso wenno negatibo a panagpampanunot.

Usigentayo no kasano a trinato ni Jehova ni Abraham idi asidegen a madadael ti Sodoma ken Gomorra. Namin-walo a nagimtuod ni Abraham ken ni Jehova mainaig iti panangukomna. Saan pulos a nangipakita ni Jehova iti panagrurod wenno pannakadismaya. Imbes ketdi, dagiti sungbatna ket nangpatalged ken nakaliwliwa ken ni Abraham. (Genesis 18:22-33) Idi insalakan ti Dios da Lot ken ti pamiliana manipud Sodoma, kiniddaw ni Lot nga agkamangda iti kabangibang a siudad imbes nga iti bambantay. Simmungbat ni Jehova: “Adtoy ipakitaanka iti konsiderasion agingga pay iti daytoy, babaen ti saanko a panangduprak iti siudad a nasaom.” (Genesis 19:18-22) Ipakita kadi dagitoy a salaysay a nakais-istrikto, di managayat, diktador nga agturay ni Jehova? Saan. Ipakitada no ania a talaga ti Dios​—maysa a naayat, naimbag, naasi, ken mannakaawat a Soberano.

Dagiti kapadasan da Aaron, David, ken Manases iti nagkauna nga Israel paneknekanda nga ulbod ti ideya a ti Dios ket managbirok iti kamali ken awan ti asinoman a makaay-ayo kenkuana. Nakaaramid ni Aaron iti tallo a nadagsen a basol. Nangaramid iti balitok a sinan-urbon a baka, nakikadua ken ni kabsatna a Miriam a nangbabalaw ken ni Moises, ken dina sinantipikar ken pinadayawan ti Dios idiay Meriba. Nupay kasta, kinita ni Jehova dagiti agkakaimbag a galadna ket impalubosna nga agtultuloy daytoy nga agakem kas nangato a padi agingga a sibibiag.​—Exodo 32:3, 4; Numeros 12:1, 2; 20:9-13.

Bayat ti panagturayna, nakaaramid ni Ari David kadagiti nadagsen a basol kas iti pannakikamalala, panangigakat iti pannakapapatay ti maysa nga inosente a lalaki, ken ilegal a panangbilang kadagiti umili. Nupay kasta, nakita ni Jehova ti panagbabawi ni David ket sisusungdo nga impatungpalna ti tulag ti Pagarian babaen ti panangipalubosna kenkuana nga agtultuloy nga agturay agingga a sibibiag.​—2 Samuel 12:9; 1 Cronicas 21:1-7.

Ni Manases nga ari ti Judea binangonna dagiti altar ni Baal, impalabasna dagiti annakna iti apuy, intandudona dagiti espiritistiko nga aramid, ken nangbangon kadagiti palso a narelihiosuan nga altar kadagiti paraangan ti templo. Ngem kalpasan ti naimpusuan a panagbabawina, pinakawan ni Jehova, winayawayaanna manipud pannakakautibo, ken insublina kenkuana ti kinaarina. (2 Cronicas 33:1-13) Aramiden kadi ti Dios dagita no saan a napateg kenkuana ti asinoman? Saan la ketdi.

Ti Ulbod a Mangak-akusar ti Mismo a Makinggalad Kadagita

Saantay a pakasdaawan a ni Satanas ti kangrunaan a mangiparparangarang kadagiti mismo a galad nga ipabpabasolna ken ni Jehova. Nagubsang ken napalalo ni Satanas. Naglawag a makita dayta iti aramid a panangidaton kadagiti annak mainaig iti palso a panagdayaw idi naglabas a panawen. Dagiti apostata nga Israelita pinuoranda dagiti annakda a lallaki ken babbai​—banag a di pulos pinanunot ni Jehova.​—Jeremias 7:31.

Ni Satanas, saan a ni Jehova, ti nalaing nga agbirok iti kamali. Ti Apocalipsis 12:10 tukoyenna ni Satanas kas “ti manangakusar kadagiti kakabsattayo, daydiay mangak-akusar kadakuada iti aldaw ken rabii iti sanguanan ti Diostayo!” Iti sabali a bangir, no maipapan ken ni Jehova, inkanta ti salmista: “No dagiti biddut koma ti siputam, O Jah, O Jehova, siasino ti makapagtakder? Ta adda kenka ti pudno a panangpakawan.”​—Salmo 130:3, 4.

Inton Awanen ti Di Umiso a Panagpampanunot

Anian a pannakabang-ar dagiti anghel idi naitapuak manipud langit ni Satanas a Diablo ken dagiti demoniona! (Apocalipsis 12:7-9) Kalpasanna, saanen a nakaapektar dagitoy a dakes nga espiritu kadagiti aktibidad dagiti anghel a kameng ti pamilia ni Jehova idiay langit.​—Daniel 10:13.

Dagiti agnanaed ditoy daga agrag-odanto iti asideg a masanguanan. Iti din agbayag, maysa nga anghel manipud langit nga addaan iti tulbek ti mangliwengweng ken dakkel a kawar iti imana ti mangparaut ken ni Satanas ken kadagiti demoniona ken itapuakna ida iti mangliwengliweng ti kinaawan gaway. (Apocalipsis 20:1-3) Anian a pannakabang-ar ti masagraptayo no mapasamakto dayta!

Kabayatanna, masapul nga agannadtayo maibusor iti di umiso a panagpampanunot. Tunggal mariknatayo a mangrugi nga agpanunottayo iti di umiso wenno negatibo a banag, nasken a liklikantayo dayta babaen ti panangipamaysatayo iti panunottayo iti ayat ni Jehova. Iti kasta, ‘ti talna ti Dios a mangringbaw iti isuamin a panunot saluadannanto dagiti pusotayo ken dagiti pannakabalin ti isiptayo.’​—Filipos 4:6, 7.

[Ladawan iti panid 26]

Liniklikan ni Job ti negatibo a panagpampanunot

[Ladawan iti panid 28]

Nabigbig ni Lot a maysa a mannakaawat a Soberano ni Jehova