Nasayaat ti Ibunga ti Naimbag a Kondukta
ITI maysa a bassit nga isla a saan nga adayo iti kosta iti abagatan ti Japan, maysa nga ina ken dagiti tallo nga ubbing nga annakna ti nangrugi a makipagadal iti Biblia kadagiti Saksi ni Jehova. Napaliiw dayta dagiti kaarrubada iti dayta a naiputputong ken konserbatibo unay a lugar ket nangrugi a liniklikanda ti ina tunggal makitada. “Ti nasaksakit ngem ti panangliklikda kaniak ket ti di nainggayyeman a panangtratoda ken ni lakayko ken kadagiti annakko,” kunana. Nupay kasta, kinunana kadagiti annakna: “Masapul nga itultuloytayo a kablaawan dagiti kaarrubatayo maigapu ken Jehova.”—Mateo 5:47, 48.
Insurona kadagiti annakna nga agbalinda a nadayaw uray inlaksid ida dagiti kaarrubada. Iti lugan, bayat ti regular nga ipapanda iti napudot nga ubbog iti lugarda, nagensayo dagiti ubbing nga agkablaaw. Apaman a sumrekda iti pasdek, kanayon a siraragsak a mangkablaaw dagiti ubbing, “Konnichiwa!”—“Naimbag nga aldawyo!” Intultuloy a kinablaawan ti pamilia ti amin a masabatda, uray no natamnay ti panangtrato kadakuada dagiti kaarrubada. Kaskasdi, di maliklikan a mapaliiw dagiti tattao ti nasayaat a kababalin dagiti ubbing.
Nagangayanna, nangrugi nga adda dagiti sumungbat met kadakuada iti “Konnichiwa.” Kalpasan ti dua a tawen, dandani amin iti ili ti sumungbaten iti kablaawda. Nasursuro pay dagiti umili ti agkikinnablaaw ken nagbalinda nga ad-adda a nainggayyeman iti maysa ken maysa. Ti bise mayor tinarigagayanna a padayawan dagiti ubbing gapu iti pasetda iti daytoy a panagbalbaliw. Ngem impatalged ti ina nga ar-aramiden laeng dagiti annakna no ania ti rumbeng nga aramiden dagiti Kristiano. Kalpasanna, iti maysa a pasalip iti panagbitla para iti intero nga isla, insalaysay ti maysa kadagiti annakna no kasano a ni nanangda sinanayna ti pamiliada a sidadayaw a mangkablaaw aniaman ti reaksion dagiti sabsabali. Nagun-od ti anakna ti umuna a premio ken nayimprenta ti bitlana iti pagiwarnak ti ili. Ita, maragsakan unay ti pamilia gapu kadagiti nagsayaat nga imbunga ti panangsurotda kadagiti Nakristianuan a prinsipio. Ti panangiranud iti naimbag a damag kadagiti sabsabali ket adayo a nalaklaka no nainggayyeman dagiti tattao.