Situtulok nga Agsaksakripisioda​—Iti Laud nga Africa

BAYAT a dumakdakkel ni Pascal iti napanglaw a lugar iti Côte d’Ivoire, tinartarigagayanna ti maaddaan iti nanam-ay a biag. Kas agdadamo a boksingero, pinampanunotna, ‘Sadinonto ngata ti pagbalinak a nalatak ken nabaknang?’ Idi agtawen iti agarup 25, impagarupna nga idiay Europa a matungpal dagiti arapaapna. Ngem gapu ta awan papelesna nga agbiahe iti sabali a pagilian, implanona ti agpa-Europa iti illegal a pamay-an.

Idi 1998, idi agtawenen iti 27, nagturong idiay Ghana, sa limmasat iti Togo ken Benin, agingga a nakagteng iti Birni Nkonni, Niger. Ita, mangrugin ti napeggad a paset ti panagdaliasatna. Tapno makapagpa-amianan, masapul a makilugan iti trak a bumallasiw iti Sahara Desert. Sa inton makadanon iti Mediteraneo, aglugan iti barko nga agpa-Europa. Dayta ti planona, ngem adda dua a napasamak idiay Niger a nanglapped kenkuana.

Umuna, naibusan iti kuarta. Maikadua, naam-ammona ti maysa a payunir nga agnagan Noé a nangyadal kenkuana iti Biblia. Natukay unay iti naadalna ket binalbaliwanna ti panangmatmatna iti biag. Dagiti namaterialan nga ambisionna ket nasuktan iti panaginteresna iti naespirituan. Nabautisaran ni Pascal idi Disiembre 1999. Kas panagyamanna ken Jehova, nagpayunir idi 2001 iti Niger​—iti mismo nga ili a nakaammuanna iti kinapudno. Ania ti nariknana maipapan iti dayta? Inyebkasna: “Daytoy ti kararagsakan a paset ti biagko!”

NARAGRAGSAK A BIAG​—ITI AFRICA

Kas ken Pascal, napaneknekan ti adu nga ad-adda a makapnek ti biag no naisentro dayta kadagiti naespirituan a kalat. Gapuna, adu a taga-Europa ti nagpa-Africa tapno makapagserbida kadagiti lugar nga addaan dakdakkel a panagkasapulan iti manangiwaragawag iti Pagarian. Kinapudnona, agarup 65 a Saksi manipud Europa​—nga agtawen iti 17 agingga iti 70​—ti immakar kadagiti pagilian iti Laud nga Africa kas iti Benin, Burkina Faso, Niger, ken Togo.a Ania ti nakatignayanda a mangaramid iti kasta a panagbalbaliw, ket ania ti imbungana?

Kinuna ni Anne-Rakel a taga-Denmark: “Dagiti nagannakko ket dati a misionero idiay Senegal. Kanayon a siraragsak nga estoriaenda ti biagda idi misioneroda pay isu a tinartarigagayak met ti kasta a biag.” Nasurok laeng a 20 ti tawen ni Anne-Rakel idi immakar idiay Togo, agarup 15 a tawenen ti napalabas. Agserserbi itan iti sign-language a kongregasion. Kasano a naparegta ti sabsabali iti iyaakarna? Kinunana: “Di nagbayag, simmaruno kaniak idiay Togo ti adingko a babai ken ti adingko a lalaki.”

Kinuna ni Aurele, maysa a naasawaan a kabsat a taga-France nga agtawen iti 70: “Idi nagretiroak, lima a tawenen ti napalabas, pampanunotek no agtalinaedak lattan idiay France bayat nga ur-urayek ti Paraiso, wenno palawaek ti ministeriok.” Pinili ni Aurele a palawaen ti ministeriona. Agarup tallo a tawenen ti napalabas, immakarda ken baketna nga Albert-Fayette iti Benin. “Ti desisionmi nga agserbi ken Jehova ditoy ti kasayaatan pay laeng nga inaramidmi,” kuna ni Aurele. “Makaparagsak met,” siiisem nga innayonna, “ta adda teritoriami iti igid ti baybay a mangipalagip kaniak iti Paraiso.”

Ti taga-France nga agassawa a da Clodomir ken Lysiane ket immakar iti Benin 16 a tawenen ti napalabas. Idi damo, mailiwda unay iti pamilia ken gagayyemda idiay France, ket madanaganda amangan no saanda a makapagbayag iti Benin. Ngem awan ti rumbeng a pagdanaganda. Naaddaanda iti adu a makaparagsak a kapadasan. Kuna ni Clodomir: “Iti 16 a tawen a kaaddami ditoy, gistay tinawen nga adda mabautisaran a yad-adalanmi iti Biblia.”

Ti agassawa a taga-France a da Sébastien ken Johanna ket immakar met iti Benin idi 2010. “Adu ti masapul nga asikasuen iti kongregasion,” kuna ni Sébastien. “Ti panagserbi ditoy ket kasla panageskuela iti napaspas a teokratiko a panagsanay!” Ania ti reaksion dagiti tattao iti ministerio? Kinuna ni Johanna: “Mawaw dagiti tattao iti kinapudno. Uray saankam a mapan mangasaba, agsaludsodda maipapan iti Biblia no addakam iti kalsada ken dumawatda kadagiti publikasiontayo.” Ania ti epekto daytoy nga iyaakarda iti relasionda kas agassawa? Kinuna ni Sébastien: “Timmibker ti relasionmi. Maragragsakanak ta agmalmalem a kaduak ni baketko iti ministerio.”

Nagpayunir dagiti agassawa a da Eric ken Katy iti makin-amianan a Benin, maysa a lugar nga awan unay matataona. Idi addada pay iti France, agarup 10 a tawenen ti napalabas, binasbasada dagiti artikulo maipapan iti panagserbi iti lugar nga addaan dakdakkel a panagkasapulan ken nakisarsaritada kadagiti agserserbi iti amin-tiempo. Daytoy ti nakatignayanda nga umakar iti sabali a pagilian, ket kasta ti inaramidda idi 2005. Nakitada ti napartak nga irarang-ay ti Benin. Kuna ni Eric: “Dua a tawen ti napalabas, adda laeng 9 nga agibumbunannag iti grupomi iti ili ti Tanguiéta; ngem 30-kami itan. Adda metten 50 aginggat’ 80 a tumabtabuno kadagiti gimong iti Domingo. Makaparagsak unay a makita ti kasta a panagrang-ay!”

PANANGAMMO KEN PANANGSANGO KADAGITI KARIT

Ania dagiti karit a nakaipasanguan dagiti immakar iti lugar nga addaan dakdakkel a panagkasapulan? Ni Benjamin nga agtawen iti 33 ket ading ni Anne-Rakel. Idi tawen 2000 idiay Denmark, adda naam-ammona a misionero a dati nga agserserbi iti Togo. Nalagip ni Benjamin: “Idi imbagak iti misionero a kayatko ti agpayunir, kinunana: ‘Ammom, mabalinmo ti agpayunir idiay Togo.’” Pinampanunot dayta ni Benjamin. Kinunana: “Awan pay 20 ti tawenko idi ngem agserserbin ti dua a manangko idiay Togo isu a nalakaak laeng a nakaakar sadiay.” Ngem adda parikutna: “Awan ammok uray maysa laeng a sao a French isu a nagrigat ti immuna nga innem a bulanko,” kinunana. Nupay kasta, nakasursuro met laeng idi agangay. Agserserbi itan ni Benjamin iti sanga nga opisina iti Benin kas paraitulod kadagiti literatura ken tumultulong iti computer department.

Da Eric ken Katy, a nadakamat itay, ket nagserbida iti foreign-language idiay France sakbay nga immakarda iti Benin. Kasano ti biag iti Laud nga Africa? Kinuna ni Katy: “Nagrigat ti sumapul iti komportable a pagyanan. No mano a bulan a nagyankami iti balay nga awanan iti koriente ken danum.” Innayon pay ni Eric: “Nagpigsa ti panagpatokar dagiti kaarrubami uray rabrabii. Masapul nga aganus ken makibagayka iti kasta a kasasaad.” Ngem agpada a kinunada: “Ti rag-o nga itden ti panagserbimi iti di pay unay nakaskasabaan a teritoria artapanna ti aniaman a rigat a nakaipasanguanmi.”

Aglima a tawenen ti napalabas, immakar iti Benin ti agassawa a taga-France a da Michel ken Marie-Agnès. Agtawenda itan iti agarup 60. Madanaganda idi damo. Kinuna ni Michel: “Adda dagiti nagkuna a mayarig ti iyaakarmi iti panaglugan iti karetilia nga idurduron ti maysa nga agkalkalantay iti tali. Talaga a nakabutbuteng dayta no dimo ammo a ni Jehova ti mangidurduron iti karetilia. Isu nga inkeddengmi ti umakar tapno ad-adda a makapagserbikami ken Jehova, ket tinulongannakami.”

NO KASANO TI AGSAGANA

Sigun kadagiti nakapadas a nagserbi iti lugar nga addaan dakdakkel a panagkasapulan, nakapatpateg nga ikabilangan dagitoy a banag: Agplanoka a nasaksakbay. Sursuruem ti makibagay. Sursuruem ti agbadyet. Agpannurayka ken Jehova.​—Luc. 14:28-30.

Kuna ni Sébastien a nadakamat itay: “Sakbay nga immakarkami ken Johanna, dua a tawen a saankam unay naggasgasto para iti paglinglingayan ken dadduma pay a di napateg a bambanag isu a nakaurnongkami.” Tapno makapagtultuloyda nga agserbi iti sabali a pagilian, tinawen nga agawidda iti Europa ket agtrabahoda iti sumagmamano a bulan tapno adda usarenda nga agpayunir idiay Benin iti sumaganad a bulbulan.

Maysa ni Marie-Thérèse kadagiti agarup 20 a babbalasang nga agserserbi iti lugar nga addaan dakdakkel a panagkasapulan iti Laud nga Africa. Drayber ti bus ti trabahona idiay France, ngem nag-leave idi 2006 tapno makapagpayunir iti Niger. Di nagbayag, nabigbigna a dayta ti biag a sapsapulenna. Kuna ni Marie-Thérèse: “Idi nagsubliak idiay France, nakisaritaak iti boss-ko a kayatko a mabaliwan ti iskediulko iti trabaho ket immanamong. Manipud Mayo aginggat’ Agosto, agtrabahoak kas drayber ti bus idiay France, ket manipud Septiembre aginggat’ Abril, agserbiak kas payunir iti Niger.”

Dagidiay ‘mangsapsapul nga umuna iti pagarian’ makapagtalekda nga ipaay kadakuada ni Jehova ti ‘amin a sabali pay a napapateg a bambanag.’ (Mat. 6:33) Ipakita dayta ti kapadasan ti maysa a balasang a taga-France a ni Saphira. Dandani 30 ti tawennan ken agserserbi kas payunir idiay Benin. Idi 2011, nagsubli idiay France tapno agurnong iti kuarta nga umanay a pangsuportana iti sabali pay a tawen (maikanem) a panagserbina idiay Africa. Kuna ni Saphira: “Aldaw idi ti Biernes, ket maudin nga aldawko iti trabaho, ngem kurang pay ti naurnongko nga usarek iti sumaruno a tawen isu a kasapulak pay ti agtrabaho iti sangapulo nga aldaw. Dua a lawasko laengen idi iti France. Nagkararagak ken Jehova ket inlawlawagko ti kasasaadko. Di nagbayag, maysa nga employment agency ti timmawag ken nagdamag kaniak no kayatko ti agtrabaho iti dua a lawas gapu ta agbakasion ti maysa nga empleadoda.” Iti dayta a Lunes, nagreport ni Saphira tapno ma-training iti trabaho ti empleado a sunuanna. Kinunana: “Nasdaawak a nakaammo a Saksi gayam ti empleado a sunuak iti sangapulo nga aldaw ket kasapulan nga agbakasion gapu ta ageskuela iti Pioneer Service School! Saan a kayat ti boss-na a palubosan malaksid no adda kasukatna. Ngem kiniddawna a tulongan ni Jehova​—kas met iti inaramidko.”

GUBUAYAN TI PUDNO A PANNAKAPNEK

Adda dagiti kakabsat a lallaki ken babbai a nakapagserbin iti adu a tawtawen iti Laud nga Africa ket nagnaeddan sadiay. Adda met dagidiay nagtalinaed sadiay iti sumagmamano a tawen sada nagsubli iti bukodda a pagilian. Ngem agingga ita, ap-apresiarenda pay laeng ti tawtawen a panagserbida iti sabali a pagilian. Nabigbigda a ti pudno a pannakapnek ket agtaud iti panagserbi ken Jehova.