Pakasaritaan ti Biag

Nagun-odko ‘Dagiti Kiddaw ti Pusok’

KAS INSALAYSAY NI DOMINIQUE MORGOU

Idi Disiembre 1998, nakagtengak met laeng idiay Africa kamaudiananna! Natungpalen ti arapaapko idi ubingak. Nabayagen nga ar-arapaapek a makita dagiti nalawa a katanapan ken makakayaw nga atap nga an-animal ti Africa. Ket ita addaakon iti dayta a pagilian! Malaksid iti dayta, natungpal ti sabali pay nga arapaapko. Maysaak nga amin-tiempo nga ebanghelisador nga agserserbi iti ganggannaet a pagilian. Adu ti nalabit mangibaga nga imposible dayta. Nakapuy unay ti panagkitak, ken magnaak kadagiti nadarat a kalsada kadagiti purok iti Africa babaen ti panangigiya ti maysa nga aso a nairuam kadagiti kalsada dagiti siudad ti Europa. Imutektekanyo no kasano a naaramidak ti nagserbi idiay Africa ken no kasano nga impaay ni Jehova ‘dagiti kiddaw ti pusok.’​—Salmo 37:4.

NAIPASNGAYAK idi Hunio 9, 1966, iti makin-abagatan a Francia. Siak ti buridek kadagiti pito nga annak​—dua a lallaki ken lima a babbai​—ket naaywanankami amin babaen kadagiti naayat a nagannak. Ngem adda ti naladingit a kasasaad iti biagko idi agtutuboak. Kas ken ni lolak, ni nanangko, ken ti maysa kadagiti manangko, sagsagabaek ti natawidko a sakit nga agbanag iti naan-anay a pannakabulsek.

Kas maysa a tin-edyer, naipasangoak iti diskriminasion gapu iti puli, panangidumduma, ken panaginsisingpet, a makagapu a kinagurak ti kagimongan. Gapu iti daytoy a narigat a kasasaad, immakarkami iti rehion ti Hérault. Sadiay, adda nakaskasdaaw a napasamak.

Naminsan, iti agsapa ti Domingo, dua a Saksi ni Jehova ti immay iti ridawmi. Am-ammo ida ni Nanang isu nga inawisna ida iti uneg. Inyimtuod ti maysa kadagiti babbai no malagip pay ni Nanang ti inkarina a makipagadalto iti Biblia. Nalagip dayta ni Nanang ket inyimtuodna, “Kaanotayo a mangrugi?” Immanamong a makipagadal iti kada agsapa ti Domingo, ket iti kasta nangrugi a naammuan ni Nanang “ti kinapudno ti naimbag a damag.”​—Galacia 2:14.

Pananggun-od iti Pannakaawat

Nagregget ni Nanang tapno matarusan ken malaglagipna dagiti inadalna. Gapu ta bulsek, kasapulan nga ikabesana ti amin. Nakaan-anus dagiti Saksi a nangisuro kenkuana. No maipapan kaniak, aglemmengak iti siledko kada umay dagiti Saksi, ket saak la rummuar no pimmanawdan. Ngem iti maysa a malem, nakita ken kinasaritanak ni Eugénie a maysa kadagiti Saksi. Imbagana kaniak a ti Pagarian ti Dios pagpatinggaennanto ti amin a kinamanaginsisingpet, gura, ken panangidumduma iti lubong. “Ti laeng Dios ti addaan iti solusion,” kinunana. Tinarigagayak kadi a maammuan ti ad-adu pay? Iti simmaganad nga aldaw, nangrugiak a makipagadal iti Biblia.

Baro kaniak dagiti amin a banag a naadalko. Maawatakon a ti Dios temporario laeng nga ipalpalubosna ti kinadakes iti daga gapu kadagiti nasayaat a rason. (Genesis 3:15; Juan 3:16; Roma 9:17) Naadalko pay a saannakami a panawan ni Jehova nga awanan iti namnama. Pinaraburannakami iti makapagagar a kari a biag nga agnanayon iti paraiso a daga. (Salmo 37:29; 96:11, 12; Isaias 35:1, 2; 45:18) Iti dayta a Paraiso, maisublinto kaniak ti sagut a panagkita, nga in-inut a mapukpukawko.​—Isaias 35:5.

Amin-Tiempo a Panagserbi

Idi Disiembre 12, 1985, insimbolok ti dedikasionko ken ni Jehova babaen ti bautismo iti danum, kas iti inaramid ni manangko a Marie-Claire. Di nagbayag, nagpabautisar met ni manongko a Jean-Pierre, kas iti inaramid ti patgenmi nga ina.

Iti kongregasion a nakaitimpuyogak, adda sumagmamano a regular pioneer, wenno amin-tiempo nga ebanghelisador. Naparegtaak iti rag-o ken kinagagarda iti ministerio. Simrek iti amin-tiempo a serbisio uray ni Marie-Claire, nga agsagsagaba iti sakit iti mata ken agus-usar iti suporta iti maysa kadagiti sakana. Uray ita, maparparegtaak iti naespirituan gapu iti ulidanna. Gapu iti kaadda dagiti payunir iti kongregasion ken iti pamiliak, natulonganak a maaddaan iti nasged a tarigagay a makiraman iti amin-tiempo a serbisio. Isu nga idi Nobiembre 1990, nangrugiak nga agpayunir idiay Béziers.​—Salmo 94:17-19.

Panangdaer iti Pannakaupay

Iti ministerio, natulonganak gapu iti pannakaseknan kaniak dagiti padak a payunir. Kaskasdi, pasaray makapaupay kaniak dagiti limitasionko gapu ta kayatko nga ad-adu pay koma ti maaramidak. Nagsukimatak iti Watch Tower Publications Index, a nagsapulak kadagiti pakasaritaan ti biag dagiti payunir a nagsagaba met gapu iti nakapuy a panagkita. Nasdaawak iti kaadu dagiti kasta a pakasaritaan! Dagitoy a praktikal ken makaparegta a salaysay ti nangisuro kaniak a mangipateg iti kabaelak nga aramiden ken mangawat kadagiti limitasionko.

Tapno adda mausarko para kadagiti kasapulak, nagtrabahoak nga agdalus kadagiti shopping mall a kaduak ti dadduma a Saksi. Naminsan, nadlawko nga inulit a trinabaho dagiti kakaduak dagiti lugar a nalpaskon a dinalusan. Agparang nga adu ti diak nadalusan. Napanak ken ni Valérie, maysa a payunir a mangimatmaton iti grupo dagiti agdaldalus, ket kiniddawko a prangka nga ibagana kaniak no makapadagsenak laeng iti grupo. Siaasi nga impalubosna a siak ti mangikeddeng no diak kabaelanen ti trabaho. Idi Marso 1994, nagikkatak iti trabaho a panagdalus.

Nariknak manen nga awan serserbik. Sipapasnek a nagkararagak ken ni Jehova, ket ammok a nagimdeng kadagiti ararawko. Naminsan pay a nakatulong kaniak iti dakkel ti panangadal iti Biblia ken kadagiti Nakristianuan a publikasion. Nupay kumapkapuy ti panagkitak, bumilbileg ti tarigagayko nga agserbi ken ni Jehova. Ania ti mabalinko nga aramiden?

Panaguray Sa Dagus a Panagdesision

Nagaplikarak a masanay iti Rehabilitation Center for the Blind and Visually Impaired idiay Nîmes ket nagsanayak idi agangay iti tallo a bulan. Makagunggona ti tiempo a nabusbosko sadiay. Naawatak ti kakaro ti pisikal a limitasionko ken nasursurok a pakibagayan dayta. Ti pannakitimpuyog kadagiti tattao nga agsagsagaba kadagiti amin a kita ti pisikal a depekto tinulongannak a mangbigbig a nakapatpateg ti Nakristianuan a namnamak. Uray kaskasano, addaanak iti kalat ken adda ti nabunga a maaramidak. Kanayonanna, naadalko ti Braille ti Francia.

Idi nagawidak, nadlaw ti pamiliak a dakkel ti naitulong ti pannakasanayko. Ngem ti maysa a diak magustuan ket ti puraw a sarukod a nasken nga usarek. Marigatanak a mangawat a masapul nga usarek dayta a “sarukod.” Kaykayatko ti maaddaan iti sabali a katulongan​—nalabit maysa nga aso a nasursuruan a mangigiya.

Nagkiddawak iti aso ngem naibaga nga adda atiddog a listaan dagiti agur-uray a maipaayan iti kasta. Maysa pay, kasapulan nga agimbestigar ti ahensia. Adda dagiti kasapulan sakbay a ti maysa maipaayan iti giya nga aso. Naminsan, maysa a babai a tumultulong iti asosasion para kadagiti bulsek ti nangibaga kaniak nga adda tennis club iti lokalidad a mangidonar iti giya nga aso para iti maysa a lumugar a bulsek wenno nakapuy ti panagkitana. Kinunana a napanunotna nga ipaay dayta kaniak. Awatek kadi? Nariknak a pamay-an dayta ni Jehova isu nga inawatko ti diaya. Ngem kasapulan nga urayek ti pannakaited ti aso.

Ar-arapaapek Latta ti Africa

Bayat ti panagurayko, naibaw-ing ti atensionko. Kas nadakamatko, interesadoak unay iti Africa sipud kinaagtutubok. Iti laksid ti kumapkapuy a panagkitak, bumilbileg dayta a tarigagayko, nangruna ta naammuak a nagadu ti umili iti Africa nga interesado iti Biblia ken iti panagserbi ken ni Jehova. Sakbay dayta, nadakamatko ken ni Valérie a tarigagayak ti bumisita idiay Africa. Kinayat kadi ni Valérie ti sumurot kaniak? Immannugot, ket nagsuratkami iti sumagmamano nga agsasao iti Pranses a sanga nga opisina dagiti Saksi ni Jehova idiay Africa.

Maysa a subalit ti naawatmi manipud Togo. Kasta unay ti gagarko ket kiniddawko ken ni Valérie nga ibasana dayta kaniak. Makaparegta dayta a surat, isu a kinuna ni Valérie: “No kasta, apay a dita padasen?” Kalpasan ti panangsungbatmi iti surat ti sanga nga opisina, naibilin a makikomunikarak ken ni Sandra, maysa a payunir idiay Lomé, ti kabesera a siudad. Inkeddengmi a Disiembre 1, 1998 ti petsa ti ipapanawmi.

Naidumduma, ngem nakaragragsak! Idi rummuarkami iti eroplano kalpasan nga agdisso idiay Lomé, nariknami ti bara ti Africa a kasla ules a nangbalkut kadakami. Sinabatnakami ni Sandra. Damomi a makita ni Sandra, ngem panagriknami kasla nabayagen nga aggagayyemkami. Sakbay ti isasangbaymi, nadutokan da Sandra ken ti kaduana a ni Christine kas special pioneer idiay Tabligbo, maysa a bassit nga ili iti sentro. Addaankamin iti pribilehio a makadua ida iti baro a teritoriada. Nagtalinaedkami sadiay iti agarup dua a bulan, ket idi pumanawkami, ammok nga agsubliak.

Naragsakanak iti Panagsublik

Idiay Francia, dagus nga insaganaak ti maikadua a panagdaliasatko nga agturong idiay Togo. Babaen ti tulong ti pamiliak, nayurnosko ti panagtalinaedko sadiay iti innem a bulan. Gapuna, idi Setiembre 1999, nageroplanoak manen a nagturong idiay Togo. Ngem iti daytoy a gundaway, agmaymaysaak. Panunotenyo ti danag ti pamiliak idi makitada a pumanawak a sisiak iti laksid ti limitasionko! Ngem awan ti rason tapno madanaganda. Impatalgedko kadagiti dadakkelko nga agur-uray idiay Lomé dagiti gagayyemko, a nagbalindan a kas kapamiliak.

Anian a ragsak ti agsubli iti dayta a teritoria a nagadu a tattao ti interesado iti Biblia! Iti kalsada, gagangay a makita dagiti tao a mangbasbasa iti Biblia. Idiay Tabligbo, adda dagiti agayab tapno makipatang maipapan iti Biblia. Ken anian a pribilehio ti agnaed iti nanumo a pagdagusan a kadua ti dua nga special pioneer a babbai! Naammuak ti sabali a kultura, naiduma a panangmatmat iti bambanag. Kangrunaanna, nadlawko a dagiti Kristiano a kakabsat idiay Africa ipangpangrunada iti biagda ti interes ti Pagarian. Kas pagarigan, tumabunoda kadagiti gimong uray kasapulan a magmagnada iti adu a kilometro a mapan iti Kingdom Hall. Adu met ti naadalko maipapan iti kinabara ken kinamanagpadagusda.

Naminsan, idi agawidkami kalpasan ti panangasaba, impudnok ken ni Sandra nga agamakak nga agsubli idiay Francia. Kimmaro ti panagkapuy ti panagkitak. Napanunotko ti aduan tao ken dagiti naariwawa a kalsada idiay Béziers, kadagiti agdan dagiti apartment, ken ti nagadu pay a banag a mangparparigat iti biag ti tao a nakapuy ti panagkitana. Naiduma iti dayta, natalna dagiti kalsada idiay Tabligbo nupay saan a nasemento​—saan nga aduan iti tao ken awan unay ti trapiko. Nairuamakon iti Tabligbo, isu a kasano ngatan no agsubliak idiay Francia?

Dua nga aldaw kalpasanna, nagtelepono ni Nanang tapno ipakaammona nga ur-urayennak ti eskuelaan para kadagiti aso. Maysa nga ubing pay a Labrador retriever nga agnagan Océane ti nakasagana nga agbalin a pannakamatak. Naminsan pay, naipaay ti kasapulak ken nailiwliwag ti pakadanagak. Kalpasan ti innem a bulan a naragsak a serbisio idiay Tabligbo, nagsubliak idiay Francia tapno agkitakami ken ni Océane.

Kalpasan ti sumagmamano a bulan a panagsanay, naipaaywan kaniak ni Océane. Saan a nalaka idi damo. Masapul a sursuruenmi ti agkinnaawatan. Ngem in-inut a nabigbigko a kasapulak unay ni Océane. Kinapudnona, nagbalinen ni Océane a paset ti biagko. Ania ti reaksion dagiti tattao idiay Béziers no mapasungadandak nga umasideg iti ridawda kaduak ti maysa nga aso? Managraem ken naasida. Nagbalin ni Océane a “bannuar” iti sangakaarrubaan. Yantangay adu ti di komportable no makasangoda ti maysa a bulsek, ti kaadda ti aso a kaduak ti timmulong kaniak nga agbalin a natural iti pannakisaritak maipapan iti pisikal a limitasionko. Makapabang-ar dayta kadagiti tattao ken agimdengda kaniak. Ti maipapaay nga atension ken ni Océane ti kasayaatan a pangirugiak iti saritaan.

Ti Panagkaduami ken ni Océane Idiay Africa

Diak malipatan ti Africa, isu a nagsaganaak nga agdaliasat nga agturong sadiay iti maikatlo a daras. Iti daytoy a gundaway, kaduak ni Océane. Simmurot met kaniak ti maysa nga agkabannuag nga agassawa, da Anthony ken Aurore, ken ti gayyemko a ni Caroline​—payunirda amin a kas kaniak. Idi Setiembre 10, 2000, simmangbaykami idiay Lomé.

Idi damo, adu ti maamak ken ni Océane gapu iti kinadakkelna. Idiay Lomé, manmano ti nakakita iti kasta kadakkel nga aso, yantangay babassit ti kaaduan nga aso idiay Togo. Idi nakitada nga adda talina, impapan ti dadduma a ni Océane ket narungsot nga animal a kasapulan a tenglen. Imbes a kasta, ni Océane ket nakasursuro a mangikanawa, a nakasagana a mangsalaknib kaniak maibusor iti aniaman a makitana a mamagpeggad kaniak. Ngem narikna ni Océane nga awan ti rumbeng a pagdanagan iti baro nga aglawlaw. No natalian ni Océane, madama ti trabahona​—disiplinado, responsable, agtalinaed iti sibayko. No maruk-atan, agay-ayam, naalikuteg pay no dadduma. Adu ti naragsak a panagkaduami.

Naawiskami amin nga agnaed a kadua da Sandra ken Christine idiay Tabligbo. Tapno matulongan dagiti lumugar a kakabsat a mairuam ken ni Océane, inawismi ida a sumarungkar kadakami ket inlawlawagmi ti akem ti giya nga aso, no apay a kasapulak dayta, ken no kasano ti panagtignayda iti kaaddana. Dagiti panglakayen immanamongda a kaduak ni Océane a tumabuno iti Kingdom Hall. Yantangay naidumduma daytoy nga urnos idiay Togo, maysa nga anunsio iti kongregasion ti nangilawlawag iti dayta. No maipapan iti ministerio, sako la ikuyog ni Océane no mangaramidak iti panagsarungkar ken panangyadal iti Biblia​—dagiti kasasaad a nalaklaka a maawatan ti kaaddana.

Agtultuloy a makaparagsak ti mangasaba iti daytoy a teritoria. Kanayon a matukay ti riknak gapu iti pannakaseknan dagiti naamo a tattao, nga iparangarang dagiti naasi a tignayda, kas iti kinagagarda a mangipaay iti pagtugawak. Idi Oktubre 2001, kimmuyog kaniak ni nanangko iti maikapat a panagturongko idiay Togo. Kalpasan ti tallo a lawas, nagsubli ni Nanang idiay Francia, a naragsak ken natalged ti riknana.

Agyamyamanak ken ni Jehova ta nabaelak ti nagserbi idiay Togo. Agtalekak nga agtultuloy nga ipaay ni Jehova ‘dagiti kiddaw ti pusok’ bayat nga itultuloyko nga usaren ti amin nga adda kaniak iti panagserbi kenkuana.a

[Footnote]

[Dagiti Ladawan iti panid 10]

Nabayagen nga ar-arapaapek a makita dagiti nalawa a katanapan ken makakayaw nga atap nga an-animal ti Africa

[Ladawan iti panid 10]

Kimmuyog ni Océane kadagiti panagsarungkar

[Ladawan iti panid 11]

Impalubos dagiti panglakayen nga ikuyogko ni Océane kadagiti gimong